Rĩungã mooneg fãagda yõyã!

¹ Tʋʋm nins fãa b sẽn maand rũndã-rũndã wã sʋka, tʋʋm kãng n tar yõod n yɩɩda. Wẽnnaam a Zeova, a Zezi Kirist la malɛgs tus ka tɛkã geta tʋʋm kãngã yelle. Yaa tʋʋm bʋgo, la bõe yĩng t’a tar yõod wʋsg woto? Yaa Rĩungã mooneg tʋʋmd sẽn fãagd yõyã!—Rom 1:16; 10:13, 14.

² Neb kẽer tagsdame tɩ tõnd ra na n sõngẽ-la nebã n yɩɩda, d sã n da tʋmd tʋʋm sẽn manegd dũniyã. Neb wʋsg rɩka b sẽka fãa la bal n maand modgr sẽn na yɩl n wa ne bãane, n sãoog bãase, bɩ sẽn na yɩl n zã tẽngã arzɛgs sõma tɩ fɩɩg n paase. La bõe n na n sõng nebã n yɩɩda?

³ Tʋʋmd sẽn tar yõod wʋsgo: Yaa Rĩungã koɛɛg bal n wilgd vɩɩmã võor sẽn ya a soaba, bũmb ning sẽn wa ne ninsaal namsgã. Sẽn paase, koe-kãng bal n kõt saagr sẽn be bas-m-yam beoog-daar yĩnga. Koe-noogã sõngda nebã tɩ b lebg a Zeova zo-rãmba, tɩ woto tõe n kɩt tɩ b paam “Wẽnnaam laafɩ sẽn yɩɩd neba bãngr fãa” wã. (Fil. 4:7) Yaa Rĩungã koɛɛg n wilgd nebã sor tɩ b tõe n mao ne masã yɛlã, la a wilgd b sẽn tõe n maan to-to n põse, dũni wẽng kãngã sã n na n wa sãam beoog-daare. (1 Zã 2:17) Rẽ yĩnga, woto ka sek tɩ d modg wʋsg wa d sẽn tõe tɛk n moon Rĩungã koɛɛg sɩda?

⁴ D rɩk makr ne tẽng neb sẽn na n be gõeem zugu, tɩ tẽngã baraas rat n fudg ka la bilfu. Bũmb ning sẽn tar yõod n yɩɩd y sẽn tõe n maan n sõng nebã yaa bõe? Rẽ yĩnga yaa y sẽn na n leb baraasã sẽn dat n ãsgã poorẽ n kaad koomã n daagd yɩng bɩ? Bɩ yaa y sẽn na n tʋmd tʋʋm sẽn nagsd tẽngã? Ayo! Y tog n neka tẽngã neba, n keoog-b tɩ yel-beed n laand b zutu, la y sõng-b tɩ b zoe n põse! Neb nins sẽn gõe tẽebã wɛɛngẽ rũndã-rũndã wã me bee yel-kãseng a woto buud pʋgẽ. (Luk 21:34-36) Sẽn mik tɩ zamaan kãngã na n looga ka la bilfã, bɩ d modg n moon neb wʋsg wa d sẽn tõe tɛk ne yãgbo!—2 Tɩm. 4:2; 2 Pɩɛ. 3:11, 12.

⁵ Pẽdg-y ne moonegã: Bɩ d bao soay n taas koe-noogã pʋ-peelem dãmb wʋsg n paase. D tõe n maana rẽ neba zagsẽ, soayã zutu, ne telefõne, la ne manesem sẽn ka yãk wakate. Tʋʋmd ning a Zeova sẽn kõ-d tɩ d maanã yaa tʋʋmd ning sẽn tar-a yõod n yɩɩdã. D sã n maan-a ne yẽesem, d ‘na n fãaga d meng la neb nins sẽn kelgd tõndã.’—1 Tɩm. 4:16.