D tʋm ne d sɛbã sõma
1. Bõe la d tõe n maan n wilg tɩ d rɩkda a Zezi togs-n-taare?
1 A Zezi sẽn maan yel-solemd n dɩlg kʋʋngã poore, a kɩtame tɩ b tigim rɩ-kellã n bĩngi. (Mat. 14:19-21) A sẽn maan woto wã, a wilga a mi-beoog ne a Zeova sẽn kõ-b bũmb ninsã tɩ yaa mak-sõng n kõ tõndo. Tõnd me segd n wilga a Zeova d mi-beoog ne bũmb nins a sẽn kõt-d ne tʋm-tʋmdã sẽn tũud sɩdã maasmã.—Kol. 3:15; Luk 12:42; Mat. 24:45-47.
2. Bõe la d tõe n maan tɩ periodik rãmbã ra wa zame?
2 Gũusg Gasgã ne Réveillez-vous ! wã: D sã n pa paamd n kõt nebã periodik rãmbã, b tõe n wa zamame. D sã n pa tõogd n kõt nebã periodik rãmbã d sẽn deegdã fãa, d segd n booga sõor ning d sẽn deegdã. La periodik kʋdã yẽ? Baa yaa sẽn kaoos la b yiis-ba, b ket n tara yõodo. D sã n tar periodik kʋd wʋsgo, tʋʋmdã yel-gɛt bɩ kãsem soab a to tõe n sõng-d-lame tɩ d bãng d sẽn tõe n kãab-b to-to tɩ yɩ sõma.
3, 4. D sã n wa reegd sɛb Rĩungã roogẽ, bõe la d segd n ning d yamẽ?
3 Sɛb a taaba: Sɛb nins d sẽn kãabd nebã kiuugã pʋgẽ wã sã n wa toeeme, nand tɩ y tɩ reeg seb-kãensã Rĩungã roogẽ bɩ y reng n ges y sã n pa tar-b yiri. Reeg-y sɛb nins y sẽn tõe n kãab nebã semennã bala, tɩ sã n sa bɩ y yaool n tɩ reeg a taaba.
4 Sã n yaa ne sɛb nins yãmb mengã sẽn dat n karmã, y pa segd n kos n yɩɩg y sẽn dat-b rãmbã ye. Gʋls-y y yʋʋr la y tigingã yʋʋr zĩ-vɩʋʋgã b sẽn bas sebrã pʋgẽ wã. Rẽ na n kɩtame tɩ y sebr sã n wa menem bɩ nina yã n kõ-yã. Sã n mik tɩ yãmb tʋmda ne Watchtower Library CD-ROM, la y bĩngd y periodik rãmbã, pa tɩlae tɩ y kos volim relie rãmbã ye.
5. Bõe la d pa segd n yĩmi, d sã n wa kãabd nebã sɛbã?
5 Sɛbã kũuni: Yaa neb nins sẽn sɩd rat n kelg koɛɛgã bal la d kõt d sɛbã. La d pa segd n yĩm tɩ yaa tõnd n segd n deng n yiis ligd sɛbã yĩng n teel koɛɛgã mooneg ye. Ned sã n sak n deeg sebr d sẽn kãab-ba, d segd n wilg-a lame t’a tõe n teela Wẽnnaam tʋʋmdã ne a nug-bũmbu.
6. Bõe yĩng tɩ d nand d sɛbã wʋsgo, la rẽ segd n kɩtame tɩ d tʋmd ne-b wãn-wãna?
6 A Zezi maana yel-soalem n dɩlg nebã. La naoor wʋsgo, a zãms-b-la yɛl wʋsg Wẽnnaam zugu. A yeela woto: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Mat. 4:4) Tõnd sɛbã wilgda nebã bũmb nins Biiblã sẽn yetã, tɩ tõe n sõng-b tɩ b paam vɩɩm sẽn-kõn-sa. (Zã 17:3) Woto kɩtame tɩ d segd n tʋm ne-b sõma la d ra sãam-b ye.