2000 Yaa yʋʋmd sẽn welg toor zall bɩ?

BŨMB sẽn yaa zall n tɩ loe ne yʋʋmd 2000 wã bɩ? Neb nins sẽn yit Nen-taoor tẽnsẽ wã nong n geta yʋʋmd 2000 wã wala yʋʋmd tusr a tãab-n-soabã pipi yʋʋmde. Segl-kãsems la b maand n na n maan a kibsa. Monta bɛd la b lugend sẽn na yɩl n sõd segõnd dãmbã hal tɩ yʋʋm tus a yiib paalgã sɩnge. Yʋʋm Paalgã kibs ket tɩ beoog soaare bɛd la b siginda. Fut b sẽn gʋls b zut n wilgd yʋʋm tusrã baasg kaasg goam la b koosd galʋ-tẽn-biyã butigsẽ la galʋ-tẽn-bɛdã leeb-bɛd zĩisẽ.

Egiliiz rãmba, b bɛd la b kɩds na n kẽesa b mens yʋʋmdã tõr kibs rãmb pʋsẽ. Vẽer yʋʋmdã sɩngrẽ, b gũudame tɩ Pap Zãn Poll 2 tog sor n kẽng Israɛll n tɩ lʋɩ Katolik rãmbã taoor n maan b sẽn boond tɩ “Katolik Egiliizã kibs-kãseng yʋʋm tusrã yĩnga.” B magame n ges tɩ sẽn zems sãamb milyõ a yiib la pʋɩ-sʋk n digd milyõ a yoobe, sẽn sɩng ne wẽn-tũudb n tɩ ta nif-na-yã rãmba, n geend n na n kẽng Israɛll vẽere.

Bõe yĩng tɩ neb wʋsg woto baood n na n kẽng Israɛlle? A sẽn gomd Papã yĩnga, a Roger Cardinal Etchegaray, sẽn yaa Vatikã nin-kãsengã yeelame: “Yʋʋmd 2000 wã yaa Kirist la a vɩɩmã tẽn-kãng pʋgẽ wã kibs maanego. Woto yĩnga, yaa bũmb sẽn zems bal ne Papã t’a wa ka.” Wãn-wãn la yʋʋmd 2000 wã tɩ loe ne Kirista? B tagsdame tɩ yʋʋmd 2000 wã tɩ zemsa kɛpɩ ne Kirist rogmã yʋʋm tus a 2000 la woto. La yaa woto bɩ? Rẽ la d sẽn na n yã wã.

Yʋʋmd 2000 wã tara võor meng n yɩɩd ne tũudum sul sãnda neba. B sɩd tẽedame tɩ vẽer bɩ sẽn zems wakat kãnga, a Zezi na n lebg n waa Oliiv tɩɩs Tãngã zugu, la Harmagedõ zabrã b sẽn gom a yell Wilgr sebrẽ wã na n maana Megido longẽ wã. (Wilgri 16:14-16) B sẽn dengd n beoond yel-kãens waoongã, Etazĩni neb kobs koosda b rot la b tarem wʋsg n yikd n kẽngd Israɛlle. Sẽn na yɩl n sõng neb nins fãa sẽn pa tõe n bas b yiyã, b yeelame tɩ Etazĩni Evãnzelist kãseng kãabame t’a na n wilga a Zezi lebg-n-wa wã televiziõ n wã ne kulɛɛr tɩ b gese!

Nasaar tẽnsẽ wã, gɛɛl b sẽn maand n na n kẽ yʋʋm tusr a tãab-n-soabẽ wã tara paasga. Baasg zãnga, tẽns a taabẽ, nebã ket n tara b tʋʋmã tʋmb wa raasenkam. Nin-kãensã, sẽn yaa dũniyã neb wʋsg sẽn yɩɩdã pa tẽed t’a Zezi sẽn yit Nazarɛtã ra yaa Mesi wã ye. B leb n pa sakd wakat sõdg sẽn tik S.D.K.-A.D. zugã me ye.a Wala makre, moeemb wʋsg tũnugda ne b mens kalãndirie, tɩ sã n yaa ne kalãndirie kãngã, vẽer na n yɩɩ yʋʋmd 1420 la pa yʋʋmd 2000 ye. Moeembã sõta yʋʋmã n tikd no-rɛɛs a Mahãmad sẽn yi Mak n zoe n kẽng Mandĩinã wakate. Fãa gilli, dũniyã gill neb tũnugda ne kalãndirie rãmb buud toor-toor 40.

Yʋʋmd 2000 wã segd n talla võor ne kiris-nebã bɩ? Yʋʋmd 2000, yʋʋm-vẽkr kiuug pipi daarã sɩd tara võor sẽn tagem zall bɩ? B na n leoka sʋgs-kãensã sõsg ning sẽn pʋgdã pʋgẽ.

[Footnotes]