A Zeova barkã tõnd “tẽngã” zugu

“Zĩig ninga fãa kʋɩlga sẽn tũudã, bõn-vɩɩlɩ wã fãa na n vɩɩndame.”—EZEKƖƐLL 47:9.

1, 2. a) Koom yõod taa zĩ-bʋgo? b) A Ezekɩɛll yãabã kʋɩlg koom makda bõe?

KOOM yaa bõn-yʋlgdg sẽn yaa kãsenga. Bõn-vɩɩg buud fãa sẽn be tẽng zug teeg-a lame. Tõnd ned ba a yembr pa tõe n ket n vɩ tɩ pa tũ ne-a ye. D leb n teeg-a-la pekr yĩnga, bala koom tõe n kɩtame tɩ rẽgd yi la a pɛk-a. Yaa rẽ n so tɩ d sood koom, tɩ d pɛgd d futã la d rɩɩbã meng ne-a. Rẽ maaneg tõe n fãaga d yõyã.

² Biiblã tũnugda ne koom sẽn na yɩl n mak a Zeova tẽebã segls vɩɩmã yĩngã. (Zeremi 2:13; Zã 4:7-15) Wẽnnaam nin-buiidã yɩlgr Kirist yao-n-dɛɛk maoongã maasem, la Wẽnnaam bãngrã sẽn be a Gomdã pʋgẽ wã bee segls kãens sʋka. (Efɛɛz rãmba 5:25-27) A Ezekɩɛll yãabã sẽn tɩ loe ne wẽn-doogã pʋgẽ, kʋɩlg ning sẽn yaa yel-solemdã sẽn yit wẽn-doogẽ wã n zoetẽ wã makda bark a woto sẽn kõt vɩɩmã. La yaa wakat bʋg la kʋɩl-kãng zoeta, la a võor ne tõnd yaa bõe rũndã-rũndã?

Kʋɩlg n zoet tẽng b sẽn lebs n lugl pʋgẽ

3. Bõe la a Ezekɩɛll yã wala sẽn be Ezekɩɛll 47:2-12 pʋgẽ wã?

³ B sẽn da yaa yembs Babilonã, a Ezekɩɛll nin-buiidã ra rata a Zeova seglsã sõma-sõma. Rẽnd ad sɩd ra yaa raoolg meng n kõ a Ezekɩɛll t’a yã koom sĩn-sĩn sẽn yit ro-sõngẽ wã n zoet n yit wẽn-doog ning b sẽn yã yãabã pʋgẽ wã! Malɛk n magd kʋɩlgã ne bõn-makdg woglem sẽn yaa kãn-tɩɩs 1 000. A zulmã tara paasgo, n yit na-sẽbẽ n digd rũnẽ wã, rẽ poore n wa ta sɛɛga, rẽ poore, a lebgda kʋɩl-kẽeng sẽn zoete, tɩ rugb lebg tɩlae. Kʋɩlgã kõta vɩɩm la kood sõma. (Ezekɩɛll 47:2-11) B yeela a Ezekɩɛll woto: “Tɩ-rɩts na n yii kʋɩlga noe a yiiba fãa.” (Ezekɩɛll 47:12a) Ko-zoetmã sã n kẽ Mog-kɩɩngã, sẽn yaa koom vɩɩm sẽn kaẽ wã, la vɩɩm sẽn wa be! Zĩmã yĩgdame. A lebgda zĩm yẽeb kãseng zĩig tɛkẽ.

4, 5. Wãn-wãn la a Zoɛll bãngr-gomd ning sẽn tɩ loe ne kʋɩlgã wõnd a Ezekɩɛll rẽndã, la bõe yĩng tɩ rẽ võor tagmẽ?

⁴ Tõe tɩ bãngr-gomd kãngã sẽn be rasãndã tẽega yembs nins sẽn yaa Zʋɩf rãmbã bãngr-gomd a to kãngã b sẽn gʋls sẽn yɩɩd yʋʋm kob-gĩn a yiib sẽn da rengã: “Koom na n bula Zusoaba rooga pʋgẽ n zoe n kẽ Sittim longã.”a (Zoɛll 4:18) Wala a Ezekɩɛll bãngr-gomdã, a Zoɛll bãngr-gomdã rengd n togsdame tɩ kʋɩlg n da na n yi Wẽnnaam doogẽ wã, sẽn yaa wẽn-doogã n zoe, n wa ne vɩɩm zĩ-koeemsẽ wã.

