Yaa Wakat Bʋg La Yʋʋm Tusr A Tãab-n-soabã Sɩngda?

YÃMB zoe n wʋma b sẽn yet tɩ yʋʋm tusr a tãab-n-soabã pa na n sɩng yʋʋmd 2000 la yaa yʋʋmd 2001 bɩ? Zĩis wʋsg wɛɛngẽ, b tõe n yeelame tɩ yelsem kãngã zemsame. D sã n tags t’a Zezi Kirist roga wakat ning b sẽn mi tɩ yaa yʋʋmd a 1 S.D.T.W. wala neb kẽer sẽn deng n tagsã, rẽ, yaa yʋʋmd 2000 wã, (pa yʋʋmd 1999 wã) yʋʋm-sar kiuug rasem 31 n na n sɩd yɩ yʋʋmd tus a yiib-n-soabã baasgo, tɩ yʋʋmd 2001, yʋʋm-vẽkr kiuug pipi daarã yaa yʋʋmd tus a tãab-n-soabã sɩngre.a Baasg zãnga, bãngdbã fãa la bal sak n deega masã t’a Zezi Kirist pa rog yʋʋmd a 1 S.D.T.W. ye. Be neere, rẽnd a roga wakat bʋgo?

A Zezi roga wakat bʋgo?

Biiblã pa wilgd a Zezi rogmã wakat takɩ ye. Baasg zãnga, a yetame t’a roga ‘naab a Herood zãmaane.’ (Matɩe 2:1) Biiblã mitb wʋsg tẽedame t’a Herood kii yʋʋmd a 4 S.D.T.W. la t’a Zezi rogmã renga rẽnda, tõe tɩ yaa yʋʋmd a 5 bɩ a 6 S.D.T.W. B tikda b sẽn yet a Herood kũumã wɛɛngẽ wã a Flavius Joseph sẽn yaa yʋʋm kob-yendẽ kʋdemd yel-gɛt sẽn yaa Zʋɩfã goam zutu.b

Sã n yaa ne a Joseph, bilf sẽn deng tɩ Rĩm a Herood ki, yũug-yõk-kiuug n zĩndi. Biiblã mitb wilgdame tɩ yũug-yõk-kiuug n zĩnd bɛk yʋʋmd a 4 S.D.T.W., tʋʋlg kiuug rasem 11, tɩ yaa kaset t’a Herood tog n kii yʋʋm kãngã. Baasg zãnga, yʋʋmd a 1 S.D.T.W., yũug-yõk-kiuug zãng-zãng n zĩnd yʋʋm-vẽkr kiuug rasem a 8, t’a to sẽn yɩ bɛk zĩnd yʋʋm-sar kiuug rasem 27. Ned ba a ye pa tõe n yeele, a Joseph sã n da gomda yũug-yõk-kiuug rãmb nins sẽn zĩnd yʋʋmd a 1 S.D.T.W. a yembr yelle, bɩ sã n da yaa yũug-yõk-kiuug ning sẽn zĩnd yʋʋmd a 4 S.D.T.W. yell ye. Woto yĩnga, d pa tõe n tũnug ne a Joseph sẽn yeelã n wilg a Herood kũumã yʋʋmd takɩ ye. Baa d sã n da tõe n maan woto, d sã n pa tar kɩbay sẽn paase, d ket n pa tõe n bãng wakat takɩ ning a Zezi sẽn da rogã ye.

