‘Bɩ yãmb vẽenem yãge’
1 Dũniyã sẽn gũbg tõndã bee lik pʋgẽ vɩɩm manesmã la tẽebã wɛɛngẽ. Sɩdã vẽenem kɩtdame tɩ b bãng lik “tʋʋma sẽn ka yõoda” sẽn na yɩl tɩ d tõog n gil kug-lakds kãensã sẽn yaa bõn-kʋʋdsã. Rẽ n so tɩ tʋm-tʋmd a Poll sagl kiris-nebã woto: “Bɩ y kẽn wa vẽenem kamba.”—Ef. 5:8, 11.
2 “Vẽenem biis” yaa toor fasɩ ne dũniyã lika. (Ef. 5:9) Sẽn na yɩl n wom biis a woto, rɩlla d yɩ neb sẽn kõt mak-sõng kiris-neb vɩɩmã pʋgẽ, n yɩ neb nins buud sẽn tat a Zezi yamã. D togame me n wilg zʋg-sõma wala maan yɛla ne d sũur fãa, pʋ-peelem, la yẽesem sɩdã yĩnga. Biis a woto segd n yɩɩ vẽeneg d daar fãa vɩɩmã la d ministɛɛrã pʋsẽ.
3 Yãg-y wakat buud fãa: A Zezi yeela a karen-biisã woto: ‘Bɩ yãmb vẽenem yãg neba sʋka.’ (Mat. 5:16) D rɩkda togs-n-taar ne a Zezi n maandẽ t’a Zeova vẽenemã pukdẽ, d sã n moond Wẽnnaam Rĩungã la a raabã. Tõnd yãgda wa fɩtl dãmb d sã n wa kẽnd neba zagsẽ la d sã n yelgd sɩdã tʋʋma zĩigẽ, lekollẽ wã, d yagsã sʋka, bɩ zĩig ning fãa d sẽn paamẽ sor n na n maan dẽ.—Fil. 2:15.
4 A Zezi yeelame tɩ neb kẽer na n kisga vẽenemã. (Zã 3:20) Dẽ neba wʋsg sẽn yɩɩd sẽn zãgsd tɩ b kõn bas tɩ “koe-nooga vẽenem sẽn pukd Kirist ziirã” yãg bãmb sʋkã pa komsd tõnd raood ye. (2 Kor. 4:4) A Zeova karemda ãdem-biisã sũyã, la a ka rat tɩ wẽng maandb zĩnd a nin-buiidã sʋk ye.
5 Tõnd sa n tũud a Zeova soayã n paamd tẽebã vẽenem, d tõe n taas-a-la neb a taabã. Tõnd manesmã sã n kɩt tɩ neba bãng tɩ d ‘paama vɩɩm vẽenem,’ dẽ na n tusa bãmb me tɩ b maan toeeng ning sẽn yaa tɩlae wã n tõog n lebg vẽenem zãadba.—Zã 8:12.
6 D sã n basdẽ tɩ d vẽenemã yãgda, d kõta d Naandã pẽgre, la d sõngd pʋ-peelem dãmbã tɩ b paam n bãng-a n tall vɩɩm sẽn ka sɛtã saagre. (1 Pɩɛ. 2:12) Sẽn mik tɩ d tara vẽenemã, bɩ d tũnug ne-a n sõng neb a taabã tɩ b yi tẽeb likã pʋgẽ n maan vẽenem tʋʋma.