“Pagb sẽn tʋmd wʋsg Soaalã pʋgẽ wã”
1 Yaa ne gom-kãensã la a Poll bilg a Tirfɛn la a Tirfooz, sẽn yaa saam-bi-pogs a yiib sẽn tʋmd wʋsg sẽn da be Rom tigingẽ wã. Saam-bi-poak a to yʋʋr sẽn boond t’a Persis wɛɛngẽ, a yeelame: “A maana tʋʋm tood wʋsg Soaalã pʋgẽ.” Woto me a pẽga a Febe n yeel t’a ‘sõnga neb wʋsgo.’ (Rom 16:2, 12, NW ) Gʋlsg Sõamyã pʋgẽ, a Dorkas baka wa ned sẽn maan “tʋʋm sõama wʋsgo n sõng naong rãmba.” (Tʋʋ. 9:36) Ad pagb nins sẽn yaa tẽeb neba yaa bark bũmb n kõ tigingã!
2 Tõnd nanda saam-bi-pogsã sẽn tʋmd wʋsg tõnd tigingã pʋgẽ wã bɩ? Yaa bãmb n maand koe-moonegã tʋʋmd n yɩɩda, n maand Biibl zãmsg ne nebã wʋsg sẽn yɩɩda, la b sõngd nin-paals wʋsgo. B leb n dɩkda sẽk wʋsg n sõngd kambã tɩ b bɩt tẽebã wɛɛngẽ. Pagb sẽn yaa kiris-nebã me sõngdame n paasd nonglmã, sũ-noogã, bãanã, la yẽesmã tigingã pʋgẽ. B kõta b sõngr ne manesem toɛ-toɛ sẽn na yɩl tɩ b sɩdbã la b zakã neb a taab tõog n tʋm n paas a Zeova tʋʋmdã pʋgẽ.
3 Saam-bi-pogs nins sẽn be wakat fãa tʋʋmdã pʋgẽ wã: Saam-bi-pogs nins sẽn yaa misioneer dãmbã bee neb nins sẽn tʋmd wʋsg Soaalã pʋgẽ wã sʋka. Bãmb wʋsg naagame n sõng tɩ tʋʋmdã paam pãng tẽn-zẽms pʋsẽ. Tigims nins pʋsẽ b sɩdbã sẽn kẽng n na n tɩ gesã, so-toak yel-gɛtbã pagb tʋmda wʋsg koe-moonegã pʋgẽ, n daoond saam-bi-pogs wʋsgo. D ka segd n yĩm saam-bi-pogs nins sẽn tʋmd Betɛllẽ wã ye. Ne yẽesem b maanda baleng tʋʋmdã n teend a Zeova siglgã. Sẽn paase, tõnd saam-bi-pogsã sẽn yaa wakat fãa so-pakdbã modgda ne kɩs-sɩd n pẽgd a Zeova, tɩ ne woto bɩ b sõngd neb tusa tɩ b bãngd sɩdã.
4 Saam-bi-pog-kãensã paamda sũ-noog kãseng b maan-m-meng maoong vɩɩmã pʋgẽ. (1 Tɩm. 6:6, 8) B zemsa ne pẽgre, la ne raoolg bɩ teelg buud fãa d sẽn tõe n kõ-ba.
5 Pagb nins sẽn yaa kiris-nebã nafda a Zeova siglgã wʋsgo. Ne kɩs-sɩda, b maanda tʋʋm sẽn yaa bark bũmb n kõt neba fãa. Bɩ d ket n nand pagb a woto la d pʋʋsdẽ tɩ b paam a Zeova barka, wakat ning b sẽn ket n “tʋmd wʋsg Soaalã pʋgẽ wã.”