Tall-y Waoogr Ne Neb A Taabã
“Bɩ y yɩ pipi n waoog taaba.”—ROM DÃMBA 12:10, NW.
1, 2. a) Bõe la d segd n minim n maandẽ, n wilg tɩ d tara sik-m-meng yam? b) Wãn-wãn la Biiblã nong n tũnugd ne gom-biig ning sẽn yaa “waoog[ã],” la ãnd dãmb n get tɩ yaa nana n yɩɩd tɩ b tall waoogre?
TÕND sõsg ning sẽn loogã gom n tadga Wẽnnaam Gomdã sagl-kãngã zugu: “Bɩ yãmb fãa sak taab ne sik-m-menga; tɩ bõe, ‘Wẽnnaam kɩɩsda tɩtaam dãmba, la bãmb ningda sik-m-mens rãmba zut barka.’ ” (1 Pɩɛɛr 5:5) Manesem a yembr tõnd sẽn na n tũnug ne n tall sik-m-meng yam yaa d sẽn na n minim n waoogd neb a taabã.
2 Naoor wʋsgo, b tũnugda ne gom-biig ning sẽn yaa “waoog” Biiblã pʋgẽ sẽn na yɩl n wilg waoogr la naneb ning d sẽn segd n tall ne neb a taabã. D waoogda neb a taabã, d sã n tar sõmblem manesem ne-ba, n tar waoogr ne b burkĩndã, n kelgd b tagsg sẽn ya a soaba, n segl n na n maan bũmb ning fãa b sẽn kos-d tɩ d tõe n maane. Naoor wʋsgo, neb nins sẽn tar sik-m-meng yamã pa na n ges tɩ woto maaneg yaa toog ye. La neb nins sẽn yaa wuk-m-mens rãmbã na n gesame tɩ yaa toog tɩ b tall waoogr sɩd-sɩda, la sẽn yaa lebende, b tõe n makame n tũnug ne pẽgr sẽn pa pʋ-peelem pẽgr n paam lohorem bɩ nafa.
A Zeova waoogda ninsaalba
3, 4. Wãn-wãn la a Zeova tall waoogr ne a Abrahaam, la bõe yĩnga?
3 A Zeova mengã kõta mak-sõng n waoogd neb a taabã. A naana ninsaalbã ne yam-daabo, la a pa maand wa b yaa robo rãmb ye. (1 Pɩɛɛr 2:16, NW ) Wala makre, a sẽn wa n yeel a Abrahaam tɩ Sodom ra segda ne sãoong wẽnemã sẽn loog nug be wã yĩnga, a Abrahaam sʋkame: “Yãmb na n lagma nin-tɩrsa ne nin-wẽnsã n sãam bɩ? Daar ninga nin-tɩrs pis-nu bee tẽnga pʋgẽ. Yãmb na n sɩd sãam-a lame n ka bas zĩig nin-tɩrs pis-nu wã sẽn be be wã yĩng bɩ?” A Zeova leok n yeelame tɩ sã n yaẽ woto fãa, a basda galʋ-tẽngã laafɩ nin-tɩrs 50 wã yĩnga. La a Abrahaam kẽnga taoor n bõos ne sik-m-menga. A yeelame tɩ la sã n da yaa neb 45, 40, 30, 20 bɩ 10 bal n da be be? A Zeova gãnega a Abrahaam yam n wilg tɩ b sã n da yã nin-tɩrs piig Sodom fãa, a ra pa na n sãam-a ye.—Sɩngre 18:20-33.
4 A Zeova ra miimi tɩ nin-tɩrs piig ra pa be Sodom ye, ne rẽ fãa a waooga a Abrahaam n kelg a tagsgo, la a tall waoogr manesem ne-a. Bõe yĩnga? Bala a Abrahaam “tẽe Zusoabã (a Zeova, NW), la bãmb geelga yõ wã wa tɩrlem yẽ yĩnga.” B ra boonda a Abrahaam tɩ “Wẽnnaam zoa.” (Sɩngre 15:6; Zak 2:23) Sẽn paase, a Zeova yãame t’a Abrahaam da waoogda neb a taabã. Zĩig poorẽ no-koeemd sẽn wa n yik a Abrahaam rũm-kɩɩmbã la a ba-biig biig a Lot rũm-kɩɩmbã sʋkã, a Abrahaam waooga a Lot n yeel-a t’a reng n yãk babg ning a sẽn datã. A Lot yãka tẽng ning a sẽn tags tɩ yaa sõma n yɩɩdã, t’a Abrahaam kẽng zĩ-zẽnga.—Sɩngre 13:5-11.
