Yaa fãagrã daar la woto!
“Gese, masã yaa bark wakate. Gese, masã yaa fãagr daare.”—2 KORẼNT DÃMBA 6:2.
1. Bõe n yaa tɩlae sẽn na yɩl n ta Wẽnnaam la Kirist yam?
A ZEOVA yãka bʋ-kaoor daar ãdem-biisã yĩnga. (Tʋʋma 17:31) D sã n dat t’a yɩ fãagr daar n kõ-do, d segd n taa a yam, la d ta a Zezi Kirist sẽn yaa Bʋkaood ning a sẽn yãkã yam. (Zã 5:22) Ta b yam a woto baoodame tɩ d tall manesem sẽn zems ne Wẽnnaam Gomdã la tẽeb sẽn tusd tõnd tɩ d sõng neb a taabã tɩ b yɩ a Zezi karen-biis hakɩka.
2. Bõe yĩng tɩ ãdem-biisã zãag ne Wẽnnaam?
2 Yel-wẽndã b sẽn dog ne wã yĩnga, ãdem-biisã zãra ne Wẽnnaam. (Rom dãmba 5:12; Efɛɛz rãmba 4:17, 18) Woto yĩnga, neb nins tõnd sẽn moondã tõe n paama fãagre, b sã n lebg n paam zems-n-taar ne-a bala. Tʋm-tʋmd a Poll wilga rẽ vẽeneg a sẽn da waa n gʋlsd kiris-nebã sẽn be Korẽntã. Bɩ d vaees 2 Korẽnt dãmba 5:10–6:10 n ges a Poll sẽn yeel bũmb ning bʋ-kaoorã, lebg n paam zems-n-taar ne Wẽnnaamã la fãagrã wɛɛngẽ.
“Tõnd ket n gomdame tɩ nebã sakd n deegdẽ”
3. Wãn-wãn la a Poll ra ‘ket n gomd tɩ nebã sakd n deegdẽ,’ la bõe yĩng tɩ d segd n maan woto rũndã-rũndã?
3 A Poll rɩka bʋ-kaoorã n tɩ loe ne moonegã a sẽn waa n gʋls tɩ: “Yaa tɩlae tɩ tõnd fãa yals Kirist bʋʋd geer taoore, tɩ ned kam fãa reeg sẽn zems a tʋʋma a sẽn da maan a yĩnga pʋgẽ, a sã n yaa sõama wala a sã n yaa wẽnga. Tõnd sẽn zoet Zusoaba yĩnga, tõnd baoodame tɩ sagl nebã n tõoge [“gomdame tɩ nebã sakd n deegdẽ,” NW ].” (2 Korẽnt dãmba 5:10, 11) Tʋm-tʋmdã ra “ket n kɩtdame tɩ nebã sakd n deegdẽ,” ne a sẽn da moond koe-noogã. Yaa wãn to yẽ ne tõndo? D sẽn be yɛl siglg wẽng kãngã saab taoorã yĩnga, d segd n maana d sẽn tõe fãa sẽn na yɩl n tɩ neb a taabã sak n gãng zĩ-longds nins sẽn yaa tɩlaeyã sẽn na yɩl n paam a Zezi lohorem, a sã n na n wa kao bʋʋdã, la b ta fãagrã Yẽgr sẽn yaa a Zeova Wẽnnaamã yam.
4, 5. a) Bõe yĩng tɩ d pa segd n zẽk d mens d sẽn pids bũmb nins a Zeova tʋʋmdã pʋgẽ wã yĩnga? b) Maana wãn t’a Poll zẽk a zug “Wẽnnaam yĩnga”?
4 Baasg zãnga Wẽnnaam sã n ninga tõnd ministɛɛrã bark bɩ d ra zẽk d mens ye. Korẽnte, kẽer da wuka b mense, bɩ b zẽka b mens roap a taab yĩnga, tɩ rẽ wa ne welsg tigengã pʋgẽ. (1 Korẽnt dãmba 1:10-13; 3:3, 4) A sẽn gomd yel-kãngã yelle, a Poll gʋlsame: “Tõnd ka le wilgd yãmb tõnd zemsg ye; la tõnd kõta yãmb weer tɩ y maan sũ-noog [“zẽk y zut,” NW ] tõnd yĩnga, tɩ yãmb tõe n leok neb nins sẽn maand sũ-noog ne nin sẽn ne la ka sũur dẽndã. Woto yĩnga, mam sã n zʋbsdẽ, yaa Wẽnnaam yĩnga; la mam sã n ka zʋbsdẽ, yaa yãmb sõngr yĩnga.” (2 Korẽnt dãmba 5:12, 13) Tɩtaam dãmbã toor da kae ne tigengã zems-n-taar la a tẽeb yɩ-neer ye. B ra rat n zẽka b mens ne nif sẽn ne, walla tɩ b sõng b tẽed-n-taasã tɩ b bɩɩs sũ-sõms Wẽnnaam taoore. Woto yĩnga, a Poll lenga tigengã n yeel woto rẽ poore: “Ned ninga sẽn zẽkd a zugu, bɩ a zẽk a zug a Zeova yĩnga.”—2 Korẽnt dãmba 10:17, NW.
