Wãn-wãn la y tõe n puk sik-m-meng hakɩka?
Sik-m-meng hakɩkã tara yõod wʋsg Wẽnnaam nifẽ. A Zak gʋlsame tɩ: “Wẽnnaam kɩɩsda tɩtaam dãmba, la a kõta sõmblem d sẽn pa segd ne wã sik-m-mens rãmbã.” (Zak 4:6, NW) Ka wã a Zak ra tõe n da rat n goma tagsa wʋsg b sẽn wilg Hebre Gʋlsgã pʋgẽ yelle. “Zusoaba yaa kãsenga; la baasgo, bãmb nanda sik-m-mens rãmba [“kõta sõmblem d sẽn pa segd ne wã sik-m-mens rãmbã,” NW ] la b geta tɩtaam dãmb yɩɩga.” “Tɩtaam dãmba na n paama sikri, la zẽk-m-mens rãmba na n paama yãnde. Baraare, yaa Zusoaba bal n na n paam waoogre.” “Bãmb [Wẽnnaam] yaanda nin-tʋʋdbã, la b maanda sik-m-mens rãmba neere.”—Yɩɩl Sõamyã 138:6; Ezai 2:11; Yelbũna 3:34.
Tʋm-tʋmd a Pɛɛr me raoola sik-m-menga. A gʋlsame: “Bɩ yãmb fãa sak taab ne sik-m-menga, tɩ bõe, ‘Wẽnnaam kɩɩsda tɩtaam dãmba, la bãmb ningda sik-m-mens rãmba zut barka [“kõta sõmblem d sẽn pa segd ne wã sik-m-mens rãmbã,” NW ].’ ”—1 Pɛɛr 5:5.
Kirista sik-m-meng makrã
Tõe tɩ y sʋke: Bõe yõod n be sik-m-meng tallg pʋgẽ? Sã n yaa ne ned ning sẽn maood n dat n yɩ kiris-ned hakɩkã, a leokrã tara yõodo: yɩ sik-m-meng soaba, yaa yɩ wala Kirista. A Zezi wilga a sik-m-mengã ne a sẽn sak tẽn-tʋmd sẽn yaa zallã, n yi saasẽ n wa tẽng zug n lebg ninsaal sẽn tar yasr sẽn paooda, n ka ta malɛk rãmbã ye. (Hebre dãmba 2:7) Baa ne a sẽn da yaa Wẽnnaam Biriblã, a tõoga toog ne yaalg a bɛɛb sẽn yaa tũudum neb sẽn wa ne a zugu. A talla yõk-m-meng a namsgã wakate, baa ne a sẽn tõe n boolẽ malɛk rãmb leziõ rãmb tɩ b wa sõng-a wã.—Matɩe 26:53
B baas n kaa a Zezi yãnd pʋgẽ ra-lukã zugu, la a kell n talla kɩs-sɩd ne a Ba wã. Woto, a Poll ra tõe n gʋlsa yẽ wɛɛngẽ tɩ: “Tall-y yam a woto Kirist Zezi sẽn da tarã me, baa t’a sẽn zĩnd Wẽnnaam wẽnegã pʋgẽ wã, a pa tags n deeg a zĩig ye, sẽn dat n yeel tɩ zeng Wẽnnaam ye. Ayo, la a faaga a menga, n dɩk yamb wẽnego, la a puka ninsaalb wẽneg pʋgẽ. Sẽn paasde, a sẽn wa n mik t’a yaa ninsaalã wakate, a sika a menga n yɩ sakda hal n tɩ ta kũum, n-yẽe, kũum namsg ra-luk zugu.”—Filip rãmba 2:5-8, NW.
Dẽ, wãn-wãn la d tõe n puk sik-m-meng hakɩkã? Yɛlã d sẽn sɩd segdã pʋsẽ, walla tɩ yɩ wuk-m-meng manesem, wãn to la d tõe n tall sik-m-meng manesem?
Sik-m-meng soab yel-manesem sẽn yaa to-to
D ges sik-m-mengã tʋʋma wɛɛngẽ, tʋʋma zĩigẽ, bɩ Kiris-ned tʋʋmdẽ wã. Sẽn na yɩl tɩ tʋʋmd maan sõma, yaa tɩlae tɩ yel-gɛtb la tʋʋm taoor dãmb zĩndi. Ned n segd n dɩk sardo. Yãmb yel-manesem yaa wãn-wãna? Yãmb yeta y sũurẽ tɩ: “Yẽ tagsdame t’a yaa bõe n na n yet maam m sẽn segd n maan bũmb ninga? Mam zĩnda tʋʋm-kãngã pʋgẽ yʋʋm wʋsg sẽn yɩɩd yẽ.” N-ye, y sã n yaa wuk-m-meng soaba, y na n yika y sũur sulg-m-meng n sak yell taoore. Sẽn paase, sik-m-meng soab modgdame n pa na n “maan bũmb ba a yembr ne zabre wala wilg-m-meng ye, la bɩ ned kam fãa tẽ ne sik-m-meng yam tɩ nebã fãa yɩɩda yẽnda.”—Filip rãmba 2:3.
Ned yʋʋm sẽn pa ta yãmb bɩ pag sã n kõ-y saglse, y yel-manesem yaa wãna? Y sã n yaa sik-m-meng soaba, sẽn yal me y na n kelga saglgã. Y sã n yaa wuk-m-meng soaba, y na n maana sũur bɩ y tõdg saglgã zĩig pʋgẽ bala. Y na n baoa pẽgr la belgr goam sẽn talld-y n debd sãoong zĩigẽ? Bɩ sẽn yaa lebende, y na n baoo saglg sẽn manegd yãmb yɩ-neer yĩnga?—Yelbũna 27:9; 29:5.
