D tʋm ne d sɛbã ne yam

1, 2. Neb wʋsg tagsg ne tõnd sɛbã yaa wãna, la kɩtame tɩ d sokd d mens bõe?

¹ “Mam sɩng n karemda yãmb sɛbã hal yʋʋmd 1965 tɛkã. M sã n karemd-ba, m geta verse rãmbã Biiblã pʋgẽ, la m yãame tɩ y sɛbã goam sɩd zemsa ne Biiblã sẽn yetã. Wakat fãa m da rat n bãnga sɩdã Wẽnnaam la a Zezi zugu, la sɩd-sɩda, m tõe n yeelame tɩ m paama m sogsa leoor yãmb sɛbã la Biiblã pʋgẽ.” Woto la rao a ye gʋls a Zeova Kaset rãmbã tʋʋmd yẽgrẽ biru n yeele. Lɛt-kãng pʋgẽ a kosame tɩ b zãms-a Biiblã.

² Wala ra-kãngã, dũniyã gill zugu, neb milyõ rãmb nonga sɛb nins d sẽn tar n zãmsd Biiblã, “tʋm-tʋmd sẽn tũud sɩd la sẽn tar yamã” sẽn yiisdã. (Mat. 24:45) Yʋʋmd fãa, sɛb sõor ka tɛk la b yiisd sẽn na yɩl n sõng neb nins sẽn sɩd rat n bãng sɩdã tɩ b bãng-a. (1 Tɩm. 2:4) Wãn to la d tõe n tʋm ne d sɛbã sẽn tik Biiblã zugã ne yam?

3. Wãn-wãn la d tõe n maan n da sãam sɛbã?

³ D ra sãam-b ye: D tõe n wa tara sɛb wʋsg tɩ yɩɩd d sẽn datã. Bõe la d tõe n maan n da sãam d sɛbã sẽn tar yõod wʋsgã? D sã n wa na n deeg sɛb koe-moonegã yĩnga, d segd n tagsame tɩ bɩ. D da reeg sõor tɩ yɩɩg d sẽn na n kãab nebã ye. D tõe n deega a ye bɩ a yiib bala, tɩ sã n sa bɩ d yaool n ye wa reeg n paase. Rẽ na n kɩtame tɩ sɛb wʋsg ra wa zam d zagsẽ wã ye. Zʋrno rãmbã wɛɛngẽ me d sã n zoe n tara bãmb wʋsg d sẽn pa kõ nebã, yɩta sõma tɩ d boog zʋrno rãmbã sõor ning d sẽn deegdã.

4. Tigingã sã n tar sɛb kẽer wʋsgo, bõe la b tõe n maane?

⁴ Tigingã sɛb nins sẽn waoogã: Tigingã sã n tara sɛb kẽer tɩ waoogẽ, ned ning sẽn get sɛbã yellã tõe n sogsa tigims a taab sẽn pẽ n ges b sã n data seb-kãens bilfu. Koe-moondbã tõe n kãabda seb-kʋdã b zags neb sẽn pa tẽedba, b Biiblã karen-biis la neb a taaba. Neb nins sẽn nan sɩng tigingã pẽnegr sõma-sõma wã tõe n data seb-kʋd kãens n paas b sɛbã.

5. Wãn to la d tõe n wilg tɩ d nanda d sɛbã?

⁵ D yiisda d sɛbã sẽn na yɩl n sõng neb nins sẽn sɩd baood sɩdã tɩ b bãng a Zeova raab kãsemsã beoog daar yĩngã, la d ratame tɩ d sɛbã sɩd tõog n pids tʋʋm kãnga. A Zezi sẽn maan burã ne yel-solemd n dɩlg nebã tɩ pa wã, a pa sãam kellã ye. Wala woto, tõnd me pa segd n sãam d sɛbã sẽn tik Biiblã zug n tar yõod wʋsgã ye. (Zã 6:11-13) Koɛɛg ning sẽn fãagd yõyã sẽn be d sɛbã pʋsẽ wã pa tõe n kẽ nebã sũyẽ, b sã n paad ne-d ye. Woto yĩnga, d sã n wa na n deeg sɛb d koe-moonegã yĩnga, d segd n deegame n zemse la d tʋm ne-b sõma tɩ naf nebã.—Fil. 4:5, NW.