5 A Poll mengã pa zẽk a zug sɩda? Kẽer tõe n tagsame t’a maana woto ne goam nins a sẽn yeel a sẽn yaa tʋm-tʋmdã wɛɛngẽ. La a ra segd n zẽka a zug “Wẽnnaam yĩnga.” A zẽka a zug poeer nins sẽn wilgd t’a yaa tʋm-tʋmdã, sẽn na yɩl n tɩ Korẽnt dãmbã ra bas a Zeova ye. A Poll yeela woto sẽn yɩl n tɩ b lebg n wa Wẽnnaam nengẽ, bala ziri tʋm-tʋmdb n da wẽnegd-b n kẽngd bab-wẽngẽ wã. (2 Korẽnt dãmba 11:16-21; 12:11, 12, 19-21; 13:10) La a Poll ra pa baood wakat fãa n na n dɩ yʋʋr ned fãa taoor ne yɛl nins a sẽn tõog n pidsã ye.—Yelbũna 21:4.
Kirist nonglmã tusda yãmb bɩ?
6. Wãn-wãn la Kirist nonglmã segd n mad tõndo?
6 A sẽn yaa tʋm-tʋmd hakɩka, a Poll zãmsa neb a taabã a Zezi yao-n-dɛɛk maoongã wɛɛngẽ. Rẽ talla pãn-tusdg kãseng a Poll vɩɩmã zugu, bala a gʋlsame: “Kirist nonglem n so [“tusd,” NW ] tõndo, tõnd sẽn mi sɩda tɩ yembr sã n ki neba fãa yĩnga, dẽ, fãa yaa kũum. Bãmb kii neba fãa yĩnga, tɩ neb nins sẽn vɩ wã kõn vɩ b mens yĩng yɛs ye, la b na vɩ sẽn ki-a bãmb yĩng n yaool n vʋʋga yĩnga.” (2 Korẽnt dãmba 5:14, 15) Ad sɩd yaa nonglem kãseng la a Zezi wilg-yã, a sẽn kõ a vɩɩmã tõnd yĩngã! Sɩd-sɩda rẽ segdẽ lame n yɩ pãn-tusdg tõnd vɩɩmã pʋgẽ. Mi-beoog ne a Zezi, a sẽn kõ a vɩɩmã tõnd yĩngã segdẽ lame n tus tõnd tɩ d tʋm ne yẽesem, fãagr ning a Zeova sẽn tũnug ne a Biribl-nongrã n kõ wã koe-noogã mooneg pʋgẽ. (Zã 3:16; mak-y ne Yɩɩl Sõamyã 96:2.) “Kirist nonglem” tusda yãmb tɩ y kẽes y meng ne yẽesem Rĩungã mooneg la karen-biisã maaneg tʋʋmd pʋgẽ bɩ?—Matɩe 28:19, 20.
7. ‘Ra ges ned wa sẽn zems ninsaal tagsg’ rat n yeelame tɩ bõe?
