“Wẽn-doogã” la “Naabã” rũndã-rũndã

“Sã n yaa ne naabã sẽn be b sʋkã, b sã n kẽedẽ, a segd n kẽeme; la b sã n yita, a segd n yiimi.”—EZEKƖƐLL 46:10, NW.

TẼN-KƲDEM wẽndẽ rabẽ rãmb kẽer yam da pa gãe fasɩ ne a Ezekɩɛll sebrã ye. Sã n yaa ne Talmudã, bãmb kẽer meng tagsame n na n yiis-a Gʋlsg Sõmsã pʋgẽ. Sẽn yɩɩd fãa yãabã sẽn tɩ loe ne wẽn-doogã yɩɩ toog ne-ba, la b yeelame tɩ ninsaal pa tõe n wʋm a võor ye. Biiblã mitb a taab ra pa mi b sẽn maandg ne a Ezekɩɛll yãabã sẽn tɩ loe ne a Zeova wẽn-doogã ye. Yaa wãn to yẽ ne tõndo?

1, 2. Sɩd-yẽgr bʋg n sõngd tõnd tɩ d bãng a Ezekɩɛll yãabã sẽn tɩ loe ne wẽn-doogã võore?

² Baleng yɩlemdã luglg tɛka, a Zeova ninga a nin-buiidã bark ne tẽeb yam-vẽenem yãgb wʋsgo, tɩ yam-welgr sẽn tɩ loe ne Wẽnnaam tẽeb wẽn-doogã sẽn ya a soaba: sẽn dat n yeel t’a Zeova seglsã sẽn wõnd wẽn-doogã rẽnd baleng yɩlemdã yĩngã be sʋka.a Sɩd-yẽgr kãngã sõngda tõnd tɩ d wʋm a Ezekɩɛll yãabã sẽn tɩ loe ne wẽn-doogã võor zĩis wʋsg pʋgẽ. Bɩ d vaees yãab kãngã yɛl a naasã sõma n paase: wẽn-doogã, maan-kʋʋdbã, naabã la tẽngã. Bõn-kãensã võor yaa bõe rũndã-rũndã?

Wẽn-doogã la yãmba

3. Bõe zãmsg la wẽn-doogã kõomã zĩigẽ sugr sẽn zẽk la a lalsã zut peesg sẽn be rasãndã kõt tõndo?

³ Mams-y n ges tõnd sẽn na n gilgd n get yãabã wẽn-do-kãnga. Tɩ d kolg n dʋ rʋʋds a yopoe sẽn tar n debd no-kãsemsã a yembrẽ. D sẽn ta no-kãng zĩigẽ wã, d geta ne yɛɛsgo. Roogã sugr zẽk n taa sẽn yɩɩd metr 30 tõnd zugu! Rẽ tẽegda tõnd tɩ noy nins d sẽn segd n tũ n kẽ a Zeova seglsẽ wã balengã yĩngã zẽkame. Vẽenem sẽn yit fẽneta wã zĩisẽ wã vẽnegda lalsã b sẽn pees koms b zutã tɩ be rasãndã, Gʋlsgã sẽn dɩkd n makd tɩrlmã. (Yɩɩl Sõamyã 92:13; Ezekɩɛll 40:14, NW, 16, 22) Zĩ-sõng kãngã yaa neb nins sẽn yaa tɩrs vɩɩm-manesmã la tẽebã wɛɛngẽ wã yĩngã. Wala sẽn zems ne rẽ, tõnd me rat n paa tɩrs sẽn na yɩl n tɩ d balengã sak reegr a Zeova nifẽ.—Yɩɩl Sõamyã 11:7.

4. Ãnd la b zãgsd t’a ra kẽ wẽn-doogẽ wã, la bõe la rẽ zãmsd tõndo?

