D kɩt tɩ d vẽenemã ket n yãgd wakat fãa

¹ Vẽenem yaa bõe? Gom-biis-võor sebrã bilgd-a-la wala “bũmb sẽn kɩt tɩ b tõe n yã.” La sɩd-sɩda, baa ne ninsaal sẽn paam bãngr wʋsg n paasã, ninsaal ket n ka mi sokr ning a Zeova sẽn sok tɩ be Zoob 38:24 pʋgẽ wã leokr zãng ye. Vẽenem sã n kaẽ tõnd tõe n vɩɩmdame bɩ? Vẽenem sã n da kaẽ, tõnd da ka na n tõog n vɩɩmdẽ ye. Yaa tɩlae tɩ d paam vẽenem n tõog n yã, la Biiblã yeta tõnd tɩ tẽebã wɛɛngẽ, “Wẽnnaam yaa vẽenem.” (1 Zã 1:5) Tõnd teega Ned ning sẽn ‘vẽnegd-a tõndã’ zãng-zãnga.—Yɩɩl. 118:27.

² Rẽ yaa sɩd yĩnga wɛɛngẽ la a leb n yaa woto me n yɩɩd tẽebã wɛɛngẽ. Ziri tũudmã kẽesa neb kʋʋng weoogo, n bas-b tẽeb lik pʋgẽ, tɩ b ‘babend [n baood] lalg wa zõense.’ (Ezai 59:9, 10) A Zeova nonglmã ne a nimbãan-zoeerã sẽn ka tar mak-n-taarã kɩtame t’a ‘tʋm a vẽenemã ne a sɩdã.’ (Yɩɩl. 43:3) Sɩd-sɩda neb milyõ rãmb sẽn yaa mi-beoog rãmb sakame, n yit ‘likã pʋgẽ n kẽed bãmb vẽenem kãsenga pʋgẽ.’—1 Pɩɛɛr 2:9.

³ A Zezi Kirist tʋʋmdã yõod yaa kãseng vẽenem kãnga tall n wa kõ dũniyã wɛɛngẽ. A yeelame: “Mam waame n na n yɩ dũniyã vẽenem, tɩ ned ning fãa sẽn tẽed maam kõn pa lik pʋgẽ ye.” (Zã 12:46) A rɩka a vɩʋʋgã, a pãngã, la a tarmã fãa n sõng tɩ neba bãng sɩdã vẽenem. A saaga a ba-yirã ween-vɩɩs a naasã fãa, n moondẽ la a zãmsd nebã galʋ-tẽng la tẽn-bil fãa pʋgẽ la bala. Zĩig fãa b nams-a-la a tẽebã yĩnga, la a kell n tʋma tʋʋmd ning sẽn yaa taas nebã sɩdã vẽenemã n ka bas ye.

⁴ A Zezi modga sõma n yãk karen-biis n zãms-ba, la a sigl-b ne bõn-datl takɩ a yamẽ. Matɩe 5:14-16 pʋgẽ d karemda noy nins a sẽn kõ-ba woto: “Yãmb yaa dũniyã vẽenem. . . . Bɩ yãmb vẽenemã yãg woto neba sʋka, tɩ bãmb tõe n yã yãmb tʋʋm sõama la b waoog yãmb Ba sẽn be arzãna.” Wala a Zezi, b ra segd n ‘yãga wa fɩtl dãmb dũniyã pʋgẽ,’ n taasd nebã sɩdã vẽenem zĩig zãnga. (Fil. 2:15) B saka zɩɩb kãnga ne sũ-noogo, n get-a wa bãmb pipi bõn-datl vɩɩmã pʋgẽ. Wakat bilf loogr poore, a Poll ra tõe n yeelame tɩ koe-noogã ‘moona dũniyã fãa.’ (Kol. 1:23) Kiris-neb tigingã neb fãa ra lagma taab n maand tʋʋm-kãngã sẽn yaa kãsengã.

