Neb yõy n be yell pʋgẽ!
1 Biiblã wilgda vẽeneg t’a Zeova ratame “tɩ neb buud fãa paam fãagre.” La leb n yaa sɩd me tɩ tẽngã neb milyaar dãmb vɩɩm saagr bee ne b manesmã ne Wẽnnaam a Zeova la ne a Rĩungã a Zezi Kirist sẽn dɩt naam a zugã sẽn yaa to-to. Yaa “sɩda bãngr sẽn yaa takɩ wã” zug bal la manesem sẽn zemsã tõe n tiki. (1 Tɩm. 2:3, 4, NW ) D wilgda nebã tɩ ka la bilfu b na n yɩlga tẽngã n yiis wẽng buud fãa n pak sor Wẽnnaam tɩrlem dũni paalgã yĩnga. B leb n kõo tõnd noor tɩ d sẽn maand woto wã sasa bɩ d kell n kẽng taoor ne tʋʋmd ning sẽn yaa yõy fãagrã.—Mat. 24:14; 28:19, 20; Rom 10:13-15.
2 Bõe yĩng tɩ yaa yãgb yell woto? A Zezi keoogame tɩ “toog kãseng na n zĩndame, [tɩ] toog sẽn yaa woto nan ka zĩnd dũniyã zug ye.” (Mat. 24:21) To-kãng na n taa a zug tẽn-sʋk Armagedõ. (Wil. 16:16) Neb wʋsg n na n paam sãoongo, b sã n ka sak koe-noogã. Tõnd roagdba, d yagse, d tʋmd-n-taase, d karen-bi-taase, la d mitb sẽn ka tẽedb bee bãmb sʋka. La sẽn pak tõnd yaa bao n yã “neb buud fãa,” n dɩk togs-n-taar ne Wẽnnaam, sẽn wilg a nonglem ne ãdem-biisã dũni tõr n kõ a Biribl a Zezi Kirist tɩ yɩ yao-n-dɛɛk neba fãa yĩnga. (Zã 3:16) D tog n modga ne yẽesem n bool neba fãa tɩ b zoe n kẽng Wẽnnaam bãan zĩigẽ wã. D sã n maan moonegã tʋʋmd zãng-zãnga, d tõe n põsa zɩɩm samde.—Eze. 33:1-7; 1 Kor. 9:16.
3 Tõnd bõn-datlã yaa bõe? B wilga moonegã tʋʋmd yõod vẽeneg Wẽnnaam Gomdã tõr pʋgẽ. Wala tʋm-tʋmd a Poll sẽn wilgã, “nonglem Kirist sẽn tarã modgda tõnd” tɩ d vɩɩmd tɩ zems ne Wẽnnaam soayã. (2 Kor. 5:14, NW ) Sẽn paase, Gũusg Gasgã nong n gomd n tadgda tõnd moonegã zɩɩb zugu. Wakat fãa, D Rĩungã Ministɛɛrã kõta sor-wilgr sẽn tɩ loe ne d sẽn segd n maan moonegã tʋʋmd to-to. Kẽem dãmbã siginda tʋʋmdã la b raoond tõnd tɩ d maan-a. Tõnd koe-moon-taas raoonda tõnd tɩ d wa lagem ne-b n tʋm ministɛɛrã pʋgẽ. D wʋmda yɛl wʋsg sẽn tɩ loe ne wilgr seglgo, periodik rãmbã la sɛb a taab kãabgo, lebg-n-tɩ-ges rãmb maanego, Biibl zãmsg ne neb maanego, la d sẽn tõe n tũnug ne sor buud fãa d sẽn paam n kõ kasetã to-to. Woto fãa sõngda tõnd tɩ d pids d bõn-datlã sẽn yaa neb yõy fãagrã.—1 Kor. 9:22, 23; Ef. 1:13.