“Tags” Wẽnnaam doogã “zug ne f sũur fãa”!

“Ninsaal biribla, . . . tags mam sẽn wilgd foo bũmb ningã fãa wã zug ne f sũur fãa . . . Togs Israɛll doogã bũmb ning fãa fo sẽn ne wã.” —EZEKIƐLL 40:4, NW.

YƲƲMD 593 S.D.T.W. ra yɩɩ Israɛll yembd kẽngr yʋʋmd 14 soabã. Ne Zʋɩf rãmb nins sẽn vɩ Babilonã, b ba-yirã b sẽn nong wʋsgã ra segd n sɩd wõnda zĩ-zãrgo. Bãmb wʋsg sẽn yɩɩd sẽn yã Zerizalɛm b yaoolmã t’a ra wita bugum, t’a lal-bɛdã siigame, t’a rotã sẽn tar dasãndã ra yaa raboodo. A Zeova wẽn-doogã, sẽn da kõt galʋ-tẽngã zu-zẽkrã, sẽn da yaa baleng yɩlemd nif zãntãa sẽn be tẽng gill zugã ra lebga raboogo. Masã, Israɛll yembdã ra bee a sɩngrẽ bala. Ra yaa yʋʋm 56 n ket n da segd n loog tɩ fãagrã b sẽn da pʋlmã yaool n wa.—Zeremi 29:10.

2. Bõe yĩng tɩ Wẽnnaam doogã sẽn be Zerizalɛmã yell tẽegr sãam a Ezekɩɛll sũuri?

² Ra segd n yɩɩ bũmb sẽn sãam kɩs-sɩd no-rɛɛs a Ezekɩɛll sũur t’a tags tɩ Wẽnnaam doogã sẽn da be kɩlometr kobsã ra yaa raboog we-rũms sẽn da beẽ. (Zeremi 9:10) Yẽ meng ba a Buzi ra sõgena be wala maan-kʋʋda. (Ezekɩɛll 1:3) A Ezekɩɛll ra na n paama zu-noog kãngã me, la b rɩk-a lame n loog yembd ne Zerizalɛm nin-bɛdã yʋʋmd 617 S.D.T.W., a sẽn da ket n yaa bi-bɩɩg sasa wã. Masã a sẽn da tar sẽn zems yʋʋm 50, wõnda a Ezekɩɛll ra miimi t’a ra pa na n ye yã Zerizalɛm abada bɩ a kẽes a meng a wẽn-doogã meebẽ ye. Rẽ, mams-y n ges a Ezekɩɛll sẽn paam yãabã sẽn tɩ loe ne wẽn-doog sẽn tar ziirã sẽn sidg a yĩng to-to!

3. a) A Ezekɩɛll yãabã sẽn tɩ loe ne wẽn-doogã bõn-datl da yaa bõe? b) Yãabã yel-kãsems a naasã yaa bʋse?

³ Yãab kãngã sẽn wogmã sẽn pid a Ezekɩɛll sebrã sags a wɛ wã, kõo Zida yembsã kãabg sẽn kengd tẽebo. Baleng yɩlemdã ra na n lebs n luglame! Yʋʋm kob-gĩn nins sẽn pʋgl dẽ wã tɛk hal tɩ ta tõnd wakatã menga, yãab kãngã yɩɩ raoolg bũmb n kõ neb nins sẽn nong a Zeova wã. Wãn-wãna? Bɩ d vaees yãab kãngã sẽn yaa bãngr-gomdã võor sẽn yɩ a soab ne Zʋɩf rãmb nins sẽn da yaa yembs Babilonã. A tara yel-kãsems a naase: wẽn-doogã, maan-kʋʋrã, naabã, la tẽngã.

Wẽn-doogã b sẽn lebs n luglã

4. Yɛ la b rɩk a Ezekɩɛll n kẽng yãabã sɩngrẽ, bõe la a yã be, la ãnd n wilg-a sor gesgã pʋgẽ?

⁴ Pipi, b talla a Ezekɩɛll n kẽng “tãn-kãseng zugu.” Tãngã zug rɩtg babgẽ wã, wẽn-do-kẽeng sẽn wõnd galʋ-tẽng sẽn gũbg ne lalg n be be. Malɛk sẽn “pɩnd wa zũud” n dɩk no-rɛɛsã t’a ges zĩisã zãnga. (Ezekɩɛll 40:2, 3) Yãabã wakate, a Ezekɩɛll yãa malɛkã sẽn maag a yĩng n magd wẽn-doogã noy a tãab sẽn mag yiib-yiib n zems taabã la b gũubã roto, la yɩng samande, pʋgẽ-pʋgẽ samande, rɩɩb roto, tẽn-kugri la wẽnd-do-sõng ne a Zĩ-sõng la a Zĩ-sõng Sẽn yɩɩdã ro-pʋse.