⁵ Rũnda-rũndã, tõnd segd n talla mi-beoogo, d sẽn paam n wa be neb nins sẽn “bas lik tʋʋma” sʋka yĩnga. (Rom 13:12, 13) Tõnd tõe n wilga d mi-beoogo, d sã n tũ makr ning a Zezi la pĩnd kiris-neb hakɩkã sẽn kõ wã. Ãdem-biisã sẽn be tẽng zug tɛka, masã yaa yãgb yell ne neb a taabã tɩ b wʋm sɩdã n yɩɩd pĩndã. Tʋʋmd buud a to ka be sẽn tõe n mak baa bilf ne tʋʋm kãngã sẽn yaa yãgb yell t’a nafa wã yaa kãsems wʋsg n yɩɩdã ye.

⁶ Wãn-wãn to la d tõe n yãg wa fɩtl dãmba? Pipi bũmb ning d sẽn tõe n maan n kɩt tɩ d vẽenemã yãg yaa d sẽn na n kẽesd d mens Rĩungã mooneg tʋʋmdẽ. Tiging fãa tara a mooneg tʋʋmd na-kẽndr a sẽn sigl n tũud wakat fãa, sẽn na yɩl n moon zĩig ning b sẽn yãk n kõ-a wã. Sɛb buud toor-toor wʋsg b sẽn yiis goam wʋsg pʋgẽ beeme. D paamda zãmsg sõma ne tigissã maasem, sẽn paase, sẽn tar-b minima me zãmsda b taabã. Rapa, pagba, sẽn kʋʋl-bã, ne kamba meng tõe n kẽesa b mens tʋʋmdã pʋgẽ. B kota ned kam fãa sẽn be tigingã pʋgẽ t’a kẽes a meng wa a sẽn tõe tɛka, la wa sẽn zems ne a yɛla sẽn yaa to-to. Tigingã tʋʋm fãa tika moonegã zugu, ne segls sẽn na yɩl n sõng ned kam fãa t’a kẽes a menga. Manesem ning sẽn yaa sõma n yɩɩd sẽn na yɩl n sõng-d tɩ d vẽenemã ket n yãgd yaa d sẽn na n kell n maand lagem-n-taar ne tigingã neb sõma wakat fãa.

⁷ Tõnd tõe n kɩtame tɩ d vẽenemã yãg tɩ ka tũ ne d sẽn na n kõ kasetã ne noor ye. Ne tõnd yel-manesmã bala, tõnd tõe n kɩtame tɩ neb a taabã yã d vẽenemã. Yaa rẽ yell la a Pɩɛɛr sẽn da tagsd a sẽn sagl woto wã: “Bɩ y kɩt tɩ yãmb yel-manesem yɩ sõamã neb nins sẽn ka pʋʋsd Wẽnnaamã sʋka, tɩ . . . bãmb na waoog Wẽnnaam . . . b sẽn na n yã y tʋʋm sõama wã yĩnga.” (1 Pɩɛ. 2:12) Neb wʋsg wilgda tʋʋmd bɩ siglg sã n yaa sõma bɩ wẽnga, b sã n ges b rãmb nins sẽn be-b b pʋsẽ wã sẽn tar yel-manesem ningã. Dũniyã rãmb sã n yã neb vɩɩm-manesem sẽn yaa yɩlemde, neb sẽn yaa pʋ-peelem dãmba, sẽn yaa laafɩ rãmba, la b tũud tẽngã noyã, b geta nin-kãens wala neb sẽn yaa toore, n yetẽ tɩ noy nins nin-kãensã sẽn tũuda sõmblem yɩɩda neba wʋsg sẽn yɩɩd sẽn tũudã zĩig sẽn zãre. Woto, pʋg-sɩd basdame t’a vẽenemã yãgda, a sã n waoogd a pagã la a nand-a ne nonglem. Paga me maanda woto a sã n sakd a sɩdã zu-sobendo. Kamba wilgdame tɩ b yaa toor ne b taabã, b sã n sakd b roagdbã noy la b lakd b mens ne yoob la dorge. Neba tara naneb wʋsg ne tʋm-tʋmd sẽn tʋmd ne a sũur fãa, n yaa pʋ-peelem soaba, la a waoogd neb a taaba. Tõnd sã n tar kiris-ned zʋg-sõma kãensã, d basdame tɩ d vẽenemã yãgda, n wilgd neb a taabã tɩ d vɩɩmã manesem zemsame.