⁴ Kõomã zĩigẽ babg fãa, gũub rot a tãab n be be. Gũudbã na n bas-d lame tɩ d kẽ wẽn-doogẽ wã bɩ? A Zeova yeela a Ezekɩɛll tɩ sãan ba a yembr “sũur sẽn pa kẽ bãongo,” pa tõe n kẽ be ye. (Ezekɩɛll 40:10; 44:9, NW ) Woto rat n yeelame tɩ bõe? Wẽnnaam sẽn sakd wa a balemdbã yaa neb nins bal sẽn nong a tõodã la b tũud-bã. (Zeremi 4:4, NW; Rom dãmba 2:29) A sakda neb a woto a tẽeb fu-roogẽ wã, a balengã roogẽ. (Yɩɩl Sõamyã 15:1-5) Baleng yɩlemdã sẽn lugl yʋʋmd 1919 tɛkã, bilf-bilfu, a Zeova tẽng zug siglgã waa ne vẽenem a vɩɩm manesmã noy zut la a teel-ba. Neb nins sẽn zãgsd ne yamleoog n pa rat n sakã b ye pa sakd tɩ b maan lagem-n-taar ne a nin-buiidã ye. Rũndã-rũndã, minung sẽn tik Biiblã zug sẽn yaa yiis wẽng maandb nins sẽn pa tekd yam n kos sugrã kɩtame tɩ b tall tõnd balengã t’a paa n yɩ yɩlemde.—1 Korẽnt dãmba 5:13.

5. a) Bõe wõneg n be a Ezekɩɛll yãabã la a Zã yãabã sẽn be Wilgri 7:9-15 pʋgẽ wã sʋka? b) A Ezekɩɛll yãabẽ wã, ãnd dãmb la buud 12 sẽn balemd yɩng samandẽ wã makda?

⁵ Pɩʋʋgrã zĩig pakda yɩng samandã zĩigẽ, zĩig ning nin-buiidã sẽn balemd la b pẽgd a Zeova wã. Rẽ tẽegda tõnd tʋm-tʋmd a Zã yãab ning sẽn be Wilgri 7:9-15, NW pʋgẽ wã, “piis a taab[ã]” “kʋʋng kãsengã” sẽn balemd a Zeova “wĩndg la yʋng a wẽn-doogẽ” wã yelle. Koms n be yãab a yiibã pʋsẽ. A Ezekɩɛll yãabã pʋgẽ, b nagsda kõomã zĩigẽ lalsã. A Zã yãabã pʋgẽ, balemdbã tara koms vãad b nusẽ, tɩ rẽ makd sũ-noog ning b sẽn tar a Zeova pẽgrã pʋgẽ wã, la b sẽn deegd a Zezi wala b Rĩmã. (Wilgri 7:9-15) A Ezekɩɛll yãabã sẽn be zĩig ningã pʋgẽ, Israɛll buud 12 wã makda “piis a taab[ã].” (Zã 10:16; mak-y ne Luk 22:28-30.) Yãmb bee neb nins sẽn tar sũ-noog a Zeova pẽgrã pʋgẽ n moond a Rĩungã sʋk bɩ?

6. Rɩɩbã rot sẽn be yɩng samandẽ wã bõn-datl da yaa bõe, la bõe zu-noog la rẽ tõe n tẽeg neb nins sẽn be piis a taabã sʋkã?

⁶ D sã n gilg n ges yɩng samandẽ wã, d nee rɩɩb ro-pʋs 30 wã, zĩis nins nin-buiidã sẽn lagemd n dɩ b yamleoog kũunã. (Ezekɩɛll 40:17) Rũndã-rũndã, sẽn be-b piis a taabã sʋkã pa kõt rũms maand ye, la b pa wat a tẽebã wẽn-doogẽ nus-zaal ye. (Mak-y ne Yikri 23:15.) Tʋm-tʋmd a Poll gʋlsame: “Bãmb [a Zezi] maasem yĩnga, bɩ tõnd kõ Wẽnnaam maand daar fãa sẽn yaa pẽgre, sẽn dat n togse tɩ d kɩs kaset ne noor goama bãmb yʋʋra yĩnga. Bɩ y ra yĩm tɩ maan neere la sõng neba ye, tɩ bõe, maand kãens nooma Wẽnnaam sũuri.” (Hebre dãmba 13:15, 16; Oze 14:2, NW ) Yaa zu-noog kãseng tɩ d kõ a Zeova maand a woto.—Yelbũna 3:9, 27.

