D sẽn na n bɩɩs d tagsg tõogã to-to

¹ Gom-biig ning sẽn yaa “tagsgã” võor a yembr yaa “gom ne ned sẽn na yɩl n toeem a tʋʋma bɩ a tagsa wã.” Sẽn na yɩl n paas y ministɛɛrã sõmblem, y segd n bɩɩsa tõog ning sẽn yaa tags ne b rãmb nins y sẽn segdã. (Tʋʋ. 17:​2-4) La wãn-wãn la y na n tõog n bɩɩs tõog kãngã?

² Sɩngda ne bʋgsgo: Y sã n wa zãmsd sɩd ning sẽn be Biiblã pʋgẽ wã, y na n yãame tɩ yɩta sõngr n kõ-y tɩ y tags b zutu. Y sã n yã tagsa tɩ wõnd b võorã wʋmb yaa toog bilfu, rɩk-y sẽk n maan vaeesg la y bʋgs leoorã y sẽn na n paama zutu. Bao-y n wʋm-y võor wilgrã b sẽn kõ wã võor vẽenega. La ka rẽ bal ye, bao-y n bãng bʋʋm nins Gʋlsg Sõamyã sẽn kõ võor wilgr kãens yĩngã..

³ Seglgã ministɛɛrã yĩng me bee sʋka: Tags-y n ges y sẽn na n wilg sɩdã neb buud toɛ-toɛy to-to. Maan-y sʋkr sẽn kɩtd tɩ ned tagse, la sẽn nekd ratem. Bãng-y y sẽn na n kẽes tagsg sẽn tik Gʋlsg Sõamyã zug sʋk to-to la y tags rẽ zugu. Reng-y n tags kɩɩsg goam nins neba sẽn tõe n tallã yelle, la y sẽn na n maan to-to n leok-bã. Yãk-y tags-kãseng sẽn na n zems n yɩɩd sebr ning y sẽn kãabdã pʋgẽ.

⁴ Tũ-y-yã a Zezi makrã: A Zezi kõo makr ning sẽn yaa sõma n yɩɩdã ne d sẽn tõe n tik Gʋlsg Sõamyã zug n maan tagsg sẽn womd biisi. Sẽn na yɩl n vaees n bãng a sẽn kõ zãmsgã to-to, bɩ d ges kɩbar ning sẽn be Luk 10:25-​37 pʋgẽ wã. Ges-y so-tũudi kãensã: 1) Tak-y a soabã yam n sik Gʋlsg Sõamyã zug y sã n wa leokd sʋgsgo. 2) Kos-y-b tɩ b gome, la b sã n gom gomd sẽn pukd yam-welgr bɩ y pẽg-ba. 3) Kell-y n yals-y y yamã loees nins sẽn be sʋkrã la verse rãmbã sʋkã zugu. 4) Tũnug-y ne bilgr sẽn kẽed sũuri, sẽn na yɩl n kɩs sɩd tɩ b wʋma leoorã võor meng-meng sõma.​—Ges-y yʋʋmd 1986, tʋʋlg kiuug 1 daar Gũusg Gasgã (farende), seb-vã-nens 27-8, sul 8-​10.

⁵ Tũnug-y ne tʋʋm-teoog ning b sẽn kõ-dã: B yiisa Comment raisonner sebrã (D Sẽn Na n Sɩng . . .  Biibl Sõss To-to seb-bilã) t’a yaa koe-moonegã tʋʋmd sebre. Sɩngr goam koe-moonegã yĩngã, kɩɩsg goamã leoorã, la tagsa nins sẽn be a pʋgẽ wã sõngda tõnd tɩ d bɩɩs d tagsgã tõogo. Comment raisonner sebrã yaa tʋʋm-teoog sẽn tar yõod wʋsg d sẽn segd n zãad wakat fãa n yit moonegã, n da maan sãmb-sãmb ne d rɩk-a n tʋme, d sã n wa maand sõss sẽn tik Biiblã zug ye. Lebg-y n ges sebrã seb-vã-nens a 7-8 n bãng y sẽn na n tũnug ne sebrã tɩ naf-y wʋsg to-to.

⁶ Y sã n bɩɩs y tagsg tõogã, rẽ na n paasa y moonegã la y zãmsg kũunã tõogo. Rẽ na n wa baas n kõo yãmb la b rãmb nins y sẽn segd ministɛɛrã pʋgẽ wã bark wʋsgo.