‘Goam b sẽn togs a wakate’
1 Vɩɩm koɛɛgã taasg neb a taab yaa toog ne yãmb bɩ? Yãmb tagsdame tɩ y tog n yeela bũmb sẽn pukd bãng-kãseng tɩ y kɛlgdbã wʋm n yɛɛs bɩ? A Zezi sẽn wa n tʋm a karen-biisã tɩ b tɩ moonã, a yeel-b lame: “Bɩ y kẽng n moone n yeel tɩ [saasẽ, NW ] soolem kolgame.” (Mat. 10:7) Koɛɛga võor wʋmb ra ka toogo, la a togsg me ra yaa nana. Rũndã-rũndã me yaa woto.
2 Naoor wʋsgo b sẽn baood yaa goam a wãn bal sẽn na yɩl n sɩng sõasga. A Filip sẽn da wa n seg Etiopi enikã, a sʋka rao wã: “Yãmb wʋmda yãmb sẽn karemda võor sɩda?” (Tʋʋ. 8:30) Ad sɩd yaa sõasg sẽn be bark wʋsg la ‘goam b sẽn togs a wakat’ a woto wã sẽn wa ne wã!—Yel. 25:11.
3 Y tõe n maana woto y koe-moonegã pʋgẽ. Wãn-wãn to? Ne y sẽn na n gũusd n get yɛlã sõma la y yãkd goam sẽn zems ne yɛlã sẽn yaa to-to wã. Maan-y sʋkre, la y kelg leokrã.
4 Sʋgs-kãsems kẽere: Y tõe n tũnuga ne sʋkr a yembr sʋgs-kãensã sʋk n sɩng sõasga:
◼ “Yãmb tũnugda ne Soaalã pʋʋsg (bɩ, Tõnd Ba sẽn be Arzãnã) y balengã pʋgẽ bɩ?” (Mat. 6:9, 10) Togs-y pʋʋsgã babg a ye, tɩ rẽ poor bɩ y yeel woto: “Neb kẽer sʋkda woto: Wẽnnaam yʋʋrã a Zezi sẽn yeel tɩ segd n paama sõmsgã (bɩ, yɩ ne waoogrã) la bʋgo?’ Kẽer sʋkdame, ‘Rĩung ning a Zezi sẽn yeel tɩ b pʋʋs t’a wa wã yaa bõe?’ Yãmb paama sʋgs-kãensã leoor sẽn tat y yam bɩ?”
◼ “Yãmb zoe n sʋka y meng woto: ‘Vɩɩmã võor yaa bõe?’” Wilg-y tɩ rẽ tɩ loee ne Wẽnnaam bãngrã.—Koɛ. 12:13; Zã 17:3.
◼ “Yãmb tagsdame tɩ b na n wa tol n yiisa kũumã daar ning bɩ?” Tũnug-y ne Ezai 25:8 la Wilgri 21:4 n kõ leoor sẽn zems ne bas-yardo.
◼ “Gudgrã sẽn be dũniyã pʋgẽ wã tara tɩɩm sẽn yaa nana bɩ?” Wilg-y tɩ Wẽnnaam zãmsa tõnd tɩ d “nong d taabã.”—Mat. 22:39.
◼ “Ãndũni sabaab n na n wa sãam tõnd tẽngã daar ning bɩ?” Togs-y tɩ Biiblã kãabdame tɩ tẽngã na n paa wakat sẽn ka sɛt yĩnga.—Yɩɩl 104:5.
5 Wilg-y koe-noogã ne manesem sẽn be yamleoogo, sẽn yaa nana la sẽn yaa tɩrga. A Zeova na n barka modgr ning y sẽn maand sẽn na yɩl n taas neb a taabã baa yaa sɩdã ‘gomd a ye’ wã.