Kaset sẽn tar pãng n yɩɩd ning d sẽn tar sẽn tɩ loe ne a Zezi rogmã yita Biiblã pʋgẽ. Kɩbarã vʋʋsem sõng sẽn vẽneg tɩ b gʋlsã yetame tɩ Lisd a Zã sẽn yaa a Zezi pʋgdb biigã sɩnga a no-rɛɛs tʋʋmdã Rom Ãmperɛɛr a Tibɛɛr Sezaar naamã rɩɩb yʋʋmd 15 soabã sasa. (Luk 3:1, 2) Dũniyã pʋgẽ kʋdemd yel-gɛtb sɩd wilgdame tɩ b ra yãka a Tɩbɛɛr t’a yɩ ãmperɛɛr yʋʋmd 14 T.W. bõn-bɩʋʋng kiuug rasem 15. Woto yĩnga, a yʋʋm 15 soabã segd n yɩɩ yʋʋmd 28 T.W. baasgẽ n tɩ ta yʋʋmd 29 T.W. baasgẽ. A Zã sɩnga a ministɛɛrã wakat kãngã, la vẽenega, a Zezi sɩnga a ministɛɛrã kiis a yoob poore. (Luk 1:24-31) D sã n dɩk kɩba-kãensã n lagem ne kaset a taaba, a Zezi ministɛɛrã sɩnga yʋʋmd 29 T.W. zĩ-likr wẽnde.c Biiblã yetame t’a Zezi ra “kolga yʋʋm pis-tã,” a sẽn da wa n sɩng a ministɛɛrã. (Luk 3:23) A sã n da tar yʋʋm 30 yʋʋmd 29 T.W. zĩ-likri, rẽnd a roga yʋʋmd a 2 S.D.T.W. zĩ-likr wẽnde. Woto masã, d sã n sõd n sɩng ne yʋʋmd a 2 S.D.T.W. zĩ-likr wẽnde n watẽ (n tẽrẽ tɩ yʋʋmd sẽn yaa feoog ka be, woto, sẽn sɩng ne yʋʋmd a 2 S.D.T.W. n tɩ ta yʋʋmd a 1 soab T.W. yaa yʋʋm a yiibu), tɩ d neẽ tɩ yʋʋm tusr a yiib-n-soabã baasame tɩ yʋʋm tusr a tãab-n-soabã sɩng yʋʋmd 1999 zĩ-likr wẽnde!

Tara yõod bɩ? Wala makre, yʋʋm tusr a tãab-n-soabã sɩngr yaa a Zezi Kirist yʋʋm Tusr Naamã Rɩɩb b sẽn gom a yell Wilgr sebrẽ wã sɩngr bɩ? Ayo. Zĩig ba a yembre, Biiblã pa wilgd tɩ loees n be yʋʋm tusr a tãab-n-soabã ne Kirist Yʋʋm Tusr Naamã Rɩɩb sʋk ye.

A Zezi yeela a karen-biisã tɩ b gũus n da maan tags-bɛd n bao n bãng wakat dãmb ye. A yeela a karen-biisã: “A ka be ne yãmb tɩ y bãng wakate la zãmaan nins Wẽnnaam sẽn yãk ne b meng pãnga ye.” (Tʋʋma 1:7) Sẽn deng rẽ, a Zezi wilgame tɩ rẽ wẽndã yẽ mengã ra pa mi wakat ning Wẽnnaam sẽn da na n pids bʋ-kaoor yɛl siglg wẽng kãngã zugã, n pak sor tɩ Kirist Yʋʋm Tusr Naamã sɩng ye. A yeelame: “Ned ba a yembr ka mi daar kãnga la wakat kãng ye, baa malɛɛk rãmba sẽn be arzãna, baa Wẽnnaam Biiga meng ka mi ye, yaa Ba bala.”—Matɩe 24:36.

Zemsame tɩ d tags tɩ Kirist na n lebg n waa yʋʋm 2000 loogr poor takɩ, sẽn sɩng ne a rogmã wa ninsaalã tɛk bɩ? Yaa ayo. A Zezi ra segd n mii a mengã rogem wakate. La sɩd-sɩda, a ra mii a sẽn na n sõd yʋʋm 2000 to-to sẽn sɩng ne wakat kãnga. La a ra pa mi a waoongã daar la a lɛɛr ye. Vẽenega, ra pa na n yɩ nana woto bal tɩ b bãng a lebg-n-wa wã wakat ye! ‘Wakat la zãmaan’ dãmbã ra bee Ba wã nugẽ, yɛl wakat yãkr yẽ a yembr bal sẽn mi.

