Pʋɩ-y ne neb a taabã tɩ zems ne b ratmã
1 A Zeova rɩka segls sẽn na yɩl n tũnug ne kɩs-sɩd “yambã” n pids tõnd tẽebã ratem. (Mat. 24:45-47, NW ) Segls kãens wʋsg yaa sɛba, Biibl dãmba, volim relie rãmba, kasɛt video rãmba, kasɛt kelgdɩ, disk kompak rãmb Biiblã vaeesg yĩnga. Wakat fãa bũmb nins a Zeova sẽn kõtã sekdame, n yaool ka zʋʋgd d sẽn datã ye. A gũudame tɩ tõnd pʋɩ bõn-kãensã ne d taaba, n kɩt sɩd tɩ neba fãa paamdame tɩ zem taaba.
2 B yiisa ligd wʋsg sẽn na yɩl n maan bõn-kãensã b sẽn kõtã. Yaa tõnd dũni gill saam-biisã n get depãens kãensã yelle. Sẽn yɩɩd fãa yaa woto, sẽn sɩng ne wakat ning siglgã sẽn dɩk segls tɩ b tõe n pʋɩ sɛbã tɩ ka tũ ne ligd yaoobã, tɩ yaa yamleoog kũunã bal n segd n sõng ne ligd yitmã. Sẽn paase, filiall dãmb wʋsg paamda seb-kãensã no-noogo, sẽn na yɩl tɩ saam-biisã paam bũmb nins b sẽn dat tigissã la koe-moonegã yĩnga, baa b tarmã sã n paood wʋsgo.
3 Tõnd sẽn tõe n maan to-to n sõnge: D tõe n saka a Poll saglg ning sẽn yet tɩ d pʋɩ ne neb a taabã “tɩ zems ne b ratmã.” (Rom 12:13, NW ) Tõnd sã n maan kũun sẽn na yɩl n teel dũni gill tʋʋmdã, tõnd pʋɩta d sẽn tarã ne d saam-biisã sẽn be dũniyã gill zugã. Ne rẽ b yamẽ, kẽer rɩka sard n na n ning ligd kɛɛng sẽn na yɩl n wa maan kũun n teel dũni gill tʋʋmdã kiuug fãa, wala b sẽn da minim n maand Rĩungã Roog ligd yitem yĩngã. B sak n deegame tɩ b ka rɩkd ligd kãngã n yiisd sɛbã bal ye, la yaa sẽn na yɩl n teel tʋʋmdã nens a taabã fãa. Tags-y n ges nafr kãseng ning tõnd dũni gill saam-biisã sẽn da na n paamẽ wã, neb wʋsg sẽn yɩɩd sã n sak n pʋɩt ne manesem a woto n ka vaandẽ.
4 Sẽn paase, d tõe n pʋɩɩ ne-ba, wakat fãa d sã n tar maan-tɩ-zems d sã n wa kot bũmb nins d sẽn tõe n paam wakat buud fãa wã. Tõnd sã n kot bũmb nins d sẽn sɩd rata bala, rẽ na n sõnga d saam-biisã sẽn be zĩis a taabã tɩ b paam tẽebã rɩɩb bãmb me sẽn datã, sẽn na yɩl n tall pãng la b kẽng taoor ne koe-noogã mooneg dũniyã babg ning b sẽn beẽ wã.—Heb. 13:16.
5 Sẽn yɩɩd fãa d segd n ninga rẽ d yamẽ, d sã n kot bõn-yood Sosiete wã sẽn maan depãens rãmb wʋsg n yiisi. Kasɛt video rãmbã, CD-ROM dãmbã, seb-bɛdã, volim relie rãmbã, la kasɛt kelgdɩ rãmbã abonema rãmba bee rẽ sʋka. Walla tɩ b kos bũmb a yembr fãa bãmb wʋsg zakã ned fãa ne a rẽndã, bõe yĩng tɩ zaka tõr ka na n maan dabaar ne bõn-yɛng bala? Tõnd sã n maand zem-zem tõnd sẽn deegd bũmb ning tõnd mengã yĩng pʋgẽ, rẽ na n sõnga neb a taabã tɩ b paam bũmb nins tõnd sẽn paamdã.—Fil. 2:4.
6 Sɛbã tõnd sẽn basd pʋʋgã pʋgẽ wã yiisg ligd tõe n paama rolb zem-zem ne kũun dũni gill tʋʋmdã yĩng tõnd sẽn maand Rĩungã Roogẽ wã, la neb nins sẽn wilg ratmã sẽn sakd tõnd sɛbã sẽn maandã. La masã sã n yaa sɛb nins tõnd sẽn kot d mens yĩngã, tɩ yɩɩl sɛbã, Annuaire dãmbã, Biibl delugs rãmbã, la bõn-yood a taabã be sʋkã, tõnd ka segd n gũ tɩ yɩng rãmbã yao bõn-kãens yĩng ye. Sẽn yɩɩd fãa yaa a Zeova sõgen dãmbã sẽn dɩk b mens n kõ wã n teend ne ligd kãngã. B sẽn ning rẽ b yamẽ wã, koe-moondb wʋsg ket n maanda kũun bõn-kãensã yĩng tɩ zems ne b sẽn da minim n yaood to-to bõn-kãens yĩngã, n miẽ tɩ b sã n da maan-b leebg yĩnga, b ligdã ra na n yɩɩga woto hal wʋsgo. Wala makre b sã n kẽng butikẽ n na n tɩ ra Biibl kɩreng sẽn bolg sãnem bĩndu, nana bala a ligda na ta wakɩr 2 400 bɩ yɩɩg woto, seb-bedr tõe n koosa wakɩr 4 000 bɩ yɩɩg woto, kalãndirie yagendg sẽn tar gʋlem sẽn koos naana yaa wakɩr 600, ãnsikolopedi sẽn be CD-ROM pʋgẽ ligd yaa wakɩr 6 000 n digd wakɩr 12 000 bɩ yɩɩd woto, b nong n daada disk kompak sẽn tar mizik wakɩr 2 400 la bala, la naoor wʋsg kasɛt video rãmbã ligd yɩɩda woto wʋsgo. F sã n pa kõ ligd tɩ seke, rẽ wat n baas n kɩtame tɩ siglgã le ka tõog n pids bũmb nins a sẽn da na n pidsẽ tɩ dũni gill tʋʋmdã kẽng taoore, tɩ ta wala a sã n da paamdẽ ligd tɩ sekdẽ ye.
7 A Zezi yeelame tɩ b ra na n bãnga a karen-biis hakɩkã n bake, ne b sẽn da na n tar nonglem ne taabã. (Zã 13:34, 35) Tõnd sã n yaa kõtb laogã wɛɛngẽ, la d ka wilgd rat-m-yembre, n pʋɩt ne d taabã tɩ zems ne b ratmã, vẽenega d wilgda ne manesem sẽn tar dasãnd tɩ d yaa kiris-neb hakɩka.