5. a) Bas-m-yam bʋg la a Zeova kõ a Ezekɩɛlle? b) “B rĩm dãmba kũuma” b sẽn da segd n dɩk n yiis wẽn-doogẽ wã ra yaa bõe, la bõe yĩng tɩ woto ra tar yõodo?

⁵ Rẽ poore, a Zeova mengã puka yãabã pʋgẽ. A kẽe wẽn-doogẽ wã n kõ a Ezekɩɛll bas-m-yam t’A na n zĩnda be. La A baoodame tɩ b yɩlg A roogã n yetẽ: “La masã, bɩ b bas b bõn-naandsa waoogre [“yoobã,” NW ] la b yiis b rĩm dãmba kũuma m nengẽ n zãage. La m na n zĩnda b sʋk wakat fãa.” (Ezekɩɛll 43:2-4, 7, 9) Vẽenega, ‘b rĩm dãmba kũum’ kãensã tɩ loee ne bõn-naandse. Zerizalɛm rĩm-tõtbã la a nin-tõtsã ra rẽgma Wẽnnaam doogã ne bõn-naandse, la sɩda, b maaname tɩ bãmb yɩ b rĩm dãmba. (Mak-y ne Amos 5:26.) B sẽn zãr ne b yɩ wẽn-vɩɩs bɩ rĩm-vɩɩse, b ra pa vɩ ye, b ra yaa bõn-dẽgd a Zeova nifẽ. B ra segd n yiis-b lame.—Maankʋʋre 26:30; Zeremi 16:18.

6. Wẽn-doogã magb võor da yaa bõe?

⁶ Yãabã bab-kãngã tags-kãseng ra yaa bõe? A kõo yembsã bas-m-yam tɩ baleng yɩlemdã ra na n lebs n lugla zãng Wẽnnaam doogẽ wã. Sẽn paase, wẽn-doogã magb kõo bas-yard-poeer sẽn yit Wẽnnaam nengẽ tɩ yãabã pidsg ra yaa waazib tɩ sãmbg ka be ye. (Mak-y ne Zeremi 31:39, 40; Zakari 2:6-12.) B ra segd n menesa bõn-naands pʋʋsg vũk fãa. A Zeova ra na n ninga a roogã bark yɛsa.

Maan-kʋʋdbã la naabã

7. Kɩbay bʋs la b kõ sẽn tɩ loe ne Levit rãmbã la maan-kʋʋdbã?

⁷ Maan-kʋʋdbã ra segd n paama yɩlgre, bɩ manegr me. B ra segd n lenga Levit rãmbã b sẽn pʋʋs bõn-naandsã yĩnga, tɩ b yaool n da segd n pẽg la b keo a Zadok komdibli wã sẽn yaa maan-kʋʋdbã, b sẽn paa n yɩ yɩlma yĩnga.a Baasgo, sul a yiibã ra na n paama sõgeneg yasr Wẽnnaam doogã sẽn lebs n luglã pʋgẽ, tɩ sãmbg sẽn ka be, rẽ ra be ne b yembr-yembrã sẽn da na n tall kɩs-sɩda. Sẽn paase, a Zeova yiisa noor woto: “Bɩ b zãms m neba tɩ b bãng bũmb sẽn welg toor mam yĩng ne bõn-zaals n bake. La b wilg bãmb tɩ b bãng bũmb sẽn yaa yɩlemd ne bõn-dẽgd sẽn yaa to-to.” (Ezekɩɛll 44:10-16, 23) Woto, b ra segd n lebs n lugla maan-kʋʋrã, la maan-kʋʋdbã tõog-toogã ne kɩs-sɩdã ra na n paama keoobo.

