Pids-y y tẽeb ratmã
1 “Rĩungã koe-moondb sẽn tar yẽesem” tigims gĩn sull tigis-kãsengã sẽn watã kõta tõnd so-kãseng tɩ d tõe n pids d tẽeb ratmã. Wala rɩ-sõng d sẽn dɩta, sãmbg sẽn ka be tigis-kãsengã sõss na n dɩlga tõnd ne “tẽeb koɛɛga.” (1 Tɩm. 4:6) B na n kɩtame tɩ d tõog n pẽneg a Zeova n paase. Sẽn paase, d tõe n gũu sagls sẽn na n sõng-d tɩ d tõog n mao ne zu-lees d vɩɩmã pʋgẽ. A Zeova kõo tõnd bas-m-yam woto: “Mam na n zãmsa foom n wilg foom sor ninga fo sẽn tog n tũ. Mam nif geta foom, la mam yaa fo sagenda.” (Yɩɩl 32:8) Ad yaa zu-noog n kõ-do, d sẽn paamd sor-wilgr ne nonglem woto d vɩɩmã pʋgẽ wã! Ges-y yɛl kẽer y sẽn tõe n maan n dɩ tigis-kãsengã nafa wʋsg wa y sẽn tõe tɛka.
2 Tõnd segd n segla d sũyã: Tõnd ned kam fãa segd n kogla a makr sũurã. (Yel. 4:23) Rẽ baoodame tɩ d kibl d menga, la d pelg d pʋg ne d menga. Tigis-kãsengã wakat yaa sasa d sẽn segd n bʋgs tõnd zems-n-taarã ne a Zeova wã zugu, yaa wakat d sẽn segd n ‘ges tõog sẽn zems zãng sẽn yaa lohorem tõogã’ pʋgẽ. Sẽn na yɩl n segl d sũyã t’a ‘reeg koɛɛgã t’a sel tõnd pʋsẽ,’ dẽnda d bõos a Zeova t’a fees tõndo, n bãng ‘so-wẽng’ sã n bee tõnd pʋgẽ n baood remsgo, la a yãag-d “sor sẽn ka sɛt pʋgẽ.’—Zak 1:21, 25; Yɩɩl 139:23, 24.
3 Kelg-y la y bʋgse: A Zezi pẽga a Maari a sẽn kelg a goama neerã, n yeele: “A Maari yãka bõn-neer kãnga sẽn na n pa ne-a wã.” (Luk 10:39, 42) Tõnd me sã n tar yam a woto, d ka na n bas tɩ yel-yaals tiis-d ye. D na n modgame n zĩnd n kelg tigis-kãsengã sõss fãa. D na n gũusdame n da gomda, bɩ n yik n yuusdẽ tɩ ka tɩlae ye. D na n gũusa neer n da tiis neb a taabã ne d telefõn selilɛɛr dãmbã, la ne d fot la d filim dɩkr teedã ye.
4 D sã n wa kelgd sõssã, bɩ d gʋlsd tagsa wã koees-koees sẽn na yɩl tɩ sõng-d tɩ d tũ gom-zugã wɛgsgo. D segd n maana loees bũmb ning d sẽn wʋmdã ne bũmb ning d sẽn zoe miẽ wã sʋka. Rẽ na n sõnga tõnd tɩ d wʋm tagsgã võor la d gãd-b d yamẽ wã sõma. D sã n wa lebgd n get tagsa nins d sẽn gʋlsã, segd n yaa sẽn na yɩl n bãng d sẽn na n tũ-b to-to. Tõnd ned kam fãa tõe n sʋka a meng woto: ‘Pãn-tusdg bʋg la rẽ tar mam zems-n-taarã ne a Zeova wã zugu? Toeen-bʋg la m segd n maan m vɩɩmã pʋgẽ? Wãn to la m tõe n tũ sagl-kãngã mam manesmã ne m taabã pʋgẽ? Wãn to la m tõe n tũ-a koe-moonegã wakate?’ Sõss-y ne neb a taab tagsa nins y sẽn nong n yɩɩdã zutu. D sã n maan bõn-kãensã, na n sõng-d lame tɩ d sak a Zeova goamã ‘d sũyã pʋsẽ.’—Yel. 4:20, 21.
5 D tũ bũmb nins d sẽn zãmsã: Ned a yembr sẽn zĩnd tigis-kãsengẽ wã yeela woto tigisgã poore: “Sõssã tagsa ra tika ned kam fãa raab zugu, n tusd ned ne a zak rãmb tɩ b vaees b sũyã n gese, sẽn na yɩl t’a soabã tõog n tik Gʋlsg Sõamyã zug n kõ a zaka rãmb sõngr ning b sẽn datã. Sõssã sõnga maam tɩ m bãng n paas tɩ yaa m tʋʋmd tɩ m sõng tigingã neb n paase.” Tõeeme tɩ tõnd wʋsg tagsa woto me. D tẽebã la d raoodã kengr tigis-kãsengã zĩigẽ bal ka sek ye. A Zezi yeelame: ‘Yãmb sẽn bãng bõn-kãensã, yãmb sã n maan woto, bark bee yãmb zutu.’ (Zã 13:17) D tog n modga ne d sũur fãa n tũ sagls nins sẽn pak tõnd mengã. (Fil. 4:9) Yaa d sã n maan woto bal la d na n tõog n pids d tẽeb ratmã.
[Zĩ-gũbri, seb-neng a 5]
Bʋgs-y bũmb ning y sẽn wʋmã zugu:
■ Wãn to la m sẽn wʋmã tar pãn-tusdg mam zems-n-taar ne a Zeova wã zugu?
■ Pãn-tusdg bʋg la a tar mam manesmã ne neb a taabã zugu?
■ Wãn to la m tõe n tũ rẽ m vɩɩmã pʋgẽ la koe-moonegã wakate?