“Bɩ yãmb vẽenem yãge”
1. Tõnd paama bõe, n segd n kɩt tɩ d taabã me paam?
1 Sõorã pukr n tãag wĩndgã kõom, vẽenem ning d sẽn paamdã yaa kaset sẽn wilgd t’a Zeova segda ne pẽgre. La a Zezi sagla a karen-biisã tɩ b bao vẽenem buud a to: “Vɩɩm vẽenem.” (Zã 8:12) Vẽenem kãng paoong yaa zu-zẽkre, la f segd n bãngame tɩ tʋʋmd sẽn tar yõod me la b bobl-fo. A Zezi ra yeelame tɩ: “Bɩ yãmb vẽenem yãg woto nebã sʋka,” tɩ naf-ba. (Mat. 5:16) Nebã wʋsg sẽn be lik bida pʋgẽ Wẽnnaam la a raabã wɛɛngẽ wã yĩnga, rẽndame tɩ d sõng tɩ b paam vẽenemã. Yaa rũndã-rũndã la d segd n sõng-b rẽ wɛɛngẽ n yɩɩda! Wãn to la tõnd tõe n dɩk Kiristã togs-n-taare, n kɩt tɩ d vẽenemã yãge?
2. Wãn to la a Zezi wilg tɩ sõng nebã tɩ b paam vẽenem Wẽnnaam daabã wɛɛngẽ tara yõod wʋsgo?
2 Ne koɛɛgã mooneg maasem: A Zezi rɩka a sẽkã, a pãngã la a sẽn tarã fãa n kẽes koɛɛgã mooneg pʋgẽ, sẽn na yɩl tɩ nebã paam vẽenem Wẽnnaam la a raabã zugu. A ra kẽnda zĩis nins fãa a sẽn tõe n yã neba. Zagsẽ wã, tãensã zutu, la zĩis a taaba. A meng wilgame tɩ sõng nebã tɩ b paam vẽenem kãngã tara yõod wʋsgo. (Zã 12:46) A sẽn dat tɩ vẽenemã yãg n zãag zĩigã yĩnga, a zãmsa a karen-biisã sẽn na yɩl tɩ b tõog n yɩ “dũniyã vẽenem.” (Mat. 5:14) Karen-biisã ra kɩtdame tɩ b vẽenemã yãgda, b sẽn da maand nebã neer la b sõngd-b tɩ b bãngd Wẽnnaam la a raabã.
3. Wãn to la d tõe n wilg tɩ d sẽn paam vẽenem Wẽnnaam daabã wɛɛngẽ wã noom-d-la wʋsgo?
3 A Zeova Kaset rãmbã sɩd modgdame n ‘kẽnd wa vẽenem kamba,’ n moond zĩis nins fãa b sẽn tõe n yã neba. (Ef. 5:8) Vʋʋsg sasa, yaa tʋʋmã zĩigẽ tɩ yaa lekollẽ wã, d sã n karemd Biiblã bɩ d sɛb a taabã tɩ nebã neẽ, tõe n kɩtame tɩ d paam n sõs ne-b Biiblã zugu. Bi-pugl a ye maana woto, tɩ kɩt t’a paam n sɩng Biiblã zãmsg ne neda, la a bas sɛb ne a karen-bi-taas 12.
4. D sã n dat tɩ ‘d vẽenemã yãge,’ bõe yĩng tɩ d segd me n zã d mens sõma?
4 Ne tʋʋm-sõma maasem: Kɩt tɩ d vẽenem yãgã baoodame tɩ d zã d mens sõma daar fãa. (Ef. 5:9) Tʋʋmã zĩisẽ, lekollẽ wã, la zĩis a taaba, nebã gũusd n geta tõnd sẽn zãad d mens to-to wã, tɩ mi n kɩt tɩ d paam n sõs Biiblã zug ne-ba. (1 Pɩɛ. 2:12) Wala makre, yʋʋm a nu bi-ribl manesem kɩtame t’a karen-saamb yeel a roagdbã woto: “Mam zɩ n yã bi-kɩdg sẽn mi sẽn segd la sẽn pa segd n bak la a gãd rẽ sõma woto ye.” Sɩd-sɩda, koɛɛgã d sẽn moondã, la d sẽn zãad d mens sõma wã kɩtdame tɩ nebã wat ‘vɩɩm vẽenemã’ pʋgẽ, la kɩtdẽ tɩ d Wẽnnaamã yʋʋr paamd pẽgre.