⁸ Yãabã gomda ned b sẽn boond tɩ naabã me. A Moiiz wakatã tɛka, buudã ra tara nanambse. Hebre gom-biig ning b sẽn lebg ne naaba, nası’ tõeeme n tɩ loe ne ned sẽn ya a ba zaka, buud bɩ tẽng meng zu-soaba. A Ezekɩɛll yãabã pʋgẽ, b lenga Israɛll nanambsã sulli, b sẽn nams nin-buiidã yĩnga, la b sagl-b lame tɩ b yɩ neb sẽn pa welsdb la sẽn yaa tɩrse. Baa ne a sẽn pa be maan-kʋʋdbã sullẽ wã, naabã tʋmda ne manesem kãseng baleng yɩlemdã pʋgẽ. A kẽeda yɩng samandẽ wã la a yit be ne buud nins sẽn pa be maan-kʋʋdbã sʋkã, n zĩ Yaang Kʋɩlengã noorẽ, n kõt nin-buiidã maand kẽer tɩ b maane. (Ezekɩɛll 44:2, 3; 45:8-12, 17, NW ) Woto, yãabã ra kõta a Ezekɩɛll nin-buiidã bas-m-yam tɩ buudã sẽn lebs n luglã ra na n paama bark ne taoor dãmb sẽn kõt mak-sõngo, roap sẽn da na n teel maan-kʋʋrã n sigl Wẽnnaam nin-buiidã la b yɩ mak-sõma tẽebã yɛl wɛɛngẽ.

Tẽngã

9. a) Wãn-wãn la b ra segd n pʋɩ tẽngã, la ãnd n da pa na n paam pʋɩɩre? b) Kũun sõngã ra yaa bõe, la bõe n da be a pʋgẽ?

⁹ Sẽn na n baase, Israɛll tẽngã ra bee a Ezekɩɛll yãabã pʋgẽ. B ra segd n pʋɩ-a lame, la b ra segd n yãka babg n kõ buud fãa. Naabã me ra na n paama pʋɩɩre. La maan-kʋʋdbã ra pa na n paam ye, bala a Zeova yeelame: “Yaa maam la bãmb pʋɩɩre.” (Ezekɩɛll 44:10, 28; Sõdbo 18:20) Yãabã wilgame tɩ naabã pʋɩɩr a sẽn paamd tẽngẽ wã ra na n zĩnda zĩig sẽn yaa zallẽ b sẽn boond tɩ kũun sõngã zĩig babs fãa. Ra yaa zĩig woglem la a yalem sẽn zem taab b sẽn pʋɩ zĩis a tãabo: yĩngr soabã yaa Levit rãmb nins sẽn tek yam n kos sugrã rẽnda, tẽn-sʋk soabã yaa maan-kʋʋdbã rẽnda, tɩ tẽngr soabã yaa galʋ-tẽngã rẽnda, ne sẽn gũbg-a wã, a zĩigã sẽn kõt koodã. A Zeova roogã ra na n zĩnda b sẽn bẽeg n kõ maan-kʋʋdbã zĩigẽ, zĩig woglem la a yalem sẽn zem taabã sẽn yaa kũunã tẽn-sʋka.—Ezekɩɛll 45:1-7.

10. Bãngr-gomd ning sẽn tɩ loe ne tẽngã pʋɩɩbã võor ne Zida kɩs-sɩd dãmbã sẽn da be yembdẽ wã ra yaa bõe?

¹⁰ Ad woto fãa sɩd ra segd n yɩɩ bũmb sẽn keng yembs kãensã sũyã! B ra kõta zak fãa bas-m-yam t’a ra na n paama pʋɩɩr tẽngã pʋgẽ. (Mak-y ne Miise 4:4.) Baleng yɩlemdã ra na n paama zĩig sẽn zẽke, sẽn be tẽn-sʋk be. La bãng-y t’a Ezekɩɛll yãabẽ wã, wala maan-kʋʋdbã, naabã ra na n vɩɩmda tẽngẽ nin-buiidã sẽn kõ wala yamleoog kũuni. (Ezekɩɛll 45:16, NW ) Woto, tẽng ning b sẽn lebs n luglã pʋgẽ, nin-buiidã ra segd n maana yamleoog kũun n kõ neb nins a Zeova sẽn da yãk tɩ b lʋɩ taoorã, n tɛɛnd-ba, b sẽn lagemd n tʋmd b sor-wilgr pʋgẽ wã yĩnga. Ne bũmb fãa pʋgẽ, tẽn-kãng ra yaa makr meng ne siglga, lagem-n-tʋm la bãane.