5. Wãn-wãn la a Zeova waoog a Lote?
5 A Zeova waooga nin-tɩrg a Lot woto me. Nand t’a sãam Sodom, a yeela a Lot t’a zoe n kẽng tãens babgẽ. Baasg zãnga a Lot yeelame t’a pa rat n kẽng be ye. A sẽn da ratẽ n yɩɩd yaa Zoaar sẽn pẽ yambẽ wã, baa ne galʋ-tẽn-kãng sẽn da be babg ning b sẽn da segd n sãama sʋkã. A Zeova yeela a Lote: “Be neere, mam sakame, m ka na n sãam tẽng ninga fo sẽn gomd a yella ye.” A Zeova talla waoogr ne kɩs-sɩd soab a Lot n maan a sẽn kosã.—Sɩngre 19:15-22; 2 Pɩɛɛr 2:6-9.
6. Wãn-wãn la a Zeova waoog a Moiizi?
6 A Zeova sẽn wa n tʋm a Moiiz t’a leb Ezipt n tɩ lʋɩ taoor n yiis A nin-buiidã yembdẽ wã, la a yeel a Faraõ t’a bas A nin-buiidã tɩ b loogã, a Moiiz leokame: “M Zusoaba, y kabre, mam ka gom minim soab ye.” A Zeova gãnega a Moiiz yam n yeele: “Mam na n zĩnda ne fo noore, n zãms foom bũmb ninga fo sẽn tog n togsã.” La a Moiiz ra ket n maanda sãmb-sãmbe. Yaa rẽ masã la a Zeova leb n gãneg a Moiiz yam n dɩk segls n tʋm a kẽem a Aarõ t’a yɩ a gom-taasa.—Yikri 4:10-16.
7. Bõe yĩng t’a Zeova sak n waoog neb a taabã?
7 Yel-kãensã fãa pʋsẽ, a Zeova wilgame t’a rat n waooga neb a taabã, sẽn yɩɩd fãa, neb nins sẽn sõgen-a wã. Baa ne b sẽn kos bũmb ningã sẽn da yaa toor ne a Zeova sẽn da rat pipi wã, a kelga b kosgã n sake, sẽn mik tɩ ra pa kɩɩsd a raabã yĩnga.
A Zezi waooga neb a taabã
8. Wãn-wãn la a Zezi waoog pag sẽn da bẽed hal wʋsgo?
8 A Zezi rɩka togs-n-taar ne a Zeova n waoog neb a taabã. A ra bee kʋʋngã sʋk vugri, tɩ pag sẽn da namsd ne zɩɩm yiib sẽn na maan yʋʋm 12 ra be beenẽ. Tɩp rãmbã pa tõog n sãoog-a ye. Sã n yaa ne a Moiiz Tõogã a ra yaa rẽgdo, n pa segd n zĩndẽ be ye. A leba a Zezi poorẽ wã n sɩɩs a fuugã n sãooge. A Zezi pa gãd Tõogã goam kãn-kãe n zab pagã, a sẽn maan bũmb ningã yĩng ye. Sẽn yaa lebende, a sẽn mi pagã sẽn da be yɛl nins pʋsẽ wã, a waoog-a lame n yeele: “M biiga, fo tẽeb n maag foom. Kẽng ne laafɩ n paam f meng ne bãag ninga sẽn tar foomã.”—Mark 5:25-34; Maankʋʋre 15:25-27.
9. Wãn-wãn la a Zezi waoog Bu-zẽng neda?
9 Vugr yɛsa, Fenisi poak n yeel a Zezi woto: “Zusoaba, a Davɩɩd Biiga, zoe-y mam ninbãanega! Zĩna namsda m bi-pugla wʋsgo.” A Zezi sẽn mi tɩ b tʋm-a-la Israɛll buudẽ wã la pa Bu-zẽmsã nengẽ wã, a yeela pagã tɩ: “A ka zems tɩ b rɩk [Israɛll] kamb dɩɩb n lob ba-bi [Bu-zẽmsã neb] ye.” Tɩ pagã leoke: “La ba-bi rɩta rɩ-zers sẽn lʋɩt bãmb Zusoaba taabl tẽngre.” T’a Zezi yeele: “Paga, fo tẽeb yaa kãsenga. Bɩ a yɩ wa fo sẽn datã.” A bi-puglã sãoogame. A Zezi waooga Bu-zẽng nin-kãngã, a tẽebã yĩnga. A Zezi sẽn tũnug ne gomd ning sẽn yaa “ba-bi” wã menga, n pa gom we-baas yellã, bʋka yellã, la wilgdame t’a talla ninbãan-zoeere.—Matɩe 15:21-28.
