A Zeova sõngda neb nins sẽn teeg yẽ wã
1 Neb wʋsg tagsdame tɩ yaa ligdi, naam, la minim n kɩtd tɩ ned yidg a vɩɩmã pʋgẽ. (Yɩɩl 12:5; 33:16, 17; 49:7) La Biiblã kõta neb nins sẽn zoet a Zeova la b teegd-a wã bas-m-yam t’a ‘yaa b sõangd la b gãongo.’ (Yɩɩl 115:11) Bɩ d ges zĩis a yiib pʋsẽ d sẽn segd n wilg tɩ d teega a Zeova.
2 D kiris-ned tʋʋmdã pʋgẽ: D tog n della Wẽnnaam, d sã n wa kõt sõasg tigingã pʋgẽ bɩ d sã n zãmsd neb koe-moonegã wakate. D rɩk makr ne a Zezi. Ba a sẽn da yaa Wẽnnaam Biriblã, a ka teeg a meng yam bɩ a tõog ye, a teega a saasẽ Ba wã zãng-zãnga. (Zã 12:49; 14:10) Rẽnd tõnd n segd n teeg Wẽnnaam n yɩɩda! (Yel. 3:5-7) Yaa ne a Zeova sõngr bal la tõnd sẽn modgd n maand bũmb ninsã tõe n waoog-a la naf neb a taabã.—Yɩɩl 127:1, 2.
3 D wilgdame tɩ d teega a Zeova, d sã n pʋʋsd n kot a sor-wilgr la a vʋʋsem sõngã sõngre. (Yɩɩl 105:4; Luk 11:13) Sẽn paase, d rellda a Zeova me, d sã n tikd d zãmsgã Biiblã sẽn yaa a Gomdã zugu. Wẽnnaam Gomdã tara pãng n tõe n kɩt tɩ ned tʋll n tũ a noyã, la a toeem ned vɩɩm. (Heb. 4:12) D sã n maand Wẽnnaam tʋʋmdã ‘ne pãng ninga Wẽnnaam sẽn kõtã’, waoogda a Zeova.—1 Pɩɛ. 4:11.
4 Zu-loeesã welgre: D sã n wa segd zu-loees me, d segdame n bao a Zeova sõngre. (Yɩɩl 46:2) Wala makre, tõnd tʋʋmd taoor soab tõeeme n ka rat n kõ-d sor tɩ d kẽng tigis-kãsenga, bɩ d tõeeme n tar zu-loɛɛg d zakã pʋgẽ. D wilgdame tɩ d teega a Zeova d sã n pelg d pʋg ne-a, n pʋʋs-a n kos-a sõngre, la d tũ sor-wilgr ning a sẽn kõt ne a Gomdã la ne a siglgã maasmã. (Yɩɩl 62:9; 119:143, 173) A Zeova sõgen dãmbã sã n maan woto, b na n yãame t’a sõngd-b-la b vɩɩmã pʋgẽ.—Yɩɩl 37:5; 118:13, 16.
5 A Zeova mengã kõo tõnd bas-m-yam woto: “Ned sẽn tẽed Zusoabã n dell bãmb tara sũ-noogo.” (Zer. 17:7) Bɩ d teeg a Zeova bũmb nins fãa d sẽn maandã pʋgẽ!—Yɩɩl 146:5.