D teenda Rĩungã tʋʋmd d babgẽ wã, la dũniyã gill zugu

A ZEOVA KASET RÃMBÃ moona koɛɛgã “hal n tãag dũniyã zĩig ning sẽn zãr n yɩɩdã,” sẽn na yɩl n pids gomd ning a Zeezi sẽn togs yaoolem wakatã wɛɛngẽ wã. (Tʋʋ. 1:8; Mat. 24:14) Sẽn na yɩl n maan dẽ, b kẽesda b sẽkã la b pãngã koɛɛgã mooneg pʋgẽ ne yamleoogo. B lʋɩɩsda Wẽnnaam Rĩungã taoore, n teeg a Zeova sẽn na yɩl t’a sõng bãmb sẽn yaa a tʋmd-n-taasã. (Mat. 6:25-34; 1 Kor. 3:5-9) Tʋʋmdã sẽn womd biis ninsã wilgda vẽeneg tɩ b tata a Zeova yam, la t’a ningd-b-la barka.

RĨUNGÃ TƲƲMD TEELG DŨNIYÃ GILL ZUGU

² Nebã sẽn ne tõnd sẽn moond to-to wã, la b ne tõnd sẽn pʋɩt Biibl-dãmb la sɛb sẽn tik Biiblã zug n pa reegd ligdã, kẽer sokdame yaa: “B maanda wãn n tõogd n maand woto fãa?” B bee bʋʋm. Sẽn na yɩl n ẽmpirim la b yiis Biibl-dãmbã ne sɛbã baooda ligd wʋsgo. Yɩl n me Betɛll-dãmb la b ges b yell me baooda ligd wʋsgo. Leb n yaa be la sẽn ẽmpirimd-b sɛbã, sẽn get-b koe-moonegã yellã la sẽn tʋmd-b tʋʋm a taab sẽn na yɩl tɩ koɛɛgã mooneg kẽng taoorã be-yã. Sẽn paase, tigims sull yel-gɛtbã, misioneer-dãmbã, zall so-pakdbã la neb a taab sẽn kẽes b mens zãng Wẽnnaam tʋʋmdã pʋgẽ segd n paama sõngre, sẽn na yɩl n tõog n kell n tʋm b tʋʋmdã. Vẽenega, yɩl n moon koɛɛgã rũndã-rũndã tõnd babgẽ wã wall dũniyã gill zug baoodame tɩ b yiis ligd wʋsgo. Ligd-kãng fãa yita yɛ?

³ Neb nins sũy sẽn noom ne a Zeova Kaset rãmbã tʋʋmdã kõta yamleoog kũun n na n teel tʋʋmdã sẽn tʋmd dũniyã gill zugã. La yaa a Zeova Kaset rãmbã mens n teend tʋʋmdã n yɩɩda. Sãnda toonda yamleoog kũun filiyall ning sẽn get koe-moonegã yell b tẽngẽ wã. B wilgdame tɩ b yaa kõatba, wa pĩnd wẽndẽ wẽnd-tũudb sẽn kõ bũmb toor-toor ne yamleoog n teel a Zeova roogã meebã. (Yik. 35:20-29; 1 Kib. 29:9) Neb kẽer gʋlsda sɛb n tik b nug n wilg tɩ b sã n wa kae, b bũmb ning na n lebga a Zeova Kaset rãmbã siglgã rẽnda. Tigimsi, tigims sul la neb n mi n kõ kũun bilf me. Yaa kũun-kãens sẽn naag taabã n sõngd tɩ koɛɛgã ket n moondẽ wã.