11, 12. a) Bãngr-gomd pʋgẽ, wãn-wãn la a Zeova kõ a nin-buiidã bas-m-yam t’a ra na n ninga b ba-yirã sẽn lebs n luglã barka? b) Bõe la tɩɩsã sẽn da yɛgd mogrã kɩrengã ra makda?

¹¹ A Zeova ra na n ninga b tẽngã bark bɩ? Bãngr-gomdã leokda sʋk kãngã ne bilgr sẽn noogd sũuri. Koom n yit wẽn-doogẽ wã n zoetẽ, n tar yalgr n debda, n lebgd ko-zoetem sẽn tar pãng wʋsgo, a sã n wa kẽed Mog-kɩɩngẽ wã. Be, a vʋʋgda ko-rãmb nins sẽn ka vɩɩmã, tɩ kʋɩl-yẽedã tʋʋmd maand sõma mogrã kɩrenga. Kʋɩlgã noyẽ, tɩɩs wʋsg n womd biis yʋʋmdã fãa, n kõt rɩɩb la yĩns maagre.—Ezekɩɛll 47:1-12.

¹² Sã n yaa ne yembsã, kãabg kãngã tẽega pipi lebs-n-luglã bãngr-goamã b sẽn gãd ne b sũy fãa wã, la a sɩd wilgd tɩ b yaa sɩda. Naoor yaka, a Zeova no-rɛɛsdbã vʋʋsmã sẽn vẽnegã bilga Israɛll sẽn lebs n lugl sẽn ye tar neba, n wõnd arzãna. Zĩis sẽn yaa war sẽn lebg n wa vɩɩm pʋgẽ wã ra yaa gom-zug sẽn yaa bãngr-gomd sẽn da wat wakat fãa. (Ezai 35:1, 6, 7; 51:3; Ezekɩɛll 36:35; 37:1-14) Woto, nin-buiidã ra tõe n saagame t’a Zeova barkã sẽn kõt vɩɩmã ra na n kiiga wa kʋɩlg sẽn yit wẽn-doogã sẽn lebs n luglã pʋgẽ. Woto yĩnga, buud sẽn ki tẽebã wɛɛngẽ ra na n lebs n vɩɩmdame. Nin-buiidã sẽn lebs n luglã ra na n paama bark ne roap sẽn yaa tẽeb nin-kãsemse, roap sẽn yaa tɩrs la kãn-kãe wa tɩɩs nins sẽn be yãab mogrã kɩreng wogellã. Roap kãensã ra na n lʋɩɩ taoor n lebs n me tẽng sẽn yaa raboogo. A Ezai me ra gʋlsa “tɩrlem tɩ-kãsemsã” sẽn da na n “lebs n me zĩis nins b sẽn varg hal sẽn kaoosã” zutu.—Ezai 61:3, 4, NW.

Wakat bʋg la yãabã pids-yã?

13. a) Wãn-wãn la a Zeova ning a nin-buiidã sẽn lebs n luglã bark ne ‘tɩrlem tɩ-kãsemse’? b) Wãn-wãn la bãngr-gomd ning sẽn tɩ loe ne Mog-kɩɩngã ra pids-yã?

¹³ Yembs nins sẽn lebg n kulã sũy sãamame bɩ? A zãr ne woto! Kell b sẽn lebs n lugl n lebg n wa b ba-yirã b sẽn nongã pʋgẽ yʋʋmd 537 S.D.T.W. Sẽn waa n beẽ n beẽ, “tɩrlem tɩ-kãsemsã” wala gʋlsd a Ɛsdrase, no-rɛɛsdb a Azze la a Zakari la maan-kʋʋd kãsem a Zozue sor-wilgr pʋgẽ, zĩis nins b sẽn sãam hal sẽn kaoosã ra lebs n meeme. Nanambsã, wala makre, a Nehemi la a Zorobabɛll rɩɩ naam tẽngã pʋgẽ ne tɩrlem n pa tall welsg ye. A Zeova roogã ra lebs n luglame, la a seglsã vɩɩmã yĩngã sẽn ya a kaoolã tũub barkã, ye yɩɩ bũmb sẽn wa wʋsgo. (Tõodo 30:19; Ezai 48:17-20) Bark a yembr da yaa bãngrã. Maan-kʋʋrã tʋʋmd ra lebs n luglame, la maan-kʋʋdbã zãmsa nin-buiidã Tõogã. (Malaki 2:7) Rẽ kɩtame tɩ nin-buiidã ye paam pãng tẽebã wɛɛngẽ la b ye lebg a Zeova sõgen dãmb sẽn womd biisi, wala Mog-kɩɩngã b sẽn bilg t’a sãoogdẽ la a sakd zĩm yẽeb sẽn womd biisã sẽn wilgdã.