7 B sẽn dɩkd b vɩɩmã n tʋmd ne manesem sẽn wilgd tɩ b tara mi-beoog ne Kirist sẽn maan bũmb ning b yĩngã, sẽn zae-bã ‘ka vɩ b mens yĩng yɛs ye, la b vɩɩ yẽ yĩnga.’ A Poll paasdame tɩ: “Woto, sẽn sɩng masã, tõnd ka get ned wa sẽn zems ninsaal tagsg ye; la tõnd sã n da ges Kirist wa sẽn zems ninsaal tagsgo, masã tõnd ka na n ges bãmb woto yɛs ye.” (2 Korẽnt dãmba 5:16) Kiris-nebã pa segd n ges nebã wa sẽn zems ninsaal tagsg ye, tõe tɩ yaa b sẽn na n getẽ tɩ Zʋɩf rãmbã yɩɩda Buzẽms nebã bɩ tɩ arzɛk rãmbã yɩɩda naong rãmbã. Sẽn zae-bã “ka get ned wa sẽn zems ninsaal tagsg ye,” bala yaa b tẽebã zems-n-taar ne b tẽed-n-taasã n tar yõodo. Neb nins sẽn ‘ges Kirist wa sẽn zems ninsaal tagsgã’ ra pa le yaa ninsaalb nins sẽn sɩd yã a Zezi, a sẽn da waa n be tẽng zugã ye. Baa neb kẽer sẽn tall saagr ne Mesi wã sã n da reng n gesa Kirist wala ninsaan-zaalga, b ra pa segd n ket n get-a woto yɛs ye. A kõo a yĩngã wala yao-n-dɛɛka, la b vʋʋg-a-la wala vʋʋsem sẽn kõt vɩɩm. A taab sẽn vʋʋg n paam yĩngr vɩɩmã ra na n basa b yĩn-nemsã n pa tol n paam n yã a Zezi Kirist yĩn-nems pʋgẽ ye.—1 Korẽnt dãmba 15:45, NW, 50; 2 Korẽnt dãmba 5:1-5.
8. Wãn-wãn la neb wa n zĩnd ‘zems-n-taar pʋgẽ ne Kirista’?
8 A sẽn ket n gomd ne sẽn zae-bã, a Poll paasdame: “Ned sã n tũud [“be zems-n-taar pʋgẽ ne,” NW ] Kirist, yẽ yaa nin-paalga, bõn-kʋda loogame, gese, bũmb fãa lebga paalse.” (2 Korẽnt dãmba 5:17) Zĩnd “zems-n-taar pʋgẽ ne Kirist” rat n yeelame tɩ d yɩ yembr ne-a. (Zã 17:21) Zems-n-taar kãng nedã sẽn tarã sɩnga wakat ning a Zeova sẽn tall-a n tees a Biriblã, la a kɩt t’a soabã rog ne vʋʋsem sõngã. Wala Wẽnnaam biribl sẽn dog ne vʋʋsmã maasem, a ra yaa “nin-paalga,” ne saagr sẽn yaa lagem ne Kirist yĩngr Rĩungẽ wã. (Zã 3:3-8; 6:44; Galat dãmba 4:6, 7) Kiris-neb a woto sẽn zaeyã paama tʋʋmd zu-noog kãsenga.
“Lebs-y n zems ne Wẽnnaam”
9. Bõe la Wẽnnaam maan n kɩt tɩ zems-taab ne yẽ tõe n zĩndi?
9 Ad a Zeova maana “nin-paalga” lohorem wʋsgo! A Poll yetame: “La bũmb fãa yita Wẽnnaam nengẽ, sẽn kɩt tɩ tõnd lebs n paam zems-n-taar ne yẽ mengã ne Kirist maasmã, la a kõo tõnd lebs-n-zems-taab tʋʋmdã, sẽn dat n yeele, tɩ ne Kirist maasem Wẽnnaam da lebsd n zemsda dũni ne yẽ menga, n pa geelgd b beegrã ye, la a bobla tõnd lebs-n-zems-taab gomdã.” (2 Korẽnt dãmba 5:18, 19, NW ) A Ãdem beegrã tɛka ãdem-biisã zãaga b mens ne Wẽnnaam. La ne nonglem, a Zeova rɩka sard n na n pak lebg-n-zems-taab sor n tũnug ne a Zezi yao-n-dɛɛkã.—Rom dãmba 5:6-12.
10. Ãnd dãmb la a Zeova bobl zems-taabã tʋʋmde, la bõe la b maan sẽn na yɩl n pids-a?