⁵ Gũusg Gasgã wilga hal sẽn kaoos t’a Zoɛll bãngr-gomdã paamda pidsg tõnd wakatã.b Rẽnd sɩd-sɩda, yaa woto me ne a Ezekɩɛll yãabã. Wẽnnaam nin-buiidã tẽng sẽn lebs n lugl rũndã-rũndã wã pʋgẽ, wala pĩnd Israɛllẽ wã, a Zeova seglsã la a barkã sɩd zoee wa koom.

Bark wʋsg sẽn zoet wa koom

6. Zɩɩmã mesb yãabã tẽn-kugr zug ra segd n tẽega Zʋɩf rãmbã bõe?

⁶ Barkã sẽn wat Wẽnnaam nin-buiidã sẽn lebs n lugl zugã yita yɛ? Be neere, bãng-y tɩ koomã yita Wẽnnaam doogẽ wã n zoetẽ. Woto me, rũndã-rũndã, barkã yita a Zeova nengẽ n tũnugd ne a tẽeb wẽn-do-kãsengã, sẽn yaa seglsã baleng yɩlemdã yĩngã. A Ezekɩɛll yãabã paasda togs-n-welg sẽn yaa kãsenga. Pʋgẽ-pʋgẽ samandẽ wã, koomã zoeta tẽn-kugrã noore, nug-goabg babgẽ wã menga. (Ezekɩɛll 47:1, NW ) Tẽn-kugrã bee yãabã wẽn-doog tẽn-sʋk menga. A Zeova maaga a yĩng n bilgd-a a Ezekɩɛll, la a kõt-a noor t’a mes maoong zɩɩmã zugẽ be. (Ezekɩɛll 43:13-18, 20) Tẽn-kugr kãng ra tara võor sẽn tagem ne Israɛll nebã fãa. B kaoolã ne a Zeova wã ra paama pãng hal sẽn kaoos wʋsg sẽn deng rẽ, a Moiiz sẽn waa n mes zɩɩmã tẽn-kugr zug Sinai Tãngã sɛɛgẽ wã. (Yikri 24:4-8) Woto, zɩɩmã mesb yãabã tẽn-kugr zug ra segd n tẽeg-b lame tɩ b sã n wa leb b tẽngã b sẽn lebs n luglã pʋgẽ n sa, a Zeova barkã ra na n zoee wa koom, b sã n da sak kaool ning b sẽn maan ne-a wã.—Tõodo 28:1-14.

7. Rũndã-rũndã, bõe võor la kiris-nebã yãt makr tẽn-kugrã pʋgẽ?

⁷ Woto me, rũndã-rũndã, Wẽnnaam nin-buiidã paamda bark ne kaool tũnugri, kaool sẽn yaa sõma n yɩɩda, kaool paalgã. (Zeremi 31:31-34) Yẽ me paama pãng hal sẽn kaoos ne zɩɩm sẽn yaa a Zezi Kirist rẽnda. (Hebre dãmba 9:15-20) Rũndã-rũndã, tõnd bee sẽn zae-bã sʋk sẽn be kaool kãng babsã pʋsẽ wã, tɩ d bee “piis a taab[ã]” sẽn dɩt a nafa wã sʋk me, d mikdame tɩ makr tẽn-kugrã tara võor sẽn tagem. A makda Wẽnnaam daabã sẽn tɩ loe ne Kirist maoongã. (Zã 10:16; Hebre dãmba 10:10) Wala makr tẽn-kugrã sẽn yaa tẽeb wẽn-doogã nifã, Kirist maoongã sẽn yaa yao-n-dɛɛkã yaa baleng yɩlemdã nifu. A yaa yẽbgr ning zug b sẽn tikd n kõt tõnd yel-wẽnã sugrã, tɩ ne woto bɩ a yaa tõnd saagrã fãa beoog-daar yĩngã yẽbgre. (1 Zã 2:2) Woto, d modgdame n na n tũ tõog ning sẽn tɩ loe ne kaool paalgã: “Kirist tõogo.” (Galat dãmba 6:2) Tõnd sã n maand woto fãa, d na n dɩɩ a Zeova seglsã vɩɩmã yĩngã nafa.