10. Zãms-bʋg sẽn tar pãng la a Zezi kõ a karen-biisã, la bõe yĩng tɩ b ra rat zãms-kãng buudu?
10 A Zezi ra ket n zãmsda a karen-biisã tɩ b segd n talla sik-m-meng yam la b waoog taaba, maam nandã sẽn da ket n yaa yell ne-bã yĩnga. B sẽn da wa n wẽ no-koeemd vugr poore a Zezi sʋkame: “Yaa bõe poorẽ la yãmb da wẽed no-koeemd ne taab sora zugu?” Tɩ b yaa sɩɩ, tɩ bõe, “bãmb sẽn da be sora zugã, b ra wẽeda no-koeemd ne taaba n dat n bãng ned ninga sẽn yaa kãseng n yɩɩda.” (Mark 9:33, 34) Yʋng ning sẽn deng a Zezi kũumã menga, “bãmb wẽe no-koeemd n dat n bãng bãmb ned ninga sẽn tog n yɩ kãsma.” (Luk 22:24) Woto yĩnga, Pakã rɩɩb wakate, a Zezi “pʋdga koom ne wamd n sɩng n waas b karen-biisa nao wã.” Ad sɩd yaa zãmsg sẽn tar pãng menga! A Zezi ra yaa Wẽnnaam Biribla, n pʋgd a Zeova ne naam ãndũniyã gill zugu. Ne rẽ fãa a kõo a karen-biisã zãmsg sẽn be waoogr n waas b nao wã. A yeelame: “Mam kõo yãmb mamsg tɩ y maan wa mam sẽn maan yãmbã.”—Zã 13:5-15.
A Poll talla waoogre
11, 12. A Poll sẽn lebg kiris-nedã poore, bõe la a zãms-yã, la wãn-wãn la a tũ zãms-kãng a manesmã ne a Filemo wã pʋgẽ?
11 A sẽn dɩkd togs-n-taar ne Kirista, a Poll talla waoogr ne neb a taabã. (1 Korẽnt dãmba 11:1) A yeelame: “Tõnd ka tol n bao neba waoogr ye. . . . La tõnd maana sũ-bʋgsem wʋsg yãmb sʋka . . . a wa kom-bõoneg wubd (ma, NW ) sẽn gũud bãmb ne nonglma.” (1 Tesalonik rãmba 2:6, 7) Ma geta a kom-bõoneg yelle. A Poll sẽn lebg kiris-nedã poore, a zãmsame n tall sik-m-meng yam, la a talla waoogr ne a kiris-nin-taasã n tall sũ-bʋgsem manesem ne-ba. A sẽn maan woto wã, a talla waoogr ne b yam-daabã me. Yell ning sẽn maan a sẽn da wa n be bãens roogẽ Romã wilga rẽ.
12 Yamb sẽn zoe t’a yʋʋr boondẽ t’a Onezim n kelg a Poll zãmsgã. A lebga kiris-neda, la a Poll zoa me. Yambã zu-soab ra yaa a Filemo, yẽ me ra yaa kiris-neda. Yẽ ra vɩɩ Azi Mineer. A Poll gʋlsa a Filemo lɛtr n wilg t’a Onezim ra tara yõod wʋsg ne-a, n yeele: “Mam nongame n tall yẽnda.” La a Poll lebsa a Onezim a Filemo nengẽ, bala a gʋlsame: “Mam ka rat n maan tɩ mam ka paam fo noor ye, tɩ fo yel-sõmda ra yɩ ne modgr ye, la a na n yɩɩ ne yamleoog bala.” A Poll pa tũnug ne zu-sobend ning a sẽn tar n yaa tʋm-tʋmdã ye, la a waooga a Filemo n pa kos n na n tall a Onezim Rom ye. Sẽn paase, a Poll sagla a Filemo t’a waoog a Onezim, n maan-a tɩ “yɩɩd yamba; [t’a] reeg yẽnda wa ba-bi-nongre.”—Filemo 13-16.