10 A Zeova bobla sẽn zae-bã zems-taab tʋʋmdã, rẽ n so t’a Poll ra tõe n yeele: “Woto yĩnga tõnd yaa ãmbasadɛɛr dãmb Kirist zĩigẽ, wala Wẽnnaam sã n da tũnugda ne tõnd n maand bõosgo. Wala neb sẽn be Kirist zĩigẽ tõnd bõosd-y lame: ‘Lebs-y n zems ne Wẽnnaam.’ ” (2 Korẽnt dãmba 5:20, NW ) Tẽn-kʋdem wẽndẽ wã, sẽn yɩɩd fãa, b ra tʋmda ãmbasadɛɛr dãmbã beem sasa, sẽn na yɩl n gese b sã n da tõe n kɩtame tɩ zabr da wa ye. (Luk 14:31, 32, NW ) Sẽn mik tɩ ãdem-biisã sẽn maand yel-wẽnã zãra ne Wẽnnaama yĩnga, a tʋma a ãmbasadɛɛr dãmb nins sẽn zae ne vʋʋsmã tɩ b tɩ togs nebã a zems-taabã noyã. Wala Kirist lɛdgdba, sẽn zae-bã kota nebã: “Lebs-y n zems ne Wẽnnaam.” Bõosg kãngã yaa ninbãan-zoeer kosg sẽn na yɩl n bao laafɩ ne Wẽnnaam la sẽn na yɩl n sak fãagr ning a sẽn kɩt tɩ tõe n zĩnd ne Kirist tũnugrã.
11. Tẽeb ne yao-n-dɛɛkã maasem, ãnd n baas n paam tɩrlem yasr Wẽnnaam taoore?
11 Ãdem-biis nins fãa sẽn wilgd tẽeb ne yao-n-dɛɛkã tõe n lebs n zemsa ne Wẽnnaam. (Zã 3:36) A Poll yeelame: “Bãmb [a Zeova] kɩtame tɩ [a Zezi] sẽn ka mi-a yel-wẽna lebg yel-wẽna tõnd yĩnga; tɩ tõnd tõe n lebg Wẽnnaam tɩrlem bãmb maasem yĩnga.” (2 Korẽnt dãmba 5:21) Rao sẽn zems zãng a Zezi ra yaa maang yel-wẽnã sugr kũuni, a Ãdem kambã la a yagensã fãa, sẽn paam fãagr ne rog-ne yel-wẽnã yĩnga. B lebga “Wẽnnaam tɩrlem” a Zezi maasem yĩnga. Tɩrlem kãnga, bɩ b tɩrlem yasr Wẽnnaam taoorã rengd n nafa Kirist pʋɩt-n-taas 144 000. A Yʋʋm Tusr Naamã rɩɩb sasa, Ba Sẽn-kõn-sa a Zezi Kirist tẽng zug kambã na n paama tɩrlem yasr wala ninsaalb sẽn zems zãnga. A na n zẽk-b lame tɩ b paam tɩrlem yasr zems-zãng pʋgẽ, sẽn na yɩl n tɩ b tõog n wilg b kɩs-sɩd ne Wẽnnaam la b paam vɩɩm sẽn-kõn-sa wã kũuni.—Ezai 9:5; Wilgri 14:1; 20:4-6, 11-15.
“Lohorem wakat sẽn yaa zalle”
12. Tʋʋm-bʋg sẽn tar yõod wʋsg la a Zeova ãmbasadɛɛr dãmbã la a sẽn tʋm b rãmbã pidsda?
12 Sẽn na yɩl n paam fãagre, d segd n tʋmame tɩ zems ne a Poll gom-kãensã: “Tõnd sẽn tʋmd ne [a Zeova] Wẽnnaama yĩnga, tõnd kota yãmb tɩ y ra reeg Wẽnnaam barka zaalem ye. Tɩ bõe, bãmb yetame: ‘Mam leoka fo pʋʋsg bark wakate, la mam sõnga foom fãagr daare.’ Gese, masã yaa bark wakate [“lohorem wakat sẽn yaa zalle,” NW ]. Gese, masã yaa fãagr daare.” (2 Korẽnt dãmba 6:1, 2) A Zeova ãmbasadɛɛr dãmb nins sẽn zaeyã la a sẽn tʋm b rãmbã, sẽn yaa “piis a taab[ã],” pa reegd b yĩngr Ba wã sõmblem b sẽn pa segd ne wã n kong a bõn-datlã ye. (Zã 10:16) Ne b manesem tɩrgã la b ministɛɛrã sẽn tar yẽesem ‘lohorem wakat’ kãngã wã, b baood n na n taa Wẽnnaam yam, la b togsda dũniyã neb tɩ yaa ‘masã la fãagrã daare.’
