D sẽn na n kãab sɛbã to-to zĩig ning neb sẽn gomd buud-goam toɛy-toɛyã
1. Bõe yĩng tɩ tigims wʋsg segd n tall buud-gom-zẽms sɛba?
1 Zĩis wʋsgo, bu-zẽms neb la d sɩng yãab moonegã zĩigẽ. Nin-kãensa sã n paam zãmsg bãmb mensã buud-goam pʋsẽ, b zãmsda tao-tao la b wʋmd yɛlã võor sõma n yɩɩda. Segl-bʋs la b maan sẽn na yɩl n sõng sɩdã ratb tɩ b paam sɛb sẽn tik Biiblã zug buud-goam nins b sẽn wʋmd sõma n yɩɩdã pʋsẽ?
2. Tigims a yiib bɩ sẽn yɩɩd woto sã n yaa buud-goam toɛy-toɛy tigims n yaool n moond bab-yɛnga, wãn to la b segd n lagem taab n tʋme?
2 D sẽn segd n bas sɛbã wakat ninga: Tigims a yiib bɩ sẽn yɩɩd woto sã n yaa buud-goam toɛy-toɛy tigims n yaool n tar mooneg zĩ-yɛnga, kãsem dãmbã sul segd n lagem n tʋma ne taab ne b tʋʋm yel-gɛtbã maasem. B segd n lugla mooneg na-kẽndr sẽn zems ne tigimsã fãa, sẽn na yɩl n tõog n kõ buud-gomd sull fãa kasetã sõma. Koe-moondbã sã n moond zak-zaka, naoor wʋsgo, b ka na n kãab nebã sɛb tigims a taabã buud-goam pʋsẽ ye. La sã n yaa kaset sẽn pa yãk wakat la b kõt bɩ b sã n kõta kasetã zãma zĩisẽ, b tõe n kãaba sɛbã neb nins sẽn be zĩ-kãngã goam pʋgẽ.—Ges-y Yãmb Sogsgã Leoor sẽn be yʋʋmd 1990 zĩ-likr kiuugã Rĩungã Tʋʋmd (ne farende) pʋgẽ wã.
3. Wakat bʋg la tiging segd n tall buud-gom-zẽng sɛba?
3 Wakat ning b sẽn segd n tall sɛb tigingã pʋgẽ: Neb wʋsg sã n be babgã pʋgẽ n gomd buud-gom-zẽng tɩ buud-gom-kãng tiging yaool n ka be zĩ-kãngã, bõe la b tõe n maane? Sã n yaa woto, tigimsã tõe n baoo sɛb nins d sẽn tʋmd ne wʋsgã buud-gom-kãngã pʋgẽ n bĩngi, wala seb-vãado, Baood la Wẽnnaam zoa seb-bi wã, la Bãngr sebrã. Koe-moondbã tõe n kãaba seb-kãensã neb nins b sẽn segd koe-moonegã wakate, la sẽn tõe n karem buud-gom-kãng pʋgẽ wã.
4. D sã n dat sɛb ne buud-gomd ning tɩ tigingã ka tar-ba, bõe la d tõe n maan n paam-ba?
4 D sẽn tõe n kos sɛbã to-to: Tigingã sã n ka tar sɛb ne buud-gomd ning ned ning sẽn dat n bãng n paasã sẽn tõe n karem, a maanda wãn n paam sɛb buud-gom-kãng pʋgẽ? Koe-moondã segd n tɩ yãa sẽn get-a sɛbã yell t’a vaees n ges sɛb nins b sẽn tõe n paam buud-gom-kãng pʋgẽ wã. Rẽ, b tõe n paasa sɛb nins b sẽn datã tigingã sɛb demand ning sẽn na n pʋglã pʋgẽ.
5. Yaa bõe yĩng la d sẽn dat tɩ neba paam tõnd sɛbã?
5 Bɩ d tʋm ne d sɛbã sõma n sõng “tɩ neba [buud] fãa,” baa b sẽn gomd goam nins fãa, “paam fãagre la b bãng sẽn yaa sɩda.”—1 Tɩm. 2:3, 4.