8. a) Bõe n da ka be yãabã wẽn-doog pʋgẽ-pʋgẽ samandẽ? b) Ne bõe la maan-kʋʋdbã sẽn be yãabã wẽn-doogẽ wã ra tõe n yɩlg b mense?

⁸ Nafr a woto a yembr yaa yɩlemd yasr a Zeova taoore. Yãabã wẽn-doog pʋgẽ, pʋgẽ-pʋgẽ samandã pʋgẽ, bũmb b sẽn ne sõma sɛk-roogã la a Salomo wẽn-doogã samandẽ ra pa leb n be ye: yaa sĩn-kãsenga, b sẽn bool rẽ poor tɩ mogrã, maan-kʋʋdbã sẽn da sood a pʋgẽ wã. (Yikri 30:18-21; 2 Kɩbaya 4:2-6, NW ) Ne bõe masã la wẽn-doogã a Ezekɩɛll sẽn yã wã maan-kʋʋdb ra tõe n tũnug ne n yɩlg b mense? Be neere, yaa ne ko-zoetem sẽn yaa yel-solemd ning sẽn da zoet n yit pʋgẽ-pʋgẽ samandẽ wã! N-yẽe, a Zeova ra na n ning-b-la bark ne bõn-tũnugdg sẽn na n kɩt tɩ b tall yɩlemd bɩ sõng yasre.

9. Wãn-wãn la sẽn zae-bã la kʋʋng kãsengã neb tõe n paam yɩlemd yasr rũndã-rũndã?

⁹ Woto me, rũndã-rũndã, sẽn zae-bã paama bark ne yɩlemd yasr a Zeova taoore. A Zeova get-b-la wa nin-sõmse, n yetẽ tɩ b yaa tɩrse. (Rom dãmba 5:1, 2, NW ) Yaa wãn to yẽ ne “kʋʋng kãsengã,” buud nins sẽn da pa maan-kʋʋdbã sẽn da makdã? B balemda yɩng samandẽ wã, la kʋɩl-yɛngã zoet n pasgda yãabã wẽn-doog bab-kãngã pʋgẽ. Rẽnd ad zemsame tɩ tʋm-tʋmd a Zã yã kʋʋng kãsengã sẽn yer fu-peels sẽn yaa yɩlma, b sẽn balemd tẽeb wẽn-doogã samand pʋgẽ wã sasa! (Wilgri 7:9-14) Baa manesem ning b sẽn tall ne-b dũni kãngã sẽn põogã pʋgẽ sẽn ya a soaba, b tõe n talla bas-m-yam tɩ b sã n ket n wilgd tẽeb ne Kirist maoongã sẽn yaa yao-n-dɛɛkã, a Zeova get-b-la wala yɩlma. Wãn-wãn la b wilgd tẽebo? Yaa b sẽn tũud a Zezi nao wã, n tar bas-yard zãng ne yao-n-dɛɛk maoongã.—1 Pɛɛr 2:21.

10, 11. Makr koomã bõn-kãseng a yembr la bʋgo, la wãn-wãn la woto tɩ loe ne kʋɩlgã yalgr kãsenga?

¹⁰ Wala d sẽn zoe n wilgã, makr ko-kãngã tara yel-zẽngdg a to sẽn tar yõod wʋsgo: yaa bãngrã. Israɛll b sẽn lebs n luglã pʋgẽ, a Zeova ninga a nin-buiidã bark ne Gʋlsgã zãmsg n tũnug ne maan-kʋʋdba. (Ezekɩɛll 44:23) Ne manesem sẽn wõnd woto, a Zeova ninga a nin-buiidã bark rũndã-rũndã ne zãmsg wʋsg sẽn tɩ loe ne a sɩdã Gomdã, n tũnug ne “maan-kʋʋdbã sẽn yaa rĩm dãmba.” (1 Pɛɛr 2:9, NW ) Bãngr sẽn tɩ loe ne a Zeova Wẽnnaam, a raabã ãdem-biisã yĩngã, la sẽn yɩɩd fãa sẽn tɩ loe ne a Zezi Kirist la Mesi Rĩungã lebga wʋsg yaoolem day kãensã wa kʋɩl-zoetem koom sẽn paasd n yɩɩd pĩnda. Ad sɩd yaa bõn-kãsenga, d sẽn paamd tẽeb pãn-paasg kãngã sẽn yaa wʋsg n paasdẽ wã!—Daniɛll 12:4.

