Biiblã saglsã tara yõod rũndã-rũndã bɩ?

KẼER LEOKDAME TƖ “AYO.” Logtor a ye n yeel tɩ ned sã n dat n tũ Biiblã saglsã, yaa wa siãns karen-saamb sẽn dat n tall yʋʋmd 1920 wã sasa sebr n karem karen-biisi. Nina meng na n sokame n gese, y sã n paam ordinatɛɛr-paalle, y na n gesa ordinatɛɛr kʋdr-kʋdr sebr n bãng y sẽn tog n tʋm ne-a to-to bɩ? Woto wilgdame tɩ neb n tagsd tɩ Biiblã pa le tar yõod ye.

Dũniyã sẽn toeeme, tɩ tɛknolozi wã tar pãng to-to wã, bõe yĩng tɩ ned na n ket n tũud seb-kʋdr saglse? Sɩd me, ne ẽntɛrnetã maasem, ned fãa tõe n kõo kibay la sagls wa a sẽn date, la a paam sagls yɛl toor-toor zugu. Tele wã pʋgẽ, bãngdb ka tɛk togsda b sẽn mi, la b tagsg bũmb wʋsg zugu. Sɛb toɛy-toɛy la b yiisd n sagend nebã, tɩ sẽn koosd-b rẽ wã woond milyaar-dãmba.

Kibayã la saglsã sẽn piuugi, tɩ d tõe n bãng d sẽn dat fãa minit a wãn bal pʋgẽ wã, bõe yĩng tɩ d na n bao n tũ Biiblã saglse, n yaool n miẽ tɩ yaa sebr b sẽn gʋls na maan tus a yiibu? Sẽn yet-b tɩ ned sã n tẽed Biiblã, yaa wa f sẽn na n get seb-kʋdr-kʋdr n karemd kamb bɩ n tʋmd ne ordinatɛɛrã bee bʋʋm bɩ? Togs-sɩdã, makrã pa zems ye. Siãnsã ne tɛknolozi wã toeemda tao-tao, la ninsaal sẽn dat n tɩ yɩɩdã pa toeemd woto ye. Ned buud fãa rata sũ-noogo, sũur pʋgẽ bãane, t’a vɩɩmã tar barka, t’a zak rãmb vɩɩm noome, tɩ yẽ ne a zo-rãmbã zemsd taaba.

Baa ne Biiblã sẽn yaa kʋdrã, a wilgda d sẽn tõe n maan to-to n paam woto fãa, la bũmb a taaba. Sẽn paase, Biiblã meng yetame t’a yaa sebr tõnd Naandã sẽn kɩt tɩ b gʋlse. Biiblã tõe n sõng-d lame tɩ d bãng d sẽn tog n maaneg bũmb fãa pʋgẽ, la d mao ne zu-loeesã. (2 Tɩmote 3:16, 17) Biiblã saglsã yaa zãmaan fãa yĩnga. Wakat pa na n zĩnd tɩ b pa le tar yõod ye! Ad Biiblã meng sẽn yete: “Wẽnnaam goamã vɩɩme.”—Ebre-rãmbã 4:12.

La yaa sɩd bɩ? Wẽnnaam Gomdã ket n vɩɩme bɩ, bɩ a pa le tar yõodo? Biiblã saglsã tõe n sɩd sõnga ned rũndã-rũndã bɩ? Gũusg Gasg kãngã yaa sẽn na n sõng-y tɩ y paam sogs-kãensã leoore.