⁸ Moon yaa togs neb a taaba bũmb ning tõnd sẽn zãms Wẽnnaam Gomdã pʋgẽ wã. D maanda woto d sã n kõt sõasg tigissẽ bɩ d sã n wa tɩ sõsd ne nebã b zagsẽ, la a ka tekd zĩ-kãens bal ye. Tõnd daar fãa tʋʋmã kɩtdame tɩ tõnd segd neb wʋsgo. Daarã pʋgẽ, naoor a wãn la y gomd ne y yagsã? Naoor a wãn la neb wat yãmb zakẽ wã? Neb toɛy-toɛy a wãn la yãmb segda, y sã n kẽng teed raabo, y sã n kẽ biisi, bɩ y sã n wa tɩ be y tʋʋmdã zĩigẽ? Yãmb sã n yaa bi-bɩɩg n ket n debd lekolle, y tõe n sõda neb nins yãmb sẽn gomd ne daar fãa wã sõor bɩ? Segb toɛy-toɛy tõnd sẽn tar n na n gom ne neb a taabã ka tɛk ye. Bũmb ning y sẽn baood yaa y ning tagsa a wãn sẽn tik Gʋlsg Sõamyã zug y yamẽ, n tar Biibl ne seb-vãad tɩ be yambẽ, la y yãk yam n sɩng sõasg ne neba, tɩ sor sã n kõ.—1 Tes. 2:2.

⁹ D paamda barka, d sã n basdẽ tɩ d vẽenemã yãgda: Ad makr kẽer sẽn kengd raoodo, sẽn tɩ loe ne kaset kũun sẽn ka yãk wakate: Yʋʋm 55 pag n da makd n na n pɩʋʋg sore. Mobill n da rat n fão-a tɩ saam-bi-poak kell n gãd a nugã n tak-a n yiis sorã zugu, la a yeel-a tɩ: “Maan-y gũusgu. Tõnd wakatã yaa yell wakate!” Rẽ poore saam-bi-poakã togsa bũmb ning sẽn kɩt tɩ wakatã yaa yell wʋsg woto wã, tɩ paga sok-a tɩ: “Yãmb yaa a Zeova Kaset soab bɩ?” A ra paama tõnd sebr a yembr a ma-bi-poak nengẽ, n da baood n na n seg a Zeova Kaset soaba, la yel-kãngã kɩtame tɩ rẽ tõog n yɩ.

¹⁰ Yel-sõmd y sẽn maan tõe n yɩɩ sabab tɩ y sõng neb a taaba tɩ b bãng sɩdã. Tõnd saam-bi-pogs a yiib sẽn wa n yi mooneg n kuiisẽ, b yãa pʋg-yãang sẽn da sigd biisẽ wã, tɩ wẽnd a ra yaa bãada. B yalsame n sok pagã n ges a sã n data sõngre. Yɩɩ lingr wʋsg ne-a tɩ neb a yiib a sẽn ka mi baa bilf sak n wilg t’a yell pak-b lame, hal t’a pẽdg n na n bãng bũmb ning sẽn kɩt tɩ b maan-a neer woto wã. Woto yɩɩ segb tɩ b kõ kaseto. Tao-tao bala paga kõ-b-la a adɛrs la a kos-b ne sũ-noog tɩ b wa ges-a. Biibl zãmsg sɩngame. Pa kaoos la paga sɩng tigissã waoong ye, la masã, a taasda neb a taaba sɩdã koɛɛga.