¹¹ Wala kʋɩlgã malɛkã sẽn magã sẽn da lebgd zulung n paasdẽ wã, woto, bark sẽn kõt vɩɩmã sẽn zoet wa koom sẽn yit a Zeova nengẽ wã paasa wʋsgo, sẽn na yɩl n tõog n deeg nebã sẽn kaoogd wʋsg n kẽed tõnd tẽeb tẽngã sẽn paam barkã pʋgẽ wã. Lebs-n-lugl bãngr-gomdã a to reng n togsame: “Ned ninga sẽn yaa bilf n yɩɩd a taaba na n lebga tusri. La ned ninga sẽn paooda na n lebga bu-kãsenga. Mam yaa Zusoaba [“a Zeova,” NW ]. A wakata sã n ta, mam na n maan-a-la tao-tao.” (Ezai 60:22) Gom-kãensã pidsame: neb milyõ rãmb n wa n naag tõnd baleng yɩlemdã pʋgẽ! A Zeova maaname tɩ “koom” wʋsg be n kõ neb nins fãa sẽn baood-a wã. (Wilgri 22:17) A kɩtdame t’a tẽng zug siglgã pʋɩ Biibl dãmb la sɛb sẽn tik Biiblã zug dũniyã gill fãa zugu, buud-goam kobs pʋsẽ. Woto me, b segla kiris-neb tigissã la tigis-kãsems dũniyã gill zug sẽn na yɩl tɩ neba fãa tõog n paam sɩdã koom sẽn yaa yɩlll wa vɛɛrã. Wãn-wãn la segls a woto mat nebã?

Koomã kõta vɩɩm!

12. a) Bõe yĩng tɩ tɩɩs nins sẽn be a Ezekɩɛll yãabẽ wã tõe n wom biis woto? b) Bõe la tɩ-kãensã sẽn womd biisã makd yaoolem dayã pʋsẽ?

¹² Kʋɩlgã a Ezekɩɛll yãabã pʋgẽ kõta vɩɩm la laafɩ. A Ezekɩɛll sẽn wʋm tɩ tɩɩsã ra na n yii kʋɩlgã noorã, b yeel-a lame: “Bãmb vãada ka na n kʋɩ ye la b biisa me ka na n sɛ ye. . . . Bãmb biisa yaa rɩɩbo la b vãada yaa bãas tɩɩm.” Bõe yĩng tɩ tɩ-kãensã womd wʋsg woto? “Tɩ bõe, ko-kãng yita Wẽnnaam doogẽ.” (Ezekɩɛll 47:12b) Makr tɩ-kãensã makda segls nins fãa Wẽnnaam sẽn dɩk sẽn na yɩl n lebs n lugl ãdem-biisã zemsg zãng zĩigẽ a Zezi yao-n-dɛɛk maoongã yẽbgr zugã. Rũndã-rũndã tẽnga zugu, kellã sẽn zaeyã lʋɩta taoor n kõt rɩɩb la maagr tẽebã wɛɛngẽ. Neb 144 000 fãa sã n wa paam b yĩngr keoorã, nafa nins sẽn na n yi b maan-kʋʋr tʋʋmdã pʋgẽ wala na-rɩt-n-taas ne Kirista na n kẽnga taoor beoog-daare, n wa baas ne tõogr zãnga kũum ning a Ãdem sẽn wa ne wã zugu.—Wilgri 5:9, 10; 21:2-4.