7. Wẽn-doogã magb kõta tõnd bas-m-yam ne bõe?

⁷ A Ezekɩɛll geta malɛk sẽn magd yãab kãngã wẽn-doogã. (Ezekɩɛll 40:3) Woto me, b yeela tʋm-tʋmd a Zã woto: “Yik n mak Wẽnnaam doogã la tẽn-kugrã ne neb nins sẽn pʋʋsd beenẽ wã.” (Wilgri 11:1) Makr kãng võor yaa bõe? Zĩis a yiib kãensã fãa pʋsẽ, rẽ yaa bas-yard-poeer tɩ baa fɩ pa tõe n gɩdg a Zeova t’a pa pids a raabã sẽn tɩ loe ne baleng yɩlemdã ye. Woto me, rũndã-rũndã, d tõe n kɩsa sɩd tɩ baa fɩ, baa kɩɩsg toaag sẽn yit guvɛrnema rãmb sẽn tar pãng nengẽ pa tõe n yals baleng yɩlemdã lebs-n-lugl ye.

8. Ãnd n kẽed pʋgẽ-pʋgẽ samandẽ wã noyẽ, la noy kãensã tẽegda tõnd bõe?

⁸ D sã n pasgd yɩng samandã, d neeme tɩ noy a tãab n tar n debd pʋgẽ-pʋgẽ samandẽ wã. Pʋgẽ-pʋgẽ noyã tonga ne yɩng noyã la b yaadem yaa yembre. (Ezekɩɛll 40:6, 20, 23, 24, 27) Yaa maan-kʋʋdbã bal n tõe n kẽ pʋgẽ-pʋgẽ samandẽ wã. Pʋgẽ-pʋgẽ noyã tẽegda tõnd tɩ sẽn zae-bã segd n tũu Wẽnnaam noyã la a tõodã, la yaa noy kãens la tõod kãens n wilgd kiris-neb hakɩkã fãa sore. La maan-kʋʋdbã tʋʋmd yaa bõe, la a võor yaa bõe rũndã-rũndã?

Maan-kʋʋdb sẽn tar kɩs-sɩda

9, 10. Wãn-wãn la “naam maan-kʋʋdba,” wala b sẽn mak-b ne maan-kʋʋdbã sull a Ezekɩɛll yãabẽ wã kõt tẽeb zãmsgo?

⁹ Wakat nins sẽn deng kiris-nebã sasa, maan-kʋʋdbã maana tʋʋm-toog wẽn-doogã pʋgẽ. Maandã rũms kʋʋbo, kõ-b tẽn-kugrã zugu, la sõgen maan-kʋʋdb a taabã la nin-buiidã ra yaa tʋʋm-toog yĩngã wɛɛngẽ. La b ra tara tʋʋmd a to sẽn tar yõodo. A Zeova kõo noor woto maan-kʋʋdbã wɛɛngẽ: “Bɩ b zãms m neba tɩ b bãng bũmb sẽn welg toor mam yĩng ne bõn-zaals n bake. La b wilg bãmb tɩ b bãng bũmb sẽn yaa yɩlemd ne bõn-dẽgd sẽn yaa to-to.”—Ezekɩɛll 44:23; Malaki 2:7.

¹⁰ Yãmb nanda tʋʋm-toog la sik-m-meng sõgeneg ning sẽn zae-bã sẽn maan wala sull sẽn yaa “naam maan-kʋʋdba” n teel baleng yɩlemdã bɩ? (1 Pɛɛr 2:9) Wala pĩnd wẽndẽ Levi maan-kʋʋdbã, b lʋɩɩ taoor n kõ tẽeb zãmsgo, n sõng nebã tɩ b wʋm sẽn yaa yɩlemd võore, la sẽn sakd Wẽnnaam nifẽ, la sẽn pa sakd a nifẽ. (Matɩe 24:45, NW ) Zãmsg a woto, sẽn yit sɛbẽ sẽn tik Biiblã zugã, la kiris-neb tigissẽ wã la tigis-kãsemsẽ wã, sõnga neb milyõ rãmb tɩ b lebg n zems ne Wẽnnaam.—2 Korẽnt dãmba 5:20, NW.