13. Ezai 49:8 wã tags-yẽgrã yaa bʋgo, la wãn-wãn la a reng pipi n paam pidsgu?
13 A Poll sõdgda Ezai 49:8 pʋgẽ d sẽn karemd woto wã: “Zusoaba yeelame: ‘Mam leoka foom bark [“maan-neer,” NW ] wakate. Mam sõnga foom fãagra daare. Mam gũu foom la m dɩk foom n maan pʋleng neba fãa yĩnga. Mam na n le yika tẽngã la m kõ neba b rogem pʋɩɩra sẽn da lebg raboogã.’ ” Bãngr-gomd kãngã reng n pidsame, Israɛll nin-buiidã sẽn waa n paam paam-m-meng ne Babilon yembdã, tɩ kaoosg poor tɩ b leb b ba-yirã sẽn lebg raboogã.—Ezai 49:3, 9.
14. Wãn-wãn la Ezai 49:8 pids a Zezi zugu?
14 A Ezai bãngr-gomdã pidsg a to pʋgẽ, a Zeova kõo a “tʋm-tʋmd” a Zezi t’a yaa “vẽenem buuda fãa yĩnga tɩ [Wẽnnaam] fãagra ta dũniyã tɛk fãa.” (Ezai 49:6, 8; mak-y ne Ezai 42:1-4, 6, 7; Matɩe 12:18-21.) Vẽenega “maan-neer wakat,” NW bɩ ‘bark wakatã’ ra tɩ loee ne a Zezi, a sẽn da waa n be tẽng zugã. A pʋʋsame tɩ Wẽnnaam ‘leok-a.’ Rẽ yɩɩ ‘fãagr wakat’ ne a Zezi, bala a talla burkĩndlem sẽn zems zãnga, la woto, a ‘lebga fãagr sẽn ka sɛt soaba, neb nins fãa sẽn sakd yẽ wã yĩnga.’—Hebre dãmba 5:7, 9; Zã 12:27, 28.
15. Wakat bʋg tɛk la tẽeb Israɛllã neb modg n wilg tɩ b zemsa ne Wẽnnaam sõmblmã d sẽn pa segd ne wã, la ra yaa ne bõn-datl bʋgo?
15 A Poll wilgame tɩ Ezai 49:8 pidsa kiris-neb nins sẽn zaeyã zutu, n kot-b tɩ b ‘ra kong Wẽnnaam sõmblem d sẽn pa segd ne wã bõn-datla,’ n pa bao a maan-neerã ‘lohormã wakatã’ la ‘fãagrã daar’ a sẽn kõtã sasa ye. A Poll paasdame: “Gese, masã yaa bark [“lohorem,” NW ] wakate. Gese, masã yaa fãagr daare.” (2 Korẽnt dãmba 6:2) Yʋʋmd 33 T.W. Pãntekotã tɛka, tẽeb Israɛllã neb modgame n na n wilg tɩ b zemsa ne Wẽnnaam sõmblmã d sẽn pa segd ne wã, sẽn na yɩl n tɩ ‘lohorem wakatã’ yɩ ‘fãagr daar’ ne-ba.
‘Tõnd wilgda d mens wala neb sẽn zems ne yɩ Wẽnnaam tʋm-tʋmdba’
16. Yel-bʋs sẽn yɩ makr meng pʋsẽ la a Poll wilg t’a zemsa ne yɩ Wẽnnaam tʋm-tʋmda?
16 Roap kẽer sẽn da lagem ne Korẽnt tigengã ra pa wilgd tɩ b zemsa ne Wẽnnaam sõmblmã d sẽn pa segd ne wã ye. B kãnega a Poll n mao n na n sãam zu-sobend ning a sẽn da tar wala tʋm-tʋmdã, baa ne a sẽn da pa rat n ‘lub neda ba a sẽn yaa ne bũmb ningã.’ Sɩd-sɩda a wilgame t’a zemsa ne yɩ Wẽnnaam tʋm-tʋmda “ne sũ-mar wʋsgo namsg pʋgẽ la naong pʋgẽ la tood pʋsẽ la pãbre la bi-bees roog kẽebo la tẽn-dãmbgo la tʋʋma la gõeem sẽn ka be, la kom.” (2 Korẽnt dãmba 6:3-5) Kaoosg zugẽ, a Poll wilgame t’a kɩɩsdbã sã n da yaa tʋm-tʋmdba, yẽ n da “yɩɩda,” bala a namsa ne bi-bees roogo, pãbre, yɛla la mongr n yɩɩd bãmba.—2 Korẽnt dãmba 11:23-27.
