Sogsg Biiblã sẽn leokde
Ãnd soab n sɩd yaa dũniyã naaba?
Sã n da yaa Wẽnnaam la dũniyã naaba, nebã ra nan namsdẽ sɩda?
Neb wʋsg tẽedame tɩ yaa Wẽnnaam la dũniyã naaba. La sã n yaa woto, nebã ra nan namsdẽ sɩda? (Tõodo 32:4, 5) Biiblã yetame tɩ dũniyã bee wẽng soabã nugẽ.—Karm-y 1 Zã 5:19.
La maana wãn tɩ dũniyã wa be wẽng soabã nugẽ? A Ãdem ne a Hawa naanegã poore, malɛk a ye n wa n kɩɩs Wẽnnaam, la a tʋlg tɩ bãmb me kɩɩse. (Sɩngre 3:1-6) A Ãdem ne a Hawa saka malɛg-kãngã sẽn yaa a Sʋɩtãanã raabo, t’a lebg b naaba. Yaa Wẽnnaam sẽn ka to wã n segd n yɩ d fãa naaba. La a kõo nebã fãa sor tɩ b yãk yẽ naamã, tɩ wilg tɩ b nong-a lame. (Tõodo 6:6; 30:16, 19) Bʋko, neb wʋsg rɩka a Ãdem ne a Hawa naoore. B basame t’a Sʋɩtãan tudg-ba.—Karm-y Wilgr 12:9.
Ãnd n na n welg ãdem-biisã zu-loeesã?
Rẽ yĩnga Wẽnnaam na n basa a Sʋɩtãan t’a kell n yɩ dũniyã naab bɩ? Abada! Ne a Zezi maasem, Wẽnnaam na n kɩtame tɩ wẽng ning fãa a Sʋɩtãan sẽn wa ne wã sa.—Karm-y 1 Zã 3:8.
Wẽnnaam kõ a Zezi pãng t’a na n sãam a Sʋɩtãana. (Rom dãmba 16:20) Rẽ poore, Wẽnnaam na n lebga ãdem-biisã naaba, n kɩt tɩ b vɩɩmd ne laafɩ la sũ-noog wa a sẽn da rat hal sɩngrẽ wã.—Karm-y Wilgr 21:3-5.