Yagd kãsengã la a tʋʋmdã
‘Yɩ-y laag sẽn tar waoogre, sẽn tõe n maan tʋʋm sõama fãa.’—2 TƖMOTƖ 2:21.
1, 2. a) Wãn-wãn la Wẽnnaam sẽn naan rao wã la pagã ra yaa tʋʋm-kãsenga? b) Raab bʋg yĩng la Yagd Kãsengã naan a Ãdem ne a Hawa?
A ZEOVA n yaa Yagd Kãsengã. Tõnd pipi roagd a Ãdem yɩɩ a naanegã tʋʋm-kãseng a yembre. Biiblã yeta tõndo: “A Zeova Wẽnnaam yaga ninsaal ne tẽngã tom la a fʋʋs a yõ-bogdẽ wã vɩɩm vʋʋsem, la ninsaal lebga sɩ-vɩɩga,” sẽn yaa: “bõn-naandg sẽn vʋʋsde.” (Sɩngre 2:7, NW, seb-vã-neng tẽngr not) Pipi bõn-naandg kãngã sẽn yaa ninsaalã ra zemsa zãnga, b naan-a-la wa Wẽnnaam mengã wõnego, tɩ rẽ wilgd Wẽnnaam yamã, la a nonglmã ne tɩrlem hakɩkã.
2 A sẽn tũnug ne a Ãdem sĩif a yembre, Wẽnnaam maana lokd la sõngd me n kõ rao wã: pagã. A Hawa neermã sẽn ka zangã yɩɩga pag ning sẽn yaa neer n yɩɩd pagbã fãa sʋkã meng rũndã-rũndã. (Sɩngre 2:21-23) Sẽn paase, pipi rao wã la a pagã paama yĩns la tõod sẽn zems zãng sẽn na yɩl n pids bõn-datl ning b sẽn bobl-b sẽn yaa kɩt tɩ tẽn-kãngã lebg arzãnã. B ra leb n paama tõog n na n tũ Wẽnnaam noor ning b sẽn togs Sɩngre 1:28 pʋgẽ tɩ “b rog kamb n pid dũniyã la b tõog-a. La b soog zĩma sẽn be kooma pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.” Sẽn na n baase, dũni gill zẽed kãng fãa ra segd n talla ninsaalb milyaar dãmb sẽn tar sũ-noogo, sẽn loe ne taab ne nonglem buud sẽn yaa “zems-n-taar loɛtg sẽn zems-zãnga.”—Kolos rãmba 3:14, NW.
3. Wãn-wãn la tõnd pipi roagdbã lebg paoogr laase, la rẽ waa ne bõe?
3 Zu-bʋko, tõnd pipi roagdbã yãka ne yamleoog n na n kɩɩs b Naand sẽn yaa Naab sẽn-ka-to sẽn yaa b Yagd Kãsengã zu-sobendo. B manesmã lebga wa b sẽn bilg Ezai 29:15, 16 pʋgẽ wã: “Neb nins sẽn solgd b tagsg ne Zusoaba na n paama toogo. Bãmb tʋmda lik pʋgẽ, la b yetẽ yaa: ‘Ãnda n ne tõndo? Ãnd n mi tõndo.’ . . . A zemsame tɩ b ges yagba wa yagd bɩ? Bũmb tõe n yeela a naanda t’a ka naan-a bɩ? Rʋk tõe n yeelame tɩ sẽn yag-a yẽ wã ka tar yam bɩ?” B tõdgr manesmã waa ne yel-beedo, kũum sẽn-kõn-sa sɩbgre. Sẽn paase, ãdem-biisã buud tõr sẽn yi bãmb pendẽ wã roga ne yel-wẽnd la kũum. (Rom dãmba 5:12, 18) Yagd Kãsengã naaneg rasãndlem sãama wʋsgo.
4. D tõe n talla yõod raab bʋg sẽn be waoogr yĩnga?
4 Baasg zãnga, baa ne tõnd sẽn pa zems zãng masã wã, tõnd sẽn yaa a Ãdem yagens sẽn yaa yel-wẽn-maandbã, d tõe n pẽga a Zeova ne goam nins sẽn be Yɩɩl Sõamyã 139:14, NW pʋgẽ wã: “Mam na n pẽga foom, bala yaa ne manesem sẽn kõt rabeem la b maan maam ne manesem sẽn be rasãnde. Fo tʋʋma yaa kãsemse, wala mam sɩɩgã sẽn mi rẽ sõma wã.” La ad sɩd yaa kaeto, Yagd Kãsengã pipi nug-tʋʋmdã sẽn paam zang wʋsg woto wã!