17. a) Ne zʋgd bʋs wilgr la d tõe n wilg tɩ d zemsa ne yɩ Wẽnnaam tʋm-tʋmdba? b) ‘Tɩrlem zab-teedã’ yaa bʋse?
17 Wala a Poll la a tũud-n-taasã, d tõe n wilgame tɩ d zemsa ne yɩ Wẽnnaam tʋm-tʋmdba. Wãn-wãna? Yaa “ne pʋ-peelem” bɩ vɩɩm manesem yɩlemde, la ne d sẽn na n tʋm tɩ zems ne Biiblã bãngr sẽn yaa takɩ. D tõe n wilgame tɩ d zemsame, ne “sũ-maasem sẽn yaa wʋsgo,” n tõogd toog ne maag-m-mengã, beegr bɩ no-baoodem taoore, la ne “sõmblem,” NW d sã n maand bũmb sẽn sõngd neb a taabã. Sẽn paase, d tõe n wilgame tɩ d zemsa ne yɩ Wẽnnaam tʋm-tʋmdba, n sakd sor-wilgr ning a sẽn kõt ne a vʋʋsmã tũnugrã, n wilgd “nonglem sɩda,” n togsd sɩda, la d teegd-a sẽn na yɩl n paam pãng n pids ministɛɛrã. Bee yamleoog tɩ d bãng t’a Poll me wilgame tɩ zemsame t’a yɩ tʋm-tʋmda, “ne tɩrlem zab-teedo rɩtgo la goabga.” Pĩnd wẽndẽ zabã pʋsẽ, naoor wʋsgo, ra yaa rɩtg nugã n da zãad sʋʋgã tɩ goabg soabã zãad gãongã. Tẽebã zabrẽ a sẽn zabd n kɩɩsd ziri karen-saam dãmbã, a Poll pa tũnug ne nemsã sẽn maand yel-wẽnã zab-teed sẽn yaa: manesem kɛgã, belgrã, zãmbã ye. (2 Korẽnt dãmba 6:6, 7; 11:12-14; Yelbũna 3:32, NW ) A tũnuga ne tɩrlem “zab-teedo,” bɩ bõn-tũnugdsi, sẽn na yɩl n kɩt tɩ sɩd balengã kẽng taoore. Yaa woto la tõnd me segd n maane.
18. Tõnd sã n yaa Wẽnnaam tʋm-tʋmdba, manesem sẽn yaa wãn to la d na n talle?
18 Tõnd sã n yaa Wẽnnaam tʋm-tʋmdba, d na n talla manesem ning a Poll la a tʋmd-n-taasã sẽn tallã. D na n maana wa kiris-neba, b waoog-d lame tɩ b paoog-d lame me. Kɩba-wẽnsã b sẽn yiis tõnd wɛɛngẽ wã pa na n yals tõnd moonegã tʋʋmd ye, d pa na n lebg wuk-m-mens rãmb me, b sã n gom d yell sõma ye. D na n goma sɩda, la d tõe n paamame tɩ b sak n deeg-do, wẽn-zoeer tʋʋm yĩnga. D sã n wa be yell taoor sẽn tõe n yãk d yõorã bɛɛbã zabr yĩnga, d na n teega a Zeova. La d na n saka kiblgã ne mi-beoogo.—2 Korẽnt dãmba 6:8, 9.
19. Wãn-wãn la d tõe ‘n kõ neb wʋsg arzɛgs’ tẽebã wɛɛngẽ?
19 A sẽn baasd a sõsgã sẽn tɩ loe ne zems-taab tʋʋmdã, a Poll goma a meng la a tʋmd-n-taasã yell “wa sũ-sãoong rãmba, la tõnd tara sũ-noog daar fãa; a wa naong rãmba, la tõnd kõta neb wʋsg arzɛgse; a wa tõnd sẽn ka tar bũmb ye, la tõnd tara bũmb fãa.” (2 Korẽnt dãmba 6:10) Baa tʋm-tʋmdb kãensã sẽn da tar bʋʋm n na n sidg b sũ-sãamsã yĩnga, b ra tara sũ-noogo. Laogã wɛɛngẽ b ra yaa naong rãmba, la tẽebã wɛɛngẽ b “kõta neb wʋsg arzɛgse.” Sɩda, b ra “tara bũmb fãa,” bala b tẽebã kõ-b-la tẽeb arzɛgse, hali n paam saagr meng n na n lebg Wẽnnaam yĩngr komdibli. La b ra tara vɩɩm sẽn be bark la sũ-noogo, b sẽn yaa ministr dãmb sẽn yaa kiris-nebã yĩnga. (Tʋʋma 20:35, NW ) Wala bãmba, d tõeeme n ‘kõ neb wʋsg arzɛgse,’ d sã n kẽesd d mens zems-taab tʋʋmdã pʋgẽ masã menga, fãagr daar n kãngã pʋgẽ!