11. a) Wãn-wãn la a Ezekɩɛll yãabã wilgd vẽeneg tɩ maan-kʋʋdbã yɩlemd yaa tɩlae? b) Yaoolem dayã pʋsẽ, wãn-wãn la sẽn zae-bã paam yɩlgr tẽebã wɛɛngẽ?

¹¹ Baasg zãnga, maan-kʋʋdbã segd n maana sẽn yɩɩd zãms neb a taabã tɩ b pa yɩlmã. Bãmb mensã segd n yɩɩ yɩlmã. Woto, a Ezekɩɛll reng n yãa yɩlgr tʋʋmd Israɛll maan-kʋʋdbã yĩnga. (Ezekɩɛll 44:10-16) Woto me, kʋdemdã wilgdame tɩ yʋʋmd 1918, a Zeova feesa maan-kʋʋdbã sull sẽn zaeyã wala “yɩlgd” a tẽeb wẽn-doogẽ wã. (Malaki 3:1-5, NW ) Neb nins b sẽn ges tɩ b yaa yɩlem tẽebã wɛɛngẽ wã, bɩ sẽn tek yam n kos sugr ne pĩnd bõn-naands pʋʋsg fãa wã, b ra kõ-b-la sor tɩ b ket n kẽngd taoor sõgenegã zu-noogẽ a tẽebã wẽn-doog pʋgẽ. La wala ned a to buud fãa, neb nins sẽn zaeyã yembr-yembr tõe n lebga rẽgd tẽebã bɩ vɩɩm-manesmã wɛɛngẽ. (Ezekɩɛll 44:22, 25-27) B ra segd n tʋma wʋsg sẽn na yɩl n pa n “da tall rẽok sẽn yit dũniyã pʋgẽ ye.”—Zak 1:27, NW; mak-y ne Mark 7:20-23.

12. Bõe yĩng tɩ d segd n tall naneb ne sẽn zae-bã tʋʋmde?

¹² Tõnd ned kam fãa tõe n sʋka a menga: ‘M nanda mak-sõng ning sẽn zae-bã sẽn kõ b kɩs-sɩd sõgenegã pʋgẽ sẽn kaoos yʋʋm wʋsgã bɩ? M dɩkda togs-n-taar ne b tẽebã bɩ?’ Yaa sõma tɩ neb nins sẽn be kʋʋng kãsengã sʋkã tẽeg tɩ b pa na n paam tɩ sẽn zae-bã be ne-b wakat fãa tẽng zug ye. A Zeova yeela woto maan-kʋʋdbã sẽn be a Ezekɩɛll yãabẽ wã wɛɛngẽ: “Bɩ y ra kõ bãmb zĩig tɩ b soog Israɛll tẽnga pʋgẽ ye. Yaa maam la bãmb pʋɩɩre.” (Ezekɩɛll 44:28) Woto me, sẽn zae-bã pa tar pʋɩɩr sẽn kaoosd wakat sẽn-kõn-sa tẽng zug ye. B tara pʋɩɩr saasẽ, la sẽn be-b kʋʋng kãsengã sʋkã getame tɩ yaa zu-noog ne-b tɩ b teel la b raool-ba, b sẽn ket n be tẽng zug ka wã sasa.—Matɩe 25:34-40; 1 Pɛɛr 1:3, 4.

Naabã: Yaa ãnda?

13, 14. a) Bõe yĩng tɩ naabã segd n be piis a taabã sʋka? b) Ãnd la naabã makda?

