Daar a ye tigis-kãsengã na-kẽndre

Yʋʋmd 2008 daar a ye tigis-kãsengã gom-zug yaa: ‘Tõnd yaa yagdo, t’a Zeova yaa tõnd yagda.’ A tika Ezai 64:7 zugu. Sagls nins d sẽn na n paamã na n kɩtame tɩ d bãng d Yagdg Kãseng a Zeova yamã, a tɩrlmã, a pãngã, la a nonglmã n paase.

Tigims sull yel-gɛtã na n wɛgsa sõsg ning gom-zug sẽn yaa: “D yɩ wa laas sẽn yaa sõma, koɛɛgã mooneg pʋgẽ.” Sõs-kãngã na n sõng-d lame tɩ d bãng neb wʋsg sẽn paamd bark ninsi, b sẽn bãng sɩdã la b wilgd b taabã yĩngã. Sõsg ning gom-zug sẽn yaa: “D sã n bʋgsd Biiblã zug sõma, na n kogl-d lame” wã na n sõng-d lame tɩ d bãng a Zeova noyã zut bʋgsg sẽn kogend-d to-to. Tigis-kãsengã kaagdã na n wɛgsa sõsg ning gom-zug sẽn yaa: “D ra yɩ wa dũniyã rãmb ye” la “D sak tɩ Yagd Kãsengã maneg-d sõma n paase.” Roagdbã la kom-bɩɩsã na n paama sagls sẽn kengd b raood gom-zut nins sẽn pʋgdã wɛgsg sasa: “Kom-bɩɩs sẽn tar yõod a Zeova nifẽ,” la “Roagdbã sẽn segd n maan bũmb nins tɩ b kambã wa yɩ sõma.” Bool-n-sogs la mak-n-wilg rãmbã na n kɩtame tɩ d bãng d saam-biisã la saam-bi-pogsã sẽn tʋmd tʋʋm nins koɛɛgã mooneg pʋgẽ. Neb nins sẽn dat n deeg lisgã segd n wilga b tigingã yel-gɛtb taoor-lʋɩt tao-tao. Tẽeg-y n zã-y Gũusg Gasg ning b sẽn na n zãms tigis-kãsengã semennã n wa.

Yagd Kãsengã sẽn dat n maan bũmb ning fãa a maandame. La yaa tõnd ned kam fãa n yãkd a sã n na n sakame bɩ a pa na n sak t’a maneg-a. Neb nins sẽn sulgd-b mens n sakd a Zeova noyã la b sakd t’a manegd-bã tõe n lebga wa yagd sẽn be ned sẽn mi yagb nugẽ, t’a yag-a la a maneg-a sõma t’a lebg bũmb sẽn tar yõodo. D sã n sakdẽ t’a Zeova manegd tõnd woto, d waoogda a naamã sẽn ka to wã la d paamd bark wʋsgo.