Dũniyã Saabo: A wata ne rabeem la sũ-sãamse, tɩ wʋsg gomd a yelle

Neb wʋsg ra yetame tɩ dũniyã na n saa yʋʋmd 2012 yʋʋm-sar kiuug rasem 21 wã daare. Y tagsg yaa wãn ne rẽ? Tõe tɩ sẽn pa pidsã, y sũur sãamame, wall yɩɩ noogo, pa rẽ bɩ kɩtame tɩ y pa le tagsd dũniyã saab yelle ye. Rẽ me pa wa b sẽn da togs pĩnd tɩ dũniyã na n saame tɩ pa pidsã sɩda?

La yaa wãn to yẽ ne Biiblã sẽn bilgd “dũniyã sɛɛb” sẽn na n yɩ to-to wã? (Matɩe 24:3) Neb wʋsg tẽedame tɩ bugum n na n dɩ dũniyã, tɩ rabeem tar-ba. Kẽer me yãgdame n na n yã dũniyã saab sẽn na n yɩ to-to. La sãnda yam yiime, bala b sɩng n gũuda dũniyã saab tɩ pa watẽ ye. Rẽ yĩnga nin-kãens fãa manesmã wilgdame tɩ dũniyã saab yaa soalem bal bɩ?

Tõe tɩ y sã n bãng Biiblã sẽn yet bũmb ning dũniyã saab wɛɛngẽ wã, na n ling-y lame. A pa wilgd d sẽn segd n gũ dũniyã saabã võor bal ye. A wilgdame me tɩ sã n wõnd kaoosda pidsgu, tõe n sãama sũuri. Bɩ d bao n bãng Biiblã sẽn leokd sogsg kẽer dũniyã saab wɛɛngẽ to-to.

Bugum n na n dɩ dũniyã bɩ?

BIIBLÃ SẼN YETE: “[Wẽnnaam] yẽbga dũniyã a yẽbgr zugu, a kõn tol n dĩms abada ye.”—YƖƖL SÕAMYÃ 104:5.

Bugum wall bũmb a to pa na n saam dũniyã ye. Biiblã yeelame tɩ Wẽnnaam naana dũniyã n dat tɩ neb zĩnd a zug wakat fãa. Yɩɩl Sõamyã 37:29 yeta woto: “Nin-tɩrs na n sooga dũniyã, la bãmb na n zĩnda a zug wakat sẽn ka sɛta.”—Yɩɩl Sõamyã 115:16; Ezai 45:18.

Wẽnnaam sẽn wa n naan dũniyã n sɛ wã, a yeelame t’a “yaa sõma wʋsgo,” la a nifẽ, dũniyã ket n yaa sõma. (Sɩngre 1:31) A pa gom a sãoong yell ye. Wẽnnaam yeelame meng t’a na n “sãama neb nins sẽn sãamd dũniyã,” n kogl-a-la tɩ b ra sãam-a zãng ye.—Wilgri 11:18.

La tõe tɩ y sokda y meng 2 Pɩɛɛr 3:7 goamã võore. Biiblã vɛrse-kãng yeta woto: “Yĩngr la dũniyã sẽn be masã wã bĩnga bugum yĩnga.” Rẽ yĩnga gom-kãensã pa wilgd tɩ bugum n na n dɩ dũniyã sɩda? Bãng-y tɩ Biiblã sã n gomd “yĩngri,” “dũniyã” la “bugum” yelle, wae n yaa makre. Yɩɩl Sõamyã 97:1 wã yeta woto: “Bɩ dũniyã kɩdem.” Ka wã, “dũniyã” makda ãdem-biisã.

D sã n karem 2 Pɩɛɛr 3:5, 6 goamã, d mikdame tɩ yĩngr la dũni ning yell vɛrse a 7 wã sẽn gomdã yaa makre. Vɛrse kãens maka dũniyã saabã ne a Nowe wakatẽ sa-kãsengã. Sa-kãsengã sãama dũniyã, la tẽngã pa sãam ye. Sa-kãsengã sẽn sãamã yaa nin-wẽnsã sẽn makd “dũniyã.” (Sɩngre 6:11) “Yĩngr” ning a sẽn sãama me makda wakat kãng nanambsã. Woto me, 2 Pɩɛɛr 3:7 goamã wilgdame tɩ Wẽnnaam na n sãama nin-wẽnsã ne b nanambsã fasɩ wa bugum sẽn dɩ bũmbu.