⁴ A Zeova Kaset rãmbã getame tɩ b sẽn paam n tõe n kõ ligd la bũmb a taab n teel koɛɛgã moonegã yaa zu-zẽkre. A Zeezi ne a karen-biisã ra tara ligd koglgo, n yãkd be n maand depãens-rãmba. (Zã 13:29) Biiblã wilgame tɩ pagb n da teend a Zeezi ne a karen-biisã. (Mark 15:40, 41; Luk 8:3) Neb nins sẽn da rat ne b sũy fãa n teel koɛɛgã moonego, la sẽn da rat n kẽes b toog koɛɛgã mooneg pʋgẽ wã sẽn kõ tẽn-tʋmd a Poll kũun ne yamleoogã, a sak n deega ne sũ-noogo. (Fili. 4:14-16; 1 Tes. 2:9) A Zeova Kaset rãmbã rɩkda pĩnd wẽndẽ nin-kãensã togs-n-taare, n moond koɛɛgã ne yẽesem, la b kõt kũun ne yamleoogo. Woto sõngdame tɩ neb nins sũy sẽn yaa tɩrsã tõe n paam “vɩɩm koom zaalem.”—Vẽn. 22:17.

TIGINGÃ YELL GESGO

⁵ Yaa yamleoog kũunã me la b yãkd n maand tigingã depãens-rãmba. Tigissã sasa b pa pɩʋʋgd ne lepr ye. B leb n pa yãk ligd sõor takɩ ned fãa sẽn segd n kõ, wall b moond n kot ligd ye. B ninga kogend tigissã zĩisẽ, tɩ ned kam fãa tõe n ning kũun “wa a sẽn tags a sũurẽ.”—2 Kor. 9:7.

⁶ Sẽn yɩɩd fãa ligdã b sẽn kõtã yaa Rĩungã roog depãens-rãmb la a yell gesg yĩnga. Kãsem-dãmbã sull tõe n yãka yam n toond ligd filiyall ning sẽn get koɛɛgã mooneg yell b tẽngẽ wã, sẽn na yɩl n teel tʋʋmdã dũniyã gill zugu. Nand tɩ b maan dẽ, b segd n bao n bãnga tigingã neb sã n sakame. Tigims wʋsg maanda woto, n kõt kũun wakat fãa n teend tʋʋmdã dũniyã gill zugu. Nebã fãa sã n tẽegdẽ tɩ wakat ninga b segd n yiisa ligd tigingã yĩnga, pa na n yɩ tɩlɛ tɩ b wae n tẽegd-b rẽ ye.

LIGDÃ YELL GESGO

⁷ Tigsg fãa poore, saam-biis a yiib n vaagd ligdã sẽn be kogendẽ wã n sõde, n gʋls a sõorã n bĩngi. (2 Rĩm. 12:9, 10; 2 Kor. 8:20) Kãsem-dãmbã sull siginda yɛlã ligdã bĩngr wɛɛngẽ, n tãag wakat ning b sẽn na n dɩk n tool filiyallã, wall b yãk n maan tigingã depãens-rãmba. Saam-biig ning sẽn get ligdã yellã gʋlsda sebr kiuug fãa sẽn na yɩl n togs tigingã neb ligdã gɛɛla. Kiuug a tãab fãa, kãsem-dãmbã sull yel-gɛt kɩtdame tɩ b vaees gɛɛlã sɛb n ges bũmb fãa sã n maana sõma.

TIGIMS SULLÃ DEPÃENS-RÃMBA

⁸ Yaa tigims sull fãa saam-biis sẽn kõt kũun ningã la b yãkd n maan tigims sull tigis-kãsemsã depãens-rãmba, la tigims sullã depãens-rãmb a taaba. B ningda kogend tigis-kãsemsã zĩisẽ, tɩ tigims sullã neb tõe n ning ligd n teel tigims sullã. Sẽn paase, sẽn na yɩl n maan depãens-rãmb a taaba, tigimsã kõta ligd wakat a taaba.

