Yãmb sogsgã leoore
◼ D sã n tũnugd ne ẽntɛrnetã n sõsd ne ned d sẽn pa mi, yel-bʋs n tõe n paam-do?
Sit-wɛɛb rãmb wʋsg n be ẽntɛrnetã pʋgẽ tɩ neb tõe n tũnug n sõs ne taaba. Ẽntɛrnetã pʋgẽ, ned tõe n baoa zĩig sit-wɛɛb pʋgẽ n bilg a meng n bĩng kiba-kãens la a foto rãmb be, tɩ neb a taab tõe n ges n bãng a sẽn yaa ned ninga. Ned ning fãa sẽn na n tɩ pak sit-kãngã tõe n bao n bãnga a soabã n paase. Kom-bɩɩs wʋsg mii sit-wɛɛb kãensã sõma. Tigingã pʋgẽ kom-bɩɩs kẽer tũnugda ne rẽ n sõsd ne neb sẽn yet tɩ b yaa a Zeova Kaset rãmba.
Ẽntɛrnetã pʋgẽ, yaa nana ne ned ning d sẽn sõsd ne wã t’a togs-d a sẽn yaa a soaba, a zems-n-taarã ne a Zeova sẽn yaa to-to la bũmb ning sẽn kɩt t’a sõsd ne tõndã, tɩ rẽ fãa yaool n yaa ziri fasɩ. (Yɩɩl 26:4) Ned sẽn yet t’a yaa a Zeova Kaset soab tõe n yaa ned sẽn pa a Zeova Kaset soaba, bɩ ned b sẽn yiis tigingã pʋgẽ menga. Tõe tɩ yaa sɩdã kɩɩsda, sẽn baood n na n sãam kiris-nebã tẽebo. (Gal. 2:4) Kiba-kɩtbã wilgame tɩ neb wʋsg tũnugda ne sit-wɛɛb kãens n dood kamba.
Baa d sã n sɩd miẽ tɩ neb nins d sẽn sõsd ne wã tara yʋ-sõng b tigingã pʋgẽ, d sã n tũnugd ne ẽntɛrnetã n sõsd ne taaba, tõe n kɩtame tɩ d wa talld manesem Biiblã noy sẽn gɩdge. Ned sã n sõsd ne a to a sẽn zɩ n yã, mi n yaa nana ne a t’a togs goam nins fãa a sẽn dat n pa zoet yãnd ye. B tõe n getame tɩ b sẽn tũnugd ne ẽntɛrnetã n sõsd ne taabã yaa bãmb bal n mi, la b tagsdẽ tɩ neb a taab wala b roagdbã, la tigingã pʋgẽ kãsem dãmbã pa tõe n bãng b sẽn yet bũmb ninsã ye. La bʋko, kiris-neb kamb wʋsg lʋɩya bẽd-kãng pʋgẽ n lebg neb sẽn gomd gom-dẽgdo. (Ef. 5:3, 4; Kol. 3:8) Sit kãens pʋsẽ, kom-bɩɩs kẽer bĩnga mizik video rãmb sẽn pid ne gom-dẽgd la tʋʋm-dẽgdo, n paas b mens foto rãmb sẽn nekd yoob tʋlsem, la yʋ-yood sẽn wilgd b sẽn tar manesem ninga.
Woto fãa yĩnga, roagdbã segd n bao n bãnga b kambã sẽn maand bũmb ning ordinatɛɛr dãmbã pʋsẽ. (Yel. 29:15) D sã n sak tɩ ned tõnd sẽn pa mi wa sõsd ne-do, wall d bas nin-kãng t’a sõsd ne d kambã, tõe n yɩɩ yelle. Woto me, tõe n yɩɩ yelle, tõnd mengã wall d kambã sã n tũnugd ne ẽntɛrnetã n baood zood ne neb d sẽn pa mi, baa tɩ nin-kãens sã n yetẽ tɩ b yaa a Zeova Kaset rãmba.—Yel. 22:3.