Mi-beoog wilgr a Zeova nonglmã yĩng wata ne barka—Pipi babgo
1 Tʋm-tʋmd a Zã gʋlsa woto: “Tõnd nonga bãmba, [a Zeova] b sẽn deng n nong tõnda yĩnga.” (1 Zã 4:19) Tõnd sã n tags bũmb nins fãa a Zeova sẽn kõ-dã yelle, rẽ tusda tõnd me tɩ d rat n wilg mi-beoog sẽn yaa kãseng ne-a. A Zezi kõo mak-sõng zĩ-kãng wɛɛngẽ, n sak n kõ kaset Wẽnnaam yʋʋrã la a Rĩungã wɛɛngẽ. (Zã 14:31) Yɩtẽ-la sõma tɩ d ges soay kẽer d sẽn tõe n tũnug ne n wilg d mi-beoog ne a Zeova, a nonglmã, la rẽ sẽn wat ne bark ninsã yĩnga.
2 Moonegã zak-zakã: A Zezi zãmsa a karen-biisã b sẽn segd n moon Rĩungã to-to. Noy nins a sẽn kõ wã wilga vẽeneg tɩ b kẽnga zak-zaka, n moon koe-noogã. (Luk 9:1-6; 10:1-7) Rẽnda d sɩd tall nonglem ne Wẽnnaam la ne d yagsã n tõog n ket n moond zak-zaka, d sã n wa segd yam-kaalg la kɩɩsgo. Baasg zãngã d sã n ket n maand woto, nafda tõnd mensã, bala d tẽebã kengd n paasdame, tɩ d kɩs-sɩdã la d saagrã paamd pãng n paasdẽ.
3 Tõnd sẽn tʋmd malɛgsã sor-wilgr pʋgẽ wã yĩngã, d yãa neb wʋsg sɩdã kom la ko-yũud sẽn tara. (Wil. 14:6) Neb n yeel tɩ b ra pʋʋsdame n kot sõngr wakat ning Kaset soab sẽn wa n wẽ sallem b zakã noorã. Kaset rãmb a yiib ne bi-bilf n da moond zak-zak Karaiib ko-sʋk tẽngẽ wã. Kãsembã rɩka sard tɩ b na n yalsa moonegã woto la b kuli. La biigã kẽnga taoor a toor n tɩ wẽ sallem zak ning sẽn pʋgdã noore, tɩ pʋg-bɩɩg pak n yi. Kãsembã sẽn yã rẽ wã b kẽngame n tɩ gom ne pagã. A bool-b-la pʋgẽ, n wilg-b t’a ra nan pʋʋsa paalem n kos Wẽnnaam t’a tʋm Kaset rãmbã tɩ b wa zãms-a Biiblã!
4 Kasetã kũun soayã zutu: Sẽn mik tɩ zĩis kẽere yaa toog tɩ b paam neba b yiyã, kasetã kũun soayã zut yaa manesem sẽn yaa sõma sẽn na yɩl n kõ neba kasetã. Sẽn paase, neb kẽer n vɩ zak neb sẽn lagem taab n beẽ bɩ b sẽn gũud wʋsgo, tɩ d ka tõe n moon zak-zak zĩ-kãng ye. La tõnd sẽn tar mi-beoog ne a Zeova a nonglmã yĩngã tusda tõnd tɩ d tũnugd ne sor buud fãa d sẽn tõe n paam n taas nebã Rĩungã koɛɛga, sor zug kaset kũunã sẽn paase.—Yel. 1:20, 21.
5 Lebg-n-tɩ-ges rãmbã maanego: Sẽn mik tɩ tõnd baooda neb nins “sẽn mi tɩ b tara tẽeb ratmã,” d ratame n maan d sẽn tõe fãa n pids raab kãnga. (Mat. 5:3, NW) Rẽ baoodame tɩ d lebg n tɩ zãgs sɩda biis d sẽn bʋdã. (1 Kor. 3:6-8) Ostrali saam-bi-poak a yembr basa seb-vãoog ne pag a yembr sẽn da ka wõnd a nonga sɩdã wʋsg ye. Ne rẽ fãa, saam-bi-poakã baoome n na n yã-a a yirã yɛsa. Saam-bi-poakã sẽn wa n baas n yã-a wã, a mikame t’a sẽn da wa a nengẽ pipi wã poorã, pagã raa Biibl ligd sẽn yaa toog wʋsgo. Saam-bi-poaka sɩnga Biibl zãmsg ne-a!
6 Biibl zãmsgã maaneg ne nebã: Tõnd koe-moonegã nen-kãngã sɩd tõe n talla yamleoog la a zĩnd bark wʋsg n yɩɩda. Ad sɩd yaa bark meng la d paamda, d sã n sõng nebã tɩ b bãng a Zeova, n yã tɩ b toeema b vɩɩmã sẽn na yɩl n ta a yam, la tɩ b reega lisg n wilg tɩ b rɩka b mens n kõ Wẽnnaam!—1 Tes. 2:20; 3 Zã 4.
7 D Rĩungã Tʋʋmd ning sẽn watã pʋgẽ, d na n yãa zĩis a taab wɛɛngẽ d sẽn paam barka, d sẽn wilg mi-beoog ne a Zeova a nonglmã yĩngã.