Bõe n na n maan dũniyã saabã wakate?

BIIBLÃ SẼN YETE: “Dũniyã ne a ratem wẽngã me loogdame, la ned ning sẽn maand Wẽnnaam daab paada wakat sẽn ka sɛta.”—1 ZÃ 2:17.

“Dũni” ning sẽn na n loogã pa tẽngã ye. Yaa nin-wẽnsã, rat n yeel tɩ neb nins sẽn pa tũud Wẽnnaam daabã. Wala logtor sẽn tõe n wopeer bãad n yãk bũmb ning sẽn wa ne bãagã t’a põsã, Wẽnnaam na n ‘sãama’ nin-wẽnsã tɩ nin-tɩrsã paam b mens n vɩɩmd dũniyã zug ne sũ-noogo. (Yɩɩl Sõamyã 37:9) Dẽnd d tõe n yeelame tɩ “dũniyã sɛɛb” yaa bõn-sõngo.

Yaa rẽ n so tɩ Biibl-dãmb kẽer lebgd “dũniyã saabã” tɩ “zãmaanã saabo.” (Matɩe 24:3; New International Version) Rẽ yĩnga ãdem-biis kẽer la dũniyã meng sẽn na n põsã, pa wilgd tɩ zãmaanã saab poore, dũni-paalg n na n zĩnd sɩda? Biiblã leokdame tɩ n-ye, bala a gomda ‘zãmaan sẽn wat’ yelle.—Luk 18:30, Sebr Sõngo.

A Zezi boola wakat kãng tɩ “bũmb fãa manegr wakate.” Sasa kãnga, Wẽnnaam na n kɩtame tɩ ãdem-biisã lebg wa a sẽn da rat tɩ b yɩ to-to hal sɩngrẽ wã. (Matɩe 19:28) Ad sɩd na n yɩɩ sũ-noog wakate!

• Tẽngã na n lebga arzãna, tɩ nebã vɩɩmd a zug ne laafɩ la sũ-noogo.—Ezai 35:1; Miise 4:4.

• Ned kam fãa na n talla tʋʋmd sẽn tar barka, la sẽn kõt sũ-noogo.—Ezai 65:21-23.

• Bãasã fãa na n saame.—Ezai 33:24.

• Sẽn kʋʋl-bã fãa na n lebga poala.—Zoob 33:25.

• Sẽn ki-bã na n vʋʋgame.—Zã 5:28, 29.

D sã n maanda “Wẽnnaam daabã,” rat n yeel tɩ bũmb nins a sẽn dat tɩ d maanã, dũniyã saab rabeem pa segd n tar tõnd ye. D pʋd n segd n tʋlgame t’a wa.

Dũniyã saab sɩd kolgame bɩ?

BIIBLÃ SẼN YETE: “Yãmb sã n yã tɩ bõn-kãens beeme, bɩ y bãng tɩ Wẽnnaam soolem kolgame.”—LUK 21:31.

Seb-gʋlsd a Richard Kyle yeela a sebr a ye (Les dernier jours sont de retour, [ãngil.]) pʋgẽ tɩ “dũniyã sẽn gudgd zĩig zãngã kɩtame tɩ nebã gomd dũniyã saab yelle,” sẽn yɩɩd fãa, b sã n pa wʋmd gudgr ning võore.

La Biiblã pʋgẽ no-rɛɛsdbã pa tik b wakatẽ zu-loeesã zug n togs b bãngr-goamã ye. Yaa Wẽnnaam n vẽneg-b tɩ b bãng yɛl nins sẽn na n zĩnd tɩ wilg tɩ dũniyã saab ta n saame wã. Bɩ d gom bũmb nins b sẽn wilg tɩ na n zĩnda tõnd wakatã kẽer yelle, la d tags n ges sã n sɩd pidsdame.

• Zabã, komã, tẽn-digimdug la bã-longdse.—Matɩe 24:7; Luk 21:11.