¹¹ Ra tol-y n yĩm-y tɩ y yaa Kaset soab ye! A Zezi sẽn da wa n bilg a karen-biisã wa “dũniyã vẽenemã,” a wilgame tɩ b ra segd n sõnga neb a taaba tɩ b rɩ Wẽnnaam Gomdã vẽnegr nafa. Tõnd sã n tũ a Zezi saglgã, wãn-wãn-to la d na n ges d koe-moonegã?

¹² D sẽn mi tɩ yɩ kiris-ned wakat pʋɩ-sʋk buud ka be wã, tõnd rɩka d mens n kõ, n ‘kɩɩs d mens raab’ la d sak n na n tũ a Zezi “wakat fãa.” (Mat. 16:24, NW ) Tõnd datame n ket n ‘maand a tʋʋmdã ne d sũyã fãa,’ n tũnugd ne segb buud fãa n kɩtdẽ tɩ d vẽenemã yãgd sẽn na yɩl n paam nebã n kõ kasetã, baa b sẽn be zĩig ning fãa. (Kol. 3:23, 24) Tõnd tog n kɩɩsa dũniyã manesem, n kell n tall yẽesem ning d sẽn da tar sɩngrẽ wã, la d modg sõma tɩ d vẽenemã ket n yãgd wʋsgo. Tõe tɩ kẽer basame tɩ b yẽesmã boog wʋsgo, la tɩ b vẽenemã lebg kɩɩ-kɩɩ, tɩ baa f yas yambẽ bɩ a yãab yaa toogo. Ned a woto buud tõe n data sõngr sẽn na yɩl n le paam yẽesem koe-moonegã yĩnga.

¹³ Neb wʋsg sẽn ka nong tõnd koɛɛga yĩng kɩtame tɩ neb kẽer tõe n ka rat n sak-a ye. A Poll yeelame tɩ koe-noogã sẽn tɩ loe ne Kiristã yaa “yalemd ne neb nins sẽn na n sãamã.” (1 Kor. 1:18) Baa ne neba sẽn yet a soab me, a togsa woto ne raoodo: “Mam ka zoet yãnd ne koe-nooga ye.” (Rom 1:16) Yãnd sẽn tar a soab getame t’a menga paoodame bɩ a ka zems ne tʋʋmdã ye. Yãnd na n yɩɩ wãn n wa tar-do, d sã n gomd ãndũni Naab Sẽn-ka-to wã yelle, la a sẽn segl bõn-kãsems nins tõnd wakat sẽn-kõn-sa sũ-noog yĩngã yelle? D pʋd n pa segd n tags tɩ d meng paoodame bɩ d pa zems ne tʋʋmdã, d sã n wa togsd neb a taabã yel-sɩd kãensã ye. Walla tɩ yɩ woto, d segd n gesame tɩ yaa tɩlae ne-d tɩ d maan d sẽn tõe tɛka, n wilgdẽ tɩ d kɩsa sɩd tɩ d “kõn zoe yãnd ye.”—2 Tɩm. 2:15.

¹⁴ Sɩdã vẽenem sẽn yãgd masã tẽns wʋsg pʋsẽ dũniyã gill zugã kõta neba saagr sẽn yaa vɩɩmd wakat sẽn-kõn-sa dũni paalg sẽn yaa arzãn pʋgẽ. Bɩ d wilg tɩ d saka saglg ning sẽn yet tɩ d kɩt tɩ d vẽenemã ket n yãgd wakat fãa wã ne d sũur fãa! D sã n maan woto, d na n paama bʋʋm n maan sũ-noog wala karen-biisã sẽn da ‘moon a Zezi Kirist koe-noogã daar fãa n ka basã.’—Tʋʋ. 5:42.