13. Maagr bʋg n pids tõnd wakatã?

¹³ Kʋɩlg ning b sẽn yã yãabã pʋgẽ wã zoetame n kẽed Mog-kɩɩngã sẽn ka vɩɩmã pʋgẽ n sãoogd bũmb ning fãa a sẽn tatã. Mog-kãng bilgda tẽeb kũum yalẽ. La vɩɩmã yĩgda “zĩig ninga fãa kʋɩlga sẽn tũudã.” (Ezekɩɛll 47:9) Woto me, yaoolem dayã pʋsẽ, zĩig ning fãa vɩɩm koomã sẽn kẽẽ wã, nebã paamda vɩɩm tẽebã wɛɛngẽ. Pipi rãmb sẽn lebg n paam vɩɩm woto yɩɩ kellã sẽn zaeyã neb yʋʋmd 1919. B sẽn da wõnd kũum n pa tʋmdẽ wã, b vʋʋga tẽebã wɛɛngẽ. (Ezekɩɛll 37:1-14; Wilgri 11:3, 7-12) Rẽ tɛka, ko-kãensã sẽn kõt vɩɩmã taa neb a taab sẽn da ki tẽebã wɛɛngẽ, la b vʋʋgame n lebg piis a taabã kʋʋng kãsengã sõor sẽn tar paasgo, sẽn nong a Zeova la b sõgend-a wã. Ka la bilfu, seglg kãngã na n yelg n taa neb kʋʋnd sẽn na n vʋʋge.

14. Kʋɩl-yẽed tʋʋmd sẽn yaagd zĩm wʋsgã Mog-kɩɩngã noor wogellã bilgda bõe sõma rũndã-rũndã?

¹⁴ Tẽeb vɩɩm wata ne biis wombo. Bũmb ning sẽn bilgd rẽ yaa kʋɩl-yẽedã tʋʋmd sẽn yaagd zĩm wʋsg mogrã sẽn da ki wã noorẽ wã. A Zezi yeela a karen-biisã: “Mam na n kɩtame tɩ y yɩ ninsaalb yẽedba.” (Matɩe 4:19, NW ) Yaoolem dayã pʋsẽ, yẽebã tʋʋmd sɩnga ne kellã sẽn zaeyã neb tigisgu, la a pa tek be ye. Koom ning sẽn kõt vɩɩmã sẽn yit a Zeova tẽeb wẽn-doogẽ wã, tɩ bark ning sẽn yaa bãngr sẽn yaa takɩ wã be sʋkã, taa buudã fãa neba. Zĩig ning fãa ko-zoetem kãngã sẽn taẽ, tẽeb vɩɩm n zĩndi.

15. Bõe n wilgd tɩ pa nebã fãa n na n sak Wẽnnaam seglsã vɩɩmã yĩnga, la nin-kãensã rãmbã baasg yaa bõe?

¹⁵ Yaa sɩd tɩ pa neba fãa n sakd vɩɩmã koɛɛg masã ye. Pa neb nins fãa me sẽn na n vʋʋg Kirist Yʋʋm tusr Naamã rɩɩb wakatã n na n sak-a ye. (Ezai 65:20; Wilgri 21:8) Malɛkã yetame tɩ pa mogrã babs fãa n paamd sãoogr ye. B rɩka zĩ-bɛgd kãensã sẽn ka vɩɩmã n ‘kõ yamsem.’ (Ezekɩɛll 47:11, NW ) Sã n yaa ne tõnd wakatẽ nebã, pa neb nins fãa b sẽn kõ a Zeova koomã sẽn kõt vɩɩmã n sakd-a ye. (Ezai 6:10) Armagedõ, neb nins fãa sẽn yãk n na n pa n yɩ kũum la bãad dãmb tẽebã wɛɛngẽ wã, b na n kõ-b-la yamsem, sẽn yaa sãoong sẽn-kõn-sa wã. (Wilgri 19:11-21) Baasg zãnga, neb nins sẽn yũud ko-kãens ne kɩs-sɩdã tõe n saag n põsame, la b yã bãngr-gomd kãngã baasg pidsgã.

Kʋɩlgã zoeta arzãnã pʋgẽ

16. Wakat bʋg la wãn-wãn la a Ezekɩɛll yãabã sẽn tɩ loe ne wẽn-doogã na n paam a baasg pidsgu?

¹⁶ Wala lebs-n-lugl bãngr-goam a taabã, a Ezekɩɛll yãabã sẽn tɩ loe ne wẽn-doogã paamda baasg pidsg Yʋʋm tusrã sasa. Rẽ, maan-kʋʋdbã sull pa na n ye zĩnd tẽng zug ka ye. “Bãmb na n yɩɩ Wẽnnaam ne Kirist maan-kʋʋdba, bãmb na n dɩɩ naam ne bãmb [yĩngri] yʋʋm tusri.” (Wilgri 20:6) Yĩngr maan-kʋʋdb kãensã na n lagma ne Kirista n kɩt tɩ b rɩ Kirist yao-n-dɛɛk maoongã nafa tɩ pidi. Woto, ãdem-bi-tɩrsã na n paama fãagre, lebs-n-lugl zemsg-zãng pʋgẽ!—Zã 3:17.

