D rɩk a Zeova sẽn yaa sũ-noog Wẽnnaamã togs-n-taare
1 Sɩd-sɩda, a Zeova ratame tɩ nebã tall sũ-noogo. Biiblã wilgda tõnd bõn-sõma nins a sẽn na n wa kõ adem-biisã, tɩ kɩt tɩ d gũud b pidsgã ne yãgbo. (Ezai 65:21-25) Neb a taabã segd n neeme tɩ tõnd sã n moond “sũ-noog Wẽnnaamã koe-noog sẽn tar ziirã” d sũy yaa noogo. (1 Tɩm. 1:11, NW) Tõnd sẽn togsd koe-noogã to-to wã segd n wilgda nebã tɩ d nonga bũmb nins sẽn be Biiblã pʋgẽ wã, la tɩ d sɩd nonga neb nins d sẽn togsd koɛɛgã me.—Rom 1:14-16.
2 Yaa sɩd tɩ pa nana tɩ d tõog tɩ raar fãa bɩ d sũyã yaa noog ye. Zĩis kẽere, mi n yaa neb bilf bal n sakd n kelgd Rĩungã koɛɛg d sẽn moondã. Sasa ninga, tõe tɩ yaa tõnd mengã n tar zu-loeese. La sẽn na yɩl n kell n tall sũ-noogo, yaa sõma tɩ d tagsd n get hal sẽn ta zĩ-bʋg la tar yõod tɩ neb nins sẽn be d moonegã zĩisẽ wã wʋm Rĩungã koe-noogã la b bãng a võore. (Rom 10:13, 14, 17) D sã n tagsd rẽ zugu, na n sõng-d lame tɩ d ket n togsd nebã a Zeova fãagr koɛɛgã ne sũ-noogo.
3 D gomd bõn-sõma yell n yɩɩda: Tõnd segd n gũusda ne d sẽn yet bũmb ningã me sõma. Baa d sẽn tõe n mi n sɩng d sõsgã ne zu-loɛɛg bɩ kiba-yook sẽn pak nebã, d pa segd n gomd yel-beedã la zu-loeesã yell wʋsg ye. Tõnd sẽn wat ne koɛɛg ningã yaa “koe-noogo.” (Ezai 52:7; Rom 10:15) Koe-no-kãng wilgda bõn-sõma nins Wẽnnaam sẽn pʋlem t’a na n kõ-d-la beoog daarã. (2 Pɩɛ. 3:13) Bɩ d ning rẽ d yamẽ, n tall Biiblã n “bels sũ-sãoong rãmbã.” (Ezai 61:1, 2) Woto na n sõnga tõnd tɩ d sũy ket n yaa noog ne koɛɛgã, la kɩt tɩ koɛɛgã me ket n yaa koe-noogo.
4 Pa segd n yɩ toog ne nebã tɩ b yã tɩ tõnd sũyã yaa noog d sã n wa moond koe-noogã ye. Bɩ d modg wakat fãa tɩ d koe-noogã mooneg sasa bɩ d wilg tɩ d sũy yaa noogo, n wilgdẽ tɩ d rɩkda a Zeova sẽn yaa sũ-noog Wẽnnaamã togs-n-taare.