D tall waoogr tõnd wakatã
13. Bõe la Rom dãmba 12:10 yet tõnd tɩ d maane?
13 Wẽnnaam Gomdã sagenda woto: “Bɩ y yɩ pipi n waoog taaba.” (Rom dãmba 12:10, NW ) Woto rat n yeelame tɩ d pa segd n gũ tɩ neb a taabã reng n waoog tõnd ye, la d segd n denga pipi n maan woto. “Bɩ ned kam fãa ra bao a meng sõngr bal ye, la bɩ ned fãa bao a taab sõngr me.” (1 Korẽnt dãmba 10:24; 1 Pɩɛɛr 3:8, 9) Woto yĩnga, a Zeova sõgen dãmbã baooda soy n na n tall waoogr ne b zakã neba, ne b kiris-nin-taasã tigingã pʋgẽ, la ne neb nins sẽn pa be tigingã pʋgẽ wã menga.
14. Wãn-wãn la pag ne a sɩd segd n tall waoogr ne taaba?
14 Biiblã yetame: “Kirist yaa ned kam (rao, NW) fãa zugu, la . . . pag zug ya a sɩda.” (1 Korẽnt dãmba 11:3) A Zeova yetame tɩ rao a maan a pagã wa Kirist sẽn maan ne tigingã. B kõo sɩdã noor 1 Pɩɛɛr 3:7 (NW) pʋgẽ, t’a kõ a pagã “waoogr wala laag pãng sẽn paood n yɩɩda, pag rẽndã.” A tõe n maana woto n sɩd wilg t’a rat n kelg-a lame, la a sẽn na n pa maand a toog kae ne a pagã saglse. (Sɩngre 21:12) A tõe n basame t’a pagã reng n yãke, sã n mik tɩ rẽ pa kɩɩsd Biiblã noore, la a sõngd-a n tar sõmblem manesem ne-a. Pagã me “segdame n waoog a sɩdã sõma-sõma.” (Efɛɛz rãmba 5:33, NW ) A segd n kelga a sɩdã, n pa baood wakat fãa n na n maan yẽ mengã sẽn dat ye. A pa segd me n paoog bɩ n zabd a sɩdã n pa satẽ ye. A wilgda sik-m-meng yam, a sã n pa baood n na n soog a sɩdã, baa sã n mik t’a tara tõod sẽn yaa kãsems n yɩɩd zĩis kẽer pʋsẽ.
15. Naneb bʋg la b segd n tall ne nin-kẽembã, la wãn-wãn la bãmb me segd n maane?
15 Tigingã pʋgẽ, neb n be n sɩd zems ne waoogr sõma. Yaa sẽn kʋʋl-bã. “Bɩ f waoog zoob-peend soaba la nin-kẽema [bɩ pʋg-yãanga].” (Maankʋʋre 19:32) Sẽn yɩɩd fãa yaa woto ne neb nins sẽn sõgen a Zeova yʋʋm wʋsg pʋgẽ wã, bala “zoob peend yaa wa waoogr maanfo. La yaa tɩrlem sor zug la b paamd-a.” (Yelbũna 16:31) Yel-gɛtbã segd n kõo mak-sõng n tall waoogr sẽn tog ne b kiris-nin-taas nins sẽn kẽem-b bãmbã. Sɩda, sẽn kʋʋl-bã me segd n talla waoogr ne neb nins yʋʋm sẽn pa ta bãmba wã, sẽn yɩɩd fãa neb nins sẽn tar zɩɩb n kɩɩmd bãgrã.—1 Pɩɛɛr 5:2, 3.
16. Wãn-wãn la roagdbã ne kambã segd n waoog taaba?
16 Kambã segd n waooga b roagdbã: “Kamba, yãmb sẽn tũud Zusoabã bɩ y sak y ba rãmba ne y ma rãmba; tɩ bõe, bõn-kãng yaa tɩrga. Yõ wã yaa pipi tõogo ne kãabg sẽn yaa: ‘Waoog f ba la f ma, tɩ fo tõe n zĩnd ne laafɩ, la tɩ fo tõe n kaoos dũniyã zugu.’ ” La roagdbã me waoogda b kambã, bala b yeel-b lame tɩ b ‘ra maan bũmb sẽn yikd b kambã sũy ye, la bɩ b wub bãmb ne Zusoaba saglgo la zãmsgo.’—Efɛɛz rãmba 6:1-4; Yikri 20:12.