⁹ Tigims sull fãa tog n kõo ligd sẽn sekd tigims sullã depãens-rãmbã, tɩ sã n kell bɩ b tool sẽn na yɩl n teel tʋʋmdã sẽn tʋmd dũniyã gill zugã. La ligd ning tigims sullã sẽn tar a kõntẽ wã sã n pa sek b na yãk n maan tigis-kãseng depãens-rãmba, wall b segl tigis-kãseng sẽn wate, wala makre, n luwaas zĩig tigis-kãsengã yĩnga, tigims sull yel-gɛtã tõe n kɩtame tɩ b tẽeg tigimsã neb tɩ d sẽn paam n tõe n kõ ligdã yaa zu-zẽkre. Kãsem-dãmb sull fãa na n yẽsa ne taab rẽ wɛɛngẽ, n ges b tigingã sẽn tõe n kõ ligd sõor ning n teel tigims sullã. Rẽ poore, b maanda rezolisiõ tɩ tigingã neb sã n sak bɩ b yaool n tool ligdã.

¹⁰ Ligd zu-loɛɛg sã n wa beẽ tɩ yaa tɩlɛ tɩ tigims sullã kãsem-dãmb kẽes b toogo, b maanda tigsg tigims sullã kãsem-dãmb yĩnga, tigims sull tigis-kãseng sasa. B sã n dɩk sard n na n maan depãens tɩ pa tigims sullã depãens-rãmb nins b sẽn mi n maandẽ wã, b segd n maana rezolisiõ n bãng kãsem-dãmbã sã n sakame. Tigims sullã sã n wa na n maan depãens a woto buud fãa, b gʋlsda ligd ning b sẽn na n yiisã n wilg kãsem-dãmbã, tɩ b togs b sã n sakame.

¹¹ Wakat-wakate, b yãkda ned t’a vaees tigims sullã gɛɛlã sɛb n ges bũmb fãa sã n maana sõma.

NAONG RÃMBÃ YELL GESGO

¹² Bũmb a ye sẽn kɩt t’a Zeezi ne a karen-biisã ra tar ligd koglgã yaa sẽn na n yãkd n sõngd naong rãmbã. (Mark 14:3-5; Zã 13:29) Hal n tãag rũndã, kiris-nebã ket n maanda woto, bala a Zeezi yeelame: “Naong rãmbã bee ne yãmb wakat fãa.” (Mark 14:7) Wãn to la a Zeova Kaset rãmbã maand rẽ rũndã-rũndã?

¹³ Wakat ninga, tigingã neb kẽer tõe n data sõngr b yʋʋmã sẽn vẽsg yĩnga, b sẽn yaa koms-rãmb yĩnga, wall zu-loees a taab sẽn yɩɩd b pãng yĩnga. Sã n wa yaa woto, b zagsã rãmba, neb b sẽn kĩ ne wall neb a taab sã n bãng tɩ b rata sõngre, b tõe n sõng-b lame. Rẽ zemsa ne tẽn-tʋmd a Zã sẽn yeel bũmb ningã. A yeelame: “Ned ning sẽn tar dũni-kãngã paoongo, n yã t’a saam-biig rat sõngr t’a baas n zãgs t’a kõn zoe a nimbãanega, Wẽnnaam nonglmã na n yɩɩ wãn n zĩnd nin-kãng pʋgẽ? Kom-bõonego, tõnd pa segd n nong taab ne no-goam wall ne noor ye. D segd n nonga taab ne tʋʋma, la ne sɩda.” (1 Zã 3:17, 18; 2 Tes. 3:6-12) Tũudum hakɩɩkã neb segd n sõngda b tẽed-n-taas nins sẽn dat sõngrã.—Zak 1:27; 2:14-17.

