Ra pʋg-y “yel-yaals” ye

¹ Bõn-tũnugdg a yembr neb wʋsg sẽn tũnugd ne n yẽsd ne taab rũndã-rũndã yaa kɩbay taasg ne ẽntɛrnetã. Baa sẽn tõe n yaa bũmb sẽn zems tɩ d tũnug ne manesem kãngã n togs d roagdb la d zo-rãmb yɛl d meng sẽn vɩɩmd bɩ d tagsa wã, “yel-yaals” bʋs n tõe n tɩ loe ne kɩbay taasg ne ẽntɛrnetã tũnugrã rɩk-n-tʋm tɩ loogã?—Yel. 12:11.

² Y sã n wa taasd kɩbay ne ẽntɛrnetã tũnugr bɩ y maan gũusgu: Neb kẽer tagsdame tɩ yaa b sẽn na n paamd kɩbay sẽn tɩ loe ne yɛl sẽn nan maan paalem ne ẽntɛrnetã maasem bal la b rɩt moor n tɩgd ne a Zeova siglgã yɛla. Rẽ tõe n tɩ loee ne yɛl neb sẽn vɩɩmde, kɩbay sẽn tɩ loe ne yɛl sẽn maand Betɛllẽ wã, kɩbay sabaab rãmb bɩ namsg d saam-biisã sẽn paamd wɛɛngẽ, la kɩbay b sẽn moon Rĩungã Tʋʋmd Lekollẽ ned yaar sẽn ka segd n bãng menga. Yaa wala kẽer yãgdame n dat n tool koees a woto, n saagdẽ tɩ bãmb n na n yɩ pipi n vẽneg kɩbarã n togs b zo-rãmbã.

³ Wakat ninga b golma kɩbarã bɩ b yaga ziri n paase. Bɩ tõeeme tɩ neb kẽer sẽn modgd n na n togs kɩbarã ne manesem sẽn sidgd yĩng wʋsgã, b kɩtame tɩ neb a taab tall tagsg sẽn pa sɩd yellã zugu. Naoor wʋsgo b rãmb nins sẽn yãgd n na n vẽneg yell n togsã ka tar yellã nao fãa ye. (Yel. 29:20) Sasa ninga, baa b sã n miimi tɩ kɩbarã ka tõe n yɩ sɩda, b taasd-a-la wa dũni kɩbar sẽn be yamleoog bala. La kɩbay a woto sẽn ka sɩda, la sẽn tudgdã yaa “soalem sẽn ka võore,” sẽn pa kɩtd tɩ ned yɩ wẽn-sakd hakɩk ye.—1 Tɩm. 4:6, 7.

⁴ Yãmb sã n taas kɩbar sẽn ka sɩda, y tara taal sã n yaa ne sũ-sãams la zũnd-zãnd ning rẽ sẽn tõe n wa wa ne wã. A Davɩɩd sẽn dag n paam kɩbar b sẽn wãag koom n paas sẽn da yet tɩ b kʋʋ a komdibli wã fãa wã, a ‘pãrsa a fut’ ne sũ-sãang kãsenga. La sɩd-sɩdã ra ya a biribl a ye n ki. Yel-kãngã meng ra seka a na sãam a sũur wʋsgo, la kɩbarã b sẽn togs n wãag koomã n paasã paasa a Davɩɩd sũ-sãangã. (2 Sãm. 13:30-33) Sɩd-sɩda d ka rat n maan bũmb sẽn na n belg bɩ sãam d saam-biig ba a yembr sũur ye.

⁵ Koe-taasg sor ning Wẽnnaam sẽn yãkã: Tẽeg-y tɩ tõnd saasẽ Ba wã tara koe-taasg sor a sẽn yãke, sẽn yaa ‘tʋm-tʋmd sẽn tũud sɩd la sẽn tar yamã.’ Yaa ‘tʋm-tʋmd’ kãng n segd n wilg kɩbay nins b sẽn segd n togs tẽebã zak neba, la ‘wakat ning sẽn segd’ ne kɩbarã taasgã. Yaa ne Wẽnnaam siglgã maasem bal la b tõe n taas tẽeb rɩ-kãngã. Yaa koe-taasg sor ning Wẽnnaam sẽn yãkã bal nengẽ la d segd wakat fãa n bao kɩbay sẽn be bas-yardo, pa koe-taasdb sẽn tũnugd ne ẽntɛrnetã nengẽ ye.—Mat. 24:45.

⁶ Sɩt ẽntɛrnet rãmbã: Sosiete wã tara a meng sɩt ẽntɛrnet sẽn yaa: www.watchtower.org. Sɩt ẽntɛrnet kãngã zemsa sẽn na yɩl n taas zãma wã kɩbaya. Ka tɩlae tɩ neda, taoor dãmb sulli, bɩ tiging ba a yembr segl kɩbay a Zeova Kaset rãmbã wɛɛngẽ n ning ẽntɛrnetã pʋgẽ ye. Neb kẽer toola tagsa nins sẽn be tõnd sɛbã pʋsẽ ne verse rãmbã la referãns rãmbã fãa, la b tol n tool tigis-kãseng sõss wala kũuni. Ligd kẽed sʋk t’a pa kẽed sʋk me, togs bũmb sẽn be a Zeova Kaset rãmbã sɛbẽ wã masĩn pʋgẽ n maan n pʋɩ neb yaa sɛb yiisdbã dʋrwa rãmb kɩɩsgo. Baa neb kẽer sã n getẽ tɩ yaa b saam-biisã la b sõngd woto, Sosiete wã ka sak rẽ ye, b segd n basa rẽ maanego.

⁷ D sã n yɩ tags-tɩ-bɩ rãmb la yõk-m-meng rãmb kɩbay taasg ne ordinatɛɛr tũnugrã wɛɛngẽ, rẽ na n kɩtame tɩ d yamã pid “ne bõn-sõama la arzɛka.”—Yel. 24:4.