Ned sã n maan kaalem, saame bɩ?

NEBÃ tagsg kũumã wɛɛngẽ wã pa yembr ye. Kẽer tẽedame tɩ b kũum poore, b na n tɩ vɩɩmda zĩig a to, wall b na n lebga bõn-vɩɩg buud a to. Sãnda tẽedame tɩ b kũum poore, b na n lebs n dogame, n vɩɩmd dũni-kãnga zug yɛsa. Kẽer yẽ tẽedame tɩ ned sã n maan kaalem, saame.

Tõe tɩ yãmb me tara y sẽn tẽed kũumã wɛɛngẽ. Rẽ bee ne b sẽn zãms yãmb bũmb nins hal y yãadmẽ wã, pa rẽ bɩ y tũudmã wall y buudã. Sẽn mik tɩ nebã tagsg yaa toor-toor bũmb ning sẽn maand ned kũum poorã wɛɛngẽ wã, ãnda soab n tõe n sõng-d tɩ d sɩd paam sokrã leoore?

Na maan yʋʋm kobse, tũudmã taoor dãmb yeta nebã tɩ ninsaal tara sɩɩg sẽn ket n vɩ a kũum poore. Tũudmã fãa la bal neb tẽedame tɩ ninsaal tara sɩɩg sẽn pa kiidi, la tɩ kũumã poore, sɩɩgã tɩ vɩɩ saasẽ. Wala makre, kiris-nebã, ẽndu-rãmbã, zʋɩf-rãmbã, la moeembã tẽeda woto. Budist-rãmbã yẽ tẽedame tɩ ninsaal sã n ki, a lebgd n doga zĩig a to, wall a lebg n dog n yaa bõn-vɩɩg a to, la t’a na n lebgd n dogdame hal n wa paam n ta zĩig namsg sẽn pa le beẽ, sũ-noog sẽn pa tõe n bãng n bilg zĩigẽ. B boonda rẽ tɩ Nirvana.

Woto fãa kɩtame tɩ neb wʋsg tẽed tɩ ne kũumã maasem, b paamd n tɩ vɩɩmda zĩig a to. Rẽ n so tɩ wʋsg tagsdẽ tɩ ninsaal sẽn kiidã yaa bũmb sẽn segde, la tɩ yaa Wẽnnaam daabo. La bõe la Biiblã yet rẽ wɛɛngẽ? Karm-y sõsg ning sẽn pʋgdã. B sẽn yet bũmb ning be wã na n ling-y lame.