Daar a ye tigis-kãsengã na-kẽndre

Yʋʋmd 2009 daar a ye tigis-kãsengã gom-zug la woto: “D ‘gũus neer n tʋm Zusoabã tʋʋmdã, n maan-a n baase.’ ” A tika Kolos rãmb 4:17 zugu. Kiris-nebã segd n tũu sagl-kãngã ne b sũy fãa. D sẽn dat n maan bũmb ning yaa d moon koɛɛgã neer wa a Zezi sẽn da moond-a to-to wã. (Zã 17:4) Koɛɛgã mooneg wɛɛngẽ, tʋm-tʋmd a Poll me kõo mak-sõngo. A ra yãka yam n na n moon koɛɛgã n tãag a kũum.—Tʋʋ. 20:24.

Tigims sull yel-gɛtã sõsgã na n wilga koe-moondb toɛy-toɛy sẽn tõogd zu-loees koe-moonegã pʋgẽ to-to. Rẽ poore, sõsg ning gom-zug sẽn yaa “Ges-y bũmb ning y sẽn bʋdã yell sõma” wã na n wilga d sẽn tõe n sɩd sõng “neb nins fãa sẽn dat vɩɩm sẽn kõn sa wã” to-to. (Tʋʋ. 13:48, NW ) Sõsd sẽn yaa kaagdã na n sɩnga ne verse rãmb nins sẽn be 2 Korẽnt dãmb 6:1-10 wɛgsg yembr-yembre. A sõsgã gom-zug yaa “D sẽn wilgd tɩ d yaa Wẽnnaam tʋm-tʋmdb to-to.” Zaabrã, a na n wɛgsa sõsg ning gom-zug sẽn yet tɩ “Koɛɛgã mooneg yaa tʋʋmd sẽn tar ziiri.” Sãmbg sẽn ka be, sõss nins sẽn pʋgdã na n kenga d pelse: “Kambã la kãsembã fãa moonda koɛɛgã ne sũ-noogo,” “Kom-bɩɩs sẽn moond koɛɛgã ne yẽesem.” Neb nins sẽn dat n deeg lisgã segd n togsa b tigingã yel-gɛtbã taoor-lʋɩt tao-tao. D tigis-kãsemsã sasa, Gũusg Gasgã zãmsg yaa bũmb sẽn tar yõod wʋsgo. Zã-y Gũusg Gasg ning d sẽn segd n zãms tigis-kãsengã semennã n wa.

Sẽn na yɩl n gũus neer n tʋm d tʋʋmdã sõma, d segd n modgdame tɩ yɛl a taab ra wa rɩk sẽk ning d sẽn segd n dɩk n tʋʋm tʋʋmd-kãngã wã ye. Sagls nins d sẽn na n paam daar a ye tigis-kãngã sasa wã na n sõnga d fãa tɩ d bãng bũmb nins d sẽn segd n maan sẽn na yɩl n tall yam sõngo, la d tags bũmb nins d sẽn maand koɛɛgã mooneg pʋgẽ wã zug sẽn na yɩl n tʋm-a n baase.