Wuk-m-mengã keoor taglem taa zĩ-bʋgo?

YÃMB zoe n paama yell ne ned sẽn mak ne yamleoog n na n faag-y bɩ? Tõe tɩ yaa tʋʋmd taoor soaba, patrõ, yel-gɛta, bɩ roagd meng n faag yãmb la a tall pa-nandem wʋsg ne yãmb bɩ? Yãmb tagsg ne nin-kãng soabã yɩɩ wãna? A nedemdã talla yamleoog ne yãmb bɩ? Yaa vẽeneg tɩ yaa ayo! Bõe yĩnga? Bala, wuk-m-meng wata ne bõn-gɩdgds la a muta yẽsgo.

Wuk-m-meng kɩtdame tɩ ned paoog a to, sẽn na yɩl n zẽk a meng zug wakat fãa. Ned sẽn tar manesem a woto pa nong n pẽgd neb a taab ye. Wakat fãa a tara gom-sãbsdem: “yaa sɩd t’a tõe n tara zʋg sõma, la a tara zang kãnga.”

Paroles d’argent pour pensées d’or (ãngil.) sebrẽ wã, b bilga wuk-m-mengã wala “minung sẽn sãamd ned wakat fãa. A sãamda a soabã, tɩ sẽn tar yamleoog a soabã nengẽ ye pa zem baa fɩ ye.” Rẽ yĩnga, yaa lingr tɩ ned ba a yembr pa rat n pẽneg wuk-m-meng soab bɩ? Sɩda naoor wʋsgo, wuk-m-meng keoor yaa zo-rãmb hakɩk kaalem. Sebr ning b sẽn sõdg zugẽ wã kẽngda taoor n yetẽ: “Sẽn yaa lebende, nebã nonga sik-m-meng soaba: pa sik-m-meng soab ning sẽn wukd a meng a sik-m-mengã yĩngã ye, la yaa sik-m-meng hakɩkã.” Wala sẽn zemse, Biiblã yeta woto: “Ned tɩtaam n wat ne a yãnde. La sik-m-meng soab na n paama waoogre.”—Yelbũna 29:23.

Sẽn yɩɩd zood bɩ ninsaalb waoogr baoobã, baasg zãnga, wãn-wãn la wuk-m-meng mat ned zoodã ne Wẽnnaam? Wãn-wãn la Wẽnnaam get wuk-m-meng soaba, zẽk-m-meng soaba, la maan-tɩ-loog soaba? Wuk-m-meng bɩ sik-m-menga: pak-a lame bɩ?

Zãmsg sik-m-mengã wɛɛngẽ

Yelbũnã gʋlsd vʋʋsmã sẽn vẽnegã yeta woto: “Tɩtaam n lʋɩt taoor tɩ sãoong pʋgda. La wuk-m-meng n lʋɩt taoor tɩ lʋɩɩs pʋgda. Ned sẽn yaa sik-m-meng soaba n tũud naong rãmb n são a sẽn tũud wuk-m-mens rãmb n dɩt b sẽn paam.” (Yelbũna 16:18, 19) Siiri sodaas naab a Naaman sẽn vɩɩmd Israɛll no-rɛɛs a Eliize wakatẽ wã makr sɩd wilgdame tɩ gom-kãensã yaa sɩda.

A Naaman da yaa wãoore. A sẽn da wa n baood sãoogr sasa, a toga sor n kẽng Samari n tagsdẽ t’a ra na n paamame t’a Eliize meng kelg-a. Sẽn yaa lebende, no-rɛɛsã tʋma a sõgena a Naaman nengẽ t’a tɩ yeel-a t’a tɩ so naoor a yopoe Zʋrdẽ Kʋɩlgẽ wã. A Naaman gesame tɩ yel-manesmã la saglgã yaa paoogr ne-a. Bõe yĩng tɩ no-rɛɛsã ra pa tõe n wa a nengẽ la a gom ne a mengã n bas n tʋmd a sõgene? La sɩd-sɩda, Siiri kʋɩlsã fãa me yaa sõma wala Zʋrdẽ kʋɩlgã! Wuk-m-meng n da ya a zu-loɛɛga. Baasgã yɩɩ bõe? A zu-noogã, a kelga sagl-sõng sẽn yɩɩdã. “La yẽ kẽngame n tɩ lis naoor a yopoe Zʋrdẽ kʋɩlgã koom pʋgẽ wa Wẽnnaam daowa sẽn yeelã. La a wãoodã sɛɛme t’a yĩnga lebg wa bi-bilf yĩnga.”—2 Rĩm dãmba 5:14.