17. Ãnd dãmb n zems ne “waoogr naoor a yiib[u]”?
17 Neb nins b sẽn segd n waoog me yaa sẽn tʋmd-b wʋsg tigingã yĩngã: “A zemsame tɩ kãsem dãmba sẽn tʋmd bãmb tʋʋmd neera paam waoogr naoor a yiib n yɩɩd neb a taabã, la sẽn yɩɩda yaa neb nins sẽn moond koɛɛga la sẽn zãmsd nebã.” (1 Tɩmote 5:17) Manesem a ye tõnd sẽn tõe n tũnug ne n waoog-b woto yaa d sẽn na n maand wa Hebre dãmba 13:17 sẽn yetã: “Bɩ y sak yãmb taoor dãmba la y reeg bãmb goama.”
18. D manesem segd n yɩɩ wãn-wãn ne neb nins sẽn pa be tigingã pʋgẽ wã?
18 D segd n waooga sẽn pa be-b tigingã pʋgẽ wã bɩ? N-yẽe. Wala makre, b kõ-d-la noor woto: “Bɩ ned kam fãa sak nanambsa noeyã.” (Rom dãmba 13:1) Bãmb yaa dũniyã nanambs a Zeova sẽn bas tɩ b tall zu-sobend hal t’a Rĩungã wa reeg b zĩiga. (Daniɛll 2:44) Woto, tõnd ‘kõta neba fãa sẽn zems bãmba, d kõta yõor yaood deegdba yõor yaoodo; la d kõt tribu reegdba tribu; neb nins sẽn zems zoeesã, d zoet-b lame; neb nins sẽn zems waoogrã, d waoogd-b lame.’ (Rom dãmba 13:7) D segdame n “waoog neba fãa.”—1 Pɩɛɛr 2:17.
19. Wãn-wãn la d tõe n ‘maan neb a taabã yel-sõmd’ la d tall waoogr ne-ba?
19 Yaa sɩd tɩ d segd n waooga neb nins sẽn pa be tigingã pʋgẽ wã, la ges-y Wẽnnaam Gomdã sẽn gomd n tadgd bũmb ning zugu: “Woto yĩnga, tõnd sã n paam weere, bɩ d maan neba fãa yel-sõmde, la neb nins sẽn yaa tõnd ba-biis a Zezi tẽeba yĩngã n yɩɩda.” (Galat dãmba 6:10) Yaa sɩd tɩ ‘yel-sõmd maaneg’ sẽn sõmb n yɩɩd ne neb a taabã yaa d sẽn na n gʋʋl b tẽebã ratem la d tɩgs ratem kãngã. (Matɩe 5:3, NW ) D tõe n maana woto, d sã n tũ tʋm-tʋmd a Poll tẽeg-kãngã: “Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.” D sã n tũnugd ne sor fãa n kõt kasetã, ‘n maand d tʋʋmdã neere,’ d pa maand neba fãa yel-sõmd bal ye, d tara waoogr ne-b me.—2 Tɩmote 2:15; 4:5.
D waoog a Zeova
20. Bõe n paam a Faraõ ne a tãb-biisã, la bõe yĩnga?
20 A Zeova waoogda a bõn-naandsã. Woto yĩnga, zemsame tɩ tõnd me waoog-a. (Yelbũna 3:9; Wilgri 4:11) A Zeova Gomdã leb n yetame: “Mam waoogda neb nins sẽn waoogd maama. La mam geta neb nins sẽn paoogd maama wa zaalem.” (1 Sãmwɛll 2:30) B sẽn da wa n yeel Ezipt Faraõ wã t’a bas Wẽnnaam nin-buiidã tɩ b loogã, a leoka woto ne tɩtaam: “A Zeova yaa ãnd tɩ mam na n kelg a koɛɛga?” (Yikri 5:2, NW ) A Faraõ sẽn wa n tʋm a tãb-biisã tɩ b tɩ kʋ Israɛll nebã, a Zeova welga Mog-Miuugã koom zĩis a yiib Israɛll yĩnga. La Ezipt nebã sẽn wa n pʋglã, a Zeova kɩtame tɩ koomã zoe n seg taaba. “[A Zeova] luba Faraõ saar dãmba ne a tãb-bi kʋʋng mogra pʋgẽ.” (Yikri 14:26-28; 15:4) Woto, a Faraõ sẽn tõdg ne tɩtaam t’a kõn waoog a Zeova wã, a wa n baas n paama sãoong sẽn yaa yel-beedo.—Yɩɩl Sõamyã 136:15.