14. Bõe yĩng t’a Ezekɩɛll bãngr-gomdã pidsg ra segd n yɩɩg bũmb ning sẽn pʋgl Zʋɩf rãmbã sẽn waa n yi Babilon yembdẽ wã n wa wã?

¹⁴ Yaa a Ezekɩɛll yãabã pidsg la woto bal bɩ? Ayo, a wilgda bũmb sẽn yaa kãseng n yɩɩda. Ade: Wẽn-doog ning a Ezekɩɛll sẽn yã wã, b ra pa tõe n me-a wa b sẽn bilg-a wã ye. Sɩda, Zʋɩf rãmbã pa reem ne yãab kãngã ye, la b tũ a yɛl kẽer b sẽn togs n welg sɩdgem-sɩdgem.b Baasg zãnga, wẽn-doog ning b sẽn yã yãabẽ wã tõr da yaa kãseng tɩ loog ne a na tõog n yals Moria Tãngã zug sẽn da yaa pĩnd wẽn-doogã zĩigã menga. Sẽn paase, a Ezekɩɛll wẽn-doogã ra pa be galʋ-tẽngã pʋgẽ ye, la yaa yɩɩga, zĩig sẽn welg toor pʋgẽ, mik yiib-n-soab wẽn-doogã ra mee zĩig ning rẽenem soabã sẽn da beẽ wã, Zerizalɛm galʋ-tẽngã pʋgẽ. (Ɛsdras 1:1, 2) Sẽn paase, kʋɩlg sɩd-sɩd ba a yembr zɩ n yi Zerizalɛm wẽn-doogẽ wã ye. Woto, pĩnd Israɛllã yãa a Ezekɩɛll bãngr-gomdã pidsg kɩdg bala. Woto wilgdame tɩ yãab kãngã tẽeb pidsg sẽn yaa kãseng n yɩɩd n segd n zĩndi.

15. a) Wakat bʋg la a Zeova tẽeb wẽn-doogã lebg yel-sɩda? b) Bõe n wilgd t’a Ezekɩɛll yãabã pa pids Kirist tẽng zug vɩɩmã sasa?

¹⁵ Vẽenega, d segd n gẽega a Ezekɩɛll yãabã pidsg a Zeova tẽeb wẽn-do-kãsengã pʋgẽ, tʋm-tʋmd a Poll sẽn gomd a soab yell wʋsg Hebre dãmbã sebrẽ wã. Wẽn-do-kãng lebga yel-sɩd a Zezi Kirist sẽn waa n paam zaeeb wala Maankʋʋd Kãsem yʋʋmd 29 T.W. La a Ezekɩɛll yãabã pidsa a Zezi wakatã bɩ? Yaa vẽeneg tɩ ayo. A Zezi sẽn yaa Maankʋʋd Kãsma pidsa Paasg daarã võor bãngr-goamã wɛɛngẽ ne a lisgã reegre, a kũumã sẽn yaa maoongã la ne a kõomã Zĩ-sõng sẽn Yɩɩdẽ wã saasẽ mengã pʋgẽ maasem. (Hebre dãmba 9:24, NW ) La d bãng t’a Ezekɩɛll yãabã pa gomd maan-kʋʋd kãsma bɩ Paasg Daarã yell baa bilf ye. Rẽnd pa wõnd yãab kãngã ra gomda yʋʋm kob-yendẽ T.W. yell ye. La yaa wakat bʋg la a tɩ loe ne?

16. A Ezekɩɛll yãabã sẽn maand zĩig ningã tẽegda tõnd bãngr-gomd a to bʋgo, la wãn-wãn la rẽ sõngd tõnd tɩ d bãng a Ezekɩɛll yãabã pidsg kãseng sasa?

