Mamsg n kõ kiris-neb sagendbã (Latter part of article “Offering ... Sacrifices to Jehovah.”)
“Yaa bõe yĩng tɩ fo sũur puudẽ tɩ f gãnem f nenga? Yaa ne sʋk kãnga la a Zeova kɩt ne sõmblem t’a Kayẽ tagse. A pa modg a Kayẽ t’a toeem ye, bala a Kayẽ ra yaa ned sẽn so a meng vɩɩm manesmã wɛɛngẽ. (Mak-y ne Tõodo 30:19.) Baasg zãnga, a Zeova pa maan sãmb-sãmb n wilg a Kayẽ a tõdgr kae manesem sorã biis sẽn ya a soab ye. A keooga a Kayẽ woto: “Fo sã n maan neere, fo ka na n zẽk f neng sɩda? La fo sã n ka maan neere, kongr wʋngã fo rignoorẽ n dat n paam foom, bɩ f tõog yẽnda.”—Sɩngre 4:6, 7.
Zemsame tɩ d bãng tɩ baa ne lengr sẽn tar pãng kãnga wã, a Zeova pa ges t’a Kayẽ yaa wa ned sẽn ‘pa tar saagr ye.’ Sẽn yaa lebende, a togsa a Kayẽ bark nins sẽn gũud-a wã, a sã n da toeem a manesmã, la a wilga ne bas-m-yam t’a Kayẽ ra tõe n tõoga zu-loɛɛg kãnga a sã n da yãkame n na n maan dẽ. “Fo sã n wẽnemd n maan sẽn yaa sõma,” woto la a Zeova yeel-yã, “sũ-noog pa na n zĩnd sɩda?” A leb n sʋka a Kayẽ yẽ nin-kʋʋr sũ-yik-kãsengã wɛɛngẽ: “Sã n yaa ne foom, fo na n tõog-a lame bɩ?”(NW ).
Rũndã-rũndã, kẽem dãmbã sẽn be kiris-neb tigengẽ wã segd n dɩka togs-n-taar ne a Zeova makrã. Wala b sẽn wilg tɩ be 2 Tɩmotɩ 4:2 pʋgẽ wã, wakat ninga b togame n “wilg neba b kongre,” la b “lenge,” tɩ yɩ vẽeneg n wilg biis nins sẽn menembã tõdgr manesem sorã sẽn wat ne wã. Wakat kãng pʋgẽ me, kẽem dãmbã segd n ‘saglame.’ Gerɛk gom-biig ning sẽn yaa pa·ra·ka·leʹo wã rat n yeelame tɩ “raoole.” “Saglgã pa zabr no-koeemd bɩ sãbsg ye. Belsg sẽn tõe n yɩ võor wʋmb a to wã yĩnga, wilgda woto me.” Woto la Theological Dictionary of the New Testament sebrã yeta.
Vẽenega, Gerɛk gom-biig sẽn loe ne-a wã sẽn yaa pa·raʹkle·tos, tõe n tɩ loee ne sõngda bɩ bʋʋd zĩigẽ avoka. Woto yĩnga, baa kẽem dãmbã sã n kõt lengr sẽn toge, b segd n tẽegame tɩ b yaa sõngdb lakae b pa bɛɛb ne ned ning sẽn dat saglgã ye. Wala a Zeova, kẽem dãmbã segd n daoolame, n wilgd bas-m-yam t’a soab ning sẽn paamd saglgã tõe n tõoga a zu-loeesã.—Mak-y ne Galat dãmba 6:1.
Sɩda, sẽn na n baase, bee ne nedã t’a rɩk saglgã n tʋme. (Galat dãmba 6:5; Filip rãmba 2:12) Sagendbã tõe n yãame tɩ neb kẽer pa reegd b keoogrã ye, kɛpɩ wala a Kayẽ sẽn yãk n maan toor kae ne lengr sẽn yit Naandã meng nengẽ wã. Baasgo, kẽem dãmbã sã n dɩkd togs-n-taar ne a Zeova sẽn yaa kiris-neb sagendbã Mamsg sẽn zems zãnga, b tõe n kɩsa sɩd tɩ b maana b sẽn segd n maane.