Sẽn paase, a Zezi pa kõ a karen-biisã noor tɩ b zĩnd zĩig takɩ n gũ-a ye. A pa yeel-b tɩ b tigim taab n gũ ye, la a yeel-b lame tɩ b sãeeg “dũniyã tɛk fãa” n tɩ maan buuda fãa neb tɩ b yɩ karen-biisi. A zɩ n lebs noor kãngã poorẽ ye.—Tʋʋma 1:8; Matɩe 28:19, 20.

B saagrã Yʋʋm-tusrã wɛɛngẽ na n lʋɩɩ koomẽ bɩ?

Baasg zãnga, tũudum neb kẽer sẽn yaa fõndamantalist rãmb gẽegda yʋʋmd 2000 wã sõma-sõma. B tẽedame tɩ kiis a wãn nins sẽn watã, Wilgr sebrã babs kẽer na n paama pidsg sɩdgem-sɩdgem la pa makr wɛɛngẽ ye. Sɩda, b getame tɩ bãmb mensã kẽesda b toog n pids-kãng pʋgẽ. Wala makre, b tika bãngr-gomd ning sẽn be Wilgri 11:3, 7, 8 pʋgẽ wã sẽn gomd kaset rãmb a yiibã sẽn togsd bãngr-goam “tẽng-kãseng ninga b sẽn boond ne makr goama tɩ Sodom wala Ezipta sʋka zĩig ninga b sẽn dag n ka bãmb Zusoaba me kũum da-pɩka zugã.” B sã n baas b kasetã kũuni, we-rũm-toaag sẽn yit bog-zulungẽ n kʋʋd kaset rãmb a yiibã.

Sã n yaa ne kɩbar sẽn be The New York Times Magazine zʋrnall ning sẽn puk yʋʋmd 1998, yʋʋm-sar kiuug rasem 27 wã, tũudum sull a yembr taoor soab “n yeel a karen-biisã tɩ yẽ yaa kaset rãmb a yiibã ned a ye b sẽn pʋlem t’a moon tẽngã sãoong la Soaalã waoongã, la tɩ rẽ poor la a Sʋɩtãan na n kʋ-a Zerizalɛm soayã zutã.” Israɛll pãn-soaadbã bee bʋʋm la b sẽn maand yɩɩrã. B yɛɛsdame tɩ yẽesem sẽn loog rãmb kẽer da mak n ‘pids’ bãngr-gomdã b toore, hali n wa wa ne zabr meng-meng ye! Baasg zãnga, Wẽnnaam pa baood ninsaal “sõngr” n na n pids a raabã ye. Biiblã bãngr-goam fãa na n paama pidsg wakat ning Wẽnnaam mengã sẽn yãkã pʋgẽ, la ne manesem ning yẽ mengã sẽn datã.

B gʋlsa Wilgr sebrã “ne bãna.” Sã n yaa ne Wilgri 1:1, (NW) a Zezi ra rat n wilga a “yembsã” (la pa dũniyã neb fãa) bũmb nins sẽn da na n zĩnd ka la bilfã. Sẽn na yɩl n wʋm Wilgr sebrã võore, Kirist yembsã bɩ a karen-biisã ra segd n paama Wẽnnaam vʋʋsem sõngã, a Zeova sẽn kõt neb nins sẽn tat a yamã. Wilgr sebrã võor sã n segd n wʋm wala yɛl sẽn na n zĩnd sɩdgem-sɩdgem la pa makr wɛɛngẽ, baa sẽn pa tar-b tẽebã ra tõe n karm-a lame n wʋm a võore. Woto, ra pa na n yɩ tɩlae ne kiris-nebã tɩ b pʋʋs n paam vʋʋsem sõngã sẽn na yɩl n wʋm a võor ye.—Matɩe 13:10-15.

