D sã n bʋd wʋsgo, d paamda bark wʋsgo
1 Tõnd fãa gẽegda kãab-kãsems nins sẽn be Wẽnnaam Gomdã pʋgẽ wã pidsgu. Baa masã menga, a Zeova kɩtame tɩ d tõe n paam bark wʋsgo, tɩ kõt tõnd sũ-noog n paasd d vɩɩmã pʋgẽ. La d mengã nafa sẽn na n ta to-to wã bee ne modgr ning d sẽn maandã. Wa tʋm-tʋmd a Poll sẽn yeelã, “ned ninga sẽn bʋt wʋsgo, a na n wʋka wʋsgo.” (2 Kor. 9:6) D ges zĩis a yiib d sẽn tõe n tũ sagl-kãngã.
2 Tõnd moonegã wakate: Taas neb a taabã koe-noogã sasa ning fãa d sẽn tõe n maan dẽ wã wata ne bark wʋsgo. (Yel. 3:27, 28) Yaa bũmb sẽn zems pẽgre, d sẽn ne tɩ koe-moondb wʋsg rɩkda sẽk n paasd koe-moonegã pʋgẽ, tɩ sõngr so-pakrã bɩ wakat fãa so-pakrã tʋʋmd be sʋka. Tõnd fãa tõe n bʋda wʋsgo, d sã n modgd ne d sũur fãa n lebgd n tʋgd n get neb nins sẽn dat n bãng n paasã, la d kãabd neb Biibl zãmsgo, d sã n paam sor fãa. (Rom 12:11) D sã n modgd zĩ-kãensã wɛɛngẽ, d na n vɩɩmda yɛl sẽn na n keng tõnd raoodo, la paas tõnd sũ-noog koe-moonegã pʋgẽ.
3 D teel Wẽnnaam Rĩungã: A Poll sẽn yeel tɩ ‘bʋd wʋsgã’ ra tɩ loee ne kũunã laogã wɛɛngẽ. (2 Kor. 9:6, 7, 11, 13) Rũndã-rũndã d tõe n kõo d nug bũmbu, bɩ n maan sõngr a taab wʋsg n teel Wẽnnaam Rĩungã. D tõe n sõngame n me Rĩung Rot la Tigis-kãsems Roto. D leb n tõeeme n sõng n pɩɩse, n pek baleng hakɩkã zĩisi, la d sõng n zã-b sõma. Y leb n tõeeme n kõ ligd n sõng ne yãmb tigingã depãens rãmba, la ne dũni gill Rĩungã mooneg la karen-biisã maaneg tʋʋmde. Sasa ning tõnd ned kam fãa sẽn kẽesd a toog rẽ pʋgẽ wã, bɩ d kɩdme, d sẽn ne t’a Zeova ningda tʋʋmdã a sẽn kõ sor tɩ b maanã bark wʋsgo!—Mal. 3:10; Luk 6:38.
4 Wẽnnaam Gomdã sagenda tõnd tɩ d ‘maan neere, la d yɩ neb sẽn maand tʋʋm sõma wʋsgo, la d yɩ neb sẽn kõte, la sẽn nong n pʋɩt d sẽn tarã ne neb a taaba.’ D sã n tũ sagl-kãngã d paamda bark wʋsg masã. Sẽn paase, d leb n ‘bĩngda paoong wakat sẽn wata yĩnga, wa yẽbgr sẽn tar pãnga, tɩ d tõe n paam vɩɩm hakɩkã tɩ yɩ d pʋɩɩre.’—1 Tɩm. 6:18, 19, Kãab-paalgã Koe-noogo.