Wakat ninga sik-m-meng bilf wata ne nafa wʋsgo.

Tɩtaam keoore

Baasg zãnga, tõnd sẽn paamd keoor ning wuk-m-meng sẽn wat ne wã taglem tõe n yɩɩga yõod bɩ paoong bõn bal zĩig sẽn zãre. Wuk-m-meng buud a to sẽn solg n be gom-biig ning sẽn yaa “hubris” pʋgẽ. Gom-bi-kãng võorã yaa “wuk-m-meng bɩ sek-m-meng sẽn loog nug sẽn wat ne rolbo.” (Webster’s Ninth New Collegiate Dictionary) Gom-kãnga yẽgr yita Gerɛk gomd pʋgẽ tɩrga, la sã n yaa ne Gerɛk bãngd a William Barclay, “hubris yaa wuk-m-meng sẽn lagem ne nin-toolem. . . , pa-nandem sẽn naag ne tɩtaam sẽn kɩtd tɩ ned paoog a taabã.”

Makr sẽn yaa vẽeneg ne wuk-m-meng sẽn loog nug a woto buud pukda Biiblã pʋgẽ. Yaa Anun sẽn yaa Ammon rĩma yellã. Étude Perspicace des Écritures sebrã wilgdame tɩ: “A Nahash sẽn maan a Davɩɩd neerã yĩnga, a Davɩɩd tʋma neb tɩ b tɩ bels a Hanun a ba wã kaalem yĩnga. La a Hanun na-biisã kɩtame t’a sak n deeg t’a Davɩɩd da maana sɩlem bal n dat n sols n bãng galʋ-tẽngã, tɩ rẽ kɩt t’a paoog a Davɩɩd sõgen dãmbã n põng b toeemsã pʋɩ-sʋgse, la b wõrs b futã pʋɩ-sʋgs hal tɩ ta b seese, n yaool n bas-b tɩ b kuili.”a Sẽn tɩ loe ne yel-kãnga sẽn zĩndã, a Barclay yetame: “Tʋʋm-manesem kãnga da yaa hubris. Ra yaa tʋʋre, yaalgo, zãma sʋk yãnd-ningr fãa sẽn lagem taaba.”—2 Sãmwɛll 10:1-5.

N-ye, wuk-m-meng soab tõe n talla tɩtaam sẽn loog noore, n tall waoogr kaalem manesem, n ning neb a taab yãnde. A sũur yaa noog ne a sẽn sãamd ned sũur tɩ yĩn-sidg kaẽ wã, ne toor kae manesem, la a noogd a sũur ne neb a taabã sũ-pa-noom la b yãnde. La ning ned yãnd yaa zĩis a yiibu sãoongo. A kɩtdame tɩ f kong zoa, tɩ f zug sẽn yɩ noog wʋsg ya a sẽn pa lebg f bɛ.

A wãn to la kiris-ned hakɩk buud fãa tõe n puk wuk-m-meng sẽn sãamd a woto, t’a Zusoabã yaool n kõ noor tɩ ‘a nong a yak wa a menga’? (Matɩe 7:12; 22:39) A yaa lebend ne bũmb ning fãa sẽn tɩ loe ne Wẽnnaam la Kirista. Sẽn tɩ loe ne yel-kãngã, a Barclay togsa gom-kãngã sẽn pa reem yellã: “hubris yaa wuk-m-meng sẽn kɩtd tɩ ninsaal kɩɩs Wẽnnaam.” Yaa wuk-m-meng ning sẽn yet tɩ: “A Zeova ka be ye” wã. (Yɩɩl Sõamyã 14:1, NW) Bɩ wala b sẽn togs Yɩɩl Sõamyã 10:4 pʋgẽ wã, “nin-wẽng wuk-m-mengã pʋgẽ, a ka baood bãngr ye. Ne yẽ tagsg fãa, yaa tɩ Wẽnnaam ka be ye.” Wuk-m-meng bɩ zẽk-m-meng a woto pa zãagd a soabã ne zo-rãmb la roagdb bal ye, la leb n zãagda a soabã ne Wẽnnaam. Ad yaa yaood sẽn sɩd toe!

Ra bas-y tɩ wuk-m-meng sãam-y ye

Wuk-m-meng tõe n talla nens toɛ-toɛya: wuk-m-meng sẽn tik tẽn-nonglmã, bu-welsgã, tarem, karengo, arzɛka, yʋʋr la naam zugu. Ne manesem buud bɩ a to, wuk-m-meng tõee bilf-bilf n sãam yãmb nedemdã.