¹³ Sʋkr sẽn nekd ratem masã n wate. Naabã makda ãnd masã? B sẽn gomd a yell wala ned la wala sullã yĩnga, d tõe n tagsame t’a makda roap sulli. (Ezekɩɛll 44:3; 45:8, 9) La yaa ãnd dãmba? Yaa vẽeneg tɩ pa sẽn zae-bã ye. Yãabã pʋgẽ, a lagemd n tʋmda sõma ne maan-kʋʋdbã, la a pa be b sʋk ye. Sẽn yaa lebend ne maan-kʋʋdbã sulli, b kõ-a-la pʋɩɩr tẽngã pʋgẽ, la woto, a tara beoog-daar tẽng zug ka, la pa saasẽ ye. (Ezekɩɛll 48:21) Sẽn paase, Ezekɩɛll 46:10, NW yetame: “Sã n yaa ne naabã sẽn be b sʋkã, b [buud nins sẽn pa maan-kʋʋdb buudã] sã n kẽedẽ [wẽn-doogã yɩng samandẽ], a segd n kẽeme; la b sã n yita, a segd n yiimi.” A pa kẽed pʋgẽ-pʋgẽ samandẽ wã ye, la a balemda yɩng samandẽ wã, n kẽedẽ la a yit wẽn-doogẽ wã ne nin-buiidã. Bõn-kãensã wilgda vẽeneg tɩ naabã bee piis a taabã kʋʋng kãsengã sʋka.

¹⁴ Vẽenega, naabã tara zɩɩb Wẽnnaam nin-buiidã sʋka. Yɩng samandẽ wã, a zĩi Yaang Kõomã noorẽ. (Ezekɩɛll 44:2, 3) Rẽ wilgda yɛl-gesg yasre, sẽn wõnd Israɛll kãsem dãmbã rẽndã, sẽn da zĩ galʋ-tẽngã noorẽ n kaood bʋʋdã. (Rut 4:1-12; Yelbũna 22:22, NW ) Ãnd dãmb n tar yɛl-gesg tʋʋmd piis a taabã sʋk rũndã-rũndã? Yaa kẽem dãmb nins sẽn tar tẽng zug saagr vʋʋsem sõngã sẽn yãkã. (Tʋʋma 20:28) Woto, b segenda naabã sull masã sẽn na yɩl t’a wa sõgen yɛl-gesg tʋʋm pʋsẽ kaoosg zugẽ dũni paalgã pʋgẽ.

15. a) Wãn-wãn la a Ezekɩɛll yãabã wat ne vẽenem zems-n-taar ning sẽn be kẽem dãmbã sẽn be kʋʋng kãsengã sʋkã la maan-kʋʋdbã sẽn zaeyã sull sʋka? b) Taoor sobend bʋg la kẽem dãmb nins sẽn zaeyã tall Wẽnnaam tẽng zugu siglgã pʋgẽ?

¹⁵ La rũndã-rũndã bõe zems-n-taar n be maan-kʋʋdbã sẽn zaeyã sulli, la roap a woto sẽn yaa kãsem dãmbã, sẽn be kʋʋng kãsengã pʋgẽ, n sõgend masã wa yel-gɛtbã sʋka? A Ezekɩɛll yãabã kɩtdame tɩ d tags tɩ kẽem dãmb nins sẽn yaa kʋʋng kãsengã nebã tara teelg tʋʋmd sẽn yaa yiib soab zĩiga, tɩ sẽn zae-bã lʋɩt taoor tẽebã wɛɛngẽ. Wãn-wãna? Tẽeg-y tɩ b kõo yãabã maan-kʋʋdb zɩɩb tɩ b zãms nin-buiidã tẽebã yɛla. B ra yeel-b lame me tɩ b tʋm wa bʋ-kaoodb bʋ-kao wã yɛlẽ. Sẽn paase, Levi nebã ra paama tʋʋmd sẽn yaa “yɛl-gesg zĩis” wẽn-doogã noyẽ. (Ezekɩɛll 44:11, NW, 23, 24) Vẽenega, naabã ra segd n saka maan-kʋʋdbã tẽeb tʋʋm la b taoor-sobendã. Rẽnd zemsame tɩ rũndã-rũndã, sẽn zae-bã lʋɩ taoor baleng yɩlemdã pʋgẽ. Wala makre, b yãka a Zeova Kaset rãmbã Siglgã-zug Sull neb bãmb sʋkã. Kɩs-sɩd kẽem dãmb kãensã sẽn zaeyã zãmsda naabã sull yʋʋm sẽn na maan pi-gĩnã, n segend sull kãngã beoog-daar nebã daar ning b sẽn na n yãk-b tɩ b paam zu-sobend fãa Wẽnnaam dũni paalgã sẽn watã pʋgẽ.