Yagdã yalgda a tʋʋmdã
5. Wãn-wãn la Yagd Kãsengã ra na n tʋm ne yagbã tõogo?
5 Zu-noogo, tõnd Naandã sẽn yaa Yagdã yagb tõog ra segd n tʋmame tɩ zʋʋg ãdem-biisã naaneg sɩngrẽ wã zĩig sẽn zãre. Tʋm-tʋmd a Poll yeta tõnd woto: “Hey ninsaala, fo pʋd n yaa ãnd n lems Wẽnnaam? Bũmb ning b sẽn yagã na n yeela ned ning sẽn yag-a wã tɩ, ‘Yaa bõe yĩng tɩ fo maan maam woto?’ Yaa bõe? Yagdã pa tar zu-sobend yag-noamdgã zug na n dɩk tãn-kãngã n maan laag tʋʋmd sẽn be waoogr yĩnga, la a to wã tʋʋmd sẽn be paoogr yĩng sɩda?”—Rom dãmba 9:20, 21, NW.
6, 7. a) Wãn-wãn la neb wʋsg yãk rũndã-rũndã n na n paam nomb paoogr yĩnga? b) Wãn-wãn la nin-tɩrsã paamd nomb tʋʋmd sẽn be waoogr yĩnga?
6 N-yẽe, Yagd Kãsengã tʋʋm kẽer na n paama yagbo, tʋʋmd sẽn be waoogr yĩnga, la sãnda tʋʋmd sẽn be paoogr yĩnga. Neb nins sẽn yãkd n na n kẽn ne dũniyã sẽn kẽed wẽn-kɩɩsg manesem pʋgẽ n paasdẽ wã paamda nomb ne manesem sẽn kɩt tɩ b na n paam bãnd sãoong yĩnga. Rĩm a Zezi Kirist sẽn tar ziirã sã n wa wa bʋ-kaoorã yĩnga, laas a woto sẽn be paoogr yĩngã na n yɩɩ neb nins fãa me sẽn yaa ninsaalb sẽn wõnd bʋʋs n yaa tõatbã. Wala Matɩe 25:46, NW sẽn yetã, nin-kãens na n “kẽnga sãoong sẽn-kõn-saẽ wã.” La “nin-tɩrsã” sẽn wõnd piisã sẽn paam nomb n be tʋʋmd “sẽn be waoogr” yĩngã na n paama ‘vɩɩm sẽn-kõn-sa wã.’
7 Ne sik-m-menga, rẽ tɩ nin-tɩrs kãensã saka ne Wẽnnaam nombã. B sɩnga Wẽnnaam vɩɩm sorã tũubu. B saka saglg ning sẽn be 1 Tɩmotɩ 6:17-19 pʋgẽ wã sẽn yet tɩ b “ra teeg arzɛg-sɛtma ye, bɩ b teeg Wẽnnaam sẽn vɩya sẽn kõt tõnd bũmb fãa tɩ sek tõnd tɩ d paam ne sũ-noogo.” B maaname tɩ “tʋʋm sõama yɩ bãmb arzɛgse, la b yɩ kõatb sẽn kõt ne sũ-noogo. La woto, bãmb na n bĩnga arzɛgs beoog yĩnga yẽbgr ninga sẽn tar pãnga zugu, tɩ bãmb tõe n paam vɩɩm sẽn yaa sɩda.” Yaa Wẽnnaam sɩdã n nom-ba, la b wilgda tẽeb sẽn pa vigsd ne kũun ning a Zeova sẽn maan ne Kirist Zezi tũnugrã, sẽn “kõ a meng wala yao-n-dɛɛk sẽn zems” sẽn na yɩl n lebs n lugl bũmb nins fãa sẽn da menem ne a Ãdem yel-wẽndã sababã. (1 Tɩmotɩ 2:6, NW ) Rẽnd ad tõnd sɩd segdame n sak a Poll sẽn sagl tɩ “[d] yeelg nedemd paalgã, tɩ ne bãngr sẽn yaa takɩ wã maasem bɩ a lebgd paalg [paamd manegr] tɩ zems ne Ned ning sẽn naan-a wã wõnegã”!—Kolos rãmba 3:10, NW.