Neb wʋsg maanda wala b yaa sik-m-mens rãmba b sã n be ne nin-kãsems bɩ b taaba menga. La bõe n maand wakat ning nedã sẽn wõnd wa a yaa sik-m-meng soabã sã n paam zu-sobendo? Zĩig pʋgẽ bala, a lebgda na-toaag sẽn kɩtd tɩ neb nins a sẽn tẽed t’a yɩɩdame wã vɩɩm lebgd toogo! Woto tõe n paama neb kẽer sẽn ningd sodaas fut bɩ sẽn tar bãnd (badge) sẽn wilgd tɩ b tara naam. Baa goosneemã wã tʋmd-tʋmdb tõe n lebga wuk-m-mens rãmba b manesmã pʋsẽ ne nin-buiidã, n tagsdẽ tɩ nin-buiidã bee be bãmb sõgeneg yĩnga, lakae bãmb yẽ pa segd n sõgen nin-buiidã ye. Wuk-m-meng tõe n kɩtame tɩ y lebg nin-toaaga, ned sẽn pa tar yĩn-sidga, la sik-m-meng tõe n kɩtame tɩ y lebg nin-sõngo.

A Zezi ra tõe n yɩɩ wuk-m-meng la nin-toaag soab a karen-biisã sʋka. A ra yaa rao sẽn zems zãnga, Wẽnnaam Biribla, n da be ne karen-biis sẽn pa zems-zãnga, yãg-yãg la zɩ-kaeedem rãmba. Baasgo, bõe boolg la a maan b rãmb nins sẽn da kelgd-a wã? “Bɩ y wa mam nengẽ yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo. [“Bala mam golã bee yamleoogo, la mam zɩɩbã yaa faasga,”NW].”—Matɩe 11:28-30.

D modgda daar fãa n na n tũ a Zezi makrã bɩ? Bɩ d mensã yaa nin-toose, pa-vigsd rãmba, na-toose, neb sẽn ka ninbãan-zoeere, la wuk-m-mens rãmb bɩ? Wala a Zezi, modg-y n yols-y, la y ra keng ye. Tõog-y wuk-m-meng sẽn sãamdã biisi.

Meng-waoogr sẽn yaa lebend ne sek-m-menga

Meng-waoogr rat n yeelame tɩ f waoog f mengã. Rat n yeelame tɩ neb a taabã sẽn tagsd bũmb ning f zugã pak-f lame. Yãmb maanda gũusg ne y yalẽ wã la y yasrã. Ɛspayn yel-bũndã yaa sɩda, “Togs maam fo sẽn tũud ned ningã la m na togs foom fo sẽn yaa ned ninga.” Yãmb sã n yãk n na n maan tũud-n-taar ne neb sẽn bas b mens n yaa yɛɛ, kʋɩɩmba, gom-yood rãmb la yalem goam dãmba, rẽ, yãmb na n lebga wa bãmba. B yel-manesmã na n mada yãmba, la wala bãmba, y na n konga meng-waoogre.

Yaa sɩd tɩ maan-tɩ-loog a to n be: wuk-m-meng sẽn talld n kẽngd sek-m-meng bɩ zẽk-m-meng zĩigẽ. A Zezi wakatẽ gʋlsdbã la Fariziẽ rãmbã da tara wuk-m-meng ne b minimdã la b tũudmã maan-tɩ-loog yalẽ wã. A Zezi keooga bãmb wɛɛngẽ n yeel woto: “Bãmb maanda b tʋʋma fãa neba nin gesgo yĩnga. Woto bãmb maanda bãmb pʋʋsg gãna tɩ yɩ yalemse, la b paasda b fut zerd woglem [sẽn na yɩl n wõneg wẽn-zoɛtb n yɩɩda.] Bãmb nonga naam zĩndg zĩis kibsa zĩisẽ la karen-dot pʋsẽ. Bãmb nonga neb pʋʋsg raas pʋsẽ, la b ratame tɩ neb bool bãmb tɩ karen-saamba.”—Matɩe 23:5-7.

Dẽ poore, meng-waoogr sẽn zemsã yaa yel-manesem sẽn kɩls tɩ zemse. Tẽeg-y me t’a Zeova nee sũurẽ, pa yɩng yel-manesem wilgr bal ye. (1 Sãmwɛll 16:7; Zeremi 17:10) Meng-tɩrlem pa Wẽnnaam tɩrlem ye. Baasg zãnga, sʋkrã masã yaa tɩ, wãn to la d na n bɩɩs sik-m-meng hakɩk la d põs wuk-m-meng keoorã sẽn tagma yaoobo?

[Footnotes]

[Picture on page 4]

Sik-m-meng bilf kɩtame t’a Naaman paam nafa wʋsgo