¹⁶ Sẽn na yɩl n paam leokre, bɩ d leb yãabẽ wã menga. A Ezekɩɛll gʋlsame: “Wẽnnaam talla maam bõn-makr pʋgẽ n kẽng Israɛll tẽng n tɩ sik maam tãng kãseng zugu. La a wẽnda wa tẽng n tilg a zug t’a rota teesd maam [“nug-goabg babgã,” NW ].” (Ezekɩɛll 40:2) Yãab kãngã sẽn maand zĩig ningã sẽn yaa “tãng kãseng[ã]” tẽegda tõnd Miise 4:1, NW sẽn yetã: “Rayã baasg sasa, na n zĩndame t’a Zeova roogã tãng lugl kãn-kãe tãensã zug-tẽn-sʋgs zutu, la a na n sɩd zẽkame n yɩɩg tãensã; la nin-buiid wʋsg na n kaoog n kẽnga be.” Wakat bʋg la bãngr-gomd kãngã pidsda? Miise 4:5 wilgdame t’a sɩngda tẽn-tẽnsã sẽn ket n balemd ziri wẽnnaam dãmbã sasa. Sɩda, yaa tõnd wakatã, “rayã baasg sasa,” la baleng yɩlemdã paam zẽkre, lebs n lugl a zĩig sẽn zemsẽ wã Wẽnnaam sõgen dãmbã vɩɩmẽ.

17. Wãn-wãn la bãngr-gomd ning sẽn be Malaki 3:1-5, NW pʋgẽ wã sõngd tõnd tɩ d bãng wakat ning a Ezekɩɛll yãabã wẽn-doog sẽn da paam yɩlgrã?

¹⁷ Bõe n kɩt tɩ lebs-n-lugl kãngã tõog n yɩ? Tẽeg-y t’a Ezekɩɛll yãabã yell ning võor sẽn tagma n yɩɩdã pʋgẽ, a Zeova waa wẽn-doogẽ wã n pẽdg tɩ b yɩlg a roogã n yiis bõn-naands pʋʋsgã. Wakat bʋg la b yɩlg Wẽnnaam tẽeb wẽn-doogã? Goam nins sẽn be Malaki 3:1-5, NW pʋgẽ wã, a Zeova reng n togsa wakat a sẽn da na n “wa A wẽn-dooga pʋgẽ,” t’a “kaoolã koe-taasd” a Zezi Kirist yãagd-a. Ne bõn-datl bʋgo? “A na n yɩɩ wa boaag bugum la fu-pɛgd sãfãnde.” Yɩlgr kãng sɩnga dũni gill pipi zabrã sasa. A baasa ne bõe? A Zeova zĩnda a roogẽ wã n ning a nin-buiidã tẽeb tẽng bark yʋʋmd 1919 tɛkã n tar n watẽ. (Ezai 66:8) Rẽnd d tõe n baas n yeelame t’a Ezekɩɛll bãngr-gomdã sẽn tɩ loe ne wẽn-doogã paamda pidsg kãseng yaoolem dayã wakate.

18. Wakat bʋg la yãabã wẽn-doog na n paam a baasg pidsgu?

¹⁸ Wala lebs-n-lugl bãngr-goam a taaba, a Ezekɩɛll yãabã tara pidsg a to, baasg pidsg Arzãnã pʋgẽ. Yaa wakat kãng bal la ãdem-bi-tɩrsã na n paam Wẽnnaam doogã segls bark zãnga. Rẽ, Kirista na n kɩtame tɩ b rɩ a maoongã sẽn yaa yao-n-dɛɛkã nafa, t’a yĩngr maan-kʋʋdb 144 000 be ne-a. Kirista naam dɩɩb zẽemb sẽn yaa ninsaan-sakdsã fãa na n paama zemsg zãnga. (Wilgri 20:5, 6) Baasg zãnga, Arzãnã pa tõe n yɩ a Ezekɩɛll yãabã pidsg wakat kãseng ye. Bõe yĩnga?

Yãabã tika tõnd wakatã

19, 20. Bõe yĩng tɩ yãabã pidsg kãseng segd n maan rũndã-rũndã, la pa Arzãnã pʋgẽ?

