D gũus ne ẽntɛrnetã bẽdse Babg a 2: Tũnug ne ẽntɛrnetã n maan vaeesgã

¹ Neb kẽer n tũnugd ẽntɛrnetã n toond saam-biisã kibay b sẽn vaees n paam tẽebã tʋʋm nens toɛy-toɛy zutu, n tẽed tɩ b maanda saam-biisã neere. Wala makre, nina maanda vaeesg diskuur pãlã zugu, n tool kibay nins a sẽn paamã n saagdẽ tɩ kiba-kãens na n nafa neb nins fãa sẽn na n tall diskuur pãlã kãng n tʋmã. Neb kẽer me tũusda Gũusg Gasgã zãmsg sẽn wat verse rãmba, la Wẽnnaam tʋʋmdã lekoll sõss bɩ vaeesg b sẽn maan sebrã zãmsg zug n toondẽ. Sãnda toonda sagls b sẽn vaees n paam koe-moonegã zugu. La rẽ yĩnga woto sɩd sõngda saam-biisã bɩ?

² Sɛb nins a Zeova siglgã sẽn yiisdã kõta tõnd yam la bãngr la b zãmsd tõnd sẽn na yɩl tɩ d tõog n bãng ‘sõma ne wẽng n bake.’ (Heb. 5:14) Rẽ yĩnga, sã n yaa neb a taabã n maand vaeesgã n kõt tõndo, d tõe n yeelame tɩ d tõogd n bãngda sõma ne wẽng n bakdẽ sɩda?

³ B goma Beere neb yell n yeel tɩ b tara manesem sẽn “yaa sõma n yɩɩd sẽn be-b Tesalonikã.” Bõe yĩnga? Bala “bãmb deega Wẽnnaam koɛɛga ne b sũyã fãa. La bãmb baoo Gʋlsg Sõamyã pʋgẽ daar fãa [sẽn na yɩl n] bãng bũmb nins b sẽn yet bãmbã sã n yaa tɩrga.” (Tʋʋ. 17:11) Baa ne a Poll la a Sɩlas sẽn moon-bã, bãmb mensã sã n da pa maan modgre, b ra pa na n tõog n sak sɩdã ne b sũy fãa ye.

⁴ Tõnd sã n dɩk vaeesg ned a to sẽn maan n segl sõsg bɩ tigisga, d pa tõe n yeel tɩ d zãmsa d meng d toor ye. Rẽ yĩnga tõnd sẽn datã pa d mengã tõog n kɩs sɩd ne Wẽnnaam Gomdã sɩda? Yaa d sẽn na n tik tõnd meng sẽn kɩs sɩd ne bũmb ningã la d tõe n kõ kaset d tẽebã zug d sõssã pʋsẽ, d sẽn leokd tigissẽ wã la koe-moonegã sasa. (Rom 10:10) D sã n teegd vaeesg neb a taab sẽn maand bala, d pa tũud Yelbũn 2:4, 5 sẽn sagend tõnd ned kam fãa t’a ‘bao bãngr ning sẽn yit Wẽnnaam nengẽ wã wa ned sẽn baood arzɛgsã’ ye.

⁵ Wala makre, d sã n gẽesd verse rãmbã Biiblã pʋgẽ d toore, d tõe n kell n karma bilf n tẽeg bũmb ning sẽn kɩt tɩ b wa gom woto zĩ-kãngã wã. Wa a Luk sẽn maan to-to n gʋls a Evãnzillã, d tõogd n fees n bãnga bũmb fãa sẽn yɩ to-to. (Luk 1:3) Modgr ning d sẽn na n maanã leb n na n sõng-d lame tɩ d sã n moond koɛɛgã wall d sã n wa kõt sõsg bɩ d mi verse rãmbã zĩis sõma. Neb wʋsg pẽgda a Zeova Kaset rãmbã n yetẽ tɩ b mii Biiblã vaeesg sõma. La yaa tõnd meng sẽn na n baood verse rãmbã d toor Biiblã pʋgẽ la b tõe n sɩd yeel tɩ d mii Biiblã vaeesg sõma.