Yãmb tõe n tõoga yel-toog ning namsg sẽn wat ne wã bɩ? Sik-m-meng na n kɩtame tɩ y tõog n mao ne yel-tood la y tõog toogo, wala a Zoob me sẽn maana. Y sã n yaa wuk-m-meng soaba, y na n nong n sãamda y sũur la tõe tɩ y yɩ tõat yel-namsds bɩ beegr y sẽn tagsd tɩ b maan-y lame taoore.—Zoob 1:22; 2:10; 27:2-5, NW.
Sik-m-meng yaa nonglem la sugr-kũuni
Yaa toog ne neb sãnda tɩ b yeel tɩ: “M kota sugri. Maam n konge. Yãmb n da tar bʋʋm.” Bõe yĩnga? Wuk-m-meng sẽn loog nugu! Baasgo, naoor wʋsgo, sugr b sẽn kos ne pʋ-peelem ra tõe-la nana n saas kãadem mo-yõsa.
Ned sã n beeg-yã y tʋllame n kõ sugr bɩ? Bɩ y wuk-m-mengã yĩnga, y tallda sũ-kẽka, tõe tɩ yaa ray la kiis wʋsg pʋgẽ, n tõdgdẽ tɩ y kõn gom ne a soab ning y sẽn tagsd t’a beega yãmbã bɩ? Bɩ yãmb tugda beem sẽn na yɩl n modg n dok y sũur zãnga? Neb la b kʋ beem pʋgẽ. Beem a taab pʋsẽ, kãneg ned n sãam a yʋʋr manesmã la b tũnug ne. Sẽn yaa lebende, sik-m-meng soab tara nonglem la a kõta sugri. Bõe yĩnga? Bala nonglem pa maand sũ-kẽk wẽng b sẽn maan-f yĩng ye. A Zeova da sakame n na n kõ Israɛll kambã sugr b sã n da bas b wuk-m-mengã. A Zezi karen-biig sẽn yaa sik-m-meng soab tʋllame n kõ sugri, n yɩlem naoor wʋsg menga!—Zoɛll 2:12-14, NW; Matɩe 18:21, 22; 1 Korẽnt dãmba 13:5, NW.
Sik-m-meng soab ‘lʋɩta taoor n waoogd neb a taaba.’ (Rom dãmba 12:10) The New International Version Biiblã yeta woto: “Waoog-y taab n yɩɩg y mense.” Yãmb pẽgda y taab la y nand b tõodã bɩ? Bɩ daar fãa dɩlla yãmb yã zang sẽn na yɩl n sãam b yʋʋrã? N-yẽe, yãmb tõe n talla pẽgr hakɩk y taabã yĩng bɩ? Yãmb sã n tar zu-loees zĩ-kãngã wɛɛngẽ, tõe tɩ meng bãan kaalem la wuk-m-meng la yãmb zu-loeese.
Wuk-m-meng soab pa tar maag-m-meng ye. Sik-m-meng soab tara maag-m-meng la sũ-mare. Yaa wãn to ne yãmba? Yãmb namsda ne sũ-pa-noang wẽgb buud fãa y sẽn yã pʋgẽ bɩ? Yel-manesem a woto buud yaa lebend ne sũ-mar tallgo. Yãmb sã n yaa sik-m-meng soaba, y pa na n tags y mengã yõod yell tɩ loog noor ye. Tẽeg-y bũmb ning sẽn zĩnd wakat ning a Zezi tʋm-tʋmdbã sẽn tags b mens yõod yell tɩ loogã. B wẽe no-koeem kãseng n da rat n bãng ãnd n da yaa kãseng n yɩɩd bãmb sʋkã. B ra yĩmame tɩ b fãa ra yaa “tʋm-tʋmdb sẽn ka yõodo”!—Luk 17:10; 22:24; Mark 10:35-37, 41.
Farens gʋlsd a Voltaire wilga sik-m-meng võor wala “maan-tɩ-zems soab a yamẽ wã . . . wuk-m-meng tɩɩm.” N-yẽe, sik-m-meng yaa yam-tagsg sikri. Sik-m-meng soab yaa maan-tɩ-zems soab a yamẽ wã, pa wuk-m-meng soab ye. A tara waoogr sẽn zulum la to naneb manesem.
Dẽ bõe yĩng tɩ d segd n mao n yɩ sik-m-mens rãmba? Bala sik-m-mengã yaa bũmb Wẽnnaam sẽn nonge, sẽn paase a sõngd-d lame tɩ d paam Wẽnnaam sor-wilgri. Yaa a Daniɛll sik-m-mengã me yĩng la a Zeova sẽn ges tɩ no-rɛɛsã yaa ned ‘a sẽn nong’ t’a tʋm malɛk a nengẽ ne yãabã! (Daniɛll 9:23; 10:11,19) Sik-m-meng wata ne keoor wʋsgo. A wata ne zo-rãmb hakɩk sẽn nong yãmba. Sẽn tar yõod n yɩɩda, a wata ne a Zeova barka. “Sik-m-meng ne Zusoaba zoees biis yaa arzɛk ne waoogre la vɩɩm.”—Yelbũna 22:4.
[Picture on page 7]
Sugr-kosg ne sik-m-meng tõe n kɩtame tɩ vɩɩmã yɩ noog n paase