17, 18. a) Wãn-wãn la b bilg kʋɩlg sẽn kõt vɩɩmã Wilgri 22:1, 2 pʋgẽ, la yaa wakat bʋg la yãab kãngã pids pipi? b) Arzãnã pʋgẽ, bõe yĩng tɩ vɩɩmã koom kʋɩlg paamd yalgr kãseng wakate?

¹⁷ Sɩda, kʋɩlg ning a Ezekɩɛll sẽn yã wã na n zoee ne vɩɩm koom ning sẽn tar pãng n yɩɩdã. Sẽn yɩɩd fãa yaa wakat kãng la bãngr-gomd ning sẽn be Wilgri 22:1, 2 pʋgẽ wã na n pidsi: “Yẽ wilga maam vɩɩm koom kʋɩlga sẽn pɩnd wa vɛɛre n yit Wẽnnaam ne Pebila geerẽ. Tẽnga sʋka la kʋɩlga noe a yiib fãa, vɩɩm tɩɩga bee be, la a womda a biis naoor piig la a yiibu. A womda a biisa kiuug fãa, la a vãad yaa neb buud fãa bãas tɩɩm.”

¹⁸ Yʋʋm tusrã wakate, bãasa fãa, yĩngã rẽnda, yam-tagsgã la yĩn-sidgã rẽnd na n maagame. Rẽ paama bilgr sõma ne “buud fãa bãas tɩɩm” makr tɩɩsã tũnugr maasem. Segls b sẽn dɩk tɩ Kirist la neb 144 000 kɩtdẽ tɩ pidsdẽ wã maasem yĩnga, “tẽnga ned ba a ye ka na n le yeel t’a ka laafɩ ye.” (Ezai 33:24) La kʋɩlgã na n kẽe a wakat ning a sẽn na n lebg kãseng n yɩɩgã pʋgẽ. A segd n lebga yaleng la zulung sẽn na yɩl n tõog n sek neb milyõ rãmbã, tõe tɩ yaa neb milyaar dãmb sẽn na n vʋʋg n yũ vɩɩmã ko-yɩlem kãensa wã. Yãabã kʋɩlg maaga Mog-kɩɩngã, n wa ne vɩɩm zĩig ning fãa a koomã sẽn zoẽ wã. Arzãnã pʋgẽ, roap la pagb na n waa vɩɩm pʋgẽ zãng-zãnga, n paam maagr ne yel-wẽnd ning b sẽn dog ne tɩ yit a Ãdem nengẽ wã, b sã n wilg tẽeb ne yao-n-dɛɛkã nafã b sẽn maan tɩ ta-bã. Wilgri 20:12, NW reng n togsame tɩ “seb-pinds” la b na n lags wakat kãnga, n wa ne vẽenem n paas tɩ sẽn vʋʋg-bã me na n dɩ-b nafa. Zu-bʋko, kẽer na n zãgsa maagr baa Arzãnã pʋgẽ. Yaa tõatb kãensã la b sẽn kõ sãoong sẽn-kõn-sa wã ‘yamsmã.’—Wilgri 20:15.

19. a) Wãn-wãn la tẽngã pʋɩɩb na n pids Arzãnã pʋgẽ? b) Arzãnã pʋgẽ, yel-zẽngdg bʋg la galʋ-tẽngã bilgda? d) Galʋ-tẽngã sẽn be zĩig ning sẽn zãr bilf ne wẽn-doogã võor yaa bõe?

