Bɩ d fãa waoog a Zeova la a Biriblã
Neb nins sẽn na n wa Tẽegrã tʋʋl-nif kiuug rasem a 8 wã sẽn tõe n dɩ a yõod tɩ pid to-to
1 Rũndã-rũndã ãnda la b waoogd wʋsgo? Yaa neb nins sẽn maan tʋʋm tɩ dũniyã neb pẽgd wʋsgã. La naoor wʋsgo pa kaoosd la b yĩm tʋʋm kãens ye. La yaa wãn to ne tʋʋm nins sẽn sɩd nafd ãdem-biisã fãa wã? D na n goma tʋʋmd ning sẽn yaa kãseng n yɩɩd tʋʋm-kãens sʋkã yell wʋsg n yɩɩd Soaalã Zaabr Dɩɩb wakate, sẽn na n zĩnd yʋʋmd 2001, tʋʋl-nif kiuug rasem a 8, wĩndgã kõom poorã.
2 Ãnda soab n zems ne paam waoogr n yɩɩda? Biiblã leokda woto: “Zusoaba la tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa.” (Wil. 4:11) A Zeova sẽn yaa Naandã, yẽ la ãndũniyã Naab Sẽn-ka-to. A zemsa ne waoogr wakat fãa.—1 Tɩm. 1:17.
3 A Zezi Kirist sẽn yaa Wẽnnaam Biriblã maana tʋʋm sẽn na n naf ãdem-biisã wakat fãa. A rɩka a Ba wã togs-n-taar bal kɛpɩ. (Zã 5:19) A sẽn sak n maan Wẽnnaam daabã zãng-zãngã, “zemsame [t’a] reeg pãnga la arzɛgse la yam la noore la naam la waoogre ne pẽgre.” (Wil. 5:12) A Ba wã waoog-a lame n kõ-a naam. (Yɩɩl 2:6-8) Sã n ya ne tõndo, d na n tõog n waooga Ba wã la Biriblã Soaalã Zaabr Dɩɩb wakate, yʋʋmd 2001, tʋʋl-nif kiuug rasem a 8.
4 Zu-bʋko, ninsaalb sẽn be tẽng zug tɛka, neb sõor sẽn paood bal n waoog a Zeova la a Biriblã wa sẽn segda. Wakat ninga, baa Israɛll nebã sẽn da yaa Wẽnnaam nin-buiidã balma a Zeova yaal-yaal bala. Woto sɩd ra yaa paoogr menga. (Mal. 1:6) D sã n dat n waoog a Zeova wa sẽn segda, d segd n sak-a-la nonglem yĩnga. D leb n segd n sak-a-la mi-beoogã d sẽn tar ne yẽ la a Biriblã bũmb nins b sẽn maan n kõ-dã yĩnga. D sã n waoogd a Zeova woto, wilgdame tɩ d tara wẽn-zoeere, la tɩ d sakda a Zeova la a Zezi d manesmã fãa pʋgẽ. Kiris-neb tigingã modgdame n zãmsd nebã la a sõngd-b tɩ b maand woto me.
5 Wakat sẽn ka wõnd a taab sẽn na yɩl n wilg waoogre: Tẽegrã maaneg ya a Zeova nin-buiidã tigisg sẽn tar yõod n yɩɩd yʋʋmd fãa. Ned ning fãa sẽn tʋll n balem la a waoog a Zeova segd n zĩnda be. (Luk 22:19) D gũudame tɩ neb nins sẽn nong sɩdã wa paas Kaset rãmb milyõ a 6tɩ b sõorã zẽk n yɩɩg milyõ 14. Ad Tẽegrã yaa wakat sẽn yaa sõma d sẽn tõe n waoog d saasẽ Ba wã! Tẽegrã wakate b gomd n tadgda a Zezi zugu. La waoogrã d sẽn wilgd a sẽn maan n kõ-dã yĩngã pẽgda a Ba wã, sẽn tʋm-a wã.—Zã 5:23.
