‘Yɩ-y kõatb sẽn kõt ne sũ-noogo’
1 Yʋʋm pi-gĩn sẽn looge, tʋm-tʋmd a Poll kõo a Tɩmote noor t’a sagl a tẽed-n-taasã “tɩ b maan neer tɩ tʋʋm sõama yɩ bãmb arzegse, la b yɩ kõatb sẽn kõt ne sũ-noogo.” (1 Tɩm. 6:18) A Poll leb n tẽega kiris-neb nins sẽn yaa Hebre dãmbã tɩ b ra yĩm “tɩ maan neere la sõng neba ye.” (Heb. 13:16) Bõe yĩng t’a gʋls no-kãensã? Bala a ra miime tɩ “ziiri la waoogre la laafɩ bĩnga neb nins sẽn maand neera yĩnga.”—Rom 2:10.
2 A sẽn yaa Naandã yĩngã, Wẽnnaam a Zeova la bũmb fãa Soaba. (Wil. 4:11) Yaa vẽeneg tɩ d nanda a sẽn dɩkd a sẽn so wã n maand bũmb nins n kõt-dã. Baa ne ninsaalb wʋsg sẽn wilgd ne b manesem tɩ b yaa zɩ-beoog rãmbã, Zãntlem Sẽn-ka-to soabã ket n basdame tɩ bũmb nins a sẽn kõt sẽn na yɩl n teel vɩɩmã nafd neba fãa. (Mat. 5:45) A tol n kõo a biribl nongr sẽn yɩɩdã tɩ yɩ maoongo, sẽn na yɩl tɩ tõnd tõog n paam vɩɩm sẽn-kõn-sa. Nonglmã b sẽn wilg tõndã ka segd n tus-d tɩ d tall mi-beoogo, n yɩ kõatb sẽn nafd d ninsaan-taasã sɩda?—2 Kor. 5:14, 15.
3 Bõe la d tõe n kõ? D sã n dɩk bũmb ning fãa d sẽn tarã n tʋm tɩ noog Wẽnnaam sũuri, rẽ yaa bũmb sẽn zems bala. Sãmbg sẽn ka be, d ratame n teel Rĩungã dũni gill tʋʋmd laogã wɛɛngẽ la tẽebã wɛɛngẽ. Sɩda koe-noogã yaa arzɛk ning sẽn tar yõod n yɩɩdã ned sẽn tõe n paame, bala a yaa ‘Wẽnnaam pãng sẽn kõt fãagre.’ (Rom 1:16) Kiuug fãa d sã n kõt d sẽkã la d laogã wʋsgo sẽn na yɩl n maan moonegã la zãmsg tʋʋmdã, tõeeme tɩ d tõog n taas neb a taabã tẽeb arzɛk kãngã, tɩ rẽ na n sõng tɩ b wa paam vɩɩm sẽn-kõn-sa wã.
4 Tõnd sã n sõngd b rãmb nins nug sẽn ka tarã, nooma a Zeova wʋsgo. A kãabdame t’a na n ninga barka, la a leb n tẽegd tõnd woto: “Arzegs ka tõe n sõng ned sũ-puugr daar ye. La tɩrlem tõe n fãaga ned ne kũum.” (Yel. 11:4; 19:17) Tõnd sã n teend Rĩungã tʋʋmd laogã wɛɛngẽ, la d kẽes d mens zãng koe-noogã mooneg pʋgẽ, rẽ yaa manesem sẽn tar dasãnd d sẽn tõe n tũnug ne n wilg tɩ d sɩd yaa kõatb sẽn kõt ne sũ-noogo.