Biiblã sẽn yet vɩɩmã la kũumã wɛɛngẽ

D sã n karem Sɩngr sebrã sẽn be Biiblã pʋgẽ wã, d yãtame tɩ Wẽnnaam da yeela d yaab a Ãdem yaa: “Fo tõe n dɩɩ tɩɩs nins fãa sẽn be zẽedã zĩig pʋgẽ wã biisi. . . . Yaa tɩɩg ning sẽn kɩtd tɩ ned bãng wẽnga, ne sõmb n bakã biis bal la fo ka tog n dɩ. Bala, daar ning fo sẽn na n dɩ tɩ-kãngã bilã, fo na n kiime.” (Sɩngre 2:16, 17) No-kãnga Wẽnnaam sẽn kõ wã ra yaa vẽenega, a tũub me ra pa toog ye. A Ãdem sã n da sak n tũ, a ra na n vɩɩmda wakat sẽn kõn sa, Edɛn zẽedã pʋgẽ.

A Ãdem yãka yam n kɩɩs Wẽnnaam noorã. A pagã kõ-a-la tɩɩg ning Wẽnnaam sẽn gɩdg tɩ b ra rɩ wã bil t’a rɩ. Kɩtame t’a ra pa le tõe n vɩɩmd wakat sẽn kõn sa ye. (Sɩngre 3:1-6) A kɩɩsgã biis ket n namsda tõnd baa ne rũndã. Tʋm-tʋmd a Poll goma rẽ yell n yeel yaa: “Rao a yembr n wa ne yel-wẽnã dũniyã tɩ kũum wa yel-wẽnã yĩnga. Rẽ n kɩt tɩ kũum yõkd nebã fãa, fãa sẽn maand yel-wẽnã yĩnga.” (Rom-dãmbã 5:12, Wẽnnaam Sebre, 1983) Yaa a Ãdem yell la b sẽn gomd vɛrse kãngã pʋgẽ wã. Bõe la a maan tɩ yaa yel-wẽnde, la wãn to la rẽ wa ne kũum?

A Ãdem sẽn yãk yam n kɩɩs Wẽnnaam noorã yaa yel-wẽnde. (1 Zã 3:4) La wa Wẽnnaam sẽn yeel a Ãdmã, yel-wẽndã yaood yaa kũum. A Ãdem ne kamb nins a sẽn da na n dogã sã n da kell n sak Wẽnnaam noorã, yel-wẽnd ra pa na n zĩndi, b ra kõn tol n ki me ye. Wẽnnaam pa naan ninsaal n dat t’a wa ki ye. A naan-a lame n dat t’a vɩɩmd wakat sẽn kõn sa.

Sik kae tɩ wa Biiblã sẽn yeelã, ‘nebã fãa kiidame.’ La ned kũum poore, bũmb n be n yit a yĩngẽ wã, n ket n vɩ bɩ? Neb wʋsg yetame tɩ ninsaal tara sɩɩga, la tɩ sɩɩgã pa tol n tõe n ki ye. La b sẽn yetã sã n yaa sɩda, rat n yeelame tɩ Wẽnnaam sẽn yeel a Ãdmã yaa ziri. Bõe yĩng tɩ d yet woto? Wẽnnaam yeela a Ãdem t’a sã n kɩɩs yẽ, a sɩbgrã na n yɩɩ kũum. La sã n mik tɩ ninsaal tara sɩɩg sẽn pa kiidi, la t’a kũum poore, sɩɩgã yit n tɩ vɩ zĩig a to, dẽnd kũumã pa sɩbgr ye. Biiblã yaool n yeelame tɩ Wẽnnaam “ka tõe n yag zĩrẽ” ye. (Ebre-rãmbã 6:18) A Sʋɩtãan sẽn yeel a Awa bũmb ningã la ziri. A yeela a Awa yaa: “Yãmb ka na n tol n ki ye!”—Sɩngre 3:4.

Nebã sẽn yet tɩ ninsaal tara sɩɩg sẽn pa kiidã sã n yaa ziri, rat n yeelame tɩ ned kũum poore, saame bɩ?

BIIBLÃ SÕNGDA TÕND TƖ D BÃNG SƖDÃ

Sɩngr sebrã goma ninsaal naanegã yelle, n yeele: “Sẽn-Ka-Saab yãka tẽngã tom n maan ninsaala. La Wẽnnaam fʋʋsa ninsaal yõ-bogdã pʋga, n ning vɩɩm ninsaal pʋgẽ. La ninsaal lebga nin-vɩɩga.” Yaa ebre gom-bil ning sẽn yaa nefɛsãa la b sẽn lebg moorã pʋgẽ tɩ “nin-vɩɩgã.” A võorã meng yaa bõn-naandg sẽn vʋʋsde.—Sɩngre 2:7.

Biiblã wilgda vẽeneg tɩ Wẽnnaam sẽn naan ninsaalã, a pa naan-a t’a tar sɩɩg sẽn pa kiid ye. La a wilgame tɩ ninsaal fãa yaa “nin-vɩɩga.” Rẽ n so tɩ baa y sẽn gẽes to-to fãa, y pa na n tol n yã baa Biiblã vɛrse-yɛng sẽn gomd “sɩɩg sẽn pa kiid” yell ye.

Biiblã sẽn pa yet tɩ ninsaal tara sɩɩg sẽn pa kiidã, bõe yĩng tɩ tũudum wʋsg pʋgẽ, b zãmsd nebã tɩ ninsaal tara sɩɩg sẽn pa kiidi? Sɩnga hal pĩnd wẽndẽ, Ezɩpt soolmẽ wã.