21. Bõe yĩng t’a Zeova sũur da yik ne a Bɛlsazaare, la baasa ne bõe?
21 Babilon rĩm a Bɛlsazaar zãgsa a Zeova waoogre. Tigr sasa b sẽn yũ rãam n tɩge, a yaala a Zeova n yũ dɩvẽ ne sãnem la wanzũri la-sõmsã a sẽn dɩk Zerizalɛm wẽn-doogẽ wã. La a sẽn da wa n maand woto wã ra ya a payẽ wẽnnaam dãmbã la a ra waoogda. La a Zeova sõgen a Daniɛll yeel-a lame: “La yãmb . . . ka sik y meng ye. . . . La yãmb zẽka y meng n kɩɩs saasẽ naabã.” Yʋʋn-kãng menga, b kʋʋ a Bɛlsazaar n deeg a rĩungã n bas-a.—Daniɛll 5:22-31.
22. a) Bõe yĩng t’a Zeova sũ-yikr wa Israɛll nanambsã la b nin-buiidã zutu? b) Ãnd la a Zeova bark-yã, la a baasa ne bõe?
22 Yʋʋm kob-yendẽ T.W., Rĩm a Herood ra kõta sõsg zãma wã taoore, tɩ nebã kaas n yeele: “Yõ wã yaa Wẽnnaam koɛɛga, ka ninsaal dẽnd ye.” Rĩm kãngã sẽn yaa wuk-m-meng soabã pa tõdg ye, la a ra rata ziir kãngã. Rẽ, “Zusoaba malɛk wẽe a Herood yẽ sẽn ka kõ Wẽnnaam waoogra yĩnga.” (Tʋʋma 12:21-23) A Herood waooga a meng n bas a Zeova, tɩ b wẽ-a n kʋ. Rẽ wẽnde tũudmã nanambs ra paooga Wẽnnaam n maan zãmb tɩ b kʋ a Biribl a Zezi. Nanambs sãnda bãngame t’a Zezi ra zãmsda nebã sɩdã, la b ra pa rat n tũ-a ye, “tɩ bõe, bãmb nonga neba waoogr n yɩɩd Wẽnnaam dẽnda.” (Zã 11:47-53; 12:42, 43) Buudã tõr pa waoog a Zeova bɩ a soab ning a sẽn yãk t’a wa a yʋʋr yĩngã, sẽn yaa a Zezi wã ye. Rẽ kɩtame t’a Zeova pa kell n waoog-b ye. A basa bãmb ne b wẽn-doogã tɩ b sãam-ba. La a kogla neb nins sẽn waoog yẽ ne a Biriblã.—Matɩe 23:38; Luk 21:20-22.
23. Bõe la d segd n maan sẽn na yɩl n vɩɩmd Wẽnnaam dũni paalgã pʋgẽ? (Yɩɩl Sõamyã 37:9-11; Matɩe 5:5)
23 Neb nins fãa sẽn dat n vɩɩmd Wẽnnaam dũni paalgã pʋgẽ yɛl siglg kãngã sãoong poorã segd n waooga Wẽnnaam la a Biribl a Zezi Kirista, la b sak-ba. (Zã 5:22, 23; Filip rãmba 2:9-11) Neb nins sẽn pa talld waoogr woto wã b ‘na n yiis-b-la tẽngã zugu.’ Sẽn yaa lebende, nin-tɩrsã sẽn waoogd Wẽnnaam la Kirista la b sakd-bã “na n zĩnda tẽnga pʋgẽ.”—Yelbũna 2:21, 22.
Lebg-n-gese
◻ Waoog neb a taabã rat n yeelame tɩ bõe, la wãn-wãn la a Zeova maan woto?
◻ Wãn-wãn la a Zezi la a Poll waoog neb a taabã?
◻ Ãnd dãmb n zems ne waoogr tõnd wakatã?
◻ Bõe yĩng tɩ d segd n waoog a Zeova la a Zezi?
[Caption on page 27]
A Zeova waooga a Abrahaam n kelg a kosgã
[Caption on page 28]
Kãadem nins sẽn tõogã pʋsẽ, rao wã ne a pagã waoogda taaba