Tigims gĩnd tigis-kãseng paalga
1 D tog n della a Zeova n tõog n yals kãn-kãe tẽebã pʋgẽ dũni sẽn be gudgr pʋgẽ. Wãn-wãn la d tõe n wilg rẽ vẽeneg d daar fãa vɩɩmã pʋgẽ? D sã n dell a Zeova, wãn-wãn la rẽ toeemd tõnd mengã la d zakã neb vɩɩm? Wãn-wãn la rẽ sõngd tõnd tɩ d yals kãn-kãe a Sʋɩtãan dũniyã pãn-tusdi taoore? Yʋʋmd 2003 tʋʋmd yʋʋmdã tigims gĩnd tigis-kãsenga sõss na n leoka sʋgs-kãensã. Tigis-kãsengã gom-zu-raoog yaa “Dell-y a Zeova n maan neere.”—Yɩɩl 37:3.
2 Pa yel-pakr bɩ raab kãseng wakat bal la d segd n wilg tɩ d rella a Zeova ye. D segd n maana rẽ d daar fãa vɩɩmã nens fãa pʋsẽ. B wilga rẽ vẽeneg pipi sõasgã gom-zug sẽn yaa “Dell-y a Zeova wakat fãa” wã pʋgẽ. (Yɩɩl 62:9) Gom-n-dees-taabã sẽn tar babs a naasã gom-zug sẽn yaa “D wilg tɩ d rella a Zeova” wã na n wilga tõnd d sẽn tõe n maan to-to n yã la d tũ sagls sẽn tik Biiblã zugu. Yaa sagls sẽn tõe n sõng-d tɩ d maan tɩ kãadem tall sũ-noogo, tɩ d welg zu-loees sẽn pukd zakã pʋgẽ, la tɩ d tõog n paam d noor dɩɩbo.
3 A Sʋɩtãan dũniyã makdame n na n golem tõnd tagsa wã sã n yaa ne sẽn yaa sõma la sẽn yaa wẽngã zugu, la a yuus tõnd yamã tɩ d ra bãng bũmb nins sẽn tar yõod n yɩɩd d vɩɩmã pʋgẽ ye. (Ezai 5:20) Sõss nins gom-zut sẽn yaa “Gũus-y y meng ne vɩɩmã yel-faadã” la “Lak-y y meng ne wẽnga, la y maan sẽn yaa neerã” na n kenga tõnd daood tɩ d teel a Zeova noyã sẽn yaa sõma wʋsgã.—Amos 5:14.
4 Na n yɩɩ tɩlae t’a Zeova sõgen dãmbã teeg-a zãng-zãnga, a sã n na n wa sãam zamaan wẽng kãngã wakate. B wilga tags-kãngã vẽeneg zãma sõasgã gom-zug sẽn yaa “Fãagr ne dũniyã toog kolgame” wã pʋgẽ. Rẽ poore, b na n kosa tõnd tɩ d vaees d mens sõasg ning gom-zug sẽn yaa “B na n gesame tɩ yãmb zemsa ne Wẽnnaam Rĩungã bɩ?” wã pʋgẽ. Tigis-kãsengã na n baasa ne sagl-kãngã: “Teeg-y a Zeova kãabsã.”
5 Tigis-kãseng fãa wakat kãseng yaa lisgã sõasg sasa. Ned ning fãa sẽn dat n deeg lisg segd n togsa yel-gɛt taoor soabã t’a maan segls nins sẽn segdã .
6 Wakat kãngã sẽn yaa gudgr wakatã, a Zeova bal la tõnd tõe n dell n yals kãn-kãe. (Yɩɩl 118:8, 9) Bɩ tõnd fãa zĩnd tigims gĩnd tigis-kãsengẽ wã rasem a yiiba fãa n tõog n dell a Zeova n paase.