Sak 56

Bõe n dẽgemd neda?

KƖƖSG ning a Zezi sẽn da paamdã ra tara yãngr n paasdẽ. A karen-biis wʋsg ra basame n ka le tũud-a ye. Sẽn paase, Zʋɩf rãmbã sẽn be Zide wã ra baoodame n na n kʋ-a, wa b sẽn da rat n kʋ-a a sẽn da wa n be Zerizalɛm yʋʋmd 31 Pakã.

Yʋʋmd 32 Pakã taame masã. Wa Wẽnnaam tõogã sẽn da baood tɩ b maanã, wõnda a Zezi kẽnga Pakã Zerizalɛm. La a maana rẽ ne gũusgu, a sẽn da mi tɩ b rat n kʋ-a lame wã yĩnga. Rẽ poore a leba Galile.

Tõe tɩ Fariziẽ rãmbã la Gʋlsdbã sẽn da wa n wa a Zezi nengẽ wã t’a ra bee Kapɛrnawom. B ra baooda bʋʋm n na n dõd-a t’a kɩɩsa tũudmã noya. B sok-a lame: “Yaa bõe tɩ yãmb karen-biisa sãamd kãsem dãmbã minungu? Tɩ bõe, bãmb ka nudgd b nus n dɩ ye.” Woto ka bũmb Wẽnnaam sẽn yeel tɩ b maan ye, la Fariziẽ rãmbã ra getame tɩ ned sã n ka tũ rog-n-mikã, n pekd a nus n tɩ tãag kãn-tɩɩga, yaa beeg kãsenga.

B sẽn dõd a Zezi wã, a pa leok-b ye, a wilg-b lame tɩ bãmb mengã kɩɩsda Wẽnnaam Tõogã ne wẽnem la ne yamleoogo. “La yãmba, yaa bõe tɩ yãmb sãamd Wẽnnaam tõoga ne yãmb mens minungu?” Woto la a Zezi sok-ba. “Tɩ bõe, Wẽnnaam yeelame: Waoog f ba la f ma. Ned sã n paoog a ba ne a ma, yẽ sɩbgr na n yɩɩ kũum. La yãmb yetame tɩ ned sã n yeel a ba bɩ a ma: Mam kõo Wẽnnaam bũmb ninga mam sẽn da na n kõ yãmba, ka tɩlae t’a waoog a ba bɩ a ma ne bõn-kãng ye.”

Sɩda, Fariziẽ rãmbã ra zãmsda nebã tɩ ligdi, arzɛka, bɩ bũmb a to f sẽn dɩk n kõ Wẽnnaam yaa wẽnd-doogã n so, la tɩ rẽ yĩnga, b ka tõe n dɩk bõn-kãng n maan bũmb a to ye. Baasg zãngã bũmbã b sẽn dɩk n kõ wã paada a soabã nugẽ. Woto, biig tõe n yeelame bal t’a ligd bɩ a tarem yaa “korbã,” sẽn dat n yeel tɩ kũun b sẽn dɩk n kõ Wẽnnaam bɩ wẽnd-doogã. A sã n maan woto, a basdame n ka tʋkd zɩɩb ning sẽn zao a zugã, sẽn yaa sõng a roagdb sẽn kʋʋle, sẽn tõe n tar zu-loe-kãsemsã ye.

Ne bʋʋm, a Zezi sũurã puuga ne Fariziẽ rãmbã sẽn golemd Wẽnnaam Tõogã, t’a yeele: “Ne yãmb minungã yãmb maanda Wẽnnaam tõog tɩ lebg zaalem. Zãmb rãmba, a Ezai togsa bãngr-goam ne yãmb yelle n yeele: ‘Nin-kãensã waoogda maam ne no-bɩmse, la b sũurã zãra ne maam. Bãmb sẽn waoogd maama yaa zaalem, bãmb zãmsda neba ninsaalb tõod bala.’ ”

Tõeeme tɩ kʋʋngã ra targame, sẽn na yɩl n bas tɩ Fariziẽ rãmbã kolg n gom ne a Zezi. Masã a Zezi sẽn zab-b sõma tɩ b ka le tõe n leok tɩ bũmbã, a leb n yeela kʋʋngã tɩ b kolge. T’a yeel-b woto: “Bɩ yãmb fãa kelg maam la y bãnge. Bũmb ka be sẽn tõe n kẽ ninsaal pʋgẽ n maan t’a lebg rẽgd ye, yaa bũmb ninga sẽn yit ninsaal pʋgẽ n maand yẽ t’a lebg rẽgdo.”

Kaoosg zugẽ, a Zezi wa n tɩ kẽe roogẽ, t’a karen-biisã sok-a woto: “Yãmb bãngame tɩ yãmb goama zaba Fariziẽ dãmba bɩ?”

A Zezi leoka woto: “Bõn-bɩtg ninga fãa mam [saasẽ] Ba sẽn ka sele, b na võog-a. Bɩ y bas bãmba, bãmb yaa zoense sẽn tɛt zoense. Zoang sã n tɛ zoanga, bãmb b yiibã fãa na n lʋɩɩ bokẽ.”

Tʋm-tʋmdb a taabã fãa yʋʋr yĩnga, a Pɩɛɛr soka a Zezi n dat n paam vẽnegr bũmb ning sẽn dẽgemd ninsaalã wɛɛngẽ. La wõnda sokrã linga a Zezi, t’a yeel woto: “Yãmb yam me ket n ka vẽneg la? Yãmb ka mi tɩ bũmb nins fãa sẽn kẽed noorẽ kẽeda pʋgẽ n yaool n kẽed zĩ-solgdsẽ la? La bũmb ninga sẽn yit noorẽ yita sũurẽ, la yaa bõn-kãng n maand ned t’a yɩ rẽgdo. Tɩ bõe, tags-wẽnse la nin-kʋʋbo la yoob buud fãa la wagdem ne ziri la kãnegre yita sũur pʋgẽ. Yaa bãmb n maand ned t’a yɩ rẽgdo. La tɩ rɩ ne nus sẽn ka nudgi, yõ wã ka maand ned t’a yɩ rẽgd ye.”

Kaanẽ, a Zezi ka yet tɩ tõnd ra tũ sagls nins sẽn tɩ loe ne yɩlemdã ye. A ka yet tɩ ned ra pek a nus n yaool n segl bɩ a rɩ rɩɩb ye. A ra ningda tũudmã taoor dãmb taal b pʋ-likã yĩnga. Ne sɩlem, b ra baooda bʋʋm n na n gil Wẽnnaam no-tɩrsã, n pẽdgdẽ tɩ b tũ minung sẽn kɩɩsd Gʋlsg Sõamyã. N-ye, yaa tʋʋm-wẽns n dẽgemd neda, la a Zezi wilgame tɩ tʋʋm-kãens yita ned sũurẽ. Zã 7:1; Tõodo 16:16; Matɩe 15:1-20; Mark 7:1-23; Yikri 20:12; 21:17; Ezai 29:13.

▪ Kɩɩs-bʋg la a Zezi paamd masã?

▪ Fariziẽ rãmbã ninga a Zezi taal-bʋgo, la sã n yaa ne a Zezi, wãn to la bãmb mengã kɩɩsd Wẽnnaam Tõogã ne yamleoogo?

▪ A Zezi wilgame tɩ yaa bõe n dẽgemd neda?