Tall-y mi-beoog wʋsg la naneb sẽn yaa kãseng ne Wẽnnaam siglgã laogo
1 Rĩm a Zozias sẽn da wa n maand segls wẽn-doogã manegr yĩngã sasa, a pẽga neb nins b sẽn bobl tʋʋmdã n yeele: “B sã n na n kɩs b ligda bɩ b ra yaas n sõd ye. Tɩ bala, bãmb tʋmda ne pʋ-peelem.” (2 Rĩm 22:3-7) Naneb ning nin-kãensã sẽn da tar ne balengã yɛlã ra yaa vẽeneg b sẽn da get laogã b sẽn bobl-bã yell to-to wã pʋgẽ. Tõnd me sẽn maand Wẽnnaam koe-noog tʋʋmdã rũndã-rũndã wã, d segd n talla pʋ-peelem laogã b sẽn dɩk n bobl-dã yell gesg pʋgẽ.
2 Koe-moonegã wakate: D sã n mi koɛɛg ning sẽn be tõnd sɛbã pʋsẽ wã yõod sẽn yaa to-to wã, la d mi ligd ning b sẽn dɩk n maan-bã sẽn ta to-to, la d tar mi-beoogo, rẽ na n tus-d lame tɩ d ges tɩ sɛbã tara yõod wʋsgo. D ka segd n dɩk d sɛbã n pʋɩ neb nins sẽn ka tar naneb hakɩk ne Biiblã koɛɛgã yaar ye. Ned sã n ka wilg sõma t’a rata koe-noogã, d tõe n basa seb-vãoogo, n da bas ne a soabã sɛb a taab ye.
3 Pʋɩ-y sɛbã ne manesem sẽn wilgd tɩ y tara naneb sẽn yaa kãseng ne b yõodã. Ra bas-y-b yaar zãma zĩisẽ tɩ neba wa sãeeg-b zaalem ye. Sẽn na yɩl n da wa sãam sɛbã bɩ y reng yir n sõd sɛb nins yãmb sẽn zoe n tarẽ wã n yaool n tɩ reeg sɛb a taaba. Wakat fãa, zʋrno rãmbã yãmb sẽn deegdã sã n yɩɩda yãmb sẽn tõe n bas ne nebã bɩ y boog y komandã.
4 Sɛb nins y sẽn deegd y meng kareng yĩngã: Tõnd segd n kosa sɛb nins sẽn sɩd yaa tɩlae ne-dã bala. Sẽn yɩɩd fãa, d segdame n da sãam sɛbã, d sã n wa kot Biibl nins sẽn bolg ne sãnem-bĩndã, bible de référence rãmbã, la seb-bɛd a taaba wala Concordance, Index rãmba, Étude perspicace, la Prédicateurs sebrã. Seb-kãensã maaneg rɩkda ligd wʋsgo.
5 Yãmb tẽegdame n gʋlsd y meng yʋʋr la y adɛrs sɛb nins y sẽn deegd y meng yĩngã zut bɩ? Rẽ na n sõngame tɩ sɛb a taab bao n ledg sɛb nins y sẽn menesã raab booge. Yãmb yɩɩl sebre, Biibli, bɩ zãmsg sebr sã n meneme, tõe tɩ y tõog n lebs n yã-b te-yãtmã zĩigẽ Rĩungã Roogẽ bɩ tigis-kãsengã zĩigẽ.—Luk 15:8, 9.
6 Bɩ d modgd n tʋmd ne tõnd sɛbã ne yam. D sã n maan woto, d wilgdame tɩ d geta Rĩungã laog a Zeova sẽn bobl-dã ne kɩs-sɩda.—Luk 16:10.