Tall-y bas-yard ne a Zeova fãagrã
20. a) A Poll tʋlsem ne a sũur fãa ra yaa bõe, la bõe yĩng tɩ sẽk ra kae n na n yals n tadge? b) Bõe n zẽng fãagrã daar pʋgẽ tõnd sẽn vɩyã?
20 A Poll sẽn wa n gʋls a lɛtr a yiib soabã Korẽnt dãmbã yʋʋmd 55 T.W. sẽnesã, ra yaa yʋʋm 15 bal n da ket Zʋɩf rãmbã yɛl siglg yĩngã. Tʋm-tʋmdã ra rata ne a sũur fãa tɩ Zʋɩf rãmbã la Buzẽmsã neb lebs n zems ne Wẽnnaam Kirist maasem yĩnga. Ra yaa fãagr daare, la sẽk ra kae n na n yals n tadg ye. Be neere, tõnd bee yɛl siglg baasg sẽn wõnd woto pʋgẽ yʋʋmd 1914 tɛka. Rĩungã mooneg tʋʋmd dũniyã gill zug sẽn kẽngd taoorã wilgda zall tɩ yaa fãagrã daar la woto.
21. a) Yʋʋmd verse bʋg la b yãk yʋʋmd 1999 yĩnga? b) Bõe la d segd n maand fãagr daar n kãngã sasa?
21 Tẽn-tẽnsã fãa neb segdame n wʋm Wẽnnaam seglsã fãagrã ne a Zezi Kirist maasmã yĩnga. Sẽk pa ket sẽn na n yaas n tadg ye. A Poll gʋlsame: “Gese, masã yaa fãagr daare.” Gom-kãensã sẽn yit 2 Korẽnt dãmba 6:2 pʋgẽ wã na n yɩɩ a Zeova Kaset rãmbã yʋʋmd verse yʋʋmd 1999 yĩngã. Ad sɩd yaa bũmb sẽn zemse, bala d bee bũmb sẽn yaa wẽng n yɩɩd Zerizalɛm la a wẽn-doogã sãoong zĩig sẽn zãr taoore! Yɛl siglg kãngã tõr sãang taa n saame, tɩ pak ned buud fãa tẽng zugu. Wakat ning d sẽn segd n tʋmã yaa masã, lakae pa beoog ye. D sã n tẽed tɩ yaa a Zeova n so fãagrã, la d sã n nong-a, la d sã n getẽ tɩ vɩɩm sẽn-kõn-sa wã tara yõodo, d pa na n kong Wẽnnaam sõmblmã d sẽn pa segd ne wã bõn-datl ye. Ne tʋlsem ne d sũur fãa sẽn yaa waoog a Zeova, d na n kõo poeer ne d no-goam la d tʋʋm tɩ d sɩd rat n maana woto, d sẽn zẽkd d koɛɛg n yet woto wã: “Gese, masã yaa fãagr daare.”
Wãn to la y na n leokẽ?
◻ Bõe yĩng tɩ lebs n zems ne Wẽnnaamã tar yõod wʋsgo?
◻ Ãnd dãmb la ãmbasadɛɛr dãmb la tʋm-tʋmdb nins sẽn kẽes b mens zems-taabã tʋʋmd pʋgẽ wã?
◻ Wãn-wãn la d tõe n wilg tɩ d zemsa ne yɩ Wẽnnaam tʋm-tʋmdba?
◻ Bõe la a Zeova Kaset rãmbã yʋʋmd verse yʋʋmd 1999 yĩngã rat n yeel ne yãmba?
[Pictures on page 13]
Wala a Polle, yãmb moonda ne yẽesem la y sõngd neb a taabã tɩ b zemsd ne Wẽnnaam bɩ?
Etazĩni
Fãrense
Kodenvaare
[Picture on page 14]
Fãagr daar n kãngã pʋgẽ, yãmb bee kʋʋndã sẽn lebsd n zems ne a Zeova Wẽnnaamã sʋk bɩ?