¹⁴ Pipi sebr ning tẽn-tʋmd a Poll sẽn tool a Tɩmote wã pʋgẽ, a wilga b sẽn segd n sõng sẽn dat-b sõngrã to-to. A sẽn kõ sagls ninsã bee 1 Tɩmote 5:3-21. Sẽn yɩɩd fãa, yaa kiris-ned fãa n segd n ges a zak neb yelle. Yaa sẽn kʋʋl-bã la koms-rãmbã kamba, b yagens wall neb nins sẽn kĩ ne-bã n segd n sõngd-ba. Wakat ninga, sẽn dat-b sõngrã tõe n paama sõngr goosneema wã nengẽ wall sigls a taab nengẽ. Sã n yaa woto, neb nins sẽn kĩ ne-bã wall neb a taab tõe n sõng-b lame n maan demand sẽn na yɩl tɩ b paam sõngrã. Yell ning tõe n wa kɩtame tɩ lebg tɩlɛ tɩ tigingã tõr sõng d tẽed-n-taas sẽn sɩng n tũud a Zeova hal sẽn kaoose, n wa rat sõngre. Neb a woto sã n pa tar zak rãmb wall neb b sẽn kĩ ne sẽn tõe n sõng-ba, tɩ b pa tõe n paam sõngr goosneema wã siglg nengẽ me, kãsem-dãmbã sull tõe n yẽsa ne taab n bãng tigingã neb sẽn tõe n maan n sõnge. Kiris-nebã getame tɩ b sẽn paam n tõe n sõng neb nins sẽn dat sõngrã ne b paoongã yaa zu-zẽkre.

¹⁵ Zaba, tẽn-digimdgu, sa-bɛda, kom wall sabab-wẽns a taab sẽn wae rũndã-rũndã wã tõe n kɩtame tɩ d tẽed-n-taas wʋsg wa rat sõngre. (Mat. 24:7-9) Tiging ning pʋgẽ b sẽn be wã neb tõeeme n pa tar sẽn sek b na sõng-b ye. Sã n yaa woto, Siglgã taoor lʋɩtb Sull kõta saam-biis sẽn be zĩis a taab sagls sẽn na yɩl tɩ b tɩ sõnge. Yɩɩ woto la Aazimineer saam-biisã maan n sõng Zide saam-biisã tɩ b paam rɩɩb kom wakate. (1 Kor. 16:1-4; 2 Kor. 9:1-5) D sã n dɩkd b togs-n-taare, d wilgda d tẽed-n-taasã tɩ d nong-b lame, la d wilgdẽ me tɩ d yaa Kirist karen-biis hakɩɩka.—Zã 13:35.

SƐBÃ YELL GESGO

¹⁶ Sẽn na yɩl tɩ Rĩungã koɛɛgã ta zĩis wʋsgo, yaa tɩlɛ tɩ d paam Biibl-dãmb la sɛb sẽn tik Biiblã zugu. Naoor wʋsgo, kãsem-dãmbã sull yãkda kãsem-sõngd t’a get sɛbã yell tigingã pʋgẽ. Saam-biis nins b sẽn yãk tɩ b get sɛbã yellã pa reemd ne b tʋʋmdã ye. B sõta sɛbã wakat-wakat sẽn na yɩl n bãng b sẽn segd n kos b rãmbã, tɩ tigingã neb tõe n paamd sɛb nins b sẽn datã.

¹⁷ Tõnd sẽn dɩk d mens n kõ Wẽnnaam n yaa kiris-nebã, d miime tɩ d sẽkã, d yamã, d pãngã, d minimã la d tarmã, la baa tõnd vɩɩmã meng yaa Wẽnnaam kũuni, tɩ d segd n tall n tʋm a tʋʋmdã. (Luk 17:10; 1 Kor. 4:7) D sã n tʋmd ne bũmb nins fãa d sẽn tarã sõma, d wilgdame tɩ d sɩd nonga a Zeova. Tõnd raab yaa d waoog a Zeova ne d bõn-sõma wã, n miẽ tɩ d sã n kõ-a bũmb ne d sũur fãa d sẽn nong-a wã yĩnga, noom-a lame. (Yel. 3:9; Mark 14:3-9; Luk 21:1-4; Kolo. 3:23, 24) A Zeezi yeelame: “Yãmb deega zaalem, bɩ y kõ zaalem.” (Mat. 10:8) Tõnd sẽn kẽesd d pãngã la d tarmã a Zeova tʋʋmdã pʋgẽ wã, d paamda sũ-noog wʋsgo.—Tʋʋ. 20:35.