16. Sã n yaa ne Ezai 32:1, 2, kẽem dãmbã fãa manesem segd n yɩɩ wãn-wãna?

¹⁶ La yaa yel-gɛtb bʋs buud la beoog-daar nin-kãensã, sẽn na n paam zɩɩb sẽn yaa kãsems n yɩɩd wala naabã sullã? Bãngr-gomd ning sẽn be Ezai 32:1, 2 pʋgẽ wã yetame: “Dẽ, dĩma na n dɩɩ naam ne tɩrlem, la kombɛɛmba [“na-biisã,” NW ] na n sooga soolma ne zemsgo. Bãmb ned kam fãa na n yɩɩ wa zĩ-lilldga sobg wakate la a wa zĩ-soalgdg sa-kẽeng wakate. Bãmb na n yɩɩ wa kʋɩls tẽn-koɛɛng pʋgẽ, la a wa kug-kãseng maasem tẽng sẽn ka pãng pʋgẽ.” Bãngr-gomd kãngã pidsda rũndã-rũndã, kẽem dãmb nins fãa sẽn yaa kiris-nebã, sẽn zae-bã la piis a taabã sẽn tʋmd n kogend bãgrã ne ‘saag sob-bɛd’ wala namsgã tẽebã yĩngã la raood komsgã.

17. Wãn-wãn la pe-kɩɩmb nins sẽn yaa kiris-nebã segd n ges b mensã, la wãn-wãn la bãgrã segd n ges-ba?

¹⁷ Gom-biis nins sẽn yaa ‘na-biig’ la “naabã,” võor sẽn yaa yembr ne Hebre buud-gomdã, b pa tũnugd ne-b wala waoogr yʋy sẽn na yɩl n pẽg ninsaalb ye. Walla tɩ yɩ woto, b bilgda zɩɩb ning roap kãensã sẽn tʋkd n get Wẽnnaam piisã yellã. A Zeova keoogda woto vẽenegã: “Israɛll nanamse, bas-y neba namsgo n da le maan b wẽng ye. Maan-y neer wa sẽn zems tõogã.” (Ezekɩɛll 45:9) Yaa sõma ne kẽem dãmbã fãa rũndã-rũndã tɩ b tũ sagl-kãensã ne b sũy fãa. (1 Pɛɛr 5:2, 3) Piisã me sakd n deegame t’a Zezi kõo pe-kɩɩmb kãensã wala “kũun sẽn yaa roapã.” (Efɛɛz rãmba 4:8, NW ) Yɛl nins b sẽn segd n pidsã gʋlsa Wẽnnaam Gomdã vʋʋsem sõng sẽn vẽnegã pʋgẽ. (1 Tɩmotɩ 3:1-7; Tɩt 1:5-9) Woto yĩnga, kiris-nebã tũuda kẽem dãmbã sor-wilgri.—Hebre dãmba 13:7.

18. Beoog-daar naabã sull zɩɩb kẽer yaa bõe masã, la a zɩɩbã beoog-daar na n yɩɩ bõe?

¹⁸ Biiblã gʋlsg wakatẽ, nanambs kẽer da tara zu-sobend wʋsgo, t’a taab rẽnd pa ta woto ye. Rũndã-rũndã, kẽem dãmb nins sẽn yaa kʋʋng kãsengã nebã tara zɩɩb toɛ-toɛy wʋsgo. Kẽer sõgenda tigeng a yembrẽ, a taab sõgenda tigems wʋsg wala so-toak yel-gɛtba, a taab sõgenda tẽns tõy n yaa Tʋʋmd-willã Sull neba, a taab tʋmda ne Siglgã-zug Sull sul toɛ-toɛ menga. Dũni paalgã pʋgẽ, a Zezi na n yãka “na-biis tẽngã gill zugu,” tɩ b lʋɩ taoor a Zeova balemdbã sʋk tẽngã zugu. (Yɩɩl Sõamyã 45:16, NW ) Sãmbg sẽn ka be, a Zezi na n tũusa bãmb wʋsg rũndã-rũndã kẽem dãmb sẽn yaa kɩs-sɩd dãmbã sʋka. Roap kãensã sẽn kõt poeer masã tɩ b zemsame wã yĩnga, a na n yãka bãmb wʋsg tɩ b paam zu-nood sẽn yaa kãsems n yɩɩd meng beoog-daare, a sã n wa puk naabã sull tʋʋmd sẽn ya a soab dũni paalgã pʋgẽ.

