Yãmb sʋgsgã leoore
◼ D sã n tar telefõn selilɛɛre, bõe la d segd n ning d yamẽ?
D sã n tar selilɛɛre, d sẽn beẽ fãa, d tõe n goma ne neb a taaba. Yaa sɩd t’a tara yõodo, la d segd n gũusa neer n da wa tũnug ne-a wakat sẽn ka segde, tɩ wa tiis tõnd koe-moonegã la kiris-neb tigissã ye. Wãn-wãn la tõe n wa yɩ woto?
Tõnd sã n be koe-moonegã zug tɩ tõnd telefõn selilɛɛr yãbe, tags-y rẽ sẽn tõe n wa wa ne bũmb ninga. D sõsd-n-taagã na n tagsa wãn-wãna? Nedã na n tagsa bõe tõnd wɛɛngẽ, tõnd sã n bas goama la d na n leok boollã? Yaa vẽeneg tɩ d ka rat n maan bũmb sẽn na n gɩdg neb a taabã tɩ b ra kelg Rĩungã koɛɛg ye. (2 Kor. 6:3) Woto yĩnga, tõnd sã n tar selilɛɛre, d segd n regl-a lame sẽn na yɩl t’a ra tiis tõnd bɩ neb a taab koe-moonegã wakat ye.
La d segd n maana wãna, sã n yaa ned a to n kõt kasetã tɩ tõnd yasẽ n gũudẽ? Tõnd sã n yãka wakat moonegã yĩnga, sasa kãnga d yamã segd n tika tʋʋmdã zugu. Maan-y sugri, wilg-y waoogr ne baleng tʋʋmdã, n yãk wakat a to y mengã yɛl bɩ y afɛɛr dãmb nins sẽn ka tɩlae wã yĩnga. (Rom 12:7) Yaa vẽeneg tɩ woto ka rat n yeel tɩ y ka tõe n tũnug ne telefõn n kõ kaset bɩ n dɩk rãndevu sẽn na yɩl n tɩ kõ kasetã ye.
Sẽn yɩɩd fãa d sã n wa kẽnd ne bõn-zoambdga, d tog n gũusa neer ne selilɛɛr dãmbã tũnugri, bala b maana vaeesg n yã tɩ woto maaneg tõe n kɩtame tɩ ned maan aksɩdã nana-nana. Laloa sã n beẽ n gɩdgdẽ tɩ ned ra gom ne telefõn selilɛɛr a sã n kẽnd ne bõn-zoambdga, bɩ d tũ-a n da reem ye.
Tõnd dabda kiris-neb tigissã la tigis-kãsemsã sẽn na yɩl n balem a Zeova, la sẽn na yɩl n paam zãmsg a nengẽ. Tõnd sã n wilgd mi-beoog tigis-kãensã sẽn yaa baleng yɛlã yĩnga, d segd n regla d selilɛɛr dãmbã sẽn na yɩl tɩ b ra tiis tõnd bɩ neb a taabã ye. Yel-yãgdem sã n wa tɩ yaa tɩlae tɩ tõnd ges a yell zĩig pʋgẽ, bɩ d yi tigisgã zĩigẽ n maan dẽ. Sã n ka rẽ, d segd n maana segls n ges d mengã la d nug-tʋʋma yɛl wakat a taab sẽn ka wakat ning b sẽn yãk balengã yĩng ye.—1 Kor. 10:24.
Bɩ tõnd sẽn tũnugd ne d selilɛɛr dãmbã ne nasaar teed a taabã to-to wã wilg wakat fãa tɩ d waoogda neb a taabã, la tɩ d nanda tẽebã yɛl sõma.