¹⁹ A Ezekɩɛll yãa wẽn-doog sẽn da rat yɩlgr ne bõn-naands pʋʋsg la tẽeb yoobo. (Ezekɩɛll 43:7-9) Rẽ sɩd ra pa tõe n tɩ loe ne a Zeova balengã Arzãnã pʋgẽ ye. Sẽn paase, yãabã maan-kʋʋdb bilgda maan-kʋʋdbã sull sẽn zaeyã sẽn ket n be tẽng zugã, la pa b yĩngr vʋʋgrã poor bɩ Yʋʋm tusrã wakat ye. Bõe yĩnga? Bãng-y tɩ b bilgda maan-kʋʋdbã wa neb sẽn sõgend pʋgẽ-pʋgẽ samandẽ wã. Sõss sẽn be Gũusg Gasgã sɛb sẽn loog pʋsẽ wilgame tɩ samand kãngã bilgda Kirista maan-kʋʋd pʋgdsã sẽn ket n be tẽngã zugã tẽeb yasr sẽn ka mak-n-taagã.c Ges-y me tɩ yãabã gomd n tadgda maan-kʋʋdbã pa-zems-zãng zugu. B yetame tɩ b kõta maand b mens yel-wẽnã yĩnga. B keoogd-b lame tɩ b gũus n da rẽgem b mens tẽebã la vɩɩm manesmã wɛɛngẽ ye. Woto, b pa makd sẽn zae-bã sẽn vʋʋgã tʋm-tʋmd a Poll sẽn gʋls woto b wɛɛngẽ wã ye: ‘Baorg na peebe, la kũum na vʋʋg n paam yĩng sẽn ka põogd ye.’ (1 Korẽnt dãmba 15:52; Ezekɩɛll 44:21, 22, 25, 27) Yãabã pʋgẽ maan-kʋʋdbã naaga nin-buiidã la b sõgend-b vẽenega. Pa na n yɩ woto Arzãnã pʋgẽ, maan-kʋʋdbã sull sẽn na n zĩnd saasẽ rẽ wẽndã ye. Woto yĩngã yãabã kõta bilgr sẽn be rasãnd ne sẽn zae-bã sẽn naagd n tʋmd sõma ne “kʋʋng kãsengã” tẽng zug rũndã-rũndã wã to-to.—Wilgri 7:9, NW; Ezekɩɛll 42:14.

²⁰ Woto, a Ezekɩɛll yãabã sẽn tɩ loe ne wẽn-doogã makda tẽebã yɩlgr biis sẽn yaa sõma sẽn pidsd rũndã-rũndã wã. La rẽ võor yaa bõe ne yãmba? Rẽ pa tũudum yel-solemd sẽn yaa yam-tagsg bũmb bal ye. Yãab kãngã tara loees kãseng ne yãmb meng daar-daar balengã y sẽn maand n kõt sɩd Wẽnnaam a Zeova a yembre. Tõnd sõasg ning sẽn pʋgdã pʋgẽ, d na n yãa wãn-wãn la yaa woto.

[Footnotes]

Y tẽrame bɩ?

◻ A Ezekɩɛll yãabã sẽn tɩ loe ne wẽn-doogã la a maan-kʋʋdbã pipi pidsg yɩɩ bõe?

◻ Wãn-wãn la a Ezekɩɛll yãabã sẽn tɩ loe ne tẽngã pʋɩɩbã paam pipi pidsgu?

◻ Pĩnd Israɛllã lebs-n-lugl pʋgẽ, ãnd dãmb n tʋm wala nanambs sẽn tar kɩs-sɩda, la ãnd dãmb n tʋm wala ‘tɩrlem tɩ-kãsemse’?

◻ Bõe yĩng t’a Ezekɩɛll yãabã sẽn tɩ loe ne wẽn-doogã segd n paam a pidsg sẽn yaa kãseng yaoolem dayã?

1. Yel-bʋg pʋgẽ la Wẽnnaam nin-buiidã a sẽn yãkã zĩnd yʋʋmd 593 S.D.T.W.?

8. a) Ãnd dãmb n da yaa pĩnd Israɛllã nanambse? b) Zĩ-bʋs wɛɛngẽ la a Ezekɩɛll yãabã naab ra tʋm baleng yɩlemdã pʋgẽ?