“Dũniyã sɛɛb” na n yɩɩ wãn to?

B sã n gomd “dũniyã sɛɛb” yelle, bõe yell la yãmb tagsda? Y tagsdame tɩ yaa wakat a Zezi Kirist sẽn na n wa tall tẽedbã n kẽng saasẽ bɩ, bɩ y tagsdame tɩ yaa wakat Wẽnnaam sẽn na n sãam tẽngã ne bũmb ning fãa sẽn be a zugã? La f sã n gomd dũniyã sɛɛb yelle, neb kẽer yɛɛsdame, tɩ sãnda tagsdẽ tɩ pa bũmb sẽn tol n tõe n yɩ ye.

Biiblã yeelame tɩ ‘dũniyã sɛɛb na n taame.’ (Matɩe 24:14) B boonda dũniyã sɛɛb tɩ “Wẽnnaam sẽn tõe fãa da-kãsengã,” la “Armagedõ” me. (Wilgri 16:14, 16) Yaa sɩd tɩ tũudmã taoor dãmb sẽn yet bũmb ning dũniyã sɛɛb wɛɛngẽ wã yaa toor-toore, tɩ nebã sẽn mamsd yɛlã sẽn na n yɩ to-to wã me yaa toor-toore. La Biiblã sẽn yet bũmb ning dũniyã sɛɛb wɛɛngẽ wã yaa vẽenega, n tõe n sõng-d tɩ d bãng sẽn na n yɩ to-to. A tõe n sõng-d lame me tɩ d bãng dũniyã sɛɛb sã n kolgame bɩ pa kolge. La sẽn tar yõod n yɩɩda, a wilgda d sẽn tõe n maan to-to n wa tõog n põse. Bɩ d reng n ges neb kẽer sẽn tagsd sɛɛbã sẽn na n yɩ to-to, la d ges Biiblã vɛrse-rãmb sẽn wilgd tɩ pa na n yɩ woto ye.

NEB KẼER SẼN YETE

1. BUGUM N NA N DƖ TẼNGÃ ZÃNGA.

   La Biiblã yeela woto: “[Wẽnnaam] yẽbga dũniyã a yẽbgr zugu, a kõn tol n dĩms abada ye.” (Yɩɩl Sõamyã 104:5) Vɛrse-kãnga, n paas vɛrse-rãmb a taab wilgdame tɩ Wẽnnaam pa na n tol n sãam tẽngã, la t’a pa na n bas tɩ bũmb sãam-a me ye.—Koɛɛg Soaba 1:4; Ezai 45:18.

2. DŨNIYÃ SƐƐB NA N TIIG N WAA YAARE.

   Biiblã wilgame tɩ Wẽnnaam zoe n yãka dũniyã sɛɛb sẽn na n yɩ wakat ningã. A Zezi yeela woto: “Ned baa a ye ka mi da-kãng la wakat kãng ye. Baa malɛk-rãmb sẽn be arzãnã ka mi ye, baa Biigã ka mi ye, yaa Ba wã bala. Gũus-y neere. Bɩ y gũ, tɩ bõe, yãmb ka mi wakat ning ra-kãng sẽn na n wa ye.” (Mark 13:32, 33) Vẽenega, Wẽnnaam sẽn yaa “Ba wã” yãka wakat takɩ, n na n sãam dũniyã.

3. NINSAALBÃ N NA N WẼNEG N SÃAM TẼNGÃ, WALL BŨMB N NA N YI YĨNGR N WA WẼ TẼNGÃ N SÃAM-A.

   Pa na n yɩ woto ye. Wilgr 19:11 yeelame: “Mam yãa arzãn sẽn pake, la haya! Wed-pɛɛlg n be be, la sẽn zao-a yẽ wã boondame tɩ Tɩrlem la Sɩda.” Vɛrse 19 wã paasame: “La mam yãa rũngã ne dũniyã rĩm-dãmb la b sodaas sẽn tigim taab n na n zab ne sẽn zao-a weefã la neb kʋʋng nins sẽn tũud bãmbã.” (Wilgri 19:11-21) Yaa sɩd tɩ gom-kãensã kẽer yaa gom-bɩndem. La d nee vẽeneg tɩ Wẽnnaam na n tʋma malɛgs tɩ b wa sãam a bɛɛbã.