• Wẽngã na n yɩɩ wʋsgo.—Matɩe 24:12.

• Nebã na n sãamda tẽngã.—Wilgri 11:18.

• Nebã na n yɩɩ beed rãmba, ligd nongdba, n nong dũniyã sũ-noog n yɩɩd b sẽn nong Wẽnnaam.—2 Tɩmote 3:2, 4.

• Nebã na n kɩɩsda b ba-rãmb la ma-rãmba.—2 Tɩmote 3:2, 3.

• Nebã na n maanda b toor kae ne bãn nins sẽn wilgd tɩ dũniyã saab kolgame wã.—Matɩe 24:37-39.

• B na n moonda Wẽnnaam Rĩungã koe-noogã dũniyã tɛk fãa.—Matɩe 24:14.

A Zezi yeelame tɩ d sã n wa yã “bõn-kãensã fãa,” bɩ d bãng tɩ dũniyã saab kolgame. (Matɩe 24:33) A Zeova Kaset rãmbã sẽn ne bãngr-gom-kãensã sẽn pidsdã, b kɩsa sɩd tɩ dũniyã saab kolgame, n moond koɛɛgã tẽns 236 pʋsẽ n keoogd nebã.

B sẽn da togs dũniyã saab wakat tɩ pa pidsã wilgdame t’a pa na n tol n sa bɩ?

BIIBLÃ SẼN YETE: “Wakat ning nebã sẽn na n yeel tɩ laafɩ la yĩn-maasmã, wakat kãng bala, toog na n paama bãmb wa toog sẽn yõkd pag sẽn tʋta, la bãmb kõn põs ye.”—1 TESALONIK RÃMBA 5:3.

Biiblã maka dũniyã saab ne pag sẽn kʋmd rogem. Zabdmã yaa tɩlae. Sẽn paase, a tiigdame n sɩnge. La bũmb nins sẽn na n maan nand tɩ saabã ta wã me yaa wa pag sẽn tar pʋga. Sɩd me, pag sã n dɩk pʋga, bũmb toor-toor n na n maand a yĩngẽ wã, t’a miẽ t’a rogmã daar kolgdame. Logtor tõe n ges-a lame n wilg a rogmã sẽn tõe n yɩ daar ninga. La baa a sã n pa rog daar-n-kãnga, a mii vẽeneg tɩ pa na n le kaoos la a rog ye. Woto me, baa b sã n da togsa dũniyã saab wakat tɩ pa pidsi, yɛlã sẽn yaa to-to wã wilgda vẽeneg tɩ d vɩɩ “yaoolem wakate.”—2 Tɩmote 3:1.

‘Bãn nins sẽn wilgd tɩ d vɩɩ yaoolem wakatã sẽn yaa vẽenesã,’ tõe tɩ y sokda y meng woto: ‘Bõe yĩng tɩ neb wʋsg pa rat n sak n deege?’ Biiblã yeelame tɩ dũniyã saab sã n wa n kolgdẽ, wʋsg na n maanda b toor kae ne bãn nins sẽn wilgd rẽ wã. Wall tɩ b sak n deeg tɩ dũniyã sẽn toeemd to-to wã wilgdame tɩ d vɩɩ yaoolem wakatã, b yaanda sẽn tẽed-bã n yet woto: “Hal tõnd yaab-rãmbã sẽn ki tɩ ta masã, bũmb fãa ket n yaa wa dũniyã naaneg wakate.” (2 Pɩɛɛr 3:3, 4) Dẽnd yaoolem dayã bãn yaa vẽenesã, la neb wʋsg maanda b toor kae.—Matɩe 24:38, 39.

Sõs-kãngã pʋgẽ, d yãa vɛrse-rãmb a wãn sẽn wilgd vẽeneg tɩ dũniyã saab ta n saame.a Y sã n data kibay a taab n paase, bɩ y kos a Zeova Kaset rãmbã, tɩ b zãmsda nebã Biiblã zaalem. B tõe n wat n zãmsd-y-la y zakẽ wã, pa rẽ bɩ zĩig a to sẽn zems ne-yã, wall ne telefõn menga. Yãmb wee n bao sẽk bala. Sẽn paase, na n naf-y-la wʋsgo.