SEBRÃ GOM-ZUG SÕSGÃ | Y TÕE N PAAMA SŨ-NOOG Y TƲƲMDÃ PƲGẼ
Neb wʋsg pa le nong tʋʋm ye
A Alɛgs zẽka kartõ wã n tɩ ning kamyõ wã pʋgẽ, la a bas n wẽ sir n sok a meng woto: ‘Bõe yĩng tɩ mam tʋmd tʋʋm-kãnga? Dabʋr la mam na n yaa n yidgi? Sã n da pa tɩlae tɩ m tʋme, m vɩɩmã ra na n yɩẽ-la noog wʋsgo!’
Rũndã-rũndã, neb wʋsg yaa wa a Alɛgse, n pa nong tʋʋmd sẽn yaa toog ye. A Aarõ sẽn yaa mobila mikanisiẽ wã yeelame: “Neb wʋsg tagsdame tɩ b sã n tʋmd tʋʋmd sẽn yaa toogo, b paoogda b menga.” A paasame tɩ sẽn tʋmd-b tʋʋm-kãens buudã wʋsg sẽn dat bal yaa b we n paam tʋʋmd sẽn são rẽ.
Bõe yĩng tɩ neb wʋsg pa rat n tʋm tʋʋmd sẽn yaa toogo? Tõe tɩ yaa filim-dãmbã sẽn wae n wilgd neb sẽn pa tʋmde, n yaool n vɩ naar pʋgẽ wã n kɩt tɩ b tagsdẽ tɩ vɩɩm hakɩkã la woto. B rɩka a Matɩe tʋʋm ro-bedr pʋgẽ, tɩ bũmb sã n sãam bɩ yaa yẽ n manegde. A yeela woto: “Nebã tagsdame tɩ sã n yaa tɩlae tɩ f tʋm wʋsg n yaool n paam bũmb nins sẽn yaa tɩlae ne-fã, f vɩɩmã ka neng ye.” A San tʋʋmd yaa rot yẽesgo. Yẽ me gũus n gesame tɩ yaa woto. Ad a sẽn yeele: “Nebã ratame tɩ b yaood-b sõma, la b pa le rat n wɩsg b mens n tʋm ye.”
La neb n be n nong tʋʋma. A Daniɛll sẽn yaa masõ sẽn tar yʋʋm 25 wã yeela woto: “Mam tagsdame tɩ ned sã n wɩsgd a meng n tʋmdẽ, nafd-a lame. Sẽn yɩɩd fãa, sã n yaa bõn-tɩrg yĩng la a tʋmda.” A Ãndere sẽn tar yʋʋm 23 wilgame tɩ yẽ me tẽeda woto. A yeelame: “Mam tagsdame tɩ tʋʋm wata ne sũ-noogo. Ned sã n pa rat n tʋm wʋsgo, a pa tõe n paam sũ-noog hakɩk ye. A yamã wat n yi a tʋʋmdã bala.”
Bõe n kɩt t’a Daniɛll la a Ãndere ne neb a taab nong tʋʋma? Koɛɛg-koɛɛga, b tũu Biiblã saglse. Biiblã wilgame tɩ d segd n tʋma ne yẽesem. La pa rẽ bal ye. A leb n wilga d sẽn tõe n maan to-to n paam sũ-noog d tʋʋmdã pʋgẽ.
Biiblã sagl-bʋs n tõe n sõng-y tɩ y paam sũ-noog y tʋʋmdã pʋgẽ? Sõsg ning sẽn pʋgdã gomda rẽ yelle.