Tõnd moonda koe-noogo
1 D sẽn yaa “bõn-sõma koe-noog” taasdbã yaa zu-no-kãseng meng n kõ-do! (Rom 10:15, NW ) D tara koɛɛg sẽn yolsd n na n taas neb nins sẽn be gudgr la saagr kaalem pʋgẽ wã. Wãn-wãn la d tõe n sõng tɩ b sak n deeg tɩ tõnd kãabd-b-la “koe noog sẽn tɩ loe ne bõn-sõma”?—Ezai 52:7, NW.
2 Segl-y koe-sõngo: Tõnd sõssã koe-moonegã pʋgẽ na n talla bi-sõma d sã n tik d yamã yɛl sẽn kengd tẽeb zutu. Woto yĩnga, d sã n wa segend d wilgrã la d lebgd n get sebr ning d sẽn na n kãabã, d tog n yalsa d yamã koɛɛgã nens nins sẽn yaa sõma zutu. D sã n taasd nebã tõnd saagrã sẽn tik Biiblã zugã ne bas-yard la yẽesem, d tõe n gũumi n wa paam bi-sõma.—Yel. 25:11.
3 Nebã sã n togsd tõnd dũniyã yɛlã wɩngr sẽn namsd-b to-to, d wilgda d ninbãan-zoeere. Baa ne rẽ, d segd n wilg-b lame tɩ ninsaal yɛlã tɩɩm hakɩk yaa Wẽnnaam Rĩungã. Baa d sã n wa sõsd ne nebã a Zeova “sũ-dokr daarã” wɛɛngẽ, d na n wilg-b lame tɩ rẽ sɩd yaa “koe-noog n kõ sik-m-mens rãmbã.” (Ezai 61:1, 2, NW ) D tõeeme n kɩt tɩ d kɛlgdbã tall bas-m-yam tɩ bũmb nins fãa a Zeova sẽn maandã na n baas n waa ne sũ-no-kãsenga, la a tall baas-neere.
4 D wilg sɩdã ne sũ-noog hakɩka: Neba sã n ne tɩ tõnd tara sũ-noogo, la tɩ bas-m-yam be d koe-zomẽ wã, b sakd n kelgame n yɩɩda. Tõnd sã n pukd yam-sõngo, tõnd kɛlgdbã na n yãame tɩ tõnd ‘maanda sũ-noog ne tõnd saagrã.’ (Rom 12:12, NW ) Dẽ, b tõeeme n sak koe-noogã n yɩɩda. Sɩda, wakat fãa d bee bʋʋm n na n puk yam-sõng la d tall sũ-noog d ministɛɛrã nens fãa pʋsẽ.
5 D sẽn yaa koe-noogã ministr dãmbã, tõnd ka taasd nebã kɩbay bal ye. Tõnd kõtã nebã saagr ne vɩɩm sẽn yaa sõma n yɩɩd masã la beoog-daare. (1 Tɩm. 4:8) Tõnd sã n gomd ne ned fãa, tõnd yam-sõngã na n puka tõnd sẽn yetã pʋgẽ, la d na n sõnga nebã tɩ b sak koe-noogã. Bɩ d tus pʋ-peelem dãmbã tɩ b sak koe noog sẽn yaa kãseng ning d sẽn moondã, n gũus bũmb ning d sẽn yetã, la d sẽn yet-a to-to wã!