Yãmb sakda Kirist nonglmã bɩ?
1 A sẽn tagsd a Zusoabã vɩɩm sẽn yɩ to-to wã yelle, tʋm-tʋmd a Zã gʋlsame: “A Zezi sẽn da nong a nebã sẽn da be dũniyã pʋgẽ wã, talla nonglem ne-b hal tɩ ta a tɛka.” (Zã 13:1, NW ) Rõandã Tẽegrã wakate, tõnd tagsda Kirist nonglem wilgr sẽn yaa kãseng n yɩɩdã yelle. D tõe n saka nonglem kãng n tall tẽeb ne yao-n-dɛɛkã, n kẽesd d mens moonegã tʋʋmdẽ ne yẽesem la d tõog toog “hal tɩ saabã ta” wala a Zezi.—Mat. 24:13, NW; 28:19, 20; Zã 3:16.
2 D sak Kirist nonglmã: A Zezi tʋma wʋsg a tẽng zug vɩɩmã yaoolem semenã. (Mat. 21:23; 23:1; 24:3) D sẽn yaa Kiristã togs-n-taasã, nonglmã segd n tusa tõnd me tɩ d ‘modg sõmb-sõmb’ a Zeova sõgenegã pʋgẽ. (Luk 13:24, NW ) Y tõe n tũnuga ne segls nins b sẽn dɩk sẽn na yɩl n paas kaset kũun tʋʋmdã tʋʋl-nif kiuugã n paas wakat ning y sẽn dɩkd koe-moonegã pʋgẽ wã bɩ?
3 Rõandã Soaalã Zaabr Dɩɩb na n maana tʋʋl-nif kiuugã rasem 19, arbã raar zaabre. Neb sõor sẽn ta wãn n na n wa wakat kãngã yõod sẽn yaa kãsengã? La rẽ bee ne tõnd wʋsgo. Yãmb gʋlsa b rãmb nins y sẽn dat n boolã yʋy, wala y Biibl karen-biis la neb a taab sẽn wilgd ratem, y roagdba, y afɛɛr maand taase, la y karen-bi-taas bɩ? Y tɩ yã-b lame n taas-b boollã ne y sũur fãa bɩ? Yãmb na n tẽeg-b-la rasem a wãn tɩ Tẽegrã nan pa ta bɩ? B baooda yãmb sõngr sẽn na yɩl n wa bɩ? Kẽem dãmbã boonda neb nins fãa sẽn ka le moond koe-noogã me. B sẽn na n maan Tẽegrã ra-zaan-daar yʋng la pa wɩkɛnnã pa segd n gɩdg neba fãa tɩ b ra wa ye.
4 Segl-y y meng n wa: Tara yõod wʋsg tɩ d segl d mens la d tall tagsg sẽn zemse, d sã n wa wat Tẽegrã. A Poll sagla a tẽed-n-taasã tɩ b ning b yamẽ tɩ Tẽegrã wakat ka reem yell ye. (1 Kor. 11:20-26) Y tõeeme n karem a Zã evãnzillã sak 13 n tɩ ta 17 wã y zak pʋgẽ Biibl zãmsgã wakate, tɩ rẽ poor bɩ y kɩt tɩ zakã ned fãa togs a Zezi maoongã võor sẽn yaa soab ne-a. Da yĩm-y daar fãa Biiblã kareng b sẽn kõ Tẽegrã semen wakatã yĩng me ye!
5 Tõnd nonglmã ne Kiristã yaa kãseng wʋsgo, la a yaa bũmb sẽn zʋʋgd tʋʋl-nif kiuug rasem 19 wã zĩig sẽn zãre. D rɩka sard kãn-kãe wakat fãa n na n wilg d nonglem ne-a! Rõandã Tẽegrã maaneg na n sõnga tõnd tɩ d paas sard dɩkr kãng pãnga.