Yãmb na n yɩɩ laag sẽn yaa wãn to?
8. a) Bõe n wilgd laag ning buud ned sẽn na n lebgã? b) Yɛl a yiib bʋs n toeemd ned a nombã pʋgẽ?
8 Bõe n na n wilg ned sẽn na n yɩ laag ning buudã? Ya a manesmã la a tʋʋmã. Pipi, yaa sũurã tʋlsem la a raab n nomd bõn-kãensã. Rĩm sẽn yaa yam soab a Salomo yeelame: “Ninsaal [sũur] tagsda a sẽn na n maan bũmb ninga. La yaa Zusoaba n tõe t’a tõoge.” (Yelbũna 16:9) Yiib soaba, manesmã la tʋʋmã paamda nomb ne bũmb nins d sẽn wʋm la d yã wã, tũud-n-taarã la yɛl nins d sẽn vɩɩmdã. Woto yĩnga ad sɩd tara yõod wʋsg tɩ d tũ sagl-kãngã: “Ned sã n tũud yam dãmba, a na n lebga yam soaba. La ned sã n tũud yalma, a na n paama toogo.” (Yelbũna 13:20) Wala 2 Pɛɛr 1:16 sẽn keoogd tõndã, d segd n laka d mens ne “soalem sẽn yaa belgr[e],” bɩ sã n yaa ne a Knox Rom Katolik lebgrã, ne “soalem ninsaal sẽn maane.” Dũni kiris-nedemdã sɩdã-kɩɩsdb zãmsg la b kibs rãmb wʋsg bee rẽ sʋka.
9. Wãn-wãn la d tõe n sak Yagd Kãsengã nomb sõma?
9 Rẽnd wala sẽn zems ne tõnd manesmã la Wẽnnaam tõe n nom tõndo. D tõe n lebs n togsa a Davɩɩd pʋʋsgã ne sik-m-meng a Zeova taoore: “Wẽnnaam, bɩ y fees maam n bãng m sũuri, mak-y maam n bãng m tagsgo n ges mam sã n tũuda so-wẽnga la y yãag maam sor sẽn ka sɛt pʋgẽ.” (Yɩɩl Sõamyã 139:23, 24) A Zeova kɩtdame tɩ b moon Rĩungã koɛɛga. Tõnd sũyã saka koe-noogã la a Zeova sor-wilgr a taabã ne nanebo. Ne a siglgã tũnugri, a kɩtdame tɩ d paam zu-noodã toɛ-toɛ sẽn tɩ loe ne koe-noogã moonegã. Bɩ d gãd bõn-kãensã kãn-kãe la d nong-b wʋsgo.—Filip rãmba 1:9-11.
10. Wãn-wãn la d segd n modg n tũ tẽeb geelg-n-tʋm dãmba?
10 Tara yõod wʋsg tɩ d kelg Wẽnnaam Gomdã wakat fãa, n tũud Biiblã daar fãa kareng geelg-n-tʋme, la d maandẽ tɩ Gʋlsgã la a Zeova tʋʋmdã yɩ d sõsgã yẽbgr zagsã pʋsẽ la d zo-rãmbã sʋka. Daar verse wã vaeesg geelg-n-tʋm yibeoog no-soakã taablẽ wã a Zeova Kaset rãmbã Betɛllã zakẽ la misioneer dãmbã rotẽ nong n tara Biiblã kareng sẽn yaa koɛɛg semen a yembre, la yʋʋmdã pʋgẽ Annuaire kareng sẽn yaa koɛɛg semen a to. Yãmb zakã tõe n maana seglg kãngã bɩ? Ad d fãa sɩd paamda bark wʋsg me, ne d lagem-n-taarã tũnugr kiris-neb tigengẽ wã, d tigissã ne taabã pʋsẽ, la sẽn yɩɩd fãa d kẽes-m-mengã Gũusg Gasgã zãmsgẽ semen fãa wã!