SẼN PƲƲSD-B WẼN-NAANDSÃ N DA TẼED WOTO

A Herodot yaa kʋdemd yel-mit sẽn zĩnd na maan yʋʋm 400 sẽn deng a Zeezi rogmã. Ra yaa Gɛrɛs soolmã neda. A yeelame tɩ yaa “Ezɩpt nebã n wa n sɩng n tẽed tɩ ninsaal tara sɩɩg sẽn pa kiidi.” Pĩnd wẽndẽ Babilond nebã me wa n tẽeda woto. Gɛrɛs naab a Alɛgsãndr le Gãrã wa n zab n deega Moayẽnoriyã yʋʋmd 332 sẽn deng a Zeezi rogmã. Rẽ tɛka, Gɛrɛs soolmã filozof-rãmb wa n tõogame tɩ neb wʋsg tẽed tɩ ninsaal tara sɩɩg sẽn pa kiidi. Pa yã n kaoos la Gɛrɛs soolmã gill neb wa tẽed woto ye.

Pipi kiris-nebã wakatẽ, fariziẽ-rãmbã ne eseniyẽ-rãmbã sẽn yaa zʋɩf-rãmb tũudum sulã ra zãmsda nebã tɩ ninsaal kũum poore, a tara sɩɩg sẽn ket n vɩ. Sebr a yembr yeelame: “Yaa gɛrk-rãmbã sẽn da tẽed bũmb ninsã, la sẽn yɩɩd fãa a Platõ sẽn da zãms nebã bũmb ninsã n wa n kɩt tɩ zʋɩf-rãmbã tẽed tɩ ninsaal tara sɩɩg sẽn pa kiidi.” A Zozɛf yaa kʋdemdã yel-mit sẽn da yaa zʋɩf. A yeelame tɩ yaa Gɛrɛs soolmẽ wã la b ra zãmsd nebã tɩ ninsaal tara sɩɩg sẽn pa kiidi, lakae Gʋlsg sõamyã pa yet woto ye. A Zozɛf wilgame tɩ gɛrk-rãmbã sẽn da zãmsd nebã bũmb nins rẽ wɛɛngẽ wã yaa kibay la soalem b seb-gʋlsdbã sẽn gʋlse.

Gɛrk-rãmbã minimdã wa n piuugame, hal tɩ baa neb sẽn da yet tɩ b yaa kiris-neb sak n tẽ b sẽn da zãmsd nebã tɩ ninsaal tara sɩɩg sẽn pa kiidã. Kʋdemdã yel-mit a Jona Lendering yeelame tɩ “filozof a Platõ ra yetame tɩ pĩndã, ninsaalbã sɩɩs ra bee zĩ-sõngẽ, la tɩ masã b bee dũni sẽn pa sõma zugu.” A paasame tɩ yaa “rẽ n so tɩ pa yɩ toog tɩ b rɩk a Platõ sẽn da yetã n kalem ne bũmb nins b sẽn da zãmsd nebã Kirist tũudmã pʋgẽ wã.” Yɩɩ woto tɩ ‘sɩɩg pa kiidã’ wa lebg bũmb “Kirist tũudmã” rãmb sẽn tẽede, hal n zãmsd rẽ me b egiliiz-rãmbẽ wã.

SƖDÃ BÃNGR NA N KƖTAME TƖ Y PAAM Y MENSE

Pipi kiris-nebã wakate, tʋm-tʋmd a Poll keooga a tẽed-n-taasã, n yeel yaa: “Sɩɩg-sõng togsa vẽeneg tɩ yaoolem wakate, neb kẽer na n basa tẽebo, n pʋg belgr sɩɩse, la zãmsg zĩn-dãmb sẽn kõta.” (1 Tɩmote 4:1) Gom-kãensã sɩd pidsame! B sẽn zãmsd nebã tɩ ninsaal tara sɩɩg sẽn pa kiidã yaa ‘zãmsg zĩn-dãmb sẽn kõte.’ Yaa hal pĩnd wẽndẽ wã la filozof-rãmb ne neb sẽn da pʋʋsd wẽn-naands ra zãmsd nebã woto.

La a Zeezi yeelame: “Yãmb na bãng sɩda, la sɩdã na kõ yãmb lohorem.” (Zã 8:32, Wẽnnaam Sebre, 1983) Tũudum wʋsg pʋgẽ, yel-maandɩ la bũmb wʋsg b sẽn zãmsd nebã pa sɩd ye. Paoogda Wẽnnaam. La d sã n zãms Biiblã, d na n bãnga sɩdã, la rẽ na n kɩtame tɩ d paam d mense. Sẽn paase, d sã n zãms Biiblã n bãng sɩdã, d na n paama d mens fasɩ ne rog-n-mik kẽer la yel-maandɩ b sẽn wae n maand ned kũum poorã.—Ges-y zĩ-gũbr ning gom-zug sẽn yaa: “Sẽn ki-bã bee yɛ?”

Tõnd Naandã pa rat tɩ ninsaal vɩɩmd tẽng zug ka yʋʋm 70 bɩ 80 bala, n ki n tɩ vɩɩmd zĩig a to wakat sẽn kõn sa ye. Hal sɩngrẽ wã, a ra ratame tɩ ninsaalbã yɩ a kom-sakdse, n vɩɩmd wakat sẽn kõn sa dũni-kanga zugu. Woto wilgdame t’a sɩd nonga ninsaalbã. Bũmb pa tõe t’a raabã pa pids ye. (Malasɩ 3:6) Yɩɩn-gʋlsdã ra yeela bũmb sẽn kengd pɛlga. A yeelame: “Nin-tɩrsã na n sooga tẽngã, la b na n paa beenẽ wakat sẽn kõn sa.”—Yɩɩn-sõamyã 37:29.