BIIBLÃ SẼN YETE

1. NINSAALBÃ GOOSNEEMA-RÃMBÃ SẼN PA TÕE N WELG B ZU-LOEESÃ NA N SÃAMAME.

   Biiblã yeela woto: “Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem-kãens fãa tɩ b menem n bas-a t’a yaas wakat fãa.” (Daniɛll 2:44) Sull ning sẽn loogã wilgame tɩ b na n sãama ‘dũniyã rĩm-dãmbã la b sodaasã sẽn na n tigim taab n zab ne sẽn zao-a weefã, la ne neb kʋʋng nins sẽn tũud bãmbã.’—Wilgri 19:19.

2. ZABA, NEN-KƐGLEM LA WẼGB BUUD FÃA NA N SAAME.

   “[Wẽnnaam] kɩtdame tɩ zabr sɛ hal dũniyã tɛk fãa.” (Yɩɩl Sõamyã 46:10) “Nin-tɩrs na n zĩnda tẽngã pʋgẽ, pʋ-peelem dãmb na n zĩnda a pʋgẽ. La b na n yiisa nin-wẽns tẽngã pʋgẽ. B na n yiisa neb nins sẽn ka baood sɩdã.” (Yelbũna 2:21, 22) Wẽnnaam yeelame: “Gese, mam maanda bũmb fãa paalse.”—Wilgri 21:4, 5.

3. TŨUDUM NINS SẼN PAOOGD WẼNNAAM, LA SẼN PA NAFD NINSAALBÃ NA N SÃAMAME.

   Biiblã yeela woto: “Wẽnnaam no-rɛɛsdbã yagda ziri, la maan-kʋʋdbã lagma bãmba. . . . La yãoã fãa sã n wa sɛ, yãmb na n maana bõe?” (Zeremi 5:31) A Zezi yeelame: “Baraare, neb wʋsg na n yeela maam yaa: ‘Zu-soaba, Zu-soaba, tõnd da ka togs bãngr-goam ne yãmb yʋʋre, la d rig zĩn-dãmb ne yãmb yʋʋre, la d maan bõn-bãn wʋsg ne yãmb yʋʋr sɩda?’ La mam na n yeela bãmb vẽeneg yaa: ‘Mam ka mi yãmb baa bilf ye. Bɩ y bas maam, yãmb tʋʋm-wẽns-maandba.’ ”—Matɩe 7:21-23.

4. NEB NINS SẼN KẼESD B MENS DŨNIYÃ YƐLẼ WÃ NA N SÃAMAME.

   A Zezi yeela woto: “Bʋ-kãng yaa tɩ vẽenem waa dũniyã zugu, la nebã nonga likã n yɩɩd vẽenem, bãmb tʋʋmã sẽn yaa wẽnsã yĩnga.” (Zã 3:19) Biiblã goma dũni sẽn sãam pĩnd yelle. Yɩɩ wẽn-sakd a Nowe wakatẽ wã. A yeelame tɩ ‘dũniyã sẽn da be pĩndã sãama koom sẽn lim-a wã yĩnga,’ la tɩ “yĩngr la dũniyã sẽn be masã wã bĩnga bugum yĩnga, bʋʋd kaoobo la wẽn-kɩɩsdbã sãoong daar sẽn na n ta wã.”—2 Pɩɛɛr 3:5-7.

B maka ‘bʋʋdã kaoob la wẽn-kɩɩsdbã sãoong daar’ sẽn watã ne a Nowe wakatẽ dũniyã sãoongã. Yɩɩ dũni bʋg la sẽn sãamã? Pa yɩ tẽngã ye. Yɩɩ wẽn-kɩɩsdbã sẽn yaa Wẽnnaam bɛɛbã la sẽn sãamã. Bʋʋdã kaoob daar sẽn watã sasa me, Wẽnnaam na n sãama neb nins sẽn yaa a bɛɛb n kɩɩsd-a ne yamleoogã. La a na n kogla a zo-rãmbã, wa a sẽn kogl a Nowe ne a zakã rãmbã.—Matɩe 24:37-42.

Wẽnnaam sã n wa sãam nin-wẽnsã fãa, y pa tagsd tɩ vɩɩmã na n yɩ noog tẽngã zug sɩda? Vẽenega, Biiblã sẽn yet sɛɛbã wɛɛngẽ wã yaa koe-noog lakae, pa koe-beed ye. La tõe tɩ y kell n sok y meng woto: ‘Biiblã wilgda dũniyã sɛɛb sẽn na n yɩ wakat ningã bɩ? Sɛɛbã kolgame bɩ? Bõe la m tõe n maan n wa paam n põse?’