B nomda tõnd sẽn na yɩl n tɩ d mao ne magsa wã
11, 12. a) Wãn-wãn la d tõe n tũ a Zak saglg ning sẽn tɩ loe ne magsa wã d daar fãa vɩɩmã pʋgẽ? b) Wãn-wãn la a Zoob sẽn vɩɩmd bũmb ningã raoond tõnd tɩ d tall burkĩndlem?
11 Tõnd daar fãa vɩɩmã pʋgẽ, Wẽnnaam basda yɛl kẽer tɩ waabo, tɩ d tõe n neẽ tɩ sãnda yaa toogo. Wãn-wãn la d segd n ges yel-kãense? Wala Zak 4:8 sẽn sagendã, d ra tol n tall sũ-toog ye, la bɩ d kolg Wẽnnaam, n teeg-a ne d sũurã fãa, n tar bas-yard tɩ d sã n ‘kolg bãmba, bãmb na kolg tõndo.’ Yaa sɩda, d na n tõoga toog ne yel-tood la magsa, la b bas-b lame tɩ b beẽ sẽn na yɩl n sõng n nom tõndo, tɩ baasgã yaa sũ-noog bũmbu. Zak 1:2, 3 kõta tõnd bas-m-yam woto: “M ba-biisi, makr toɛ-toɛ sã n paam yãmba, bɩ y geelg bãmb wa sũ-noog bala, tɩ yãmb miimi tɩ yãmb tẽeb makr wata ne sũ-mare.”
12 A Zak yeelame yɛsa: “Ned sã n paam makre, bɩ a ra yeel tɩ yaa Wẽnnaam n makd yẽ ye. Tɩ bõe, bũmb ka tõe n mak Wẽnnaam tɩ b maan wẽng ye, la Wẽnnaam menga ka makd ned ba a ye t’a maan wẽng ye. La ned kam fãa tara makr a meng wẽnga ratem sẽn makd yẽnda n bẽt yẽnda.” (Zak 1:13, 14) D magsa wã tõe n yɩɩ wʋsg la toɛ-toɛya, la wala sẽn da yɩ to-to ne a Zoobã, b fãa sõngdame me n nomd tõndo. Ad sɩd yaa bas-m-yam sẽn yaa kãseng la Gʋlsgã sẽn kõt tõnd Zak 5:11 pʋgẽ wã: “Gese, tõnd yetame tɩ bark bee neb nins sẽn sakd namsg ne sũ-mara zutu. Yãmb wʋma a Zoob sũ-mara yelle, la yãmb bãnga Zusoaba sẽn yaool n maan bũmb ninga n kõ yẽnda, tɩ bõe, Zusoaba tara sũ-bʋgsem la ninbãan-zoeer hal wʋsgo.” Wala laas sẽn be Yagd Kãsengã nusẽ, bɩ d tall d burkĩndlmã wakat fãa, ne bas-m-yam sẽn wõnd a Zoob rẽndã tɩ baasgã na n yɩɩ sõma!—Zoob 2:3, 9, 10; 27:5, NW; 31:1-6; 42:12-15.
D nom d kambã
13, 14. a) Wakat bʋg la roagdbã segd n sɩng b kambã nombo, la ne baasg bʋg b yamẽ? b) Baasg bʋs sẽn be yamleoog la y tõe n sõdge?
13 Roagdbã tõeeme n kẽes b mens n nom b kambã, b yãadem wakat tɛka, la ad d kambã sɩd tõe n wa yɩɩ burkĩndlem talldb hal sõma! (2 Tɩmotɩ 3:14, 15) Yɩɩ woto, baa makrã sã n da yaa kɛgems wʋsgo. Yʋʋm a wãn sẽn looge, namsgã tẽebã yĩng sẽn da wa n be a zug tẽn-sʋkã Afirik tẽng a yembrẽ, zak sẽn zems ne bas-yard n solg n yiisd Gũusg Gasgã roog yaanga. Daar a yembre sodaas n da wa n bui sorã, n kẽed zak-zak n baood kom-bɩɩs n na n yãk sodaare. Kom-dibli a yiibã sẽn da be zakẽ wã ra ket n tara sẽk n na n solge, la sodaasã sã n da bao, b ra na n sɩd wa baas n yãa sɛbã yiisg masĩn. Rẽ ra tõe n baasa ne nams-toaag wʋsg bɩ zakã gill kʋʋbo. Bõe la b ra tõe n maane? Kom-bɩɩs a yiibã zẽka b koees sõma n sõdg Zã 15:13 goamã: “Nonglem ka be sẽn yɩɩd woto ye, tɩ ned sak kũum a zo-rãmb yĩnga.” B pẽdgame n kell n pa salõ wã pʋgẽ. Sodaasã ra na n yã-b lame n nams-b wʋsg tɩ sãmbg ka be, bɩ b kʋ-b menga, b sã n da zãgs tɩ b kõn kẽ sodaarã. La rẽ poore, b ye pa na n vaees n paas ye. La sɛbã yiisg masĩn la zakã neb a taabã na n põsame. La baasgã yɩɩ sõma wʋsgo. Sodaasã sɩd gãnga ro-kãngã, n kẽng rot a taabẽ wã! Ninsaalb kãensã sẽn paam nomb n yɩ laas tʋʋmd sẽn be waoogr yĩngã põsa ne sɛb yiisg masĩnã, n ket n yiisd tẽebã rɩɩb wakat sẽn zems pʋgẽ. Kom-dibli a yiibã a yembr ne a ba-bi-poak n sõgend Betɛllẽ wã masã. Biriblã ket n tʋmda ne masĩn-kʋdrã.