Wẽnnaam nin-buiidã tẽng rũndã-rũndã

19. Tẽngã a Ezekɩɛll yãabã pʋgẽ makda bõe?

¹⁹ A Ezekɩɛll yãabã leb n bilgda Israɛll tẽngã sẽn lebs n luglã. Bõe la yãabã nen-kãngã makda? Lebs-n-lugl bãngr-goam a taab n deng n togs tɩ Israɛll tẽngã ra na n yɩɩ arzãn wala Edɛn. (Ezekɩɛll 36:34, 35) Rũndã-rũndã, d tara “tẽng” sẽn lebs n lugli, la yẽ me yaa wa Edɛn mamsga. Wala sẽn zems ne rẽ, d nong n gomda d tẽeb arzãnã yelle. Gũusg Gasgã bilga tõnd “tẽng[ã]” wala Wẽnnaam sẽn yãk nin-buiid ningã “soolem.”b Zĩig ning fãa a Zeova sõgen sẽn beẽ, a bee tẽn-kãngã b sẽn lebs n luglã pʋgẽ, a sã n modgd n na n teel baleng hakɩkã n tũ Kirist Zezi na-yakmã.—1 Pɛɛr 2:21.

20. No-bʋg la d tõe n zãms n bãng ne “kũun sõngã” a Ezekɩɛll yãabẽ wã, la wãn-wãn la d tõe n tũ no-kãngã?

²⁰ Yaa wãn to yẽ ne tẽngã zĩig ning b sẽn boond tɩ “kũun sõngã”? Nin-buiidã ra segd n kõ-a-la wala yamleoog kũun sẽn na yɩl n teel maan-kʋʋdbã la galʋ-tẽngã. Woto me, “tẽngã neb fãa” ra segd n dɩka zĩig n maan yamleoog kũun naabã yĩnga. Rẽ võor yaa bõe rũndã-rũndã? Yaa sɩd tɩ pa rat n yeel tɩ b segd n zɩlga Wẽnnaam nin-buiidã ne zɩɩb sẽn yaa kõ tũudum taoor dãmb sull yaood ye. (2 Tesalonik rãmba 3:8) Walla tɩ yɩ woto, teelg ning b sẽn kõt kẽem dãmbã yaa tẽebã wɛɛngẽ pipi. Sõng ne tʋʋmd ning sẽn maand masã wã, la wilg lagem-n-tʋm la sakr yamã bee rẽ sʋka. Baasgo, wala a Ezekɩɛll wakatã, yaa “a Zeova” la b maand yamleoog kũun kãngã, la pa ninsaal ye.—Ezekɩɛll 45:1, NW, 7, 16.

21. Bõe la tẽngã pʋɩɩb a Ezekɩɛll yãabẽ wã tõe n zãms tõndo?

²¹ Pa naabã la maan-kʋʋdbã bal n tar zĩis b sẽn yãk n kõ-b tẽn-kãngã b sẽn lebs n luglã pʋgẽ bal ye. Tẽngã pʋɩɩb wilgdame tɩ buud 12 wã a yembr fãa sɩd tara pʋɩɩre. (Ezekɩɛll 47:13, 22, 23) Woto, sẽn be-b kʋʋng kãsengã pʋgẽ wã pa tar zĩig bal tẽeb arzãna pʋgẽ rũndã-rũndã ye, la b na n paama zĩig b sẽn yãk n kõ-ba, b sã n wa paam zĩig Wẽnnaam Rĩungã tẽng zug babgẽ me.