6 Bõe la tõnd tõe n maan n sõng Tẽegrã wɛɛngẽ? D tõe n sõnga neb nins sẽn wilg nonglem ne sɩdã paalmã tɩ b rɩ a yõod tɩ pidi. Bool-y-b tɩ b wa. Sã n yaa tɩlae, bɩ y sõng-b tɩ b wa Tẽegrã zĩigẽ. Togs-y-b sõsgã võore. Tall-y-b n tɩ wilg neb a taaba. Bũmb ning b sẽn yãt la b wʋmd be wã tõe n tus-b lame tɩ b wa naag tõnd n waoog a Zeova.
7 Da tags-y tɩ bũmb nins b sẽn maand Tẽegrã wakatã ka tar pãng ye. Karen-bi-bedr a yembr yeela woto: “Mam zoe n yãa kominiyõ maaneg mam egiliizã pʋgẽ naoor wʋsgo, la a yaa toor zãng fasɩ ne yão wã. Mam neeme tɩ sẽn maand Tẽegrẽ wã yaa wa Biiblã sẽn yetã bal kɛpɩ. La mam tagsdame tɩ yãmb n tar sɩdã.” A sɩngame n wat tigissã wakat fãa, la pa kaoos la a reeg lisg ye.
8 Sõng-y nin-paalsã tɩ b bɩ tẽebã wɛɛngẽ: Gũus-y n ges n bãng nin-paalsã sẽn wa Tẽegrã sẽn yaa b rãmba. Tẽegrã poor bɩ y lebg n tɩ ges-b tao-tao. Leb-y n gom-y ne-b bõn-paals nins b sẽn bãng la b yã wã yelle. Togs-y-b tɩ tigiss a taab n be, sẽn tõe n sõng-b tɩ b bãng Biiblã n paase. Lebg-y n ges-y ne nin-kãens Bãngr sebrã sak 17 wã gom-zug sẽn yaa “Bɩ y paam bãan Wẽnnaam nin-buiidã sʋkã.” Rẽ na n wilg-b-la segls toɛ-toɛ b sẽn dɩk tigingã pʋgẽ tẽebã wɛɛngẽ. B tõe n dɩɩ segl-kãens nafa zĩig pʋgẽ. Rɩk-y segls tɩ b tõog n ges video ning gom-zug sẽn yaa Toute la communauté de nos frères wã. Video kãng sã n ka beẽ, bɩ y kɩt tɩ b ges video a to wala Unis grâce à l’enseignement divin wã. Video wã pʋgẽ, b mengã na n tõog n yãa a Zeova nin-buiidã zems-n-taare, sũ-noogo, la b yẽesem.
9 Tara yõod wʋsg tɩ neb nins sẽn nong sɩdã paalmã zãms n bãng b sẽn tõe n waoog a Zeova to-to. Wilg-y-b tɩ b sã n pʋʋs a Zeova ne pʋ-peelem, nooma a sũuri. Pʋʋsg a woto me na n kenga b raood tẽebã wɛɛngẽ. (1 Zã 5:14) Tũnug-y ne Baood seb-bilã zãmsg a 8 n tɩ ta 12 wã n wilg manesem ning sẽn waoogd a Zeova wã. Sõs-y ne a soabã yɛl nins b sẽn togs Témoins de Jéhovah seb-bila, seb-neng 30-1 pʋgẽ wã zugu. (Seb-bi kãngã sã n ka beẽ, y tõe n tũnuga ne Les Témoins de Jehovah — Unis pour faire la volonté de Dieu sur toute la terre seb-bilã, seb-neng 14-5). Raool-y nin-paalsã tɩ b tags n ges b sã n tõe n moona koe-noogã n waoog a Zeova.
10 D segd n talla mi-beoog a Zezi maoongã yĩnga, la d sẽn paam n ya a karen-biisã yĩnga. D sã n maan woto, waoogda Ba wã la a wat ne bark n kõt neb a taabã. A Zezi kãaba woto: “Ned sã n maan mam tʋʋmde, mam Ba na waoog-a.”—Zã 12:26.