14 B tõe n zãmsa kom-bõonegã b sẽn na n pʋʋs to-to. La Wẽnnaamã reegda b pʋʋsgã. Makr sẽn yaa kãseng sẽn wilgd rẽ n zĩnd Ruwãnda kʋ-beedã sasa. Tõatb sẽn da waa n dat n kʋ yʋʋm a yoob bipugl la a roagdbã ne gernaad lobdem, bipuglã zẽka a koɛɛg n pʋʋs a Zeova ne a sũur fãa n kotẽ t’a fãag-ba, sẽn na yɩl tɩ b paam n ket n kẽngd taoor ne a tʋʋmdã. Neb nins sẽn da rat n kʋ-bã yĩn-sidg nekame tɩ b bas-b n yeele: “Bipugl kɩdg kãngã yĩnga, tõnd pa tõe n kʋ yãmb ye.”—1 Pɛɛr 3:12.
15. A Poll keooga ne pãn-tusd-wẽns bʋse?
15 Pa tɩlae ne tõnd kambã wʋsg sẽn yɩɩd tɩ b mao ne yɛl toom sẽn ta b rãmb nins b sẽn bilg yĩngrã ye, la makr wʋsg la b segd lekollẽ wã, la rũndã-rũndã ãdem-biisã sẽn kʋɩɩbã sʋka: gom-yoodo, pornogarfi, reem wẽnse, kom-taasã sẽn tusd-b tɩ b tall minim wẽnsã piuuga zĩis wʋsgo. Tʋm-tʋmd a Poll keooga ne pãn-tusd-kãensã n yɩlem wʋsgo.—1 Korẽnt dãmba 5:6; 15:33, 34; Efɛɛz rãmba 5:3-7.
16. Wãn-wãn la ned tõe n lebg laag tʋʋmd sẽn be waoogr yĩnga?
16 A sẽn gom laas b sẽn bĩngi, tɩ ‘kẽer tar waoogre, tɩ kẽer tʋʋmd yaa rẽgdã’ yell poore, a Poll yeelame: “Dẽ yĩnga, ned sã n zĩnd pʋ-peelem n lak ne bõn-kãense, a na n yɩɩ laaga a tʋʋmd sẽn tar waoogre, la sẽn bĩng toor a Zusoaba tʋʋmd yĩnga, la sẽn tõe n maan tʋʋm sõama fãa.” Woto, bɩ d raool d kambã tɩ b gũus b tũud-n-taarã. Bɩ d kɩt tɩ b ‘lak ne yãadem datem wẽnga, la b bao tɩrlem ne tẽebo la nonglem ne laafɩ ne neb nins fãa sẽn pʋʋsd Zusoaba ne pʋ-peelmã.’ (2 Tɩmotɩ 2:20-22) Zak pʋgẽ geelg-n-tʋm sẽn na yɩl n ‘kengd taab’ tõe n talla yõod sẽn pa tõe n sɩf biig nomb pʋgẽ. (1 Tesalonik rãmba 5:11, NW; Yelbũna 22:6) Biibl kareng la a zãmsg daar fãa, n tũnugd ne Sosiete wã sɛb sẽn zems tõe n yɩɩ sõngr meng-menga.