22. a) Galʋ-tẽngã a Ezekɩɛll yãabẽ wã makda bõe? b) Galʋ-tẽngã sẽn tar noy a nensã fãa pʋsẽ wã tõe n zãmsa tõnd bõe?

²² Sẽn na n baase, yaa bõe la galʋ-tẽngã sẽn be yãabẽ wã makda? Pa yĩngr galʋ-tẽng ye, bala a bee ‘pʋ-wɛɛg’ (sẽn yaa tẽng sẽn pa welg toorã) tẽn-sʋka. (Ezekɩɛll 48:15-17) Rẽnd segd n yɩɩ tẽng zug bũmbu. Be neere, galʋ-tẽng yaa bõe? Galʋ-tẽng pa tẽegd tõnd neb sẽn wa n lagem taab wala sull n maan neb siglg sɩda? N-yẽe. Woto yĩnga, galʋ-tẽngã makda tẽng zug yɛl-gesg sẽn na n naf neb nins fãa sẽn na n zĩnd tẽng zug lagem-taabã sẽn yaa tɩrgã pʋgẽ. A na n tʋma zãng-zãng “tẽng paalga” sẽn watã pʋgẽ. (2 Pɛɛr 3:13) Galʋ-tẽngã noy sẽn be nensã fãa pʋsẽ wã, a yembr fãa buud fãa yĩngã, yaa bilgr sõma-sõma tɩ galʋ-tẽngã pakame. Rũndã-rũndã, Wẽnnaam nin-buiidã pa be yɛl-gesg pʋgẽ sẽn solg ye. Saam-biis nins sẽn tar taoor-sobendã segd n yɩɩ neb b sẽn tõe n gom ne nana-nana. Nebã fãa mii noy nins sẽn wilgd-b sorã. Buudã fãa neb sẽn kood tẽngã sẽn teend galʋ-tẽngã tẽegda tõnd tɩ laogã wɛɛngẽ menga piis a taabã teenda yɛl gesgã segls b sẽn dɩk Wẽnnaam nin-buiidã fãa yĩng dũniyã gill zugã.—Ezekɩɛll 48:19, 30-34.

23. Bõe la d na n zãms n bãng sõsg ning sẽn pʋgdã pʋgẽ?

²³ Yaa wãn to yẽ ne kʋɩlgã sẽn yit wẽn-do-sõngẽ wã n zoetẽ wã? Rẽ sẽn makd bũmb ning rũndã-rũndã la beoog-daarã n na n yɩ sõs-bugs kãensã a tãab-n-soab la yaoolem soaba gom-zugu.

Lebg-n-gese

◻ Wẽn-doogã a Ezekɩɛll yãabẽ wã makda bõe?

◻ Ãnd la maan-kʋʋdbã sẽn sõgend wẽn-doogẽ wã makda?

◻ Naabã sull yaa ãnda, la a zɩɩb kẽer yaa bʋse?

◻ Tẽngã a Ezekɩɛll yãabẽ wã yaa bõe, la wãn-wãn la b pʋɩ-ya buud 12?

◻ Galʋ-tẽngã makda bõe?

[Footnotes]

[Diagram/Map on page 21]

(For fully formatted text, see publication)

Tẽngã pʋɩɩb wala b sẽn bilg-a a Ezekɩɛll yãabẽ wã

BUUD PIIG LA A YIIBÃ

Mogr kãsengã

Galile mogrã

Zʋrdẽ kʋɩlgã

Yamsem mogrã

DAN

ASƐƐR

NEFTALI

MANASE

EFRAIM

RUBƐN

ZIDA

NAABÃ

BẼNZAMẼ

SƖMEÕ

ISAKAAR

ZABULÕ

GAAD

[Diagram]

KŨUN SÕNGÃ YALGRE

A. “A Zeova mengã bee be” (a Zeova-Shammah); B. galʋ-tẽngã zĩig sẽn sakd koodã

Levit rãmbã pʋɩɩre

A Zeova ro-sõngã

Maan-kʋʋdbã pʋɩɩre

B A B