Goam sẽn yaa nana yaa sõma n yɩɩda
1 Bõe yĩng tɩ koe-moondb nins sẽn yaa kambã paamd tɩ neb nins b sẽn taasd Rĩungã koɛɛgã kelgd-b neere? Bũmb a yembr yaa b goamã sẽn yaa nana wã. Koe-moondb kẽer tõe n tagsdame tɩ b sã n dat n kõt kaset sõma, dall b yɩ no-minim dãmba. Baasg zãnga, yɛl b sẽn vɩɩmd n yã wilgdame tɩ koɛɛgã wilgr ne goam sẽn yaa nana la vẽeneg n são n yɩɩda.
2 A Zezi moona Rĩungã koɛɛg n tũnug ne goam sẽn yaa nana la sẽn ka be kẽe-ka yii-ka ye, la a zãms a karen-biisã tɩ b maan woto me. (Mat. 4:17; 10:5-7; Luk 10:1, 9) Sẽn na yɩl t’a kɛlgdbã tʋlg n kelg-a, la tɩ kẽ b sũyã, a Zezi tũnuga ne sɩngr goamã, sʋgsgo, la ne makr toɛ-toɛy sẽn yaa nana. (Zã 4:7-14) D segdame n dɩk togs-n-taar ne yẽ, n wilg koɛɛgã ne goam b sẽn tõe n wʋm b võor nana-nana.
3 Tõnd segd n moona ‘soolem koe-noogã.’ (Mat. 24:14) Y sã n dɩk Rĩungã tɩ yaa y gom-zu-kãsenga, na n sõng-y lame tɩ y wilg koɛɛgã ne goam sẽn yaa nana. Gom-y ne kɛlgdbã yɛl sẽn pak-b zugu. Naoor wʋsgo, zakã yɛl n pak pagbã n yɩɩd politikã yɛla. Sẽn pak zak soab nong n ya a nug-tʋʋmdã la a zaka bãan yelle. Ne kom-bɩɩsã yaa b beoog-daarã yell n pak-ba, tɩ sẽn kʋʋl-bã maand yɩɩr n yɩɩd ne b yĩns-laafɩ wã la ne b bãanã. Naoor wʋsgo sẽn pak nebã n yɩɩd yaa b tẽngã yɛl n yɩɩd tẽn-zãrsẽ yɛla. Y tõe n deng n goma ne-b yɛl sẽn pak neba fãa yelle. Rẽ poore, bɩ y togs-b bark nins ãdem-bi-sakdbã sẽn na n paam Wẽnnaam Rĩungã naam wakatã. Y sã n tũus goam sẽn yaa nana a wãn bal n lagem ne verse, rẽ n zemsd n yɩɩd sẽn na yɩl tɩ kɛlgdã tʋlg n kelge.
4 Y tõe n yeela woto n sɩng sõasg ne neda:
◼ Sãmbg sẽn ka be, y sakame tɩ bãas sẽn ka tar tɩɩm n namsd ãdem-biisã. La yãmb bãngame tɩ Wẽnnaam pʋlmame t’a na n yiisa bãasã fãa ne kũuma ka la bilf bɩ?” Bas-y t’a soabã leoke, tɩ rẽ poor bɩ y karem Wilgri 21:3, 4.
5 Y sã n wilg koɛɛgã ne goam sẽn yaa nana la vẽenega, neb wʋsg sẽn yɩɩd sẽn be yãmb moonegã zĩigẽ tõe n wʋma yãmb goamã võor tɩ kẽ b sũyã. Rẽ na n sõng-b lame tɩ b bãng a Zeova la vɩɩm sẽn ka sɛtã saagre.—Zã 17:3.