D yãame tɩ sã n yaa ne Biiblã kaseto, yʋʋm tusr a tãab-n-soabã sẽn sɩng ne a Zezi rogmã sɩngda yʋʋmd 1999 zĩ-likr sasa, la d yã tɩ wakat kãnga, bɩ yʋʋmd 2000 yʋʋm-vẽkr kiuug pipi daarã, bɩ yʋʋmd 2001, yʋʋm-vẽkr kiuug pipi daarã pa tar võor zall ye. Baasg zãnga, yʋʋm tusr n be n pak kiris-nebã hal sõma-sõma. Sã n pa yʋʋm tusr a tãab-n-soabã, yaa bʋgo? Baasg sõsgã sẽn be sõss sẽn pʋgd taab kãngã pʋgẽ wã na n leoka sʋk-kãngã.

[Footnotes]

[Box on page 5]

Yaa yʋʋmd 2000 bɩ yʋʋmd 2001?

Sẽn na yɩl n wʋm bũmb ning sẽn kɩt tɩ neb kẽer yetẽ tɩ yʋʋm tusr a tãab-n-soabã sẽn sɩng ne a Zezi rogmã na n tɩ zemsa ne yʋʋmd 2001, yʋʋm-vẽkr kiuug pipi daarã võore, bɩ y ges bilg-kãngã. Rɩk-y makr ne y sẽn na n karemd sebr sẽn tar seb-vã-nens 200. Yãmb sã n wa ta seb-vã-neng 200 wã sɩngrẽ, y saa seb-vã-nens 199, tɩ yaa seb-vã-neng a yembr n ket karengo. Y pa na n sa sebrã tɩ sã n pa y taa seb-vã-neng 200 wã tɛkẽ ye. Woto me, wa nebã sẽn tagsd to-to wã, na n mikame tɩ masã yʋʋm tusrã yʋʋm 999 n loog yʋʋmd 1999, yʋʋm-sar kiuug rasem 31, tɩ ket yʋʋm-yend tɩ yʋʋm tusrã sa. Sã n yaa ne sõd-kãngã, yʋʋm tusr a tãab-n-soabã sɩngda yʋʋmd 2001, yʋʋm-vẽkr kiuug pipi daare. Baasg zãnga, wala sõs-kãngã sẽn wilgdã, rẽ pa rat n yeel tɩ wakat kãnga, na n mikame tɩ yaa yʋʋm 2000 takɩ n loog d sã n sɩng sõdg a Zezi rogmã tɛk ye.

[Box on page 6]

Yaa wãn-wãn la S.D.K.-A.D. wakat sõdb manesmã sɩng-yã

Yʋʋm kob-gĩnd a yoob soab T.W. sɩngrẽ, Pap Zã 1 kõo moan sẽn boond t’a Dionysius Exiguus tʋʋmd n yeel-a t’a maan magb manesem sẽn da na n sõng egiliiz rãmbã tɩ b yãk wakat bãmb meng sẽn sak Pakã yĩnga.

A Dionysius sɩnga tʋʋmdã. A magame n leb poorẽ wakatã pʋgẽ, n sãag a Zezi kũumã wakate, n tɩ ta wakat ning a sẽn da tagsd tɩ yaa a Zezi rogmã sasa. Rẽ poore a sõda yʋʋmd fãa sẽn sɩng ne wakat kãng masã n watẽ. A Dionysius pʋda wakatã sẽn sɩng ne a Zezi rogmã tɩ “A.D.” (tɩ yaa Anno Domini, “tõnd soaalã pʋgẽ yʋʋmde.”) A sẽn da rat bal n mams magb manesem sẽn zems ne bas-yard n na n mag Pakã wakat yʋʋmd fãa wã, a Dionysius sɩnga yʋʋm sõdb manesem sẽn sɩng ne Kiristã rogem n tar n watẽ n pa bãng ye.

Baa ne mitb wʋsg sẽn sak n deeg t’a Zezi pa rog yʋʋmd ning a Dionysius sẽn da tikd n maand a magbã, a wakatã sõdb manesem sɩd sõngda tõnd tɩ d bãng yɛlã maaneg sasa wakatã pʋgẽ, la d bãng loees ning sẽn be yel-kãens ne taab sʋkã.