Ned kam fãa nombã
17. Wãn-wãn la kiblgã na n nom tõndo, la rẽ wata ne baasg bʋg sẽn be sũ-noogo?
17 Sẽn na yɩl n nom tõndo, a Zeova kõt-d-la sagls sẽn yit a Gomdã pʋgẽ, la ne a siglgã tũnugri. Ra tol-y n zãgs sagls a woto sẽn yit Wẽnnaam nengẽ wã ye! Sak-y-yã ne yam, la bas-y t’a nom-y t’a Zeova maan waoogr tʋʋmd ne-yã. Yelbũna 3:11, 12 sagenda woto: “M biiga, ra paoog Zusoaba zãmsg ye, la ra zoe b tãsga ye. Tɩ bõe, Zusoaba sɩbgda b sẽn nong a soab wa ned sẽn sɩbgd a bi-nongre.” Sẽn paase, ba saglg la b kõt Hebre dãmba 12:6-11 pʋgẽ woto: “Zusoaba sɩbgda bãmb sẽn nong a soaba . . . Yaa sɩda tɩ sɩbgr fãa wakate wẽnda toogo la sũ-sãoongo, la baoosgo, a yaool n wata ne tɩrlem la laafɩ neb nins sẽn sakda yĩnga.” Bõn-tũnugdg kãseng ning b sẽn tũnugd ne n kõt kiblg a woto wã segd n yɩɩ Wẽnnaam Gomdã vʋʋsem sõng sẽn vẽneg tɩ b gʋlsã.—2 Tɩmotɩ 3:16, 17.
18. Sã n yaa ne tek-yam-n-kos-sugrã wɛɛngẽ, bõe la Luk sak 15 zãmsd tõndo?
18 A Zeova yaa ninbãan-zoɛt me. (Yikri 34:6) Zĩig ning tek-yam-n-kos-sugr hakɩk sẽn wilgẽ, baa yaa yel-wẽnd ning sẽn yaa kãseng n yɩɩdã yĩnga, a kõta sugri. Baa rũndã-rũndã ‘laog sãamdb’ tõe n paama nomb n lebg laas tʋʋmd sẽn be waoogr yĩnga. (Luk 15:22-24, 32) Tõe tɩ tõnd yel-wẽnã pa wẽns n ta laog sãamdã rẽnd ye. La tõnd sik-m-meng sakrã ne Gʋlsgã sagls na n kɩta wakat fãa tɩ d paam nomb n lebg laase, rɩk-n-tʋm sẽn be waoogr yĩnga.
19. Wãn-wãn la d tõe n ket n sõgend wala laas sẽn be waoogr a Zeova nusẽ?
19 Tõnd sẽn zãms n bãng sɩdã pipi wã, d wilga d tʋlsem n na n bas t’a Zeova nom-do. D basa dũniyã soya, n sɩng n yeelgd nedemd paalgã, n lebg kiris-neb sẽn dɩk b mens n kõ n deeg lisgu. D saka saglg ning sẽn be Efɛɛz rãmba 4:20-24 pʋgẽ wã n ‘bas nedemd kʋdgã sẽn da zemsd ne tõnd pĩnd tʋʋm manesmã, ne a tʋlsem sẽn belgdã, n yeelgd nedemd paalgã b sẽn naan tɩ zems ne Wẽnnaam daabã, tɩrlem la kɩs-sɩd hakɩk pʋsẽ wã.’ D yembr-yembrã, bɩ d ket n yaa nuga a Zeova sẽn yaa Yagd Kãsengã nusẽ t’a nom-do, n sõgend wakat fãa wa laase, tʋʋmd sẽn be waoogr yĩnga!
Lebg-n-gese
◻ Yagd Kãsengã raab ne tẽngã yaa bõe?
◻ Wãn-wãn la y tõe n paam nomb tʋʋmd sẽn be waoogr yĩnga?
◻ Ne manesem bʋg la kambã tõe n paam nombo?
◻ Wãn-wãn la d segd n ges kiblgã?
[Picture on page 20]
Yãmb na n paama nomb tʋʋmd sẽn be waoogr yĩng bɩ b na n zãgs-y lame?
[Picture on page 22]
Kom-bɩɩsã tõe n paama nomb b yãadem tɛka