¹⁹ Wakat kãnga me, tẽngã pʋɩɩb a Ezekɩɛll yãabẽ wã me na n paama a baasg pidsgu. A Ezekɩɛll yãa tẽngã b sẽn pʋɩ sõma. Woto me, kɩs-sɩd kiris-ned fãa tõe n talla bas-m-yam t’a na n paama zĩiga, bɩ pʋɩɩr Arzãnã pʋgẽ. Wõnda b na n pidsa tʋlsem ning ned fãa sẽn tar n na n paam a meng roog n vɩɩmd a pʋgẽ la a ges a yellã tɩ zũnd-zãnd ra zĩnd ye. (Ezai 65:21; 1 Korẽnt dãmba 14:33, NW ) Wala sẽn zemse, galʋ-tẽng ning a Ezekɩɛll sẽn yã wã bilgda yɛl gesg segls a Zeova sẽn dat n maan tẽn-paalgã yĩngã. Maan-kʋʋdbã sull sẽn zaeyã pa na n ye zĩnd ãdem-biisã sʋk yĩngã pʋgẽ ye. Yãabã kɩtdame tɩ d tags woto, a sẽn bilgd galʋ-tẽngã t’a be ‘pʋ-wɛɛgẽ’ n zãr bilf ne wẽn-doogã yĩnga. (Ezekɩɛll 48:15) Neb 144 000 sã n wa rɩt naam ne Kirist saasẽ, Rĩmã na n talla lɛdgdb tẽng zug me. A tẽng zug zẽembã na n dɩɩ nafa wʋsg sẽn yit naabã sull sor-wilgr la b teesg sẽn tar nonglmã pʋgẽ. Baasg zãnga, goosneema wã zĩig meng-meng pa na n yɩ tẽng zug ye, la yaa saasẽ. Ned fãa sẽn be tẽng zugu, naabã sull sẽn paase, na n saka Mesi Rĩungã.—Daniɛll 2:44; 7:14, 18, NW, 22, NW.

20, 21. a) Bõe yĩng tɩ galʋ-tẽngã yʋʋr zemse? b) Sʋgs-bʋs la tõnd võor-wʋmbã ne a Ezekɩɛll yãabã segd n tus tõnd tɩ d sʋk d mense?

²⁰ Ges-y a Ezekɩɛll bãngr-gomdã yaoolem goama: “Sẽn sɩng ne baraare, b na n boola galʋ-tẽngã yʋʋr tɩ a Zeova mengã bee be.” (Ezekɩɛll 48:35, NW ) Galʋ-tẽn-kãngã sẽn be wã pa sẽn na yɩl n kõ roap tõog bɩ pãn-tusdg ye. Pa sẽn na yɩl n kõ ninsaal raab pãng me ye. Yaa a Zeova galʋ-tẽng sẽn pukd a tagsgã la a nonglmã, la a maan-tɩ-zemsã yɛlã pʋsẽ wakat fãa. (Zak 3:17, NW ) Rẽ kõta tõnd bas-m-yam sẽn kengd sũur t’a Zeova na n ninga ãdem-biisã lagem-taab “tẽng paalg” sẽn siglã bark wakat sẽn-kõn-sa yĩnga.—2 Pɛɛr 3:13.

²¹ D yĩns pa sidgd ne bũmb ning sẽn gũud tõndã sɩda? Rẽnd wala sẽn zemse, tõnd ned kam fãa na maan neer n sʋke: ‘Wãn to la m maand bark kãsems nins b sẽn puk a Ezekɩɛll yãabã pʋgẽ wã taoore? M teenda tʋʋmd ning yel-gɛtbã sẽn tar nonglmã sẽn maandã, kellã sẽn zaeyã neb la naabã sull beoog-daar nebã rẽnd sẽn paasã bɩ? Mam dɩka baleng yɩlemdã t’a be mam vɩɩmã pipi zĩigẽ bɩ? Mam dɩta vɩɩmã koom sẽn zoet wʋsg woto rũndã-rũndã wã nafa tɩ pid bɩ?’ Bɩ tõnd ned kam fãa ket n maand woto, la d maan sũ-noog ne a Zeova seglsã wakat sẽn-kõn-sa yĩnga!

[Footnotes]

Wãn to la y na n leokẽ?

◻ Koom ning sẽn zoet n yit wẽn-doogẽ wã makda bõe?

◻ Maagr bʋg la a Zeova pids n tũnug ne makr kʋɩlgã, la bõe yĩng tɩ kʋɩlgã yalg n paase?

◻ Bõe la tɩɩs nins sẽn be kʋɩlgã noorã makda?

◻ Bõe la galʋ-tẽngã makd Yʋʋm tusr Naamã rɩɩb sasa, la bõe yĩng tɩ galʋ-tẽngã yʋʋr zemse?

[Picture on page 29]

Vɩɩmã kʋɩlg makda Wẽnnaam seglsã fãagrã yĩnga